৯. ছত্তুপাহনৰগ্গো

১. পঠমসিক্খাপদৰণ্ণনা

১১৮১. ছত্তৰগ্গস্স পঠমসিক্খাপদে – সকিম্পি ধারেতি আপত্তি পাচিত্তিযস্সাতি মগ্গগমনে একপযোগেনেৰ দিৰসম্পি ধারেতি, একাৰ আপত্তি. সচে কদ্দমাদীনি পত্ৰা উপাহনা ওমুঞ্চিত্ৰা ছত্তমেৰ ধারেন্তী গচ্ছতি, দুক্কটং. অথাপি গচ্ছাদীনি দিস্ৰা ছত্তং অপনামেত্ৰা উপাহনারুল়্হাৰ গচ্ছতি, দুক্কটমেৰ. সচে ছত্তম্পি অপনামেত্ৰা উপাহনাপি ওমুঞ্চিত্ৰা পুন ধারেতি, পুন পাচিত্তিযং. এৰং পযোগগণনায আপত্তিযো ৰেদিতব্বা. সেসং উত্তানমেৰ. এল়কলোমসমুট্ঠানং – কিরিযং, নোসঞ্ঞাৰিমোক্খং, অচিত্তকং, পণ্ণত্তিৰজ্জং, কাযকম্মং, তিচিত্তং, তিৰেদনন্তি.

পঠমসিক্খাপদং.

২. দুতিযসিক্খাপদৰণ্ণনা

১১৮৪. দুতিযে – যানেন যাযন্তীতি এত্থাপি ওরোহিত্ৰা পুনপ্পুনং অভিরুহন্তিযা পযোগগণনায আপত্তিযো ৰেদিতব্বা. সেসং পঠমে ৰুত্তনযমেৰাতি.

দুতিযসিক্খাপদং.

৩. ততিযসিক্খাপদৰণ্ণনা

১১৯০. ততিযে – ৰিপ্পকিরিযিংসূতি মণযো ৰিপ্পকিণ্ণা. ইধাপি ওমুঞ্চিত্ৰা ধারেন্তিযা পযোগগণনায আপত্তিযো. সমুট্ঠানাদীনি ৰুত্তনযানেৰ. কেৰলং ইধ অকুসলচিত্তং হোতীতি.

ততিযসিক্খাপদং.

৪. চতুত্থসিক্খাপদৰণ্ণনা

১১৯৪. চতুত্থে – সীসূপগাদীসু যং যং ধারেতি, তস্স তস্স ৰসেন ৰত্থুগণনায আপত্তিযো ৰেদিতব্বা. সেসং ততিযে ৰুত্তনযমেৰাতি.

চতুত্থসিক্খাপদং.

৫. পঞ্চমসিক্খাপদৰণ্ণনা

১১৯৯. পঞ্চমে – গন্ধৰণ্ণকেনাতি গন্ধেন চ ৰণ্ণকেন চ. সেসং উত্তানমেৰ. সমুট্ঠানাদীনি ততিযসদিসানেৰাতি.

পঞ্চমসিক্খাপদং.

৬. ছট্ঠসিক্খাপদৰণ্ণনা

১২০২. ছট্ঠে – সব্বং পঞ্চমে ৰুত্তসদিসমেৰাতি.

ছট্ঠসিক্খাপদং.

৭. সত্তমসিক্খাপদৰণ্ণনা

১২০৮-৯. সত্তমে – উম্মদ্দাপেতি আপত্তি পাচিত্তিযস্সাতি এত্থ হত্থং অমোচেত্ৰা উম্মদ্দনে একাৰ আপত্তি, মোচেত্ৰা মোচেত্ৰা উম্মদ্দনে পযোগগণনায আপত্তিযো. সম্বাহনেপি এসেৰ নযো. গিলানাযাতি অন্তমসো মগ্গগমনপরিস্সমেনাপি সাবাধায. আপদাসূতি চোরভযাদীহি সরীরকম্পনাদীসু. সেসং উত্তানমেৰ. সমুট্ঠানাদীনি ততিযসদিসানেৰাতি.

সত্তমসিক্খাপদং.

৮-৯-১০. অট্ঠমনৰমদসমসিক্খাপদৰণ্ণনা

১২১০. অট্ঠমাদীসু তীসু সিক্খমানায সামণেরিযা, গিহিনিযাতি ইদমেৰ নানাকরণং, সেসং সত্তমে ৰুত্তসদিসমেৰাতি.

অট্ঠমনৰমদসমসিক্খাপদানি.

১১. একাদসমসিক্খাপদৰণ্ণনা

১২১৪. একাদসমে – ভিক্খুস্স পুরতোতি অভিমুখমেৰাতি অত্থো. ইদং পন উপচারং সন্ধায কথিতন্তি ৰেদিতব্বং. সেসং উত্তানমেৰ. কথিনসমুট্ঠানং – কাযৰাচতো কাযৰাচাচিত্ততো চ সমুট্ঠাতি, কিরিযাকিরিযং, নোসঞ্ঞাৰিমোক্খং, অচিত্তকং, পণ্ণত্তিৰজ্জং, কাযকম্মং, ৰচীকম্মং, তিচিত্তং, তিৰেদনন্তি.

একাদসমসিক্খাপদং.

