১০. দসমসিক্খাপদৰণ্ণনা

১১৬৪. দসমে – অনাপুচ্ছাতি অনাপুচ্ছিত্ৰা. ভিক্খুনীহি দ্ৰিক্খত্তুং আপুচ্ছিতব্বং – পব্বজ্জাকালে চ উপসম্পদাকালে চ, ভিক্খূনং পন সকিং আপুচ্ছিতেপি ৰট্টতি.

১১৬৫. অজানন্তীতি মাতাদীনং অত্থিভাৰং অজানন্তী. সেসং উত্তানমেৰ. ইদং অপুব্বসমুট্ঠানসীসং. চতুসমুট্ঠানং – ৰাচতো কাযৰাচতো ৰাচাচিত্ততো কাযৰাচাচিত্ততো চ সমুট্ঠাতি. কথং? অব্ভানকম্মাদীসু কেনচিদেৰ করণীযেন খণ্ডসীমাযং নিসিন্না ‘‘পক্কোসথ সিক্খমানং, ইধেৰ নং উপসম্পাদেস্সামা’’তি উপসম্পাদেতি; এৰং ৰাচতো সমুট্ঠাতি. উপস্সযতো পট্ঠায উপসম্পাদেস্সামীতি ৰত্ৰা খণ্ডসীমং গচ্ছন্তিযা কাযৰাচতো সমুট্ঠাতি. দ্ৰীসুপি ঠানেসু পণ্ণত্তিভাৰং জানিত্ৰাৰ ৰীতিক্কমং করোন্তিযা ৰাচাচিত্ততো কাযৰাচাচিত্ততো চ সমুট্ঠাতি. অননুজানাপেত্ৰা উপসম্পাদনতো কিরিযাকিরিযং, নোসঞ্ঞাৰিমোক্খং, অচিত্তকং, পণ্ণত্তিৰজ্জং, কাযকম্মং, ৰচীকম্মং, তিচিত্তং, তিৰেদনন্তি.

দসমসিক্খাপদং.