১০. সপরিৰারছত্তদাযকত্থেরঅপদানং

৮২. ‘‘পদুমুত্তরো লোকৰিদূ, আহুতীনং পটিগ্গহো;

আকাসে জলৰুট্ঠীৰ ৰস্সতে [ৰস্সতি (সী. স্যা.), ৰস্সেতি (?)] ধম্মৰুট্ঠিযা.

৮৩. ‘‘তমদ্দসাসিং সম্বুদ্ধং, দেসেন্তং অমতং পদং;

সকং চিত্তং পসাদেত্ৰা, অগমাসিং সকং ঘরং.

৮৪. ‘‘ছত্তং অলঙ্কতং গয্হ, উপগচ্ছিং নরুত্তমং;

হট্ঠো হট্ঠেন চিত্তেন, আকাসে উক্খিপিং অহং.

৮৫. ‘‘সুসঙ্গহিতযানংৰ, দন্তোৰ সাৰকুত্তমো;

উপগন্ত্ৰান সম্বুদ্ধং, মত্থকে সম্পতিট্ঠহি.

৮৬. ‘‘অনুকম্পকো কারুণিকো, বুদ্ধো লোকগ্গনাযকো;

ভিক্খুসঙ্ঘে নিসীদিত্ৰা, ইমা গাথা অভাসথ.

৮৭. ‘‘‘যেন ছত্তমিদং দিন্নং, অলঙ্কতং মনোরমং;

তেন চিত্তপ্পসাদেন, দুগ্গতিং সো ন গচ্ছতি.

৮৮. ‘‘‘সত্তক্খত্তুঞ্চ দেৰেসু, দেৰরজ্জং করিস্সতি;

বাত্তিংসক্খত্তুঞ্চ রাজা, চক্কৰত্তী ভৰিস্সতি.

৮৯. ‘‘‘কপ্পসতসহস্সম্হি, ওক্কাককুলসম্ভৰো;

গোতমো নাম গোত্তেন, সত্থা লোকে ভৰিস্সতি.

৯০. ‘‘‘তস্স ধম্মেসু দাযাদো, ওরসো ধম্মনিম্মিতো;

সব্বাসৰে পরিঞ্ঞায, নিব্বাযিস্সতিনাসৰো’.

৯১. ‘‘বুদ্ধস্স গিরমঞ্ঞায, ৰাচাসভিমুদীরিতং;

পসন্নচিত্তো সুমনো, ভিয্যো হাসং জনেসহং.

৯২. ‘‘জহিত্ৰা মানুসং যোনিং, দিব্বং যোনিং [দেৰযোনিং (সী.), দিব্বযোনিং (স্যা.)] মজ্ঝগং;

ৰিমানমুত্তমং ময্হং, অব্ভুগ্গতং মনোরমং.

৯৩. ‘‘ৰিমানা নিক্খমন্তস্স, সেতচ্ছত্তং ধরীযতি;

তদা সঞ্ঞং পটিলভিং, পুব্বকম্মস্সিদং ফলং.

৯৪. ‘‘দেৰলোকা চৰিত্ৰান, মনুস্সত্তঞ্চ আগমিং;

ছত্তিংসক্খত্তুং চক্কৰত্তী, সত্তকপ্পসতম্হিতো.

৯৫. ‘‘তম্হা কাযা চৰিত্ৰান, আগচ্ছিং [অগঞ্ছিং (?)] তিদসং পুরং;

সংসরিত্ৰানুপুব্বেন, মানুসং পুনরাগমিং.

৯৬. ‘‘ওক্কন্তং মাতুকুচ্ছিং মং, সেত্তচ্ছত্তং অধারযুং;

জাতিযা সত্তৰস্সোহং, পব্বজিং অনগারিযং.

৯৭. ‘‘সুনন্দো নাম নামেন, ব্রাহ্মণো মন্তপারগূ;

ফলিকং ছত্তমাদায, সাৰকগ্গস্স সো তদা.

৯৮. ‘‘অনুমোদি মহাৰীরো, সারিপুত্তো মহাকথী;

সুত্ৰানুমোদনং তস্স, পুব্বকম্মমনুস্সরিং.

৯৯. ‘‘অঞ্জলিং পগ্গহেত্ৰান, সকং চিত্তং পসাদযিং;

সরিত্ৰা পুরিমং কম্মং, অরহত্তমপাপুণিং.

১০০. ‘‘উট্ঠায আসনা তম্হা, সিরে কত্ৰান অঞ্জলিং;

সম্বুদ্ধং অভিৰাদেত্ৰা, ইমং ৰাচং উদীরিযিং.

১০১. ‘‘সতসহস্সিতো কপ্পে, বুদ্ধো লোকে অনুত্তরো;

পদুমুত্তরো লোকৰিদূ, আহুতীনং পটিগ্গহো.

১০২. ‘‘তস্স ছত্তং মযা দিন্নং, ৰিচিত্তং সমলঙ্কতং;

উভো হত্থেহি পগ্গণ্হি, সযম্ভূ অগ্গপুগ্গলো.

১০৩. ‘‘অহো বুদ্ধো অহো ধম্মো, অহো নো সত্থুসম্পদা;

একচ্ছত্তস্স দানেন, দুগ্গতিং নুপপজ্জহং.

১০৪. ‘‘কিলেসা ঝাপিতা ময্হং, ভৰা সব্বে সমূহতা;

সব্বাসৰে পরিঞ্ঞায, ৰিহরামি অনাসৰো.

১০৫. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা সপরিৰারছত্তদাযকো থেরো ইমা গাথাযো অভাসিত্থাতি.

সপরিৰারছত্তদাযকত্থেরস্সাপদানং দসমং.

উমাপুপ্ফিযৰগ্গো তেত্তিংসতিমো.