৬. রাহুলত্থেরঅপদানং

৬৮. ‘‘পদুমুত্তরস্স ভগৰতো, লোকজেট্ঠস্স তাদিনো;

সত্তভূমম্হি পাসাদে, আদাসং সন্থরিং অহং.

৬৯. ‘‘খীণাসৰসহস্সেহি, পরিকিণ্ণো মহামুনি;

উপাগমি গন্ধকুটিং, দ্ৰিপদিন্দো [দিপদিন্দো (সী. স্যা.)] নরাসভো.

৭০. ‘‘ৰিরোচেন্তো [ৰিরোচযং (স্যা.)] গন্ধকুটিং, দেৰদেৰো নরাসভো;

ভিক্খুসঙ্ঘে ঠিতো সত্থা, ইমা গাথা অভাসথ.

৭১. ‘‘‘যেনাযং জোতিতা সেয্যা, আদাসোৰ সুসন্থতো;

তমহং কিত্তযিস্সামি, সুণাথ মম ভাসতো.

৭২. ‘‘‘সোণ্ণমযা রূপিমযা, অথো ৰেল়ুরিযামযা;

নিব্বত্তিস্সন্তি পাসাদা, যে কেচি মনসো পিযা.

৭৩. ‘‘‘চতুসট্ঠিক্খত্তুং দেৰিন্দো, দেৰরজ্জং করিস্সতি;

সহস্সক্খত্তুং চক্কৰত্তী, ভৰিস্সতি অনন্তরা.

৭৪. ‘‘‘একৰীসতিকপ্পম্হি, ৰিমলো নাম খত্তিযো;

চাতুরন্তো ৰিজিতাৰী, চক্কৰত্তী ভৰিস্সতি.

৭৫. ‘‘‘নগরং রেণুৰতী নাম, ইট্ঠকাহি সুমাপিতং;

আযামতো তীণি সতং, চতুরস্সসমাযুতং.

৭৬. ‘‘‘সুদস্সনো নাম পাসাদো, ৰিস্সকম্মেন মাপিতো [ৰিসুকম্মেন§মাপিতো (ক.), ৰিস্সকম্মেন নিম্মিতো (সী.)];

কূটাগারৰরূপেতো, সত্তরতনভূসিতো.

৭৭. ‘‘‘দসসদ্দাৰিৰিত্তং তং [অৰিৰিত্তং (সী.)], ৰিজ্জাধরসমাকুলং;

সুদস্সনংৰ নগরং, দেৰতানং ভৰিস্সতি.

৭৮. ‘‘‘পভা নিগ্গচ্ছতে তস্স, উগ্গচ্ছন্তেৰ সূরিযে;

ৰিরোচেস্সতি তং নিচ্চং, সমন্তা অট্ঠযোজনং.

৭৯. ‘‘‘কপ্পসতসহস্সম্হি, ওক্কাককুলসম্ভৰো;

গোতমো নাম গোত্তেন, সত্থা লোকে ভৰিস্সতি.

৮০. ‘‘‘তুসিতা সো চৰিত্ৰান, সুক্কমূলেন চোদিতো;

গোতমস্স ভগৰতো, অত্রজো সো ভৰিস্সতি.

৮১. ‘‘‘সচে ৰসেয্য [সচা’ৰসেয্য (?)] অগারং, চক্কৰত্তী ভৰেয্য সো;

অট্ঠানমেতং যং তাদী, অগারে রতিমজ্ঝগা.

৮২. ‘‘‘নিক্খমিত্ৰা অগারম্হা, পব্বজিস্সতি সুব্বতো;

রাহুলো নাম নামেন, অরহা সো ভৰিস্সতি’.

৮৩. ‘‘কিকীৰ অণ্ডং রক্খেয্য, চামরী ৰিয ৰালধিং;

নিপকো সীলসম্পন্নো, মমং রক্খি মহামুনি [এৰং রক্খিং মহামুনি (সী. ক.), মমং দক্খি মহামুনি (স্যা.)].

৮৪. ‘‘তস্সাহং ধম্মমঞ্ঞায, ৰিহাসিং সাসনে রতো;

সব্বাসৰে পরিঞ্ঞায, ৰিহরামি অনাসৰো.

৮৫. ‘‘পটিসম্ভিদা চতস্সো, ৰিমোক্খাপি চ অট্ঠিমে;

ছল়ভিঞ্ঞা সচ্ছিকতা, কতং বুদ্ধস্স সাসনং’’.

ইত্থং সুদং আযস্মা রাহুলো থেরো ইমা গাথাযো অভাসিত্থাতি.

রাহুলত্থেরস্সাপদানং ছট্ঠং.