১০. উক্খিত্তপদুমিযত্থেরঅপদানং

১২৯. ‘‘নগরে হংসৰতিযা, অহোসিং মালিকো তদা;

ওগাহেত্ৰা পদুমসরং, সতপত্তং ওচিনামহং.

১৩০. ‘‘পদুমুত্তরো নাম জিনো, সব্বধম্মান পারগূ;

সহ সতসহস্সেহি [সতসহস্সসিস্সেহি (ক.)], সন্তচিত্তেহি তাদিভি.

১৩১. ‘‘খীণাসৰেহি সুদ্ধেহি, ছল়ভিঞ্ঞেহি ঝাযিভি [সো তদা (সী.), সো সহ (ক.)];

মম ৰুদ্ধিং সমন্ৰেসং, আগচ্ছি মম সন্তিকং [মম সন্তিকে (সী.), পুরিসুত্তমো (স্যা. ক.)].

১৩২. ‘‘দিস্ৰানহং দেৰদেৰং, সযম্ভুং লোকনাযকং;

ৰণ্টে ছেত্ৰা সতপত্তং, উক্খিপিমম্বরে তদা.

১৩৩. ‘‘যদি বুদ্ধো তুৰং ৰীর, লোকজেট্ঠো নরাসভো;

সযং গন্ত্ৰা সতপত্তা, মত্থকে ধারযন্তু তে.

১৩৪. ‘‘অধিট্ঠহি মহাৰীরো, লোকজেট্ঠো নরাসভো;

বুদ্ধস্স আনুভাৰেন, মত্থকে ধারযিংসু তে.

১৩৫. ‘‘তেন কম্মেন সুকতেন, চেতনাপণিধীহি চ;

জহিত্ৰা মানুসং দেহং, তাৰতিংসমগচ্ছহং.

১৩৬. ‘‘তত্থ মে সুকতং ব্যম্হং, সতপত্তন্তি ৰুচ্চতি;

সট্ঠিযোজনমুব্বিদ্ধং, তিংসযোজনৰিত্থতং.

১৩৭. ‘‘সহস্সক্খত্তুং দেৰিন্দো, দেৰরজ্জমকারযিং;

পঞ্চসত্ততিক্খত্তুঞ্চ, চক্কৰত্তী অহোসহং.

১৩৮. ‘‘পদেসরজ্জং ৰিপুলং, গণনাতো অসঙ্খিযং;

অনুভোমি সকং কম্মং, পুব্বে সুকতমত্তনো.

১৩৯. ‘‘তেনেৰেকপদুমেন, অনুভোত্ৰান সম্পদা;

গোতমস্স ভগৰতো, ধম্মং সচ্ছিকরিং অহং.

১৪০. ‘‘কিলেসা ঝাপিতা ময্হং, ভৰা সব্বে সমূহতা;

নাগোৰ বন্ধনং ছেত্ৰা, ৰিহরামি অনাসৰো.

১৪১. ‘‘সতসহস্সিতো কপ্পে, যং পুপ্ফমভিপূজযিং;

দুগ্গতিং নাভিজানামি, একপদুমস্সিদং ফলং.

১৪২. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা উক্খিত্তপদুমিযো থেরো ইমা গাথাযো অভাসিত্থাতি.

উক্খিত্তপদুমিযত্থেরস্সাপদানং দসমং.

গন্ধোদকৰগ্গো চতুতিংসতিমো.