১৯. কুটজপুপ্ফিযৰগ্গো

১. কুটজপুপ্ফিযত্থেরঅপদানং

১. ‘‘সুৰণ্ণৰণ্ণং সম্বুদ্ধং, সতরংসিংৰ উগ্গতং;

দিসং অনুৰিলোকেন্তং, গচ্ছন্তং অনিলঞ্জসে.

২. ‘‘কুটজং পুপ্ফিতং দিস্ৰা, সংৰিত্থতসমোত্থতং;

রুক্খতো ওচিনিত্ৰান, ফুস্সস্স অভিরোপযিং.

৩. ‘‘দ্ৰেনৰুতে ইতো কপ্পে, যং পুপ্ফমভিরোপযিং;

দুগ্গতিং নাভিজানামি, বুদ্ধপূজাযিদং ফলং.

৪. ‘‘ইতো সত্তরসে কপ্পে, তযো আসুং সুপুপ্ফিতা;

সত্তরতনসম্পন্না, চক্কৰত্তী মহব্বলা.

৫. ‘‘পটিসম্ভিদা চতস্সো, ৰিমোক্খাপি চ অট্ঠিমে;

ছল়ভিঞ্ঞা সচ্ছিকতা, কতং বুদ্ধস্স সাসনং’’.

ইত্থং সুদং আযস্মা কুটজপুপ্ফিযো থেরো ইমা গাথাযো অভাসিত্থাতি.

কুটজপুপ্ফিযত্থেরস্সাপদানং পঠমং.

২. বন্ধুজীৰকত্থেরঅপদানং

৬. ‘‘সিদ্ধত্থো নাম সম্বুদ্ধো, সযম্ভূ সব্ভি ৰণ্ণিতো;

সমাধিং সো সমাপন্নো, নিসীদি পব্বতন্তরে.

৭. ‘‘জাতস্সরে গৰেসন্তো, দকজং পুপ্ফমুত্তমং;

বন্ধুজীৰকপুপ্ফানি, অদ্দসং সমনন্তরং.

৮. ‘‘উভো হত্থেহি পগ্গয্হ, উপাগচ্ছিং মহামুনিং;

পসন্নচিত্তো সুমনো, সিদ্ধত্থস্সাভিরোপযিং.

৯. ‘‘চতুন্নৰুতিতো কপ্পে, যং পুপ্ফমভিরোপযিং;

দুগ্গতিং নাভিজানামি, বুদ্ধপূজাযিদং ফলং.

১০. ‘‘ইতো চাতুদ্দসে কপ্পে, একো আসিং জনাধিপো;

সমুদ্দকপ্পো নামেন, চক্কৰত্তী মহব্বলো.

১১. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা বন্ধুজীৰকো থেরো ইমা গাথাযো অভাসিত্থাতি.

বন্ধুজীৰকত্থেরস্সাপদানং দুতিযং.

৩. কোটুম্বরিযত্থেরঅপদানং

১২. ‘‘কণিকারংৰ জোতন্তং, নিসিন্নং পব্বতন্তরে;

অপ্পমেয্যংৰ উদধিং, ৰিত্থতং ধরণিং যথা.

১৩. ‘‘পূজিতং [পরেতং (সী.)] দেৰসঙ্ঘেন, নিসভাজানিযং যথা;

হট্ঠো হট্ঠেন চিত্তেন, উপাগচ্ছিং নরুত্তমং.

১৪. ‘‘সত্তপুপ্ফানি পগ্গয্হ, কোটুম্বরসমাকুলং;

বুদ্ধস্স অভিরোপেসিং, সিখিনো লোকবন্ধুনো.

১৫. ‘‘একত্তিংসে ইতো কপ্পে, যং পুপ্ফমভিরোপযিং;

দুগ্গতিং নাভিজানামি, বুদ্ধপূজাযিদং ফলং.

১৬. ‘‘ইতো ৰীসতিকপ্পম্হি, মহানেলসনামকো;

একো আসি মহাতেজো, চক্কৰত্তী মহব্বলো.

