২০. তমালপুপ্ফিযৰগ্গো

১. তমালপুপ্ফিযত্থেরঅপদানং

১. ‘‘চুল্লাসীতিসহস্সানি, থম্ভা সোৰণ্ণযা অহূ;

দেৰলট্ঠিপটিভাগং, ৰিমানং মে সুনিম্মিতং.

২. ‘‘তমালপুপ্ফং পগ্গয্হ, ৰিপ্পসন্নেন চেতসা;

বুদ্ধস্স অভিরোপযিং, সিখিনো লোকবন্ধুনো.

৩. ‘‘একত্তিংসে ইতো কপ্পে, যং কম্মমকরিং তদা;

দুগ্গতিং নাভিজানামি, বুদ্ধপূজাযিদং ফলং.

৪. ‘‘ইতো ৰীসতিমে কপ্পে, চন্দতিত্তোতি এককো;

সত্তরতনসম্পন্নো, চক্কৰত্তী মহব্বলো.

৫. ‘‘পটিসম্ভিদা চতস্সো, ৰিমোক্খাপি চ অট্ঠিমে;

ছল়ভিঞ্ঞা সচ্ছিকতা, কতং বুদ্ধস্স সাসনং’’.

ইত্থং সুদং আযস্মা তমালপুপ্ফিযো থেরো ইমা গাথাযো অভাসিত্থাতি.

তমালপুপ্ফিযত্থেরস্সাপদানং পঠমং.

২. তিণসন্থারকত্থেরঅপদানং

৬. ‘‘যদা ৰনৰাসী [যং দাযৰাসিকো (সী.)] ইসি, তিণং লাযতি সত্থুনো;

সব্বে পদক্খিণাৰট্টা [পদক্খিণাৰত্তা (সী. স্যা.)], পথব্যা [পুথৰ্যা (সী.)] নিপতিংসু তে.

৭. ‘‘তমহং তিণমাদায, সন্থরিং ধরণুত্তমে;

তীণেৰ তালপত্তানি, আহরিত্ৰানহং তদা.

৮. ‘‘তিণেন ছদনং কত্ৰা, সিদ্ধত্থস্স অদাসহং;

সত্তাহং ধারযুং তস্স [তত্থ (স্যা.)], দেৰমানুসসত্থুনো.

৯. ‘‘চতুন্নৰুতিতো কপ্পে, যং তিণং অদদিং তদা;

দুগ্গতিং নাভিজানামি, তিণদানস্সিদং ফলং.

১০. ‘‘পঞ্চসট্ঠিম্হিতো কপ্পে, চত্তারোসুং মহদ্ধনা;

সত্তরতনসম্পন্না, চক্কৰত্তী মহব্বলা.

১১. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা তিণসন্থারকো থেরো ইমা গাথাযো অভাসিত্থাতি.

তিণসন্থারকত্থেরস্সাপদানং দুতিযং.

৩. খণ্ডপুল্লিযত্থেরঅপদানং

১২. ‘‘ফুস্সস্স খো ভগৰতো, থূপো আসি মহাৰনে;

কুঞ্জরেহি তদা ভিন্নো, পরূল়্হো পাদপো [পরূল়্হপাদপো (সী.), সংরূল়্হো পাদপো (স্যা.)] তহিং.

১৩. ‘‘ৰিসমঞ্চ সমং কত্ৰা, সুধাপিণ্ডং অদাসহং;

তিলোকগরুনো তস্স, গুণেহি পরিতোসিতো [পরিতো সুতো (ক.)].

১৪. ‘‘দ্ৰেনৰুতে ইতো কপ্পে, যং কম্মমকরিং তদা;

দুগ্গতিং নাভিজানামি, সুধাপিণ্ডস্সিদং ফলং.

১৫. ‘‘সত্তসত্ততিকপ্পম্হি, জিতসেনাসুং সোল়স;

সত্তরতনসম্পন্না, চক্কৰত্তী মহব্বলা.

১৬. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা খণ্ডফুল্লিযো থেরো ইমা গাথাযো অভাসিত্থাতি.

খণ্ডপুল্লিযত্থেরস্সাপদানং ততিযং.

৪. অসোকপূজকত্থেরঅপদানং

১৭. ‘‘তিৰরাযং [তিপুরাযং (স্যা.)] পুরে রম্মে, রাজুয্যানং অহু তদা;

উয্যানপালো তত্থাসিং, রঞ্ঞো বদ্ধচরো অহং.

১৮. ‘‘পদুমো নাম নামেন, সযম্ভূ সপ্পভো অহু;

নিসিন্নং [নিসিন্নো (ক.)] পুণ্ডরীকম্হি, ছাযা ন জহি তং মুনিং.

১৯. ‘‘অসোকং পুপ্ফিতং দিস্ৰা, পিণ্ডিভারং সুদস্সনং;

বুদ্ধস্স অভিরোপেসিং, জলজুত্তমনামিনো.

