৯. ধম্মসৰনিযত্থেরঅপদানং

১১১. ‘‘পদুমুত্তরো নাম জিনো, সব্বধম্মান পারগূ;

চতুসচ্চং পকাসেন্তো, সন্তারেসি বহুং জনং.

১১২. ‘‘অহং তেন সমযেন, জটিলো উগ্গতাপনো;

ধুনন্তো ৰাকচীরানি, গচ্ছামি অম্বরে তদা.

১১৩. ‘‘বুদ্ধসেট্ঠস্স উপরি, গন্তুং ন ৰিসহামহং;

পক্খীৰ সেলমাসজ্জ [সেলমাপজ্জ (স্যা.)], গমনং ন লভামহং.

১১৪. ‘‘ন মে ইদং ভূতপুব্বং, ইরিযস্স ৰিকোপনং;

দকে যথা উম্মুজ্জিত্ৰা, এৰং গচ্ছামি অম্বরে.

১১৫. ‘‘উল়ারভূতো মনুজো, হেট্ঠাসীনো [হেট্ঠাপি নো (ক.)] ভৰিস্সতি;

হন্দ মেনং গৰেসিস্সং, অপি অত্থং লভেয্যহং.

১১৬. ‘‘ওরোহন্তো অন্তলিক্খা, সদ্দমস্সোসি সত্থুনো;

অনিচ্চতং কথেন্তস্স, তমহং উগ্গহিং তদা.

১১৭. ‘‘অনিচ্চসঞ্ঞমুগ্গয্হ, অগমাসিং মমস্সমং;

যাৰতাযুং ৰসিত্ৰান, তত্থ কালঙ্কতো অহং.

১১৮. ‘‘চরিমে ৰত্তমানম্হি, তং ধম্মসৰনং [ধম্মসৰণং (সী.)] সরিং;

তেন কম্মেন সুকতেন, তাৰতিংসমগচ্ছহং.

১১৯. ‘‘তিংসকপ্পসহস্সানি, দেৰলোকে রমিং অহং;

একপঞ্ঞাসক্খত্তুঞ্চ, দেৰরজ্জমকারযিং.

১২০. ‘‘একসত্ততিক্খত্তুঞ্চ, চক্কৰত্তী অহোসহং;

পদেসরজ্জং ৰিপুলং, গণনাতো অসঙ্খিযং.

১২১. ‘‘পিতুগেহে নিসীদিত্ৰা, সমণো ভাৰিতিন্দ্রিযো;

গাথায পরিদীপেন্তো, অনিচ্চতমুদাহরি [অনিচ্চৰত্থুদাহরি (স্যা. ক.)].

১২২. ‘‘অনুস্সরামি তং সঞ্ঞং, সংসরন্তো ভৰাভৰে;

ন কোটিং পটিৰিজ্ঝামি [ন কোচি পটিৰজ্জামি (ক.)], নিব্বানং অচ্চুতং পদং [অযং গাথা উপরি ৪৩ ৰগ্গে সত্তমাপদানে পুরিমগাথায পুরেতরং দিস্সতি].

১২৩. ‘‘অনিচ্চা ৰত সঙ্খারা, উপ্পাদৰযধম্মিনো;

উপ্পজ্জিত্ৰা নিরুজ্ঝন্তি, তেসং ৰূপসমো সুখো.

১২৪. ‘‘সহ গাথং সুণিত্ৰান, পুব্বকম্মং অনুস্সরিং;

একাসনে নিসীদিত্ৰা, অরহত্তমপাপুণিং.

১২৫. ‘‘জাতিযা সত্তৰস্সোহং, অরহত্তমপাপুণিং;

উপসম্পাদযি বুদ্ধো, গুণমঞ্ঞায চক্খুমা.

১২৬. ‘‘দারকোৰ অহং সন্তো, করণীযং সমাপযিং;

কিং মে করণীযং অজ্জ, সক্যপুত্তস্স সাসনে.

১২৭. ‘‘সতসহস্সিতো কপ্পে, যং কম্মমকরিং তদা;

দুগ্গতিং নাভিজানামি, সদ্ধম্মসৰনে ফলং.

১২৮. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা ধম্মসৰনিযো থেরো ইমা গাথাযো অভাসিত্থাতি.

ধম্মসৰনিযত্থেরস্সাপদানং নৰমং.