১৬. বন্ধুজীৰকৰগ্গো

১. বন্ধুজীৰকত্থেরঅপদানং

১. ‘‘চন্দংৰ ৰিমলং সুদ্ধং, ৰিপ্পসন্নমনাৰিলং;

নন্দীভৰপরিক্খীণং, তিণ্ণং লোকে ৰিসত্তিকং.

২. ‘‘নিব্বাপযন্তং জনতং, তিণ্ণং [দিস্ৰা (?)] তারযতং ৰরং [তারযতং মুনিং (স্যা.)];

মুনিং ৰনম্হি ঝাযন্তং [ৰনস্মিং ঝাযমানং তং (সী. স্যা.)], একগ্গং সুসমাহিতং.

৩. ‘‘বন্ধুজীৰকপুপ্ফানি, লগেত্ৰা সুত্তকেনহং;

বুদ্ধস্স অভিরোপযিং, সিখিনো লোকবন্ধুনো.

৪. ‘‘একত্তিংসে ইতো কপ্পে, যং কম্মমকরিং তদা;

দুগ্গতিং নাভিজানামি, বুদ্ধপূজাযিদং ফলং.

৫. ‘‘ইতো সত্তমকে কপ্পে, মনুজিন্দো মহাযসো;

সমন্তচক্খু নামাসি, চক্কৰত্তী মহব্বলো.

৬. ‘‘পটিসম্ভিদা চতস্সো, ৰিমোক্খাপি চ অট্ঠিমে;

ছল়ভিঞ্ঞা সচ্ছিকতা, কতং বুদ্ধস্স সাসনং’’.

ইত্থং সুদং আযস্মা বন্ধুজীৰকো থেরো ইমা গাথাযো অভাসিত্থাতি.

বন্ধুজীৰকত্থেরস্সাপদানং পঠমং.

২. তম্বপুপ্ফিযত্থেরঅপদানং

৭. ‘‘পরকম্মাযনে যুত্তো, অপরাধং অকাসহং;

ৰনন্তং অভিধাৰিস্সং, ভযৰেরসমপ্পিতো.

৮. ‘‘পুপ্ফিতং পাদপং দিস্ৰা, পিণ্ডিবন্ধং সুনিম্মিতং;

তম্বপুপ্ফং গহেত্ৰান, বোধিযং ওকিরিং অহং.

৯. ‘‘সম্মজ্জিত্ৰান তং বোধিং, পাটলিং পাদপুত্তমং;

পল্লঙ্কং আভুজিত্ৰান, বোধিমূলে উপাৰিসিং.

১০. ‘‘গতমগ্গং গৰেসন্তা, আগচ্ছুং মম সন্তিকং;

তে চ দিস্ৰানহং তত্থ, আৰজ্জিং বোধিমুত্তমং.

১১. ‘‘ৰন্দিত্ৰান অহং বোধিং, ৰিপ্পসন্নেন চেতসা;

অনেকতালে পপতিং, গিরিদুগ্গে ভযানকে.

১২. ‘‘একনৰুতিতো কপ্পে, যং পুপ্ফমভিরোপযিং;

দুগ্গতিং নাভিজানামি, বোধিপূজাযিদং ফলং.

১৩. ‘‘ইতো চ ততিযে কপ্পে, রাজা সুসঞ্ঞতো অহং [সংথুসিতো অহুং (সী.)];

সত্তরতনসম্পন্নো, চক্কৰত্তী মহব্বলো.

১৪. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা তম্বপুপ্ফিযো থেরো ইমা গাথাযো অভাসিত্থাতি.

তম্বপুপ্ফিযত্থেরস্সাপদানং দুতিযং.

৩. ৰীথিসম্মজ্জকত্থেরঅপদানং

১৫. ‘‘উদেন্তং সতরংসিংৰ, পীতরংসিংৰ [সিতরংসিংৰ (সী. স্যা.)] ভাণুমং;

পন্নরসে যথা চন্দং, নিয্যন্তং লোকনাযকং.

১৬. ‘‘অট্ঠসট্ঠিসহস্সানি, সব্বে খীণাসৰা অহুং;

পরিৰারিংসু সম্বুদ্ধং, দ্ৰিপদিন্দং নরাসভং.

১৭. ‘‘সম্মজ্জিত্ৰান তং ৰীথিং, নিয্যন্তে লোকনাযকে;

উস্সাপেসিং ধজং তত্থ, ৰিপ্পসন্নেন চেতসা.

১৮. ‘‘একনৰুতিতো কপ্পে, যং ধজং অভিরোপযিং;

দুগ্গতিং নাভিজানামি, ধজদানস্সিদং ফলং.