২০. ‘‘চতুন্নৰুতিতো কপ্পে, যং পুপ্ফমভিরোপযিং;

দুগ্গতিং নাভিজানামি, বুদ্ধপূজাযিদং ফলং.

২১. ‘‘সত্ততিংসম্হিতো কপ্পে, সোল়স অরণঞ্জহা [অরুণঞ্জহা (সী.)];

সত্তরতনসম্পন্না, চক্কৰত্তী মহব্বলা.

২২. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা অসোকপূজকো থেরো ইমা গাথাযো অভাসিত্থাতি.

অসোকপূজকত্থেরস্সাপদানং চতুত্থং.

৫. অঙ্কোলকত্থেরঅপদানং

২৩. ‘‘অঙ্কোলং পুপ্ফিতং দিস্ৰা, মালাৰরং সকোসকং [সমোগধং (স্যা.)];

ওচিনিত্ৰান তং পুপ্ফং, অগমং বুদ্ধসন্তিকং.

২৪. ‘‘সিদ্ধত্থো তম্হি সমযে, পতিলীনো মহামুনি;

মুহুত্তং পটিমানেত্ৰা, গুহাযং পুপ্ফমোকিরিং.

২৫. ‘‘চতুন্নৰুতিতো কপ্পে, যং পুপ্ফমভিপূজযিং;

দুগ্গতিং নাভিজানামি, পুপ্ফদানস্সিদং [বুদ্ধপূজাযিদং (সী. স্যা.)] ফলং.

২৬. ‘‘ছত্তিংসম্হি ইতো কপ্পে, আসেকো দেৰগজ্জিতো;

সত্তরতনসম্পন্নো, চক্কৰত্তী মহব্বলো.

২৭. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা অঙ্কোলকো থেরো ইমা গাথাযো অভাসিত্থাতি.

অঙ্কোলকত্থেরস্সাপদানং পঞ্চমং.

৬. কিসলযপূজকত্থেরঅপদানং

২৮. ‘‘নগরে দ্ৰারৰতিযা, মালাৰচ্ছো মমং অহু;

উদপানো চ তত্থেৰ, পাদপানং ৰিরোহনো.

২৯. ‘‘সবলেন উপত্থদ্ধো, সিদ্ধত্থো অপরাজিতো;

মমানুকম্পমানো সো, গচ্ছতে অনিলঞ্জসে.

৩০. ‘‘অঞ্ঞং কিঞ্চি ন পস্সামি, পূজাযোগ্গং মহেসিনো;

অসোকং পল্লৰং দিস্ৰা, আকাসে উক্খিপিং অহং.

৩১. ‘‘বুদ্ধস্স তে কিসলযা, গচ্ছতো যন্তি পচ্ছতো;

তাহং দিস্ৰান সংৰিজিং [সোহং দিস্ৰান তং ইদ্ধিং (সী. স্যা.)], অহো বুদ্ধস্সুল়ারতা.

৩২. ‘‘চতুন্নৰুতিতো কপ্পে, পল্লৰং অভিরোপযিং;

দুগ্গতিং নাভিজানামি, বুদ্ধপূজাযিদং ফলং.

৩৩. ‘‘সত্ততিংসে [সত্তৰীসে (সী. স্যা.)] ইতো কপ্পে, একো একিস্সরো অহু;

সত্তরতনসম্পন্নো, চক্কৰত্তী মহব্বলো.

৩৪. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা কিসলযপূজকো থেরো ইমা গাথাযো অভাসিত্থাতি.

কিসলযপূজকত্থেরস্সাপদানং ছট্ঠং.

৭. তিন্দুকদাযকত্থেরঅপদানং

৩৫. ‘‘গিরিদুগ্গচরো আসিং, মক্কটো থামৰেগিকো;

ফলিনং তিন্দুকং দিস্ৰা, বুদ্ধসেট্ঠং অনুস্সরিং.

৩৬. ‘‘নিক্খমিত্ৰা কতিপাহং, ৰিচিনিং লোকনাযকং;

পসন্নচিত্তো সুমনো, সিদ্ধত্থং তিভৰন্তগুং.

৩৭. ‘‘মম সঙ্কপ্পমঞ্ঞায, সত্থা লোকে অনুত্তরো;

খীণাসৰসহস্সেহি, আগচ্ছি মম সন্তিকং.

৩৮. ‘‘পামোজ্জং জনযিত্ৰান, ফলহত্থো উপাগমিং;

পটিগ্গহেসি ভগৰা, সব্বঞ্ঞূ ৰদতং ৰরো.

৩৯. ‘‘চতুন্নৰুতিতো কপ্পে, যং ফলং অদদিং তদা;

দুগ্গতিং নাভিজানামি, ফলদানস্সিদং ফলং.

