৩২. আরক্খদাযকৰগ্গো

১. আরক্খদাযকত্থেরঅপদানং

১. ‘‘ধম্মদস্সিস্স মুনিনো, ৰতি কারাপিতা মযা;

আরক্খো চ মযা দিন্নো, দ্ৰিপদিন্দস্স তাদিনো.

২. ‘‘অট্ঠারসে কপ্পসতে, যং কম্মমকরিং তদা;

তেন কম্মৰিসেসেন, পত্তো মে আসৰক্খযো.

৩. ‘‘পটিসম্ভিদা চতস্সো, ৰিমোক্খাপি চ অট্ঠিমে;

ছল়ভিঞ্ঞা সচ্ছিকতা, কতং বুদ্ধস্স সাসনং’’.

ইত্থং সুদং আযস্মা আরক্খদাযকো থেরো ইমা গাথাযো অভাসিত্থাতি.

আরক্খদাযকত্থেরস্সাপদানং পঠমং.

২. ভোজনদাযকত্থেরঅপদানং

৪. ‘‘সুজাতো সাললট্ঠীৰ, সোভঞ্জনমিৰুগ্গতো;

ইন্দলট্ঠিরিৰাকাসে, ৰিরোচতি সদা জিনো.

৫. ‘‘তস্স দেৰাতিদেৰস্স, ৰেস্সভুস্স মহেসিনো;

অদাসি ভোজনমহং, ৰিপ্পসন্নেন চেতসা.

৬. ‘‘তং মে বুদ্ধো অনুমোদি, সযম্ভূ অপরাজিতো;

ভৰে নিব্বত্তমানম্হি, ফলং নিব্বত্ততূ তৰ.

৭. ‘‘একত্তিংসে ইতো কপ্পে, যং দানমদদিং তদা;

দুগ্গতিং নাভিজানামি, ভোজনস্স ইদং ফলং.

৮. ‘‘পঞ্চৰীসে ইতো কপ্পে, একো আসিং অমিত্তকো;

সত্তরতনসম্পন্নো, চক্কৰত্তী মহব্বলো.

৯. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা ভোজনদাযকো থেরো ইমা গাথাযো অভাসিত্থাতি.

ভোজনদাযকত্থেরস্সাপদানং দুতিযং.

৩. গতসঞ্ঞকত্থেরঅপদানং

১০. ‘‘আকাসেৰ পদং নত্থি, অম্বরে অনিলঞ্জসে;

সিদ্ধত্থং জিনমদ্দক্খিং, গচ্ছন্তং তিদিৰঙ্গণে [তিদিৰঙ্গণং (স্যা. ক.)].

১১. ‘‘অনিলেনেরিতং দিস্ৰা, সম্মাসম্বুদ্ধচীৰরং;

ৰিত্তি মমাহু তাৰদে [ৰিত্তি মে পাহুণা তাৰ (স্যা.), ৰিত্তি মে তাৰদে জাতা (সী.)], দিস্ৰান গমনং মুনিং [মুনে (সী.)].

১২. ‘‘চতুন্নৰুতিতো কপ্পে, যং সঞ্ঞমলভিং তদা;

দুগ্গতিং নাভিজানামি, বুদ্ধসঞ্ঞাযিদং ফলং.

১৩. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা গতসঞ্ঞকো থেরো ইমা গাথাযো অভাসিত্থাতি.

গতসঞ্ঞকত্থেরস্সাপদানং ততিযং.

৪. সত্তপদুমিযত্থেরঅপদানং

১৪. ‘‘নদীকূলে ৰসামহং, নেসাদো নাম ব্রাহ্মণো;

সতপত্তেহি পুপ্ফেহি, সম্মজ্জিত্ৰান অস্সমং.

১৫. ‘‘সুৰণ্ণৰণ্ণং সম্বুদ্ধং, সিদ্ধত্থং লোকনাযকং;

দিস্ৰা নভেন [ৰনেন (স্যা. ক.)] গচ্ছন্তং, হাসো মে উদপজ্জথ.

১৬. ‘‘পচ্চুগ্গন্ত্ৰান সম্বুদ্ধং, লোকজেট্ঠং নরাসভং;

অস্সমং অতিনামেত্ৰা, জলজগ্গেহি ওকিরিং.

১৭. ‘‘চতুন্নৰুতিতো কপ্পে, যং পুপ্ফমভিরোপযিং;

দুগ্গতিং নাভিজানামি, বুদ্ধপূজাযিদং ফলং.

১৮. ‘‘ইতো তে সত্তমে কপ্পে, চতুরো পাদপাৰরা;

সত্তরতনসম্পন্না, চক্কৰত্তী মহব্বলা.

