৩১. পদুমকেসরৰগ্গো

১. পদুমকেসরিযত্থেরঅপদানং

১. ‘‘ইসিসঙ্ঘে অহং পুব্বে, আসিং মাতঙ্গৰারণো;

মহেসীনং পসাদেন, পদ্মকেসরমোকিরিং.

২. ‘‘পচ্চেকজিনসেট্ঠেসু, ধুতরাগেসু তাদিসু;

তেসু চিত্তং পসাদেত্ৰা, কপ্পং সগ্গম্হি মোদহং.

৩. ‘‘একনৰুতিতো কপ্পে, কেসরং ওকিরিং তদা;

দুগ্গতিং নাভিজানামি, বুদ্ধপূজাযিদং ফলং.

৪. ‘‘পটিসম্ভিদা চতস্সো, ৰিমোক্খাপি চ অট্ঠিমে;

ছল়ভিঞ্ঞা সচ্ছিকতা, কতং বুদ্ধস্স সাসনং’’.

ইত্থং সুদং আযস্মা পদুমকেসরিযো থেরো ইমা গাথাযো অভাসিত্থাতি.

পদুমকেসরিযত্থেরস্সাপদানং পঠমং.

২. সব্বগন্ধিযত্থেরঅপদানং

৫. ‘‘গন্ধমালং মযা দিন্নং, ৰিপস্সিস্স মহেসিনো;

অদাসিং উজুভূতস্স, কোসেয্যৰত্থমুত্তমং.

৬. ‘‘একনৰুতিতো কপ্পে, যং ৰত্থমদদিং [গন্ধমদদিং (স্যা.)] পুরে;

দুগ্গতিং নাভিজানামি, গন্ধদানস্সিদং ফলং.

৭. ‘‘ইতো পন্নরসে কপ্পে, সুচেল়ো নাম খত্তিযো;

সত্তরতনসম্পন্নো, চক্কৰত্তী মহব্বলো.

৮. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা সব্বগন্ধিযো থেরো ইমা গাথাযো অভাসিত্থাতি.

সব্বগন্ধিযত্থেরস্সাপদানং দুতিযং.

৩. পরমন্নদাযকত্থেরঅপদানং

৯. ‘‘কণিকারংৰ জোতন্তং, উদযন্তংৰ ভাণুমং;

ৰিপস্সিং অদ্দসং বুদ্ধং, লোকজেট্ঠং নরাসভং.

১০. ‘‘অঞ্জলিং পগ্গহেত্ৰান, অভিনেসিং সকং ঘরং;

অভিনেত্ৰান সম্বুদ্ধং, পরমন্নমদাসহং.

১১. ‘‘একনৰুতিতো কপ্পে, পরমন্নমদিং [পরমন্নং দদিং (সী.), পরমন্নমদং (স্যা.)] তদা;

দুগ্গতিং নাভিজানামি, পরমন্নস্সিদং ফলং.

১২. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা পরমন্নদাযকো থেরো ইমা গাথাযো অভাসিত্থাতি.

পরমন্নদাযকত্থেরস্সাপদানং ততিযং.

৪. ধম্মসঞ্ঞকত্থেরঅপদানং

১৩. ‘‘ৰিপস্সিনো ভগৰতো, মহাবোধিমহো অহু;

রুক্খট্ঠস্সেৰ সম্বুদ্ধো, [রুক্খট্ঠেযেৰ সম্বুদ্ধে (সী.), রুক্খট্ঠো ইৰ সম্বুদ্ধো (অট্ঠ.) এত্থ রুক্খট্ঠস্সেৰ বোধিমহকারজনস্স সম্বুদ্ধো চতুসচ্চং পকাসেতীতি অত্থোপি সক্কা ঞাতুং] লোকজেট্ঠো নরাসভো [লোকজেট্ঠে নরাসভে (সী.)].

১৪. ‘‘ভগৰা তম্হি সমযে, ভিক্খুসঙ্ঘপুরক্খতো;

চতুসচ্চং পকাসেতি, ৰাচাসভিমুদীরযং.

১৫. ‘‘সঙ্খিত্তেন চ দেসেন্তো, ৰিত্থারেন চ দেসযং [দেসযি (স্যা.), ভাসতি (ক.)];

ৰিৰট্টচ্ছদো সম্বুদ্ধো, নিব্বাপেসি মহাজনং.