৪০. ‘‘সত্তপঞ্ঞাসকপ্পম্হি, উপনন্দসনামকো;

সত্তরতনসম্পন্নো, চক্কৰত্তী মহব্বলো.

৪১. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা তিন্দুকদাযকো থেরো ইমা গাথাযো অভাসিত্থাতি.

তিন্দুকদাযকত্থেরস্সাপদানং সত্তমং.

৮. মুট্ঠিপূজকত্থেরঅপদানং

৪২. ‘‘সুমেধো নাম ভগৰা, লোকজেট্ঠো নরাসভো;

পচ্ছিমে অনুকম্পায, পধানং পদহী জিনো.

৪৩. ‘‘তস্স চঙ্কমমানস্স, দ্ৰিপদিন্দস্স তাদিনো;

গিরিনেলস্স পুপ্ফানং, মুট্ঠিং বুদ্ধস্স রোপযিং.

৪৪. ‘‘তেন চিত্তপ্পসাদেন, সুক্কমূলেন চোদিতো;

তিংসকপ্পসহস্সানি, দুগ্গতিং নুপপজ্জহং.

৪৫. ‘‘তেৰীসতিকপ্পসতে, সুনেলো নাম খত্তিযো;

সত্তরতনসম্পন্নো, একো আসিং মহব্বলো.

৪৬. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা মুট্ঠিপূজকো থেরো ইমা গাথাযো অভাসিত্থাতি.

মুট্ঠিপূজকত্থেরস্সাপদানং অট্ঠমং.

৯. কিংকণিকপুপ্ফিযত্থেরঅপদানং

৪৭. ‘‘সুমঙ্গলোতি নামেন, সযম্ভূ অপরাজিতো;

পৰনা নিক্খমিত্ৰান, নগরং পাৰিসী জিনো.

৪৮. ‘‘পিণ্ডচারং চরিত্ৰান, নিক্খম্ম নগরা মুনি;

কতকিচ্চোৰ সম্বুদ্ধো, সো ৰসী ৰনমন্তরে.

৪৯. ‘‘কিংকণিপুপ্ফং পগ্গয্হ, বুদ্ধস্স অভিরোপযিং;

পসন্নচিত্তো সুমনো, সযম্ভুস্স মহেসিনো.

৫০. ‘‘চতুন্নৰুতিতো কপ্পে, যং পুপ্ফমভিরোপযিং;

দুগ্গতিং নাভিজানামি, বুদ্ধপূজাযিদং ফলং.

৫১. ‘‘ছল়াসীতিম্হিতো কপ্পে, অপিলাসিসনামকো;

সত্তরতনসম্পন্নো, চক্কৰত্তী মহব্বলো.

৫২. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা কিংকণিকপুপ্ফিযো থেরো ইমা গাথাযো অভাসিত্থাতি.

কিংকণিকপুপ্ফিযত্থেরস্সাপদানং নৰমং.

১০. যূথিকপুপ্ফিযত্থেরঅপদানং

৫৩. ‘‘পদুমুত্তরো নাম জিনো, আহুতীনং পটিগ্গহো;

পৰনা নিক্খমিত্ৰান, ৰিহারং যাতি চক্খুমা.

৫৪. ‘‘উভো হত্থেহি পগ্গয্হ, যূথিকং পুপ্ফমুত্তমং;

বুদ্ধস্স অভিরোপযিং, মেত্তচিত্তস্স তাদিনো.

৫৫. ‘‘তেন চিত্তপ্পসাদেন, অনুভোত্ৰান সম্পদা;

কপ্পানং সতসহস্সং, দুগ্গতিং নুপপজ্জহং.

৫৬. ‘‘ইতো পঞ্ঞাসকপ্পেসু, একো আসিং জনাধিপো;

সমিত্তনন্দনো নাম, চক্কৰত্তী মহব্বলো.

৫৭. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা যূথিকপুপ্ফিযো থেরো ইমা গাথাযো অভাসিত্থাতি;

যূথিকপুপ্ফিযত্থেরস্সাপদানং দসমং.

তমালপুপ্ফিযৰগ্গো ৰীসতিমো.

তস্সুদ্দানং –

তমালতিণসন্থারো, খণ্ডফুল্লি অসোকিযো;

অঙ্কোলকী কিসলযো, তিন্দুকো নেলপুপ্ফিযো;

কিংকণিকো যূথিকো চ, গাথা পঞ্ঞাস অট্ঠ চাতি.

অথ ৰগ্গুদ্দানং –

ভিক্খাদাযী পরিৰারো, সেরেয্যো সোভিতো তথা;

ছত্তঞ্চ বন্ধুজীৰী চ, সুপারিচরিযোপি চ.

কুমুদো কুটজো চেৰ, তমালি দসমো কতো;

ছসতানি চ গাথানি, ছসট্ঠি চ ততুত্তরি.

ভিক্খাৰগ্গদসকং.