৮. কুমারিভূতৰগ্গো

১-২-৩. পঠমদুতিযততিযসিক্খাপদৰণ্ণনা

১১১৯. কুমারিভূতৰগ্গস্স পঠমদুতিযততিযসিক্খাপদানি তীণি তীহি গিহিগতসিক্খাপদেহি সদিসানি. যা পন তা সব্বপঠমা দ্ৰে মহাসিক্খমানা, তা অতিক্কন্তৰীসতিৰস্সাতি ৰেদিতব্বা. তা গিহিগতা ৰা হোন্তু অগিহিগতা ৰা, সিক্খমানা ইচ্চেৰ ৰত্তব্বা, গিহিগতাতি ৰা কুমারিভূতাতি ৰা ন ৰত্তব্বা. গিহিগতায দসৰস্সকালে সিক্খাসম্মুতিং দত্ৰা দ্ৰাদসৰস্সকালে উপসম্পদা কাতব্বা. একাদসৰস্সকালে দত্ৰা তেরসৰস্সকালে কাতব্বা, দ্ৰাদসতেরসচুদ্দসপন্নরসসোল়সসত্তরসঅট্ঠারসৰস্সকালে সম্মুতিং দত্ৰা ৰীসতিৰস্সকালে উপসম্পদা কাতব্বা. অট্ঠারসৰস্সকালতো পট্ঠায চ পনাযং গিহিগতাতিপি কুমারিভূতাতিপি ৰত্তুং ৰট্টতি, কুমারিভূতা পন গিহিগতাতি ন ৰত্তব্বা, কুমারিভূতা ইচ্চেৰ ৰত্তব্বা. মহাসিক্খমানা পন গিহিগতাতিপি ৰত্তুং ন ৰট্টতি, কুমারিভূতাতিপি ৰত্তুং ন ৰট্টতি, সিক্খাসম্মুতিদানৰসেন পন তিস্সোপি সিক্খমানাতি ৰত্তুং ৰট্টতি.

পঠমদুতিযততিযানি.

৪-৫-৬. চতুত্থপঞ্চমছট্ঠসিক্খাপদৰণ্ণনা

১১৩৬. চতুত্থপঞ্চমছট্ঠেসু সব্বং উত্তানমেৰ. সব্বানি তিসমুট্ঠানানি চতুত্থং কিরিযং, সঞ্ঞাৰিমোক্খং, সচিত্তকং, পণ্ণত্তিৰজ্জং, কাযকম্মং, ৰচীকম্মং, তিচিত্তং, তিৰেদনন্তি. পঞ্চমং কিরিযাকিরিযং, সঞ্ঞাৰিমোক্খং, সচিত্তকং, পণ্ণত্তিৰজ্জং, কাযকম্মং, ৰচীকম্মং, তিচিত্তং, তিৰেদনন্তি. যঞ্চেত্থ সঙ্ঘেন পরিচ্ছিন্দিতব্বাতি ৰুত্তং, তস্স উপপরিক্খিতব্বাতি অত্থো. ছট্ঠং কিরিযং, সঞ্ঞাৰিমোক্খং, সচিত্তকং, লোকৰজ্জং, কাযকম্মং, ৰচীকম্মং, অকুসলচিত্তং দুক্খৰেদনন্তি. যং পনেত্থ ‘‘পরিচ্ছিন্দিত্ৰা’’তি ৰুত্তং, তস্স উপপরিক্খিত্ৰাতি অত্থো.

চতুত্থপঞ্চমছট্ঠসিক্খাপদানি

৭. সত্তমসিক্খাপদৰণ্ণনা

১১৫০. সত্তমে – সব্বং উত্তানমেৰ. ধুরনিক্খেপসমুট্ঠানং – কিরিযং, সঞ্ঞাৰিমোক্খং, সচিত্তকং, লোকৰজ্জং, কাযকম্মং, ৰচীকম্মং, অকুসলচিত্তং, দুক্খৰেদনন্তি.

সত্তমসিক্খাপদং.

৮. অট্ঠমসিক্খাপদৰণ্ণনা

১১৫৪. অট্ঠমেপি – সব্বং উত্তানমেৰ. সমুট্ঠানাদীনিপি অনন্তরসদিসানেৰাতি.