১৬. ‘‘তস্সাহং ধম্মং সুত্ৰান, লোকজেট্ঠস্স তাদিনো;

ৰন্দিত্ৰা সত্থুনো পাদে, পক্কামিং উত্তরামুখো.

১৭. ‘‘একনৰুতিতো কপ্পে, যং ধম্মমসুণিং তদা;

দুগ্গতিং নাভিজানামি, ধম্মসৰস্সিদং ফলং.

১৮. ‘‘তেত্তিংসম্হি ইতো কপ্পে, একো আসিং মহীপতি;

সুতৰা নাম নামেন, চক্কৰত্তী মহব্বলো.

১৯. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা ধম্মসঞ্ঞকো থেরো ইমা গাথাযো অভাসিত্থাতি.

ধম্মসঞ্ঞকত্থেরস্সাপদানং চতুত্থং.

৫. ফলদাযকত্থেরঅপদানং

২০. ‘‘ভাগীরথীনদীতীরে, অহোসি অস্সমো তদা;

তমহং অস্সমং গচ্ছিং, ফলহত্থো অপেক্খৰা.

২১. ‘‘ৰিপস্সিং তত্থ অদ্দক্খিং, পীতরংসিংৰ ভাণুমং;

যং মে অত্থি ফলং সব্বং, অদাসিং সত্থুনো অহং.

২২. ‘‘একনৰুতিতো কপ্পে, যং ফলং অদদিং তদা;

দুগ্গতিং নাভিজানামি, ফলদানস্সিদং ফলং.

২৩. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা ফলদাযকো থেরো ইমা গাথাযো অভাসিত্থাতি.

ফলদাযকত্থেরস্সাপদানং পঞ্চমং.

৬. সম্পসাদকত্থেরঅপদানং

২৪. ‘‘‘নমো তে বুদ্ধ ৰীরত্থু, ৰিপ্পমুত্তোসি সব্বধি;

ব্যসনম্হি [ব্যসনং হি (সী.)] অনুপ্পত্তো, তস্স মে সরণং ভৰ’.

২৫. ‘‘সিদ্ধত্থো তস্স ব্যাকাসি, লোকে অপ্পটিপুগ্গলো;

‘মহোদধিসমো সঙ্ঘো, অপ্পমেয্যো অনুত্তরো.

২৬. ‘‘‘তত্থ ত্ৰং ৰিরজে খেত্তে, অনন্তফলদাযকে;

সঙ্ঘে চিত্তং পসাদেত্ৰা, সুবীজং ৰাপ [চাপি (সী.), ৰাপি (স্যা.)] রোপয.

২৭. ‘‘ইদং ৰত্ৰান সব্বঞ্ঞূ, লোকজেট্ঠো নরাসভো;

মমেৰ অনুসাসিত্ৰা, ৰেহাসং নভমুগ্গমি.

২৮. ‘‘অচিরং গতমত্তম্হি, সব্বঞ্ঞুম্হি নরাসভে;

মরণং সমনুপ্পত্তো, তুসিতং উপপজ্জহং.

২৯. ‘‘তদাহং ৰিরজে খেত্তে, অনন্তফলদাযকে;

সঙ্ঘে চিত্তং পসাদেত্ৰা, কপ্পং সগ্গম্হি মোদহং.

৩০. ‘‘চতুন্নৰুতিতো কপ্পে, পসাদমলভিং তদা;

দুগ্গতিং নাভিজানামি, পসাদস্স ইদং ফলং.

৩১. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা সম্পসাদকো থেরো ইমা গাথাযো অভাসিত্থাতি.

সম্পসাদকত্থেরস্সাপদানং ছট্ঠং.

৭. আরামদাযকত্থেরঅপদানং

৩২. ‘‘সিদ্ধত্থস্স ভগৰতো, আরামো রোপিতো মযা;

সন্দচ্ছাযেসু [সীতছাযেসু (স্যা.), সন্তচ্ছাযেসু (ক.)] রুক্খেসু, উপাসন্তেসু পক্খিসু.

