৭. তিণকুটিদাযকত্থেরঅপদানং

৭৪. ‘‘নগরে বন্ধুমতিযা, অহোসিং পরকম্মিকো;

পরকম্মাযনে যুত্তো, পরভত্তং অপস্সিতো.

৭৫. ‘‘রহোগতো নিসীদিত্ৰা, এৰং চিন্তেসহং তদা;

বুদ্ধো লোকে সমুপ্পন্নো, অধিকারো চ নত্থি মে.

৭৬. ‘‘কালো মে গতিং [কালো গতিং মে (সী. স্যা.)] সোধেতুং, খণো মে পটিপাদিতো;

দুক্খো নিরযসম্ফস্সো, অপুঞ্ঞানঞ্হি পাণিনং.

৭৭. ‘‘এৰাহং চিন্তযিত্ৰান, কম্মসামিং উপাগমিং;

একাহং কম্মং যাচিত্ৰা, ৰিপিনং পাৰিসিং অহং.

৭৮. ‘‘তিণকট্ঠঞ্চ ৰল্লিঞ্চ, আহরিত্ৰানহং তদা;

তিদণ্ডকে ঠপেত্ৰান, অকং তিণকুটিং অহং.

৭৯. ‘‘সঙ্ঘস্সত্থায কুটিকং, নিয্যাদেত্ৰান [নিয্যাতেত্ৰান (সী.)] তং অহং;

তদহেযেৰ আগন্ত্ৰা, কম্মসামিং উপাগমিং.

৮০. ‘‘তেন কম্মেন সুকতেন, তাৰতিংসমগচ্ছহং;

তত্থ মে সুকতং ব্যম্হং, কুটিকায সুনিম্মিতং [তিণকুটিকায নিম্মিতং (সী.)].

৮১. ‘‘সহস্সকণ্ডং সতভেণ্ডু, ধজালু হরিতামযং;

সতসহস্সনিয্যূহা, ব্যম্হে পাতুভৰিংসু মে.

৮২. ‘‘যং যং যোনুপপজ্জামি, দেৰত্তং অথ মানুসং;

মম সঙ্কপ্পমঞ্ঞায, পাসাদো উপতিট্ঠতি.

৮৩. ‘‘ভযং ৰা ছম্ভিতত্তং ৰা, লোমহংসো ন ৰিজ্জতি;

তাসং মম ন জানামি, তিণকুটিকাযিদং [তিণকুটিযিদং (ক.)] ফলং.

৮৪. ‘‘সীহব্যগ্ঘা চ দীপী চ, অচ্ছকোকতরচ্ছকা [তরচ্ছযো (স্যা. ক.)];

সব্বে মং পরিৰজ্জেন্তি, তিণকুটিকাযিদং ফলং.

৮৫. ‘‘সরীসপা [সিরিংসপা (সী. স্যা.), সরিংসপা (ক.)] চ ভূতা চ, অহী কুম্ভণ্ডরক্খসা;

তেপি মং পরিৰজ্জেন্তি, তিণকুটিকাযিদং ফলং.

৮৬. ‘‘ন পাপসুপিনস্সাপি, সরামি দস্সনং মম;

উপট্ঠিতা সতি ময্হং, তিণকুটিকাযিদং ফলং.

৮৭. ‘‘তাযেৰ তিণকুটিকায, অনুভোত্ৰান সম্পদা;

গোতমস্স ভগৰতো, ধম্মং সচ্ছিকরিং অহং.

৮৮. ‘‘একনৰুতিতো কপ্পে, যং কম্মমকরিং তদা;

দুগ্গতিং নাভিজানামি, তিণকুটিকাযিদং ফলং.

৮৯. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা তিণকুটিদাযকো থেরো ইমা গাথাযো অভাসিত্থাতি.

তিণকুটিদাযকত্থেরস্সাপদানং সত্তমং.