১৭. সুপারিচরিযৰগ্গো

১. সুপারিচরিযত্থেরঅপদানং

১. ‘‘পদুমো নাম নামেন, দ্ৰিপদিন্দো নরাসভো;

পৰনা অভিনিক্খম্ম, ধম্মং দেসেতি চক্খুমা.

২. ‘‘যক্খানং সমযো আসি, অৰিদূরে মহেসিনো;

যেন কিচ্চেন সম্পত্তা, অজ্ঝাপেক্খিংসু তাৰদে.

৩. ‘‘বুদ্ধস্স গিরমঞ্ঞায, অমতস্স চ দেসনং;

পসন্নচিত্তো সুমনো, অপ্ফোটেত্ৰা উপট্ঠহিং.

৪. ‘‘সুচিণ্ণস্স ফলং পস্স, উপট্ঠানস্স সত্থুনো;

তিংসকপ্পসহস্সেসু, দুগ্গতিং নুপপজ্জহং.

৫. ‘‘ঊনতিংসে কপ্পসতে, সমলঙ্কতনামকো;

সত্তরতনসম্পন্নো, চক্কৰত্তী মহব্বলো.

৬. ‘‘পটিসম্ভিদা চতস্সো, ৰিমোক্খাপি চ অট্ঠিমে;

ছল়ভিঞ্ঞা সচ্ছিকতা, কতং বুদ্ধস্স সাসনং’’.

ইত্থং সুদং আযস্মা সুপারিচরিযো থেরো ইমা গাথাযো অভাসিত্থাতি.

সুপারিচরিযত্থেরস্সাপদানং পঠমং.

২. কণৰেরপুপ্ফিযত্থেরঅপদানং

৭. ‘‘সিদ্ধত্থো নাম ভগৰা, লোকজেট্ঠো নরাসভো;

পুরক্খতো সাৰকেহি, নগরং পটিপজ্জথ.

৮. ‘‘রঞ্ঞো অন্তেপুরে আসিং, গোপকো অভিসম্মতো;

পাসাদে উপৰিট্ঠোহং, অদ্দসং লোকনাযকং.

৯. ‘‘কণৰেরং [করৰীরং (সক্কতানুলোমং), কণৰীরং (পাকত)] গহেত্ৰান, ভিক্খুসঙ্ঘে সমোকিরিং;

বুদ্ধস্স ৰিসুং কত্ৰান, ততো ভিয্যো সমোকিরিং.

১০. ‘‘চতুন্নৰুতিতো কপ্পে, যং পুপ্ফমভিপূজযিং [রোপযিং (স্যা.)];

দুগ্গতিং নাভিজানামি, বুদ্ধপূজাযিদং ফলং.

১১. ‘‘সত্তাসীতিম্হিতো কপ্পে, চতুরাসুং মহিদ্ধিকা;

সত্তরতনসম্পন্না, চক্কৰত্তী মহব্বলা.

১২. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা কণৰেরপুপ্ফিযো থেরো ইমা গাথাযো অভাসিত্থাতি.

কণৰেরপুপ্ফিযত্থেরস্সাপদানং দুতিযং.

৩. খজ্জকদাযকত্থেরঅপদানং

১৩. ‘‘তিস্সস্স খো ভগৰতো, পুব্বে ফলমদাসহং;

নাল়িকেরঞ্চ পাদাসিং, খজ্জকং অভিসম্মতং.

১৪. ‘‘বুদ্ধস্স তমহং দত্ৰা, তিস্সস্স তু মহেসিনো;

মোদামহং কামকামী, উপপজ্জিং [কামকারী, উপপজ্জং (সী.)] যমিচ্ছকং [সব্বত্থপি এৰমেৰ দিস্সতি].

১৫. ‘‘দ্ৰেনৰুতে ইতো কপ্পে, যং দানমদদিং তদা;

দুগ্গতিং নাভিজানামি, ফলদানস্সিদং ফলং.

১৬. ‘‘ইতো তেরসকপ্পম্হি, রাজা ইন্দসমো অহু;

সত্তরতনসম্পন্নো, চক্কৰত্তী মহব্বলো.

১৭. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা খজ্জকদাযকো থেরো ইমা গাথাযো অভাসিত্থাতি.

খজ্জকদাযকত্থেরস্সাপদানং ততিযং.

