১৮. কুমুদৰগ্গো

১. কুমুদমালিযত্থেরঅপদানং

১. ‘‘পব্বতে হিমৰন্তম্হি, মহাজাতস্সরো অহু;

তত্থজো রক্খসো আসিং, ঘোররূপো মহব্বলো.

২. ‘‘কুমুদং পুপ্ফতে তত্থ, চক্কমত্তানি জাযরে;

ওচিনামি চ তং পুপ্ফং, বলিনো সমিতিং তদা.

৩. ‘‘অত্থদস্সী তু ভগৰা, দ্ৰিপদিন্দো নরাসভো;

পুপ্ফসঙ্কোচিতং [পুপ্ফং সঙ্কোচিতং (সী. স্যা.), পুপ্ফং সমোচিতং (?)] দিস্ৰা, আগচ্ছি মম সন্তিকং.

৪. ‘‘উপাগতঞ্চ সম্বুদ্ধং, দেৰদেৰং নরাসভং;

সব্বঞ্চ পুপ্ফং পগ্গয্হ, বুদ্ধস্স অভিরোপযিং.

৫. ‘‘যাৰতা হিমৰন্তন্তা, পরিসা সা [হিমৰন্তস্মিং, যাৰ মালা (স্যা.)] তদা অহু;

তাৰচ্ছদনসম্পন্নো, অগমাসি তথাগতো.

৬. ‘‘অট্ঠারসে কপ্পসতে, যং পুপ্ফমভিরোপযিং;

দুগ্গতিং নাভিজানামি, বুদ্ধপূজাযিদং ফলং.

৭. ‘‘ইতো পন্নরসে কপ্পে, সত্তাহেসুং জনাধিপা;

সহস্সরথনামা তে, চক্কৰত্তী মহব্বলা.

৮. ‘‘পটিসম্ভিদা চতস্সো, ৰিমোক্খাপি চ অট্ঠিমে;

ছল়ভিঞ্ঞা সচ্ছিকতা, কতং বুদ্ধস্স সাসনং’’.

ইত্থং সুদং আযস্মা কুমুদমালিযো থেরো ইমা গাথাযো অভাসিত্থাতি.

কুমুদমালিযত্থেরস্সাপদানং পঠমং.

২. নিস্সেণিদাযকত্থেরঅপদানং

৯. ‘‘কোণ্ডঞ্ঞস্স ভগৰতো, লোকজেট্ঠস্স তাদিনো;

আরোহত্থায পাসাদং, নিস্সেণী কারিতা মযা.

১০. ‘‘তেন চিত্তপ্পসাদেন, অনুভোত্ৰান সম্পদা;

ধারেমি অন্তিমং দেহং, সম্মাসম্বুদ্ধসাসনে.

১১. ‘‘একত্তিংসম্হি কপ্পানং, সহস্সম্হি তযো অহুং [মহা (সী. স্যা.)];

সম্বহুলা নাম রাজানো, চক্কৰত্তী মহব্বলা.

১২. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা নিস্সেণিদাযকো থেরো ইমা গাথাযো অভাসিত্থাতি.

নিস্সেণিদাযকত্থেরস্সাপদানং দুতিযং.

৩. রত্তিপুপ্ফিযত্থেরঅপদানং

১৩. ‘‘মিগলুদ্দো পুরে আসিং, অরঞ্ঞে কাননে অহং;

ৰিপস্সিং অদ্দসং বুদ্ধং, দেৰদেৰং নরাসভং.

১৪. ‘‘রত্তিকং পুপ্ফিতং দিস্ৰা, কুটজং ধরণীরুহং;

সমূলং পগ্গহেত্ৰান, উপনেসিং মহেসিনো.

১৫. ‘‘একনৰুতিতো কপ্পে, যং পুপ্ফমভিরোপযিং;

দুগ্গতিং নাভিজানামি, পুপ্ফদানস্সিদং ফলং.

১৬. ‘‘ইতো চ অট্ঠমে কপ্পে, সুপ্পসন্নসনামকো;

সত্তরতনসম্পন্নো, রাজাহোসিং মহব্বলো.

১৭. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা রত্তিপুপ্ফিযো থেরো ইমা গাথাযো অভাসিত্থাতি.

রত্তিপুপ্ফিযত্থেরস্সাপদানং ততিযং.

৪. উদপানদাযকত্থেরঅপদানং

১৮. ‘‘ৰিপস্সিনো ভগৰতো, উদপানো কতো মযা;

পিণ্ডপাতঞ্চ দত্ৰান [গহেত্ৰান (স্যা.)], নিয্যাদেসিমহং তদা.

১৯. ‘‘একনৰুতিতো কপ্পে, যং কম্মমকরিং তদা;

দুগ্গতিং নাভিজানামি, উদপানস্সিদং ফলং.

২০. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা উদপানদাযকো থেরো ইমা গাথাযো অভাসিত্থাতি.

উদপানদাযকত্থেরস্সাপদানং চতুত্থং.

৫. সীহাসনদাযকত্থেরঅপদানং

২১. ‘‘নিব্বুতে লোকনাথম্হি, পদুমুত্তরনাযকে;

পসন্নচিত্তো সুমনো, সীহাসনমদাসহং.

২২. ‘‘বহূহি গন্ধমালেহি, দিট্ঠধম্মসুখাৰহে;

তত্থ পূজঞ্চ কত্ৰান, নিব্বাযতি বহুজ্জনো.

২৩. ‘‘পসন্নচিত্তো সুমনো, ৰন্দিত্ৰা বোধিমুত্তমং;

কপ্পানং সতসহস্সং, দুগ্গতিং নুপপজ্জহং.