১৯. ‘‘ইতো চতুত্থকে কপ্পে, রাজাহোসিং মহব্বলো;

সব্বাকারেন সম্পন্নো, সুধজো ইতি ৰিস্সুতো.

২০. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা ৰীথিসম্মজ্জকো থেরো ইমা গাথাযো অভাসিত্থাতি.

ৰীথিসম্মজ্জকত্থেরস্সাপদানং ততিযং.

৪. কক্কারুপুপ্ফপূজকত্থেরঅপদানং

২১. ‘‘দেৰপুত্তো অহং সন্তো, পূজযিং সিখিনাযকং;

কক্কারুপুপ্ফং পগ্গয্হ, বুদ্ধস্স অভিরোপযিং.

২২. ‘‘একত্তিংসে ইতো কপ্পে, যং পুপ্ফমভিরোপযিং;

দুগ্গতিং নাভিজানামি, বুদ্ধপূজাযিদং ফলং.

২৩. ‘‘ইতো চ নৰমে কপ্পে, রাজা সত্তুত্তমো অহুং;

সত্তরতনসম্পন্নো, চক্কৰত্তী মহব্বলো.

২৪. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা কক্কারুপুপ্ফপূজকো থেরো ইমা গাথাযো অভাসিত্থাতি.

কক্কারুপুপ্ফপূজকত্থেরস্সাপদানং চতুত্থং.

৫. মন্দারৰপুপ্ফপূজকত্থেরঅপদানং

২৫. ‘‘দেৰপুত্তো অহং সন্তো, পূজযিং সিখিনাযকং;

মন্দারৰেন পুপ্ফেন, বুদ্ধস্স অভিরোপযিং.

২৬. ‘‘সত্তাহং ছদনং আসি, দিব্বং মালং তথাগতে;

সব্বে জনা সমাগন্ত্ৰা, নমস্সিংসু তথাগতং.

২৭. ‘‘একত্তিংসে ইতো কপ্পে, যং পুপ্ফমভিপূজযিং;

দুগ্গতিং নাভিজানামি, বুদ্ধপূজাযিদং ফলং.

২৮. ‘‘ইতো চ দসমে কপ্পে, রাজাহোসিং জুতিন্ধরো;

সত্তরতনসম্পন্নো, চক্কৰত্তী মহব্বলো.

২৯. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা মন্দারৰপুপ্ফপূজকো থেরো ইমা গাথাযো অভাসিত্থাতি.

মন্দারৰপুপ্ফপূজকত্থেরস্সাপদানং পঞ্চমং.

৬. কদম্বপুপ্ফিযত্থেরঅপদানং

৩০. ‘‘হিমৰন্তস্সাৰিদূরে, কুক্কুটো নাম পব্বতো;

তম্হি পব্বতপাদম্হি, সত্ত বুদ্ধা ৰসন্তি তে.

৩১. ‘‘কদম্বং পুপ্ফিতং দিস্ৰা, দীপরাজংৰ উগ্গতং;

উভো হত্থেহি পগ্গয্হ, সত্ত বুদ্ধে সমোকিরিং.

৩২. ‘‘চতুন্নৰুতিতো কপ্পে, যং পুপ্ফমভিরোপযিং;

দুগ্গতিং নাভিজানামি, বুদ্ধপূজাযিদং ফলং.

৩৩. ‘‘দ্ৰেনৰুতে ইতো কপ্পে, সত্তাসুং পুপ্ফনামকা;

সত্তরতনসম্পন্না, চক্কৰত্তী মহব্বলা.

৩৪. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা কদম্বপুপ্ফিযো থেরো ইমা গাথাযো অভাসিত্থাতি;

কদম্বপুপ্ফিযত্থেরস্সাপদানং ছট্ঠং.

৭. তিণসূলকত্থেরঅপদানং

৩৫. ‘‘হিমৰন্তস্সাৰিদূরে, ভূতগণো নাম পব্বতো;

ৰসতেকো জিনো তত্থ, সযম্ভূ লোকনিস্সটো.

৩৬. ‘‘তিণসূলং গহেত্ৰান, বুদ্ধস্স অভিরোপযিং;

একূনসতসহস্সং, কপ্পং ন ৰিনিপাতিকো.

৩৭. ‘‘ইতো একাদসে কপ্পে, একোসিং ধরণীরুহো;

সত্তরতনসম্পন্নো, চক্কৰত্তী মহব্বলো.

৩৮. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা তিণসূলকো থেরো ইমা গাথাযো অভাসিত্থাতি.