১৭. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা কোটুম্বরিযো থেরো ইমা গাথাযো অভাসিত্থাতি.

কোটুম্বরিযত্থেরস্সাপদানং ততিযং.

৪. পঞ্চহত্থিযত্থেরঅপদানং

১৮. ‘‘তিস্সো নামাসি ভগৰা, লোকজেট্ঠো নরাসভো;

পুরক্খতো সাৰকেহি, রথিযং পটিপজ্জথ.

১৯. ‘‘পঞ্চ উপ্পলহত্থা চ, চাতুরা ঠপিতা মযা;

আহুতিং দাতুকামোহং, পগ্গণ্হিং ৰতসিদ্ধিযা [পুত্তোম্হি হিতসিদ্ধিযা (স্যা.)].

২০. ‘‘সুৰণ্ণৰণ্ণং সম্বুদ্ধং, গচ্ছন্তং অন্তরাপণে;

বুদ্ধরংসীহি ফুট্ঠোস্মি [বুদ্ধরংস্যাভিফুট্ঠোম্হি (সী.), বুদ্ধরংসাভিঘুট্ঠোস্মি (ক.)], পূজেসিং দ্ৰিপদুত্তমং.

২১. ‘‘দ্ৰেনৰুতে ইতো কপ্পে, যং পুপ্ফমভিপূজযিং;

দুগ্গতিং নাভিজানামি, বুদ্ধপূজাযিদং ফলং.

২২. ‘‘ইতো তেরসকপ্পম্হি, পঞ্চ সুসভসম্মতা;

সত্তরতনসম্পন্না, চক্কৰত্তী মহব্বলা.

২৩. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা পঞ্চহত্থিযো থেরো ইমা গাথাযো অভাসিত্থাতি.

পঞ্চহত্থিযত্থেরস্সাপদানং চতুত্থং.

৫. ইসিমুগ্গদাযকত্থেরঅপদানং

২৪. ‘‘উদেন্তং সতরংসিংৰ, পীতরংসিংৰ [সিতরংসিংৰ (সী.)] ভাণুমং;

ককুধং ৰিলসন্তংৰ, পদুমুত্তরনাযকং.

২৫. ‘‘ইসিমুগ্গানি পিসিত্ৰা [ইসিসুগ্গানি পিংসেত্ৰা (সী.), ইসিমুগ্গং নিমন্তেত্ৰা (স্যা.)], মধুখুদ্দে অনীল়কে;

পাসাদেৰ ঠিতো সন্তো, অদাসিং লোকবন্ধুনো.

২৬. ‘‘অট্ঠসতসহস্সানি, অহেসুং বুদ্ধসাৰকা;

সব্বেসং পত্তপূরেন্তং [পত্তপূরং তং (সী.)], ততো চাপি বহুত্তরং.

২৭. ‘‘তেন চিত্তপ্পসাদেন, সুক্কমূলেন চোদিতো;

কপ্পানং সতসহস্সং, দুগ্গতিং নুপপজ্জহং.

২৮. ‘‘চত্তালীসম্হি সহস্সে, কপ্পানং অট্ঠতিংস তে;

ইসিমুগ্গসনামা [মহিসমন্তনামা (স্যা.)] তে, চক্কৰত্তী মহব্বলা.

২৯. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা ইসিমুগ্গদাযকো থেরো ইমা গাথাযো অভাসিত্থাতি.

ইসিমুগ্গদাযকত্থেরস্সাপদানং পঞ্চমং.

৬. বোধিউপট্ঠাকত্থেরঅপদানং

৩০. ‘‘নগরে রম্মৰতিযা, আসিং মুরজৰাদকো;

নিচ্চুপট্ঠানযুত্তোম্হি, গতোহং বোধিমুত্তমং.