৩৩. ‘‘অদ্দসং ৰিরজং বুদ্ধং, আহুতীনং পটিগ্গহং;

আরামং অভিনামেসিং, লোকজেট্ঠং নরাসভং.

৩৪. ‘‘হট্ঠো হট্ঠেন চিত্তেন, ফলং পুপ্ফমদাসহং;

ততো জাতপ্পসাদোৰ, তং ৰনং পরিণামযিং.

৩৫. ‘‘বুদ্ধস্স যমিদং দাসিং, ৰিপ্পসন্নেন চেতসা;

ভৰে নিব্বত্তমানম্হি, নিব্বত্ততি ফলং মম.

৩৬. ‘‘চতুন্নৰুতিতো কপ্পে, যং আরামমদং তদা;

দুগ্গতিং নাভিজানামি, আরামস্স ইদং ফলং.

৩৭. ‘‘সত্ততিংসে ইতো কপ্পে, সত্তাসুং মুদুসীতলা;

সত্তরতনসম্পন্না, চক্কৰত্তী মহব্বলা.

৩৮. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা আরামদাযকো থেরো ইমা গাথাযো অভাসিত্থাতি.

আরামদাযকত্থেরস্সাপদানং সত্তমং.

৮. অনুলেপদাযকত্থেরঅপদানং

৩৯. ‘‘অত্থদস্সিস্স মুনিনো, অদ্দসং সাৰকং অহং;

নৰকম্মং করোন্তস্স, সীমায উপগচ্ছহং.

৪০. ‘‘নিট্ঠিতে নৰকম্মে চ, অনুলেপমদাসহং;

পসন্নচিত্তো সুমনো, পুঞ্ঞক্খেত্তে অনুত্তরে.

৪১. ‘‘অট্ঠারসে কপ্পসতে, যং কম্মমকরিং তদা;

দুগ্গতিং নাভিজানামি, অনুলেপস্সিদং ফলং.

৪২. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা অনুলেপদাযকো থেরো ইমা গাথাযো অভাসিত্থাতি.

অনুলেপদাযকত্থেরস্সাপদানং অট্ঠমং.

৯. বুদ্ধসঞ্ঞকত্থেরঅপদানং

৪৩. ‘‘উদেন্তং সতরংসিংৰ, পীতরংসিংৰ ভাণুমং;

ৰনন্তরগতং সন্তং, লোকজেট্ঠং নরাসভং.

৪৪. ‘‘অদ্দসং সুপিনন্তেন, সিদ্ধত্থং লোকনাযকং;

তত্থ চিত্তং পসাদেত্ৰা, সুগতিং উপপজ্জহং.

৪৫. ‘‘চতুন্নৰুতিতো কপ্পে, যং সঞ্ঞমলভিং তদা;

দুগ্গতিং নাভিজানামি, বুদ্ধসঞ্ঞাযিদং ফলং.

৪৬. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা বুদ্ধসঞ্ঞকো থেরো ইমা গাথাযো অভাসিত্থাতি.

বুদ্ধসঞ্ঞকত্থেরস্সাপদানং নৰমং.

১০. পব্ভারদাযকত্থেরঅপদানং

৪৭. ‘‘পিযদস্সিনো ভগৰতো, পব্ভারো সোধিতো মযা;

ঘটকঞ্চ উপট্ঠাসিং, পরিভোগায তাদিনো.

৪৮. ‘‘তং মে বুদ্ধো ৰিযাকাসি, পিযদস্সী মহামুনি;

সহস্সকণ্ডো সতভেণ্ডু [সতগেণ্ডু (স্যা. ক.)], ধজালু হরিতামযো.

৪৯. ‘‘নিব্বত্তিস্সতি সো যূপো, রতনঞ্চ অনপ্পকং;

পব্ভারদানং দত্ৰান, কপ্পং সগ্গম্হি মোদহং.

৫০. ‘‘ইতো বাত্তিংসকপ্পম্হি, সুসুদ্ধো নাম খত্তিযো;

সত্তরতনসম্পন্নো, চক্কৰত্তী মহব্বলো.

৫১. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা পব্ভারদাযকো থেরো ইমা গাথাযো অভাসিত্থাতি.

পব্ভারদাযকত্থেরস্সাপদানং দসমং.

পদুমকেসরৰগ্গো একতিংসতিমো.