তিণসূলকত্থেরস্সাপদানং সত্তমং.

৮. নাগপুপ্ফিযত্থেরঅপদানং

৩৯. ‘‘সুৰচ্ছো নাম নামেন, ব্রাহ্মণো মন্তপারগূ;

পুরক্খতো সসিস্সেহি, ৰসতে পব্বতন্তরে.

৪০. ‘‘পদুমুত্তরো নাম জিনো, আহুতীনং পটিগ্গহো;

মমুদ্ধরিতুকামো সো, আগচ্ছি মম সন্তিকং.

৪১. ‘‘ৰেহাসম্হি চঙ্কমতি, ধূপাযতি জলতে তথা;

হাসং মমং ৰিদিত্ৰান, পক্কামি পাচিনামুখো.

৪২. ‘‘তঞ্চ অচ্ছরিযং দিস্ৰা, অব্ভুতং লোমহংসনং;

নাগপুপ্ফং গহেত্ৰান, গতমগ্গম্হি ওকিরিং.

৪৩. ‘‘সতসহস্সিতো কপ্পে, যং পুপ্ফং ওকিরিং অহং;

তেন চিত্তপ্পসাদেন, দুগ্গতিং নুপপজ্জহং.

৪৪. ‘‘একত্তিংসে কপ্পসতে [একতিংসে ইতো কম্মে (স্যা.)], রাজা আসি মহারহো;

সত্তরতনসম্পন্নো, চক্কৰত্তী মহব্বলো.

৪৫. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা নাগপুপ্ফিযো থেরো ইমা গাথাযো অভাসিত্থাতি.

নাগপুপ্ফিযত্থেরস্সাপদানং অট্ঠমং.

৯. পুন্নাগপুপ্ফিযত্থেরঅপদানং

৪৬. ‘‘কাননং ৰনমোগয্হ, ৰসামি লুদ্দকো অহং;

পুন্নাগং পুপ্ফিতং দিস্ৰা, বুদ্ধসেট্ঠং অনুস্সরিং.

৪৭. ‘‘তং পুপ্ফং ওচিনিত্ৰান, সুগন্ধং গন্ধিতং সুভং;

থূপং করিত্ৰা পুলিনে, বুদ্ধস্স অভিরোপযিং.

৪৮. ‘‘দ্ৰেনৰুতে ইতো কপ্পে, যং পুপ্ফমভিপূজযিং;

দুগ্গতিং নাভিজানামি, বুদ্ধপূজাযিদং ফলং.

৪৯. ‘‘একম্হি নৰুতে কপ্পে, একো আসিং তমোনুদো;

সত্তরতনসম্পন্নো, চক্কৰত্তী মহব্বলো.

৫০. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা পুন্নাগপুপ্ফিযো থেরো ইমা গাথাযো অভাসিত্থাতি.

পুন্নাগপুপ্ফিযত্থেরস্সাপদানং নৰমং.

১০. কুমুদদাযকত্থেরঅপদানং

৫১. ‘‘হিমৰন্তস্সাৰিদূরে, মহাজাতস্সরো অহু;

পদুমুপ্পলসঞ্ছন্নো, পুণ্ডরীকসমোত্থটো.

৫২. ‘‘কুকুত্থো নাম নামেন, তত্থাসিং সকুণো তদা;

সীলৰা বুদ্ধিসম্পন্নো, পুঞ্ঞাপুঞ্ঞেসু কোৰিদো.

৫৩. ‘‘পদুমুত্তরো লোকৰিদূ, আহুতীনং পটিগ্গহো;

জাতস্সরস্সাৰিদূরে, সঞ্চরিত্থ মহামুনি.

৫৪. ‘‘জলজং কুমুদং ছেত্ৰা, উপনেসিং মহেসিনো;

মম সঙ্কপ্পমঞ্ঞায, পটিগ্গহি মহামুনি.

৫৫. ‘‘তঞ্চ দানং দদিত্ৰান, সুক্কমূলেন চোদিতো;

কপ্পানং সতসহস্সং, দুগ্গতিং নুপপজ্জহং.

৫৬. ‘‘সোল়সেতো কপ্পসতে, আসুং ৰরুণনামকা;

অট্ঠ এতে জনাধিপা, চক্কৰত্তী মহব্বলা.

৫৭. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা কুমুদদাযকো থেরো ইমা গাথাযো অভাসিত্থাতি.

কুমুদদাযকত্থেরস্সাপদানং দসমং.

বন্ধুজীৰকৰগ্গো সোল়সমো.