৭. উপসেনৰঙ্গন্তপুত্তত্থেরঅপদানং

৮৬. ‘‘পদুমুত্তরং ভগৰন্তং, লোকজেট্ঠং নরাসভং;

পব্ভারম্হি নিসীদন্তং, উপগচ্ছিং নরুত্তমং.

৮৭. ‘‘কণিকারপুপ্ফং [কণিকারং পুপ্ফিতং (সী. স্যা.)] দিস্ৰা, ৰণ্টে ছেত্ৰানহং তদা;

অলঙ্করিত্ৰা ছত্তম্হি, বুদ্ধস্স অভিরোপযিং.

৮৮. ‘‘পিণ্ডপাতঞ্চ পাদাসিং, পরমন্নং সুভোজনং;

বুদ্ধেন নৰমে তত্থ, সমণে অট্ঠ ভোজযিং.

৮৯. ‘‘অনুমোদি মহাৰীরো, সযম্ভূ অগ্গপুগ্গলো;

ইমিনা ছত্তদানেন, পরমন্নপৰেচ্ছনা.

৯০. ‘‘তেন চিত্তপ্পসাদেন, সম্পত্তিমনুভোস্সসি;

ছত্তিংসক্খত্তুং দেৰিন্দো, দেৰরজ্জং করিস্সতি.

৯১. ‘‘একৰীসতিক্খত্তুঞ্চ, চক্কৰত্তী ভৰিস্সতি;

পদেসরজ্জং ৰিপুলং, গণনাতো অসঙ্খিযং.

৯২. ‘‘সতসহস্সিতো কপ্পে, ওক্কাককুলসম্ভৰো;

গোতমো নাম গোত্তেন, সত্থা লোকে ভৰিস্সতি [যং ৰদন্তি সুমেধোতি, ভূরিপঞ্ঞং সুমেধসং; কপ্পেতো সতসহস্সে, এস বুদ্ধো ভৰিস্সতি; (ক.)].

৯৩. ‘‘সাসনে দিব্বমানম্হি, মনুস্সত্তং গমিস্সতি;

তস্স ধম্মেসু দাযাদো, ওরসো ধম্মনিম্মিতো.

৯৪. ‘‘উপসেনোতি নামেন, হেস্সতি সত্থু সাৰকো;

[ইদং পাদদ্ৰযং থেরগাথাঅট্ঠকথাযমেৰ দিস্সতি] সমন্তপাসাদিকত্তা, অগ্গট্ঠানে ঠপেস্সতি

[ইদং পাদদ্ৰযং থেরগাথাঅট্ঠকথাযমেৰ দিস্সতি].

৯৫. ‘‘চরিমং ৰত্ততে ময্হং, ভৰা সব্বে সমূহতা;

ধারেমি অন্তিমং দেহং, জেত্ৰা মারং সৰাহনং [সৰাহিনিং (?)].

৯৬. ‘‘পটিসম্ভিদা চতস্সো, ৰিমোক্খাপি চ অট্ঠিমে;

ছল়ভিঞ্ঞা সচ্ছিকতা, কতং বুদ্ধস্স সাসনং’’.

ইত্থং সুদং আযস্মা উপসেনো ৰঙ্গন্তপুত্তো থেরো ইমা গাথাযো অভাসিত্থাতি.

উপসেনৰঙ্গন্তপুত্তত্থেরস্সাপদানং সত্তমং.

ততিযভাণৰারং.