৪. দেসপূজকত্থেরঅপদানং

১৮. ‘‘অত্থদস্সী তু ভগৰা, লোকজেট্ঠো নরাসভো;

অব্ভুগ্গন্ত্ৰান ৰেহাসং, গচ্ছতে অনিলঞ্জসে.

১৯. ‘‘যম্হি দেসে ঠিতো সত্থা, অব্ভুগ্গচ্ছি মহামুনি;

তাহং দেসং অপূজেসিং, পসন্নো সেহি পাণিভি.

২০. ‘‘অট্ঠারসে কপ্পসতে, অদ্দসং যং মহামুনিং;

দুগ্গতিং নাভিজানামি, দেসপূজাযিদং ফলং.

২১. ‘‘একাদসে কপ্পসতে, গোসুজাতসনামকো;

সত্তরতনসম্পন্নো, চক্কৰত্তী মহব্বলো.

২২. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা দেসপূজকো থেরো ইমা গাথাযো অভাসিত্থাতি.

দেসপূজকত্থেরস্সাপদানং চতুত্থং.

৫. কণিকারছত্তিযত্থেরঅপদানং

২৩. ‘‘ৰেস্সভূ নাম সম্বুদ্ধো, লোকজেট্ঠো নরাসভো;

দিৰাৰিহারায মুনি, ওগাহযি মহাৰনং.

২৪. ‘‘কণিকারং ওচিনিত্ৰা, ছত্তং কত্ৰানহং তদা;

পুপ্ফচ্ছদনং কত্ৰান, বুদ্ধস্স অভিরোপযিং.

২৫. ‘‘একত্তিংসে ইতো কপ্পে, যং পুপ্ফমভিরোপযিং;

দুগ্গতিং নাভিজানামি, বুদ্ধপূজাযিদং ফলং.

২৬. ‘‘ইতো ৰীসতিকপ্পম্হি, সোণ্ণাভা অট্ঠ খত্তিযা;

সত্তরতনসম্পন্না, চক্কৰত্তী মহব্বলা.

২৭. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা কণিকারছত্তিযো থেরো ইমা গাথাযো অভাসিত্থাতি.

কণিকারছত্তিযত্থেরস্সাপদানং পঞ্চমং.

৬. সপ্পিদাযকত্থেরঅপদানং

২৮. ‘‘ফুস্সো নামাসি [নামাথ (সী.)] ভগৰা, আহুতীনং পটিগ্গহো;

গচ্ছতে ৰীথিযং ৰীরো, নিব্বাপেন্তো মহাজনং.

২৯. ‘‘অনুপুব্বেন ভগৰা, আগচ্ছি মম সন্তিকং;

ততো তং [ততোহং (সী. স্যা.)] পত্তং পগ্গয্হ, সপ্পিতেলমদাসহং.

৩০. ‘‘দ্ৰেনৰুতে ইতো কপ্পে, যং সপ্পিমদদিং তদা;

দুগ্গতিং নাভিজানামি, সপ্পিদানস্সিদং ফলং.

৩১. ‘‘ছপ্পঞ্ঞাসে ইতো কপ্পে, একো আসি সমোদকো;

সত্তরতনসম্পন্নো, চক্কৰত্তী মহব্বলো.

৩২. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা সপ্পিদাযকো থেরো ইমা গাথাযো অভাসিত্থাতি.

সপ্পিদাযকত্থেরস্সাপদানং ছট্ঠং.

৭. যূথিকপুপ্ফিযত্থেরঅপদানং

৩৩. ‘‘চন্দভাগানদীতীরে, অনুসোতং ৰজামহং;

সযম্ভুং অদ্দসং তত্থ, সালরাজংৰ ফুল্লিতং.

৩৪. ‘‘পুপ্ফং যূথিকমাদায, উপগচ্ছিং মহামুনিং;

পসন্নচিত্তো সুমনো, বুদ্ধস্স অভিরোপযিং.

৩৫. ‘‘চতুন্নৰুতিতো কপ্পে, যং পুপ্ফমভিরোপযিং;

দুগ্গতিং নাভিজানামি, বুদ্ধপূজাযিদং ফলং.

৩৬. ‘‘সত্তসট্ঠিম্হিতো কপ্পে, একো সামুদ্ধরো অহু;

সত্তরতনসম্পন্নো, চক্কৰত্তী মহব্বলো.

