২. সীহাসনিযৰগ্গো

১. সীহাসনদাযকত্থেরঅপদানং

১. ‘‘নিব্বুতে লোকনাথম্হি, সিদ্ধত্থে দ্ৰিপদুত্তমে [দিপদুত্তমে (সী. স্যা.)];

ৰিত্থারিকে পাৰচনে, বাহুজঞ্ঞম্হি সাসনে.

২. ‘‘পসন্নচিত্তো সুমনো, সীহাসনমকাসহং;

সীহাসনং করিত্ৰান, পাদপীঠমকাসহং.

৩. ‘‘সীহাসনে চ ৰস্সন্তে, ঘরং তত্থ অকাসহং;

তেন চিত্তপ্পসাদেন, তুসিতং উপপজ্জহং.

৪. ‘‘আযামেন চতুব্বীস, যোজনং আসি [যোজনাসিংসু (স্যা. ক.)] তাৰদে;

ৰিমানং সুকতং ময্হং, ৰিত্থারেন চতুদ্দস.

৫. ‘‘সতং [সত্ত (স্যা.)] কঞ্ঞাসহস্সানি, পরিৰারেন্তি মং সদা;

সোণ্ণমযঞ্চ পল্লঙ্কং, ব্যম্হে আসি সুনিম্মিতং.

৬. ‘‘হত্থিযানং অস্সযানং, দিব্বযানং উপট্ঠিতং;

পাসাদা সিৰিকা চেৰ, নিব্বত্তন্তি যদিচ্ছকং.

৭. ‘‘মণিমযা চ পল্লঙ্কা, অঞ্ঞে সারমযা বহূ;

নিব্বত্তন্তি মমং সব্বে, সীহাসনস্সিদং ফলং.

৮. ‘‘সোণ্ণমযা রূপিমযা, ফলিকাৰেল়ুরিযামযা;

পাদুকা অভিরূহামি, পাদপীঠস্সিদং ফলং.

৯. ‘‘চতুন্নৰুতিতো [চতুনৰুতে ইতো (সী. স্যা.)] কপ্পে, যং কম্মমকরিং তদা;

দুগ্গতিং নাভিজানামি, পুঞ্ঞকম্মস্সিদং ফলং.

১০. ‘‘তেসত্ততিম্হিতো কপ্পে, ইন্দনামা তযো জনা;

দ্ৰেসত্ততিম্হিতো কপ্পে, তযো সুমননামকা.

১১. ‘‘সমসত্ততিতো কপ্পে, তযো ৰরুণনামকা;

সত্তরতনসম্পন্না, চতুদীপম্হি ইস্সরা.

১২. ‘‘পটিসম্ভিদা চতস্সো, ৰিমোক্খাপি চ অট্ঠিমে;

ছল়ভিঞ্ঞা সচ্ছিকতা, কতং বুদ্ধস্স সাসনং’’.

ইত্থং সুদং আযস্মা সীহাসনদাযকো থেরো ইমা গাথাযো অভাসিত্থাতি.

সীহাসনদাযকত্থেরস্সাপদানং পঠমং.

২. একত্থম্ভিকত্থেরঅপদানং

১৩. ‘‘সিদ্ধত্থস্স ভগৰতো, মহাপূগগণো অহু;

সরণং গতা চ তে বুদ্ধং, সদ্দহন্তি তথাগতং.

১৪. ‘‘সব্বে সঙ্গম্ম মন্তেত্ৰা, মাল়ং কুব্বন্তি সত্থুনো;

একত্থম্ভং অলভন্তা, ৰিচিনন্তি ব্রহাৰনে.

১৫. ‘‘তেহং অরঞ্ঞে দিস্ৰান, উপগম্ম গণং তদা;

অঞ্জলিং পগ্গহেত্ৰান, পরিপুচ্ছিং গণং অহং.

১৬. ‘‘তে মে পুট্ঠা ৰিযাকংসু, সীলৰন্তো উপাসকা;

মাল়ং মযং কত্তুকামা, একত্থম্ভো ন লব্ভতি.

১৭. ‘‘একত্থম্ভং মমং দেথ, অহং দস্সামি সত্থুনো;

আহরিস্সামহং থম্ভং, অপ্পোস্সুক্কা ভৰন্তু তে [ভৰন্তু ৰো (সী.), ভৰাথ ৰো (?)].

