২. তীণুপ্পলমালিযত্থেরঅপদানং

১১. ‘‘চন্দভাগানদীতীরে, অহোসিং ৰানরো তদা;

অদ্দসং ৰিরজং বুদ্ধং, নিসিন্নং পব্বতন্তরে.

১২. ‘‘ওভাসেন্তং দিসা সব্বা, সালরাজংৰ ফুল্লিতং;

লক্খণব্যঞ্জনূপেতং, দিস্ৰা অত্তমনো অহুং.

১৩. ‘‘উদগ্গচিত্তো সুমনো, পীতিযা হট্ঠমানসো;

তীণি উপ্পলপুপ্ফানি, মত্থকে অভিরোপযিং.

১৪. ‘‘পুপ্ফানি অভিরোপেত্ৰা, ৰিপস্সিস্স মহেসিনো;

সগারৰো ভৰিত্ৰান [গমিত্ৰান (সী.), নমিত্ৰান (ক.)], পক্কামিং উত্তরামুখো.

১৫. ‘‘গচ্ছন্তো পটিকুটিকো, ৰিপ্পসন্নেন চেতসা;

সেলন্তরে পতিত্ৰান [পপতিত্ৰা (স্যা. ক.)], পাপুণিং জীৰিতক্খযং.

১৬. ‘‘তেন কম্মেন সুকতেন, চেতনাপণিধীহি চ;

জহিত্ৰা মানুসং দেহং [পুরিমং জাতিং (?) উপরি ৩৮ ৰগ্গে ততিযাপদানে এৰমেৰ দিস্সতি], তাৰতিংসমগচ্ছহং.

১৭. ‘‘সতানং তীণিক্খত্তুঞ্চ, দেৰরজ্জং অকারযিং;

সতানং পঞ্চক্খত্তুঞ্চ, চক্কৰত্তী অহোসহং.

১৮. ‘‘একনৰুতিতো কপ্পে, যং পুপ্ফমভিপূজযিং;

দুগ্গতিং নাভিজানামি, বুদ্ধপূজাযিদং ফলং.

১৯. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা তীণুপ্পলমালিযো [তিউপ্পলমালিযো (সী.)] থেরো ইমা গাথাযো অভাসিত্থাতি.

তীণুপ্পলমালিযত্থেরস্সাপদানং দুতিযং.