৩৭. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা যূথিকপুপ্ফিযো থেরো ইমা গাথাযো অভাসিত্থাতি.

যূথিকপুপ্ফিযত্থেরস্সাপদানং সত্তমং.

৮. দুস্সদাযকত্থেরঅপদানং

৩৮. ‘‘তিৰরাযং পুরে রম্মে, রাজপুত্তোসহং [রাজপুত্তো অহং (সী. স্যা.)] তদা;

পণ্ণাকারং লভিত্ৰান, উপসন্তস্সদাসহং.

৩৯. ‘‘অধিৰাসেসি ভগৰা, ৰত্থং [নৰং (ক.)] হত্থেন আমসি;

সিদ্ধত্থো অধিৰাসেত্ৰা, ৰেহাসং নভমুগ্গমি.

৪০. ‘‘বুদ্ধস্স গচ্ছমানস্স, দুস্সা ধাৰন্তি পচ্ছতো;

তত্থ চিত্তং পসাদেসিং, বুদ্ধো নো অগ্গপুগ্গলো.

৪১. ‘‘চতুন্নৰুতিতো কপ্পে, যং দুস্সমদদিং তদা;

দুগ্গতিং নাভিজানামি, দুস্সদানস্সিদং ফলং.

৪২. ‘‘সত্তসট্ঠিম্হিতো কপ্পে, চক্কৰত্তী তদা অহু;

পরিসুদ্ধোতি নামেন, মনুজিন্দো মহব্বলো.

৪৩. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা দুস্সদাযকো থেরো ইমা গাথাযো অভাসিত্থাতি.

দুস্সদাযকত্থেরস্সাপদানং অট্ঠমং.

৯. সমাদপকত্থেরঅপদানং

৪৪. ‘‘নগরে বন্ধুমতিযা, মহাপূগগণো অহু;

তেসাহং পৰরো আসিং, মম বদ্ধচরা [পট্ঠচরা (স্যা.)] চ তে.

৪৫. ‘‘সব্বে তে সন্নিপাতেত্ৰা, পুঞ্ঞকম্মে সমাদযিং;

মাল়ং কস্সাম সঙ্ঘস্স, পুঞ্ঞক্খেত্তং অনুত্তরং.

৪৬. ‘‘সাধূতি তে পটিস্সুত্ৰা, মম ছন্দৰসানুগা;

নিট্ঠাপেত্ৰা চ তং মাল়ং, ৰিপস্সিস্স অদম্হসে.

৪৭. ‘‘একনৰুতিতো কপ্পে, যং মাল়মদদিং তদা;

দুগ্গতিং নাভিজানামি, মাল়দানস্সিদং ফলং.

৪৮. ‘‘একূনসত্ততিকপ্পে [একূনসট্ঠিকপ্পম্হি (সী. স্যা.)],

একো আসি জনাধিপো.

আদেয্যো নাম নামেন, চক্কৰত্তী মহব্বলো.

৪৯. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা সমাদপকো থেরো ইমা গাথাযো অভাসিত্থাতি.

সমাদপকত্থেরস্সাপদানং নৰমং.

১০. পঞ্চঙ্গুলিযত্থেরঅপদানং

৫০. ‘‘তিস্সো নামাসি ভগৰা, লোকজেট্ঠো নরাসভো;

পৰিসতি গন্ধকুটিং, ৰিহারকুসলো মুনি.

৫১. ‘‘সুগন্ধমালমাদায, অগমাসিং জিনন্তিকং;

অপসদ্দো চ সম্বুদ্ধে, পঞ্চঙ্গুলিমদাসহং.

৫২. ‘‘দ্ৰেনৰুতে ইতো কপ্পে, যং গন্ধমভিরোপযিং;

দুগ্গতিং নাভিজানামি, পঞ্চঙ্গুলিস্সিদং [পঞ্চঙ্গুলিযিদং (সী.)] ফলং.

৫৩. ‘‘দ্ৰেসত্ততিম্হিতো কপ্পে, রাজা আসিং সযম্পভো;

সত্তরতনসম্পন্নো, চক্কৰত্তী মহব্বলো.

৫৪. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা পঞ্চঙ্গুলিযো থেরো ইমা গাথাযো অভাসিত্থাতি;

পঞ্চঙ্গুলিযত্থেরস্সাপদানং দসমং.

সুপারিচরিযৰগ্গো সত্তরসমো.