৬. পভঙ্করত্থেরঅপদানং

৫৩. ‘‘পদুমুত্তরভগৰতো, লোকজেট্ঠস্স তাদিনো;

ৰিপিনে চেতিযং আসি, ৰাল়মিগসমাকুলে.

৫৪. ‘‘ন কোচি ৰিসহি গন্তুং, চেতিযং অভিৰন্দিতুং;

তিণকট্ঠলতোনদ্ধং, পলুগ্গং আসি চেতিযং.

৫৫. ‘‘ৰনকম্মিকো তদা আসিং, পিতুমাতুমতেনহং [পিতুপেতামহেনহং (সী.), পিতাপেতামহেনহং (স্যা.)];

অদ্দসং ৰিপিনে থূপং, লুগ্গং তিণলতাকুলং.

৫৬. ‘‘দিস্ৰানাহং বুদ্ধথূপং, গরুচিত্তং উপট্ঠহিং;

বুদ্ধসেট্ঠস্স থূপোযং, পলুগ্গো অচ্ছতী ৰনে.

৫৭. ‘‘নচ্ছন্নং নপ্পতিরূপং, জানন্তস্স গুণাগুণং;

বুদ্ধথূপং অসোধেত্ৰা, অঞ্ঞং কম্মং পযোজযে.

৫৮. ‘‘তিণকট্ঠঞ্চ ৰল্লিঞ্চ, সোধযিত্ৰান চেতিযে;

ৰন্দিত্ৰা অট্ঠ ৰারানি [অট্ঠ ঠানানি (ক.)], পটিকুটিকো অগচ্ছহং.

৫৯. ‘‘তেন কম্মেন সুকতেন, চেতনাপণিধীহি চ;

জহিত্ৰা মানুসং দেহং, তাৰতিংসমগচ্ছহং.

৬০. ‘‘তত্থ মে সুকতং ব্যম্হং, সোৰণ্ণং সপভস্সরং;

সট্ঠিযোজনমুব্বিদ্ধং, তিংসযোজনৰিত্থতং.

৬১. ‘‘তিসতানি চ ৰারানি, দেৰরজ্জমকারযিং;

পঞ্চৰীসতিক্খত্তুঞ্চ, চক্কৰত্তী অহোসহং.

৬২. ‘‘ভৰাভৰে সংসরন্তো, মহাভোগং লভামহং;

ভোগে মে ঊনতা নত্থি, সোধনায ইদং ফলং.

৬৩. ‘‘সিৰিকা হত্থিখন্ধেন, ৰিপিনে গচ্ছতো মম;

যং যং দিসাহং গচ্ছামি, সরণং সম্পতে [সিজ্ঝতে (ক.)] ৰনং.

৬৪. ‘‘খাণুং ৰা কণ্টকং ৰাপি, নাহং পস্সামি চক্খুনা;

পুঞ্ঞকম্মেন সংযুত্তো, সযমেৰাপনীযরে.

৬৫. ‘‘কুট্ঠং গণ্ডো কিলাসো চ, অপমারো ৰিতচ্ছিকা;

দদ্দু কচ্ছু [কণ্ডু (স্যা.)] চ মে নত্থি, সোধনায ইদং ফলং.

৬৬. ‘‘অঞ্ঞম্পি মে অচ্ছরিযং, বুদ্ধথূপস্স সোধনে [বুদ্ধথূপম্হি সোধিতে (স্যা.)];

নাভিজানামি মে কাযে, জাতং পিল়কবিন্দুকং.

৬৭. ‘‘অঞ্ঞম্পি মে অচ্ছরিযং, বুদ্ধথূপম্হি সোধিতে [সব্বত্থপি এৰমেৰ দিস্সতি, তথা উপরিপি];

দুৰে ভৰে সংসরামি, দেৰত্তে অথ মানুসে.

৬৮. ‘‘অঞ্ঞম্পি মে অচ্ছরিযং, বুদ্ধথূপম্হি সোধিতে;

সুৰণ্ণৰণ্ণো সব্বত্থ, সপ্পভাসো ভৰামহং.

৬৯. ‘‘অঞ্ঞম্পি মে অচ্ছরিযং, বুদ্ধথূপম্হি সোধিতে;

অমনাপং ৰিৰজ্জতি, মনাপং উপতিট্ঠতি.

৭০. ‘‘অঞ্ঞম্পি মে অচ্ছরিযং, বুদ্ধথূপম্হি সোধিতে;

ৰিসুদ্ধং হোতি মে চিত্তং, একগ্গং সুসমাহিতং.

৭১. ‘‘অঞ্ঞম্পি মে অচ্ছরিযং, বুদ্ধথূপম্হি সোধিতে;

একাসনে নিসীদিত্ৰা, অরহত্তমপাপুণিং.

৭২. ‘‘সতসহস্সিতো কপ্পে, যং কম্মমকরিং তদা;

দুগ্গতিং নাভিজানামি, সোধনায ইদং ফলং.

৭৩. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা পভঙ্করো থেরো ইমা গাথাযো অভাসিত্থাতি.

পভঙ্করত্থেরস্সাপদানং ছট্ঠং.