১০. কুমুদদাযকত্থেরঅপদানং

৫১. ‘‘হিমৰন্তস্সাৰিদূরে, মহাজাতস্সরো অহু;

পদুমুপ্পলসঞ্ছন্নো, পুণ্ডরীকসমোত্থটো.

৫২. ‘‘কুকুত্থো নাম নামেন, তত্থাসিং সকুণো তদা;

সীলৰা বুদ্ধিসম্পন্নো, পুঞ্ঞাপুঞ্ঞেসু কোৰিদো.

৫৩. ‘‘পদুমুত্তরো লোকৰিদূ, আহুতীনং পটিগ্গহো;

জাতস্সরস্সাৰিদূরে, সঞ্চরিত্থ মহামুনি.

৫৪. ‘‘জলজং কুমুদং ছেত্ৰা, উপনেসিং মহেসিনো;

মম সঙ্কপ্পমঞ্ঞায, পটিগ্গহি মহামুনি.

৫৫. ‘‘তঞ্চ দানং দদিত্ৰান, সুক্কমূলেন চোদিতো;

কপ্পানং সতসহস্সং, দুগ্গতিং নুপপজ্জহং.

৫৬. ‘‘সোল়সেতো কপ্পসতে, আসুং ৰরুণনামকা;

অট্ঠ এতে জনাধিপা, চক্কৰত্তী মহব্বলা.

৫৭. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা কুমুদদাযকো থেরো ইমা গাথাযো অভাসিত্থাতি.

কুমুদদাযকত্থেরস্সাপদানং দসমং.

বন্ধুজীৰকৰগ্গো সোল়সমো.