১৮. ‘‘তে মে থম্ভং পৰেচ্ছিংসু, পসন্না তুট্ঠমানসা;

ততো পটিনিৰত্তিত্ৰা, অগমংসু সকং ঘরং.

১৯. ‘‘অচিরং গতে পূগগণে, থম্ভং অহাসহং তদা;

হট্ঠো হট্ঠেন চিত্তেন, পঠমং উস্সপেসহং.

২০. ‘‘তেন চিত্তপ্পসাদেন, ৰিমানং উপপজ্জহং;

উব্বিদ্ধং ভৰনং ময্হং, সত্তভূমং [সতভূমং (সী. ক.)] সমুগ্গতং.

২১. ‘‘ৰজ্জমানাসু ভেরীসু, পরিচারেমহং সদা;

পঞ্চপঞ্ঞাসকপ্পম্হি, রাজা আসিং যসোধরো.

২২. ‘‘তত্থাপি ভৰনং ময্হং, সত্তভূমং সমুগ্গতং;

কূটাগারৰরূপেতং, একত্থম্ভং মনোরমং.

২৩. ‘‘একৰীসতিকপ্পম্হি, উদেনো নাম খত্তিযো;

তত্রাপি ভৰনং ময্হং, সত্তভূমং সমুগ্গতং.

২৪. ‘‘যং যং যোনুপপজ্জামি, দেৰত্তং অথ মানুসং;

অনুভোমি সুখং সব্বং [সব্বমেতং (স্যা.)], একত্থম্ভস্সিদং ফলং.

২৫. ‘‘চতুন্নৰুতিতো কপ্পে, যং থম্ভমদদং তদা;

দুগ্গতিং নাভিজানামি, একত্থম্ভস্সিদং ফলং.

২৬. ‘‘পটিসম্ভিদা চতস্সো, ৰিমোক্খাপি চ অট্ঠিমে;

ছল়ভিঞ্ঞা সচ্ছিকতা, কতং বুদ্ধস্স সাসনং’’.

ইত্থং সুদং আযস্মা একত্থম্ভিকো থেরো ইমা গাথাযো অভাসিত্থাতি.

একত্থম্ভিকত্থেরস্সাপদানং দুতিযং.

৩. নন্দত্থেরঅপদানং

২৭. ‘‘পদুমুত্তরস্স ভগৰতো, লোকজেট্ঠস্স তাদিনো;

ৰত্থং খোমং মযা দিন্নং, সযম্ভুস্স মহেসিনো.

২৮. ‘‘তং মে বুদ্ধো ৰিযাকাসি, জলজুত্তরনামকো;

‘ইমিনা ৰত্থদানেন, হেমৰণ্ণো ভৰিস্সসি.

২৯. ‘‘‘দ্ৰে সম্পত্তী অনুভোত্ৰা, কুসলমূলেহি চোদিতো;

গোতমস্স ভগৰতো, কনিট্ঠো ত্ৰং ভৰিস্সসি.

৩০. ‘‘‘রাগরত্তো সুখসীলো, কামেসু গেধমাযুতো;

বুদ্ধেন চোদিতো সন্তো, তদা [ততো (স্যা.)] ত্ৰং পব্বজিস্সসি.

৩১. ‘‘‘পব্বজিত্ৰান ত্ৰং তত্থ, কুসলমূলেন চোদিতো;

সব্বাসৰে পরিঞ্ঞায, নিব্বাযিস্সসিনাসৰো’.

৩২. ‘‘সত্ত [সত (স্যা.)] কপ্পসহস্সম্হি, চতুরো চেল়নামকা;

সট্ঠি কপ্পসহস্সম্হি, উপচেলা চতুজ্জনা.

৩৩. ‘‘পঞ্চ কপ্পসহস্সম্হি, চেল়াৰ চতুরো জনা;

সত্তরতনসম্পন্না, চতুদীপম্হি ইস্সরা.

৩৪. ‘‘পটিসম্ভিদা চতস্সো, ৰিমোক্খাপি চ অট্ঠিমে;

ছল়ভিঞ্ঞা সচ্ছিকতা, কতং বুদ্ধস্স সাসনং’’.