অট্ঠমসিক্খাপদং.

৯. নৰমসিক্খাপদৰণ্ণনা

১১৫৮. নৰমে – সোকাৰাসন্তি সঙ্কেতং কত্ৰা অগচ্ছমানা পুরিসানং অন্তো সোকং পৰেসেতীতি সোকাৰাসা, তং সোকাৰাসং. তেনেৰাহ – ‘‘সোকাৰাসা নাম পরেসং দুক্খং উপ্পাদেতী’’তি. অথ ৰা ঘরং ৰিয ঘরসামিকা, অযম্পি পুরিসসমাগমং অলভমানা সোকং আৰিসতি. ইতি যং আৰিসতি, স্ৰাস্সা আৰাসো হোতীতি সোকাৰাসা. তেনাহ – ‘‘সোকং আৰিসতী’’তি. অজানন্তীতি এদিসা অযন্তি অজানমানা. সেসং উত্তানমেৰ. তিসমুট্ঠানং – কিরিযং, সঞ্ঞাৰিমোক্খং, সচিত্তকং, পণ্ণত্তিৰজ্জং, কাযকম্মং, ৰচীকম্মং, তিচিত্তং, তিৰেদনন্তি.

নৰমসিক্খাপদং.

১০. দসমসিক্খাপদৰণ্ণনা

১১৬৪. দসমে – অনাপুচ্ছাতি অনাপুচ্ছিত্ৰা. ভিক্খুনীহি দ্ৰিক্খত্তুং আপুচ্ছিতব্বং – পব্বজ্জাকালে চ উপসম্পদাকালে চ, ভিক্খূনং পন সকিং আপুচ্ছিতেপি ৰট্টতি.

১১৬৫. অজানন্তীতি মাতাদীনং অত্থিভাৰং অজানন্তী. সেসং উত্তানমেৰ. ইদং অপুব্বসমুট্ঠানসীসং. চতুসমুট্ঠানং – ৰাচতো কাযৰাচতো ৰাচাচিত্ততো কাযৰাচাচিত্ততো চ সমুট্ঠাতি. কথং? অব্ভানকম্মাদীসু কেনচিদেৰ করণীযেন খণ্ডসীমাযং নিসিন্না ‘‘পক্কোসথ সিক্খমানং, ইধেৰ নং উপসম্পাদেস্সামা’’তি উপসম্পাদেতি; এৰং ৰাচতো সমুট্ঠাতি. উপস্সযতো পট্ঠায উপসম্পাদেস্সামীতি ৰত্ৰা খণ্ডসীমং গচ্ছন্তিযা কাযৰাচতো সমুট্ঠাতি. দ্ৰীসুপি ঠানেসু পণ্ণত্তিভাৰং জানিত্ৰাৰ ৰীতিক্কমং করোন্তিযা ৰাচাচিত্ততো কাযৰাচাচিত্ততো চ সমুট্ঠাতি. অননুজানাপেত্ৰা উপসম্পাদনতো কিরিযাকিরিযং, নোসঞ্ঞাৰিমোক্খং, অচিত্তকং, পণ্ণত্তিৰজ্জং, কাযকম্মং, ৰচীকম্মং, তিচিত্তং, তিৰেদনন্তি.

দসমসিক্খাপদং.

১১. একাদসমসিক্খাপদৰণ্ণনা

১১৬৭-৮. একাদসমে – পারিৰাসিকছন্দদানেনাতি পারিৰাসিযেন ছন্দদানেন. তত্থ চতুব্বিধং পারিৰাসিযং – পরিসপারিৰাসিযং, রত্তিপারিৰাসিযং, ছন্দপারিৰাসিযং, অজ্ঝাসযপারিৰাসিযন্তি. তত্থ পরিসপারিৰাসিযং নাম ভিক্খূ কেনচিদেৰ করণীযেন সন্নিপতিতা হোন্তি, অথ মেঘো ৰা উট্ঠাতি, উস্সারণা ৰা করিযতি, মনুস্সা ৰা অজ্ঝোত্থরন্তা আগচ্ছন্তি, ভিক্খূ ‘‘অনোকাসা মযং অঞ্ঞত্র গচ্ছামা’’তি ছন্দং অৰিস্সজ্জেত্ৰাৰ উট্ঠহন্তি. ইদং পরিসপারিৰাসিযং. কিঞ্চাপি পরিসপারিৰাসিযং, ছন্দস্স পন অৰিস্সট্ঠত্তা কম্মং কাতুং ৰট্টতি.