৩১. ‘‘সাযং পাতং উপট্ঠিত্ৰা, সুক্কমূলেন চোদিতো;

অট্ঠারসকপ্পসতে, দুগ্গতিং নুপপজ্জহং.

৩২. ‘‘পন্নরসে কপ্পসতে, ইতো আসিং জনাধিপো;

মুরজো [দমথো (স্যা.)] নাম নামেন, চক্কৰত্তী মহব্বলো.

৩৩. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা বোধিউপট্ঠাকো থেরো ইমা গাথাযো অভাসিত্থাতি.

বোধিউপট্ঠাকত্থেরস্সাপদানং ছট্ঠং.

৭. একচিন্তিকত্থেরঅপদানং

৩৪. ‘‘যদা দেৰো [দেৰা (ক.)] দেৰকাযা, চৰতে [চৰন্তি (ক.)] আযুসঙ্খযা;

তযো সদ্দা নিচ্ছরন্তি, দেৰানং অনুমোদতং.

৩৫. ‘ইতো ভো সুগতিং গচ্ছ, মনুস্সানং সহব্যতং;

মনুস্সভূতো সদ্ধম্মে, লভ সদ্ধং অনুত্তরং.

৩৬. ‘‘‘সা তে সদ্ধা নিৰিট্ঠাস্স, মূলজাতা পতিট্ঠিতা;

যাৰজীৰং অসংহীরা, সদ্ধম্মে সুপ্পৰেদিতে.

৩৭. ‘‘‘কাযেন কুসলং কত্ৰা, ৰাচায কুসলং বহুং;

মনসা কুসলং কত্ৰা, অব্যাপজ্জং [অব্যাপজ্ঝং (স্যা.), অপ্পমাণং (ইতিৰুত্তকে ৮৩)] নিরূপধিং.

৩৮. ‘‘‘ততো ওপধিকং পুঞ্ঞং, কত্ৰা দানেন তং বহুং;

অঞ্ঞেপি মচ্চে সদ্ধম্মে, ব্রহ্মচরিযে নিৰেসয’.

৩৯. ‘‘ইমায অনুকম্পায, দেৰা দেৰং যদা ৰিদূ;

চৰন্তং অনুমোদন্তি, এহি দেৰ পুনপ্পুনং [দেৰপুরং পুন (স্যা.)].

৪০. ‘‘সংৰেগো মে [সংৰিগ্গোহং (স্যা.)] তদা আসি, দেৰসঙ্ঘে সমাগতে;

কংসু নাম অহং যোনিং, গমিস্সামি ইতো চুতো.

৪১. ‘‘মম সংৰেগমঞ্ঞায, সমণো ভাৰিতিন্দ্রিযো;

মমুদ্ধরিতুকামো সো, আগচ্ছি মম সন্তিকং.

৪২. ‘‘সুমনো নাম নামেন, পদুমুত্তরসাৰকো;

অত্থধম্মানুসাসিত্ৰা, সংৰেজেসি মমং তদা.

৪৩. ‘‘তস্সাহং ৰচনং সুত্ৰা, বুদ্ধে চিত্তং পসাদযিং;

তং ধীরং অভিৰাদেত্ৰা, তত্থ কালংকতো অহং.

৪৪. ‘‘উপপজ্জিং স [উপপজ্জিস্সং (সী.)] তত্থেৰ, সুক্কমূলেন চোদিতো;

কপ্পানং সতসহস্সং, দুগ্গতিং নুপপজ্জহং.

৪৫. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা একচিন্তিকো থেরো ইমা গাথাযো অভাসিত্থাতি.

একচিন্তিকত্থেরস্সাপদানং সত্তমং.

৮. তিকণ্ণিপুপ্ফিযত্থেরঅপদানং

৪৬. ‘‘দেৰভূতো অহং সন্তো, অচ্ছরাহি পুরক্খতো;

পুব্বকম্মং সরিত্ৰান, বুদ্ধসেট্ঠং অনুস্সরিং.