১৯. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা সত্তপদুমিযো থেরো ইমা গাথাযো অভাসিত্থাতি.

সত্তপদুমিযত্থেরস্সাপদানং চতুত্থং.

৫. পুপ্ফাসনদাযকত্থেরঅপদানং

২০. ‘‘সুৰণ্ণৰণ্ণং সম্বুদ্ধং, পীতরংসিংৰ [সতরংসিংৰ (সী. স্যা.)] ভাণুমং;

অৰিদূরেন গচ্ছন্তং, সিদ্ধত্থং অপরাজিতং.

২১. ‘‘তস্স পচ্চুগ্গমিত্ৰান, পৰেসেত্ৰান অস্সমং;

পুপ্ফাসনং মযা দিন্নং, ৰিপ্পসন্নেন চেতসা.

২২. ‘‘অঞ্জলিং পগ্গহেত্ৰান, ৰেদজাতো তদা অহং;

বুদ্ধে চিত্তং পসাদেত্ৰা, তং কম্মং পরিণামযিং.

২৩. ‘‘যং মে অত্থি কতং পুঞ্ঞং, সযম্ভুম্হপরাজিতে;

সব্বেন তেন কুসলেন, ৰিমলো হোমি সাসনে.

২৪. ‘‘চতুন্নৰুতিতো কপ্পে, পুপ্ফাসনমদং তদা;

দুগ্গতিং নাভিজানামি, পুপ্ফাসনস্সিদং ফলং.

২৫. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা পুপ্ফাসনদাযকো থেরো ইমা গাথাযো অভাসিত্থাতি.

পুপ্ফাসনদাযকত্থেরস্সাপদানং পঞ্চমং.

৬. আসনসন্থৰিকত্থেরঅপদানং

২৬. ‘‘চেতিযং উত্তমং নাম, সিখিনো লোকবন্ধুনো;

অরঞ্ঞে ইরীণে ৰনে, অন্ধাহিণ্ডামহং তদা.

২৭. ‘‘পৰনা নিক্খমন্তেন, দিট্ঠং সীহাসনং মযা;

একংসং অঞ্জলিং কত্ৰা, সন্থৰিং [থৰিস্সং (সী.)] লোকনাযকং.

২৮. ‘‘দিৰসভাগং থৰিত্ৰান, বুদ্ধং লোকগ্গনাযকং;

হট্ঠো হট্ঠেন চিত্তেন, ইমং ৰাচং উদীরযিং.

২৯. ‘‘‘নমো তে পুরিসাজঞ্ঞ, নমো তে পুরিসুত্তম;

সব্বঞ্ঞূসি মহাৰীর, লোকজেট্ঠ নরাসভ’.

৩০. ‘‘অভিত্থৰিত্ৰা সিখিনং, নিমিত্তকরণেনহং;

আসনং অভিৰাদেত্ৰা, পক্কামিং উত্তরামুখো.

৩১. ‘‘একত্তিংসে ইতো কপ্পে, যং থৰিং ৰদতং ৰরং;

দুগ্গতিং নাভিজানামি, থোমনায ইদং ফলং.

৩২. ‘‘সত্তৰীসে ইতো কপ্পে, অতুলা সত্ত আসু তে;

সত্তরতনসম্পন্না, চক্কৰত্তী মহব্বলা.

৩৩. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা আসনসন্থৰিকো [আসনসন্থৰকো (?), আসনথৰিকো (ক.), আসনত্থৰিকো (সী. স্যা.)] থেরো ইমা গাথাযো অভাসিত্থাতি.

আসনসন্থৰিকত্থেরস্সাপদানং ছট্ঠং.

৭. সদ্দসঞ্ঞকত্থেরঅপদানং

৩৪. ‘‘সুদস্সনো মহাৰীরো, দেসেতি অমতং পদং;

পরিৰুতো সাৰকেহি, ৰসতি ঘরমুত্তমে.

৩৫. ‘‘তায ৰাচায মধুরায, সঙ্গণ্হাতি [সঙ্গণ্হন্তে (সী.)] মহাজনং;

ঘোসো চ ৰিপুলো আসি, আসীসো [আসংসো (সী.)] দেৰমানুসে.

৩৬. ‘‘নিগ্ঘোসসদ্দং সুত্ৰান, সিদ্ধত্থস্স মহেসিনো;

সদ্দে চিত্তং পসাদেত্ৰা, অৰন্দিং লোকনাযকং.

৩৭. ‘‘চতুন্নৰুতিতো কপ্পে, যং সঞ্ঞমলভিং তদা;

দুগ্গতিং নাভিজানামি, বুদ্ধসঞ্ঞাযিদং ফলং.

৩৮. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা সদ্দসঞ্ঞকো থেরো ইমা গাথাযো অভাসিত্থাতি.

