৭. নিগ্গুণ্ডিপুপ্ফিযত্থেরঅপদানং

৩৯. ‘‘যদা দেৰো দেৰকাযা, চৰতে আযুসঙ্খযা;

তযো সদ্দা নিচ্ছরন্তি, দেৰানং অনুমোদতং.

৪০. ‘‘‘ইতো ভো সুগতিং গচ্ছ, মনুস্সানং সহব্যতং;

মনুস্সভূতো সদ্ধম্মে, লভ সদ্ধং অনুত্তরং.

৪১. ‘‘‘সা তে সদ্ধা নিৰিট্ঠাস্স, মূলজাতা পতিট্ঠিতা;

যাৰজীৰং অসংহীরা, সদ্ধম্মে সুপ্পৰেদিতে.

৪২. ‘‘‘কাযেন কুসলং কত্ৰা, ৰাচায কুসলং বহুং;

মনসা কুসলং কত্ৰা, অব্যাপজ্জং নিরূপধিং.

৪৩. ‘‘‘ততো ওপধিকং পুঞ্ঞং, কত্ৰা দানেন তং বহুং;

অঞ্ঞেপি মচ্চে সদ্ধম্মে, ব্রহ্মচরিযে নিৰেসয’.

৪৪. ‘‘ইমায অনুকম্পায, দেৰাদেৰং যদা ৰিদূ;

চৰন্তং অনুমোদন্তি, এহি দেৰ পুনপ্পুনং [দেৰপুরং পুন (সী.)].

৪৫. ‘‘সংৰেগো মে [সংৰিগ্গোহং (স্যা.)] তদা আসি, দেৰসঙ্ঘে সমাগতে;

কংসু নাম অহং যোনিং, গমিস্সামি ইতো চুতো.

৪৬. ‘‘মম সংৰেগমঞ্ঞায, সমণো ভাৰিতিন্দ্রিযো;

মমুদ্ধরিতুকামো সো, আগচ্ছি মম সন্তিকং.

৪৭. ‘‘সুমনো নাম নামেন, পদুমুত্তরসাৰকো;

অত্থধম্মানুসাসিত্ৰা, সংৰেজেসি মমং তদা.

দ্ৰাদসমং ভাণৰারং.

৪৮. ‘‘তস্সাহং ৰচনং সুত্ৰা, বুদ্ধে চিত্তং পসাদযিং;

তং ধীরং অভিৰাদেত্ৰা, তত্থ কালংকতো অহং.

৪৯. ‘‘উপপজ্জিং স [উপপজ্জিস্সং (সী.)] তত্থেৰ, সুক্কমূলেন চোদিতো;

ৰসন্তো মাতুকুচ্ছিম্হি, পুন ধারেতি মাতুযা.

৫০. ‘‘তম্হা কাযা চৰিত্ৰান, তিদসে উপপজ্জহং;

এত্থন্তরে ন পস্সামি, দোমনস্সমহং তদা.

৫১. ‘‘তাৰতিংসা চৰিত্ৰান, মাতুকুচ্ছিং সমোক্কমিং;

নিক্খমিত্ৰান কুচ্ছিম্হা, কণ্হসুক্কং অজানহং.

৫২. ‘‘জাতিযা সত্তৰস্সোৰ [জাতিযা সত্তৰস্সেন (স্যা.)], আরামং পাৰিসিং অহং;

গোতমস্স ভগৰতো, সক্যপুত্তস্স তাদিনো.

৫৩. ‘‘ৰিত্থারিকে [ৰিত্থারিতে (সী. ক.)] পাৰচনে, বাহুজঞ্ঞম্হি সাসনে;

অদ্দসং সাসনকরে, ভিক্খৰো তত্থ সত্থুনো.

৫৪. ‘‘সাৰত্থি নাম নগরং, রাজা তত্থাসি কোসলো;

রথেন নাগযুত্তেন, উপেসি বোধিমুত্তমং.

৫৫. ‘‘তস্সাহং নাগং দিস্ৰান, পুব্বকম্মং অনুস্সরিং;

অঞ্জলিং পগ্গহেত্ৰান, সমযং অগমাসহং.

৫৬. ‘‘জাতিযা সত্তৰস্সোৰ, পব্বজিং অনগারিযং;

যো সো বুদ্ধং উপট্ঠাসি, আনন্দো নাম সাৰকো.

৫৭. ‘‘গতিমা ধিতিমা চেৰ, সতিমা চ বহুস্সুতো;

রঞ্ঞো চিত্তং পসাদেন্তো, নিয্যাদেসি মহাজুতি.

৫৮. ‘‘তস্সাহং ধম্মং সুত্ৰান, পুব্বকম্মং অনুস্সরিং;

তত্থেৰ ঠিতকো সন্তো, অরহত্তমপাপুণিং.

৫৯. ‘‘একংসং চীৰরং কত্ৰা, সিরে কত্ৰান অঞ্জলিং;

সম্বুদ্ধং অভিৰাদেত্ৰা, ইমং ৰাচং উদীরযিং.

৬০. ‘‘‘পদুমুত্তরবুদ্ধস্স, দ্ৰিপদিন্দস্স সত্থুনো;

নিগ্গুণ্ডিপুপ্ফং পগ্গয্হ, সীহাসনে ঠপেসহং.

৬১. ‘‘‘তেন কম্মেন দ্ৰিপদিন্দ, লোকজেট্ঠ নরাসভ;

পত্তোম্হি অচলং ঠানং, হিত্ৰা জযপরাজযং’.

৬২. ‘‘পঞ্চৰীসসহস্সম্হি, কপ্পানং মনুজাধিপা;

অব্বুদনিরব্বুদানি, অট্ঠট্ঠাসিংসু খত্তিযা.

৬৩. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা নিগ্গুণ্ডিপুপ্ফিযো থেরো ইমা গাথাযো অভাসিত্থাতি.

নিগ্গুণ্ডিপুপ্ফিযত্থেরস্সাপদানং সত্তমং.