১২. দ্ৰাদসমসিক্খাপদৰণ্ণনা

১২১৯-২৩. দ্ৰাদসমে – অনোকাসকতন্তি অসুকস্মিং নাম ঠানে পুচ্ছামীতি এৰং অকতওকাসং. তেনেৰাহ – ‘‘অনোকাসকতন্তি অনাপুচ্ছা’’তি. অনোদিস্সাতি অসুকস্মিং নাম ঠানে পুচ্ছামীতি এৰং অনিযমেত্ৰা কেৰলং ‘‘পুচ্ছিতব্বং অত্থি, পুচ্ছামি অয্যা’’তি এৰং ৰত্ৰা. সেসং উত্তানমেৰ. পদসোধম্মসমুট্ঠানং – ৰাচতো ৰাচাচিত্ততো চ সমুট্ঠাতি, কিরিযাকিরিযং, নোসঞ্ঞাৰিমোক্খং, অচিত্তকং, পণ্ণত্তিৰজ্জং, ৰচীকম্মং, তিচিত্তং, তিৰেদনন্তি.

দ্ৰাদসমসিক্খাপদং.

১৩. তেরসমসিক্খাপদৰণ্ণনা

১২২৬. তেরসমে – পরিক্খেপং অতিক্কামেন্তিযাতি একেন পাদেন অতিক্কন্তে দুক্কটং, দুতিযেন পাচিত্তিযং. উপচারেপি এসেৰ নযো.

১২২৭. অচ্ছিন্নচীৰরিকাযাতিআদীসু সঙ্কচ্চিকচীৰরমেৰ চীৰরন্তি ৰেদিতব্বং. আপদাসূতি মহগ্ঘং হোতি সঙ্কচ্চিকং, পারুপিত্ৰা গচ্ছন্তিযাৰ উপদ্দৰো উপ্পজ্জতি, এৰরূপাসু আপদাসু অনাপত্তি. সেসং উত্তানমেৰ. এল়কলোমসমুট্ঠানং – কিরিযং, নোসঞ্ঞাৰিমোক্খং, অচিত্তকং, পণ্ণত্তিৰজ্জং, কাযকম্মং, তিচিত্তং, তিৰেদনন্তি.

তেরসমসিক্খাপদং.

ছত্তুপাহনৰগ্গো নৰমো.

উদ্দিট্ঠা খো অয্যাযো ছসট্ঠিসতং পাচিত্তিযা ধম্মাতি এত্থ সব্বানেৰ ভিক্খুনীনং খুদ্দকেসু ছন্নৰুতি, ভিক্খূনং দ্ৰেনৰুতীতি অট্ঠাসীতিসতং সিক্খাপদানি, ততো সকলং ভিক্খুনীৰগ্গং, পরম্পরভোজনং, অনতিরিত্তভোজনং, অনতিরিত্তেন অভিহট্ঠুং পৰারণং, পণীতভোজনৰিঞ্ঞত্তি, অচেলকসিক্খাপদং, দুট্ঠুল্লপটিচ্ছাদনং, ঊনৰীসতিৰস্সুপসম্পাদনং, মাতুগামেন সদ্ধিং সংৰিধায অদ্ধানগমনং, রাজন্তেপুরপ্পৰেসনং, সন্তং ভিক্খুং অনাপুচ্ছা ৰিকালে গামপ্পৰেসনং, নিসীদনং ৰস্সিকসাটিকন্তি ইমানি দ্ৰাৰীসতি সিক্খাপদানি অপনেত্ৰা সেসানি সতঞ্চ ছসট্ঠি চ সিক্খাপদানি পাতিমোক্খুদ্দেসমগ্গেন উদ্দিট্ঠানি হোন্তীতি ৰেদিতব্বানি. তেনাহ – ‘‘উদ্দিট্ঠা খো অয্যাযো ছসট্ঠিসতং পাচিত্তিযা ধম্মা…পে… এৰমেতং ধারযামী’’তি.

তত্রাযং সঙ্খেপতো সমুট্ঠানৰিনিচ্ছযো – গিরগ্গসমজ্জং, চিত্তাগারসিক্খাপদং, সঙ্ঘাণি, ইত্থালঙ্কারো, গন্ধৰণ্ণকো, ৰাসিতকপিঞ্ঞাকো, ভিক্খুনীআদীহি উম্মদ্দনপরিমদ্দনানীতি ইমানি দস সিক্খাপদানি অচিত্তকানি লোকৰজ্জানি. অযং পনেত্থ অধিপ্পাযো – ৰিনাপি চিত্তেন আপজ্জিতব্বত্তা অচিত্তকানি, চিত্তে পন সতি অকুসলেনেৰ আপজ্জিতব্বত্তা লোকৰজ্জানি. অৰসেসানি অচিত্তকানি, পণ্ণত্তিৰজ্জানেৰ. চোরীৰুট্ঠাপনং, গামন্তরং, আরামসিক্খাপদং গব্ভিনিৰগ্গে আদিতো পট্ঠায সত্ত, কুমারিভূতৰগ্গে আদিতো পট্ঠায পঞ্চ, পুরিসসংসট্ঠং পারিৰাসিযছন্দদানং, অনুৰস্সৰুট্ঠাপনং, একন্তরিকৰুট্ঠাপনন্তি ইমানি একূনৰীসতি সিক্খাপদানি সচিত্তকানি পণ্ণত্তিৰজ্জানি, অৰসেসানি সচিত্তকানি লোকৰজ্জানেৰাতি.

সমন্তপাসাদিকায ৰিনযসংৰণ্ণনায ভিক্খুনীৰিভঙ্গে

খুদ্দকৰণ্ণনা নিট্ঠিতা.

পাচিত্তিযকণ্ডং নিট্ঠিতং.