ইত্থং সুদং আযস্মা নন্দো থেরো ইমা গাথাযো অভাসিত্থাতি.

নন্দত্থেরস্সাপদানং ততিযং.

৪. চূল়পন্থকত্থেরঅপদানং

৩৫. ‘‘পদুমুত্তরো নাম জিনো, আহুতীনং পটিগ্গহো;

গণম্হা ৰূপকট্ঠো সো, হিমৰন্তে ৰসী তদা.

৩৬. ‘‘অহম্পি হিমৰন্তম্হি, ৰসামি অস্সমে তদা;

অচিরাগতং মহাৰীরং, উপেসিং লোকনাযকং.

৩৭. ‘‘পুপ্ফচ্ছত্তং গহেত্ৰান, উপগচ্ছিং নরাসভং;

সমাধিং সমাপজ্জন্তং, অন্তরাযমকাসহং.

৩৮. ‘‘উভো হত্থেহি পগ্গয্হ, পুপ্ফচ্ছত্তং অদাসহং;

পটিগ্গহেসি ভগৰা, পদুমুত্তরো মহামুনি.

৩৯. ‘‘সব্বে দেৰা অত্তমনা, হিমৰন্তং উপেন্তি তে;

সাধুকারং পৰত্তেসুং, অনুমোদিস্সতি চক্খুমা.

৪০. ‘‘ইদং ৰত্ৰান তে দেৰা, উপগচ্ছুং নরুত্তমং;

আকাসে ধারযন্তস্স [ধারযন্তং মে (ক), ধারযতো মে (?)], পদুমচ্ছত্তমুত্তমং.

৪১. ‘‘সতপত্তছত্তং পগ্গয্হ, অদাসি তাপসো মম;

‘তমহং কিত্তযিস্সামি, সুণাথ মম ভাসতো.

৪২. ‘‘‘পঞ্চৰীসতিকপ্পানি, দেৰরজ্জং করিস্সতি;

চতুত্তিংসতিক্খত্তুঞ্চ, চক্কৰত্তী ভৰিস্সতি.

৪৩. ‘‘‘যং যং যোনিং সংসরতি, দেৰত্তং অথ মানুসং;

অব্ভোকাসে পতিট্ঠন্তং, পদুমং ধারযিস্সতি’.

৪৪. ‘‘কপ্পসতসহস্সম্হি, ওক্কাককুলসম্ভৰো;

গোতমো নাম গোত্তেন [নামেন (সী. ক.)], সত্থা লোকে ভৰিস্সতি.

৪৫. ‘‘‘পকাসিতে পাৰচনে, মনুস্সত্তং লভিস্সতি;

মনোমযম্হি কাযম্হি, উত্তমো সো ভৰিস্সতি.

৪৬. ‘‘‘দ্ৰে ভাতরো ভৰিস্সন্তি, উভোপি পন্থকৰ্হযা;

অনুভোত্ৰা উত্তমত্থং, জোতযিস্সন্তি সাসনং’.

৪৭. ‘‘সোহং অট্ঠারসৰস্সো [সো অট্ঠারসৰস্সোহং (স্যা.)], পব্বজিং অনগারিযং;

ৰিসেসাহং ন ৰিন্দামি, সক্যপুত্তস্স সাসনে.

৪৮. ‘‘দন্ধা ময্হং গতী আসি, পরিভূতো পুরে অহুং [অহং (স্যা.)];

ভাতা চ মং পণামেসি, গচ্ছ দানি সকং ঘরং.

৪৯. ‘‘সোহং পণামিতো সন্তো, সঙ্ঘারামস্স কোট্ঠকে;

দুম্মনো তত্থ অট্ঠাসিং, সামঞ্ঞস্মিং অপেক্খৰা.

৫০. ‘‘ভগৰা তত্থ [অথেত্থ সত্থা (সী. স্যা.)] আগচ্ছি, সীসং ময্হং পরামসি;

বাহায মং গহেত্ৰান, সঙ্ঘারামং পৰেসযি.

৫১. ‘‘অনুকম্পায মে সত্থা, অদাসি পাদপুঞ্ছনিং;

এৰং সুদ্ধং অধিট্ঠেহি, একমন্তমধিট্ঠহং.

