২. অজিনদাযকত্থেরঅপদানং

৬. ‘‘একত্তিংসে ইতো কপ্পে, গণসত্থারকো অহং;

অদ্দসং ৰিরজং বুদ্ধং, আহুতীনং পটিগ্গহং.

৭. ‘‘চম্মখণ্ডং মযা দিন্নং, সিখিনো লোকবন্ধুনো;

তেন কম্মেন দ্ৰিপদিন্দ, লোকজেট্ঠ নরাসভ.

৮. ‘‘সম্পত্তিং অনুভোত্ৰান, কিলেসে ঝাপযিং অহং;

ধারেমি অন্তিমং দেহং, সম্মাসম্বুদ্ধসাসনে.

৯. ‘‘একত্তিংসে ইতো কপ্পে, অজিনং যং অদাসহং;

দুগ্গতিং নাভিজানামি, অজিনস্স ইদং ফলং.

১০. ‘‘ইতো পঞ্চমকে কপ্পে, রাজা আসিং সুদাযকো;

সত্তরতনসম্পন্নো, চক্কৰত্তী মহব্বলো.

১১. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা অজিনদাযকো থেরো ইমা গাথাযো অভাসিত্থাতি.

অজিনদাযকত্থেরস্সাপদানং দুতিযং.