১০. পব্ভারদাযকত্থেরঅপদানং

৪৭. ‘‘পিযদস্সিনো ভগৰতো, পব্ভারো সোধিতো মযা;

ঘটকঞ্চ উপট্ঠাসিং, পরিভোগায তাদিনো.

৪৮. ‘‘তং মে বুদ্ধো ৰিযাকাসি, পিযদস্সী মহামুনি;

সহস্সকণ্ডো সতভেণ্ডু [সতগেণ্ডু (স্যা. ক.)], ধজালু হরিতামযো.

৪৯. ‘‘নিব্বত্তিস্সতি সো যূপো, রতনঞ্চ অনপ্পকং;

পব্ভারদানং দত্ৰান, কপ্পং সগ্গম্হি মোদহং.

৫০. ‘‘ইতো বাত্তিংসকপ্পম্হি, সুসুদ্ধো নাম খত্তিযো;

সত্তরতনসম্পন্নো, চক্কৰত্তী মহব্বলো.

৫১. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা পব্ভারদাযকো থেরো ইমা গাথাযো অভাসিত্থাতি.

পব্ভারদাযকত্থেরস্সাপদানং দসমং.

পদুমকেসরৰগ্গো একতিংসতিমো.