পুন ভিক্খূ ‘‘উপোসথাদীনি করিস্সামা’’তি রত্তিং সন্নিপতিত্ৰা ‘‘যাৰ সব্বে সন্নিপতন্তি, তাৰ ধম্মং সুণিস্সামা’’তি একং অজ্ঝেসন্তি, তস্মিং ধম্মকথং কথেন্তেযেৰ অরুণো উগ্গচ্ছতি. সচে ‘‘চাতুদ্দসিকং উপোসথং করিস্সামা’’তি নিসিন্না ‘‘পন্নরসো’’তি কাতুং ৰট্টতি. সচে পন্নরসিকং কাতুং নিসিন্না পাটিপদে অনুপোসথে উপোসথং কাতুং ন ৰট্টতি, অঞ্ঞং পন সঙ্ঘকিচ্চং কাতুং ৰট্টতি. ইদং রত্তিপারিৰাসিযং নাম.

পুন ভিক্খূ ‘‘কিঞ্চিদেৰ অব্ভানাদিসঙ্ঘকম্মং করিস্সামা’’তি নিসিন্না হোন্তি, তত্রেকো নক্খত্তপাঠকো ভিক্খু এৰং ৰদতি – ‘‘অজ্জ নক্খত্তং দারুণং, মা ইমং কম্মং করোথা’’তি. তে তস্স ৰচনেন ছন্দং ৰিস্সজ্জেত্ৰা তত্থেৰ নিসিন্না হোন্তি. অথঞ্ঞো আগন্ত্ৰা ‘‘নক্খত্তং পটিমানেন্তং অত্থো বালং উপচ্চগা’’তি (জা. ১.১.৪৯) ৰত্ৰা ‘‘কিং নক্খত্তেন করোথা’’তি ৰদতি. ইদং ছন্দপারিৰাসিযঞ্চেৰ অজ্ঝাসযপারিৰাসিযঞ্চ. এতস্মিং পারিৰাসিযে পুন ছন্দপারিসুদ্ধিং অনানেত্ৰা কম্মং কাতুং ন ৰট্টতি.

ৰুট্ঠিতায পরিসাযাতি ছন্দং ৰিস্সজ্জেত্ৰা কাযেন ৰা ৰাচায ৰা ছন্দৰিস্সজ্জনমত্তেনেৰ ৰা উট্ঠিতায পরিসায.

১১৬৯. অনাপত্তি অৰুট্ঠিতায পরিসাযাতি ছন্দং অৰিস্সজ্জেত্ৰা অৰুট্ঠিতায অনাপত্তি. সেসং উত্তানমেৰ. তিসমুট্ঠানং – কিরিযং, সঞ্ঞাৰিমোক্খং, সচিত্তকং, পণ্ণত্তিৰজ্জং, কাযকম্মং, ৰচীকম্মং, তিচিত্তং, তিৰেদনন্তি.

একাদসমসিক্খাপদং.

১২. দ্ৰাদসমসিক্খাপদৰণ্ণনা

১১৭০. দ্ৰাদসমে – উপস্সযো ন সম্মতীতি ৰসনোকাসো নপ্পহোতি. সেসং উত্তানমেৰ. সমুট্ঠানাদীনি অনন্তরসদিসানেৰাতি.

দ্ৰাদসমসিক্খাপদং.

১৩. তেরসমসিক্খাপদৰণ্ণনা

১১৭৫. তেরসমে – একং ৰস্সং দ্ৰেতি একন্তরিকে একস্মিং সংৰচ্ছরে দ্ৰে ৰুট্ঠাপেতি. সেসং উত্তানমেৰ. সমুট্ঠানাদীনিপি ৰুত্তসদিসানেৰাতি.

তেরসমসিক্খাপদং.

কুমারিভূতৰগ্গো অট্ঠমো.