২৪. ‘‘পন্নরসসহস্সম্হি, কপ্পানং অট্ঠ আসু তে [অট্ঠ আসযুং (ক.)];

সিলুচ্চযসনামা চ, রাজানো চক্কৰত্তিনো.

২৫. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা সীহাসনদাযকো থেরো ইমা গাথাযো অভাসিত্থাতি;

সীহাসনদাযকত্থেরস্সাপদানং পঞ্চমং.

৬. মগ্গদত্তিকত্থেরঅপদানং

২৬. ‘‘অনোমদস্সী ভগৰা, দ্ৰিপদিন্দো নরাসভো;

দিট্ঠধম্মসুখত্থায, অব্ভোকাসম্হি চঙ্কমি.

২৭. ‘‘উদ্ধতে পাদে পুপ্ফানি, সোভং মুদ্ধনি তিট্ঠরে;

পসন্নচিত্তো সুমনো, ৰন্দিত্ৰা পুপ্ফমোকিরিং.

২৮. ‘‘ৰীসকপ্পসহস্সম্হি, ইতো পঞ্চ জনা অহুং;

পুপ্ফচ্ছদনিযা নাম, চক্কৰত্তী মহব্বলা.

২৯. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা মগ্গদত্তিকো থেরো ইমা গাথাযো অভাসিত্থাতি.

মগ্গদত্তিকত্থেরস্সাপদানং ছট্ঠং.

৭. একদীপিযত্থেরঅপদানং

৩০. ‘‘পদুমুত্তরস্স মুনিনো, সল়লে বোধিমুত্তমে;

পসন্নচিত্তো সুমনো, একদীপং অদাসহং.

৩১. ‘‘ভৰে নিব্বত্তমানম্হি, নিব্বত্তে পুঞ্ঞসঞ্চযে;

দুগ্গতিং নাভিজানামি, দীপদানস্সিদং ফলং.

৩২. ‘‘সোল়সে কপ্পসহস্সে, ইতো তে চতুরো জনা;

চন্দাভা নাম নামেন, চক্কৰত্তী মহব্বলা.

৩৩. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা একদীপিযো থেরো ইমা গাথাযো অভাসিত্থাতি.

একদীপিযত্থেরস্সাপদানং সত্তমং.

নৰমং ভাণৰারং.

৮. মণিপূজকত্থেরঅপদানং

৩৪. ‘‘ওরেন হিমৰন্তস্স, নদিকা সম্পৰত্তথ;

তস্সা চানুপখেত্তম্হি, সযম্ভূ ৰসতে তদা.

৩৫. ‘‘মণিং পগ্গয্হ পল্লঙ্কং, সাধুচিত্তং মনোরমং;

পসন্নচিত্তো সুমনো, বুদ্ধস্স অভিরোপযিং.

৩৬. ‘‘চতুন্নৰুতিতো কপ্পে, যং মণিং অভিরোপযিং;

দুগ্গতিং নাভিজানামি, বুদ্ধপূজাযিদং ফলং.

৩৭. ‘‘ইতো চ দ্ৰাদসে কপ্পে, সতরংসীসনামকা;

অট্ঠ তে আসুং রাজানো, চক্কৰত্তী মহব্বলা.

৩৮. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা মণিপূজকো থেরো ইমা গাথাযো অভাসিত্থাতি.

মণিপূজকত্থেরস্সাপদানং অট্ঠমং.

৯. তিকিচ্ছকত্থেরঅপদানং

৩৯. ‘‘নগরে বন্ধুমতিযা, ৰেজ্জো আসিং সুসিক্খিতো;

আতুরানং সদুক্খানং, মহাজনসুখাৰহো.

৪০. ‘‘ব্যাধিতং সমণং দিস্ৰা, সীলৰন্তং মহাজুতিং;

পসন্নচিত্তো সুমনো, ভেসজ্জমদদিং তদা.

৪১. ‘‘অরোগো আসি তেনেৰ, সমণো সংৰুতিন্দ্রিযো;

অসোকো নাম নামেন, উপট্ঠাকো ৰিপস্সিনো.

৪২. ‘‘একনৰুতিতো কপ্পে, যং ওসধমদাসহং;

দুগ্গতিং নাভিজানামি, ভেসজ্জস্স ইদং ফলং.

৪৩. ‘‘ইতো চ অট্ঠমে কপ্পে, সব্বোসধসনামকো;

সত্তরতনসম্পন্নো, চক্কৰত্তী মহব্বলো.

৪৪. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা তিকিচ্ছকো থেরো ইমা গাথাযো অভাসিত্থাতি.

তিকিচ্ছকত্থেরস্সাপদানং নৰমং.

১০. সঙ্ঘুপট্ঠাকত্থেরঅপদানং

৪৫. ‘‘ৰেস্সভুম্হি ভগৰতি, অহোসারামিকো অহং;

পসন্নচিত্তো সুমনো, উপট্ঠিং সঙ্ঘমুত্তমং.

৪৬. ‘‘একত্তিংসে ইতো কপ্পে, যং কম্মমকরিং তদা;

দুগ্গতিং নাভিজানামি, উপট্ঠানস্সিদং ফলং.

৪৭. ‘‘ইতো তে সত্তমে কপ্পে, সত্তেৰাসুং সমোদকা;

সত্তরতনসম্পন্না, চক্কৰত্তী মহব্বলা.

৪৮. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা সঙ্ঘুপট্ঠাকো থেরো ইমা গাথাযো অভাসিত্থাতি.

সঙ্ঘুপট্ঠাকত্থেরস্সাপদানং দসমং.

কুমুদৰগ্গো অট্ঠারসমো.