৫২. ‘‘হত্থেহি তমহং গয্হ, সরিং কোকনদং অহং;

তত্থ চিত্তং ৰিমুচ্চি মে, অরহত্তং অপাপুণিং.

৫৩. ‘‘মনোমযেসু কাযেসু, সব্বত্থ পারমিং গতো;

সব্বাসৰে পরিঞ্ঞায, ৰিহরামি অনাসৰো.

৫৪. ‘‘পটিসম্ভিদা চতস্সো, ৰিমোক্খাপি চ অট্ঠিমে;

ছল়ভিঞ্ঞা সচ্ছিকতা, কতং বুদ্ধস্স সাসনং’’.

ইত্থং সুদং আযস্মা চূল়পন্থকো [চুল্লপন্থকো (সী. স্যা.)] থেরো ইমা গাথাযো অভাসিত্থাতি.

চূল়পন্থকত্থেরস্সাপদানং চতুত্থং.

৫. পিলিন্দৰচ্ছত্থেরঅপদানং

৫৫. ‘‘নিব্বুতে লোকনাথম্হি, সুমেধে অগ্গপুগ্গলে;

পসন্নচিত্তো সুমনো, থূপপূজং অকাসহং.

৫৬. ‘‘যে চ খীণাসৰা তত্থ, ছল়ভিঞ্ঞা মহিদ্ধিকা;

তেহং তত্থ সমানেত্ৰা, সঙ্ঘভত্তং অকাসহং.

৫৭. ‘‘সুমেধস্স ভগৰতো, উপট্ঠাকো তদা অহু;

সুমেধো নাম নামেন, অনুমোদিত্থ সো তদা.

৫৮. ‘‘তেন চিত্তপ্পসাদেন, ৰিমানং উপপজ্জহং;

ছল়াসীতিসহস্সানি, অচ্ছরাযো রমিংসু মে.

৫৯. ‘‘মমেৰ অনুৰত্তন্তি, সব্বকামেহি তা সদা;

অঞ্ঞে দেৰে অভিভোমি, পুঞ্ঞকম্মস্সিদং ফলং.

৬০. ‘‘পঞ্চৰীসতিকপ্পম্হি, ৰরুণো নাম খত্তিযো;

ৰিসুদ্ধভোজনো [সুসুদ্ধভোজনো (সী.)] আসিং, চক্কৰত্তী অহং তদা.

৬১. ‘‘ন তে বীজং পৰপন্তি, নপি নীযন্তি নঙ্গলা;

অকট্ঠপাকিমং সালিং, পরিভুঞ্জন্তি মানুসা.

৬২. ‘‘তত্থ রজ্জং করিত্ৰান, দেৰত্তং পুন গচ্ছহং;

তদাপি এদিসা ময্হং, নিব্বত্তা ভোগসম্পদা.

৬৩. ‘‘ন মং মিত্তা অমিত্তা ৰা, হিংসন্তি সব্বপাণিনো;

সব্বেসম্পি পিযো হোমি, পুঞ্ঞকম্মস্সিদং ফলং.

৬৪. ‘‘তিংসকপ্পসহস্সম্হি, যং দানমদদিং তদা;

দুগ্গতিং নাভিজানামি, গন্ধালেপস্সিদং ফলং.

৬৫. ‘‘ইমস্মিং ভদ্দকে কপ্পে, একো আসিং জনাধিপো;

মহানুভাৰো রাজাহং [রাজীসি (স্যা. ক.)], চক্কৰত্তী মহব্বলো.

৬৬. ‘‘সোহং পঞ্চসু সীলেসু, ঠপেত্ৰা জনতং বহুং;

পাপেত্ৰা সুগতিংযেৰ, দেৰতানং পিযো অহুং.

৬৭. ‘‘পটিসম্ভিদা চতস্সো, ৰিমোক্খাপি চ অট্ঠিমে;

ছল়ভিঞ্ঞা সচ্ছিকতা, কতং বুদ্ধস্স সাসনং’’.

ইত্থং সুদং আযস্মা পিলিন্দৰচ্ছো [পিলিন্দিৰচ্ছো (সী.)] থেরো ইমা গাথাযো অভাসিত্থাতি.

পিলিন্দৰচ্ছত্থেরস্সাপদানং পঞ্চমং.