৪৭. ‘‘তিকণ্ণিপুপ্ফং [কিংকণিপুপ্ফং (ক.)] পগ্গয্হ, সকং চিত্তং পসাদযিং;

বুদ্ধম্হি অভিরোপেসিং, ৰিপস্সিম্হি নরাসভে.

৪৮. ‘‘একনৰুতিতো কপ্পে, যং পুপ্ফমভিপূজযিং;

দুগ্গতিং নাভিজানামি, বুদ্ধপূজাযিদং ফলং.

৪৯. ‘‘তেসত্ততিম্হিতো কপ্পে, চতুরাসুং রমুত্তমা;

সত্তরতনসম্পন্না, চক্কৰত্তী মহব্বলা.

৫০. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা তিকণ্ণিপুপ্ফিযো [কিংকণিকপুপ্ফিযো (ক.)] থেরো ইমা গাথাযো অভাসিত্থাতি.

তিকণ্ণিপুপ্ফিযত্থেরস্সাপদানং অট্ঠমং.

৯. একচারিযত্থেরঅপদানং

৫১. ‘‘তাৰতিংসেসু দেৰেসু, মহাঘোসো তদা অহু;

বুদ্ধো চ লোকে নিব্বাতি, মযঞ্চম্হ সরাগিনো.

৫২. ‘‘তেসং সংৰেগজাতানং, সোকসল্লসমঙ্গিনং;

সবলেন উপত্থদ্ধো, অগমং বুদ্ধসন্তিকং.

৫৩. ‘‘মন্দারৰং গহেত্ৰান, সঙ্গীতি [সণ্হিতং (সী.), সঙ্গিতং (স্যা.)] অভিনিম্মিতং;

পরিনিব্বুতকালম্হি, বুদ্ধস্স অভিরোপযিং.

৫৪. ‘‘সব্বে দেৰানুমোদিংসু, অচ্ছরাযো চ মে তদা;

কপ্পানং সতসহস্সং, দুগ্গতিং নুপপজ্জহং.

৫৫. ‘‘সট্ঠিকপ্পসহস্সম্হি, ইতো সোল়স তে জনা;

মহামল্লজনা নাম, চক্কৰত্তী মহব্বলা.

৫৬. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা একচারিযো থেরো ইমা গাথাযো অভাসিত্থাতি.

একচারিযত্থেরস্সাপদানং নৰমং.

১০. তিৰণ্টিপুপ্ফিযত্থেরঅপদানং

৫৭. ‘‘অভিভূতং পনিজ্ঝন্তি [অভিভূতোপনিজ্ঝন্তি (সী.)], সব্বে সঙ্গম্ম তে মমং [অভিভুং থেরং পনিজ্ঝাম, সব্বে সঙ্গম্ম তে মযং (স্যা.)];

তেসং নিজ্ঝাযমানানং, পরিল়াহো অজাযথ.

৫৮. ‘‘সুনন্দো নাম নামেন, বুদ্ধস্স সাৰকো তদা;

ধম্মদস্সিস্স মুনিনো, আগচ্ছি মম সন্তিকং.

৫৯. ‘‘যে মে বদ্ধচরা আসুং, তে মে পুপ্ফং অদুং তদা;

তাহং পুপ্ফং গহেত্ৰান, সাৰকে অভিরোপযিং.

৬০. ‘‘সোহং কালংকতো তত্থ, পুনাপি উপপজ্জহং;

অট্ঠারসে কপ্পসতে, ৰিনিপাতং ন গচ্ছহং.

৬১. ‘‘তেরসেতো কপ্পসতে, অট্ঠাসুং ধূমকেতুনো;

সত্তরতনসম্পন্না, চক্কৰত্তী মহব্বলা.

৬২. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা তিৰণ্টিপুপ্ফিযো থেরো ইমা গাথাযো অভাসিত্থাতি;

তিৰণ্টিপুপ্ফিযত্থেরস্সাপদানং দসমং.

কুটজপুপ্ফিযৰগ্গো একূনৰীসতিমো.