সদ্দসঞ্ঞকত্থেরস্সাপদানং সত্তমং.

৮. তিরংসিযত্থেরঅপদানং

৩৯. ‘‘কেসরিং অভিজাতংৰ, অগ্গিক্খন্ধংৰ পব্বতে;

ওভাসেন্তং দিসা সব্বা [নিৰাসেন্তং (ক.), দিসাসিন্নং (স্যা.)], সিদ্ধত্থং পব্বতন্তরে.

৪০. ‘‘সূরিযস্স চ আলোকং, চন্দালোকং তথেৰ চ;

বুদ্ধালোকঞ্চ দিস্ৰান, ৰিত্তি মে উদপজ্জথ.

৪১. ‘‘তযো আলোকে দিস্ৰান, সম্বুদ্ধং [বুদ্ধঞ্চ (সী.)] সাৰকুত্তমং;

একংসং অজিনং কত্ৰা, সন্থৰিং লোকনাযকং.

৪২. ‘‘তযো হি আলোককরা, লোকে লোকতমোনুদা;

চন্দো চ সূরিযো চাপি, বুদ্ধো চ লোকনাযকো.

৪৩. ‘‘ওপম্মং উপদস্সেত্ৰা, কিত্তিতো মে মহামুনি;

বুদ্ধস্স ৰণ্ণং কিত্তেত্ৰা, কপ্পং সগ্গম্হি মোদহং.

৪৪. ‘‘চতুন্নৰুতিতো কপ্পে, যং বুদ্ধমভিকিত্তযিং;

দুগ্গতিং নাভিজানামি, কিত্তনায ইদং ফলং.

৪৫. ‘‘একসট্ঠিম্হিতো কপ্পে, একো ঞাণধরো অহু;

সত্তরতনসম্পন্নো, চক্কৰত্তী মহব্বলো.

৪৬. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা তিরংসিযো থেরো ইমা গাথাযো অভাসিত্থাতি.

তিরংসিযত্থেরস্সাপদানং অট্ঠমং.

৯. কন্দলিপুপ্ফিযত্থেরঅপদানং

৪৭. ‘‘সিন্ধুযা নদিযা তীরে, অহোসিং কস্সকো তদা;

পরকম্মাযনে যুত্তো, পরভত্তং অপস্সিতো.

৪৮. ‘‘সিন্ধুং অনুচরন্তোহং, সিদ্ধত্থং জিনমদ্দসং;

সমাধিনা নিসিন্নংৰ, সতপত্তংৰ পুপ্ফিতং.

৪৯. ‘‘সত্ত কন্দলিপুপ্ফানি, ৰণ্টে ছেত্ৰানহং তদা;

মত্থকে অভিরোপেসিং, বুদ্ধস্সাদিচ্চবন্ধুনো.

৫০. ‘‘সুৰণ্ণৰণ্ণং সম্বুদ্ধং, অনুকূলে সমাহিতং;

তিধাপভিন্নমাতঙ্গং, কুঞ্জরংৰ দুরাসদং.

৫১. ‘‘তমহং উপগন্ত্ৰান, নিপকং ভাৰিতিন্দ্রিযং;

অঞ্জলিং পগ্গহেত্ৰান, অৰন্দিং সত্থুনো অহং.

৫২. ‘‘চতুন্নৰুতিতো কপ্পে, যং পুপ্ফমভিরোপযিং;

দুগ্গতিং নাভিজানামি, বুদ্ধপূজাযিদং ফলং.

৫৩. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা কন্দলিপুপ্ফিযো থেরো ইমা গাথাযো অভাসিত্থাতি.

কন্দলিপুপ্ফিযত্থেরস্সাপদানং নৰমং.

১০. কুমুদমালিযত্থেরঅপদানং

৫৪. ‘‘উসভং পৰরং ৰীরং, মহেসিং ৰিজিতাৰিনং;

ৰিপস্সিনং মহাৰীরং, অভিজাতংৰ কেসরিং.

৫৫. ‘‘রথিযং পটিপজ্জন্তং, আহুতীনং পটিগ্গহং;

গহেত্ৰা কুমুদং মালং, বুদ্ধসেট্ঠং সমোকিরিং.

৫৬. ‘‘একনৰুতিতো কপ্পে, যং পুপ্ফমভিপূজযিং;

দুগ্গতিং নাভিজানামি, বুদ্ধপূজাযিদং ফলং.

৫৭. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা কুমুদমালিযো থেরো ইমা গাথাযো অভাসিত্থাতি.

কুমুদমালিযত্থেরস্সাপদানং দসমং.

আরক্খদাযকৰগ্গো বাত্তিংসতিমো [বত্তিংসতিমো (সী. স্যা.)].