৮. সুমনাৰেল়িযত্থেরঅপদানং

৬৪. ‘‘ৰেস্সভুস্স ভগৰতো, লোকজেট্ঠস্স তাদিনো;

সব্বে জনা সমাগম্ম, মহাপূজং করোন্তি তে.

৬৫. ‘‘সুধায পিণ্ডং কত্ৰান, আৰেল়ং সুমনাযহং;

সীহাসনস্স পুরতো, অভিরোপেসহং তদা.

৬৬. ‘‘সব্বে জনা সমাগম্ম, পেক্খন্তি পুপ্ফমুত্তমং;

কেনিদং পূজিতং পুপ্ফং, বুদ্ধসেট্ঠস্স তাদিনো.

৬৭. ‘‘তেন চিত্তপ্পসাদেন, নিম্মানং উপপজ্জহং;

অনুভোমি [অনুভোসিং (সী.)] সকং কম্মং, পুব্বে সুকতমত্তনো.

৬৮. ‘‘যং যং যোনুপপজ্জামি, দেৰত্তং অথ মানুসং;

সব্বেসানং পিযো হোমি, পুপ্ফপূজাযিদং ফলং.

৬৯. ‘‘নাভিজানামি কাযেন, ৰাচায উদ চেতসা;

সংযতানং তপস্সীনং, কতং অক্কোসিতং মযা.

৭০. ‘‘তেন সুচরিতেনাহং, চিত্তস্স পণিধীহি চ;

সব্বেসং পূজিতো হোমি, অনক্কোসস্সিদং ফলং.

৭১. ‘‘ইতো একাদসে কপ্পে, সহস্সারোসি খত্তিযো;

সত্তরতনসম্পন্নো, চক্কৰত্তী মহব্বলো.

৭২. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা সুমনাৰেল়িযো থেরো ইমা গাথাযো অভাসিত্থাতি.

সুমনাৰেল়িযত্থেরস্সাপদানং অট্ঠমং.