১. আলম্বণদাযকত্থেরঅপদানং

১. ‘‘অত্থদস্সিস্স ভগৰতো, লোকজেট্ঠস্স তাদিনো;

আলম্বণং মযা দিন্নং, দ্ৰিপদিন্দস্স তাদিনো.

২. ‘‘ধরণিং পটিপজ্জামি, ৰিপুলং সাগরপ্পরং;

পাণেসু চ ইস্সরিযং, ৰত্তেমি ৰসুধায চ.

৩. ‘‘কিলেসা ঝাপিতা ময্হং, ভৰা সব্বে সমূহতা;

তিস্সো ৰিজ্জা অনুপ্পত্তা, কতং বুদ্ধস্স সাসনং.

৪. ‘‘ইতো দ্ৰেসট্ঠিকপ্পম্হি, তযো আসিংসু খত্তিযা;

একাপস্সিতনামা তে, চক্কৰত্তী মহব্বলা.

৫. ‘‘পটিসম্ভিদা চতস্সো, ৰিমোক্খাপি চ অট্ঠিমে;

ছল়ভিঞ্ঞা সচ্ছিকতা, কতং বুদ্ধস্স সাসনং’’.

ইত্থং সুদং আযস্মা আলম্বণদাযকো থেরো ইমা গাথাযো অভাসিত্থাতি.

আলম্বণদাযকত্থেরস্সাপদানং পঠমং.