২. অন্ধকারৰগ্গো

১. পঠমসিক্খাপদৰণ্ণনা

৮৩৯. অন্ধকারৰগ্গস্স পঠমসিক্খাপদে – অপ্পদীপেতি পদীপচন্দসূরিযঅগ্গীসু একেনাপি অনোভাসিতে. তেনেৰস্স পদভাজনে ‘‘অনালোকে’’তি ৰুত্তং. সল্লপেয্য ৰাতি গেহস্সিতকথং কথেয্য.

৮৪১. অরহোপেক্খা অঞ্ঞৰিহিতাতি ন রহোঅস্সাদাপেক্খা রহোঅস্সাদতো অঞ্ঞৰিহিতাৰ হুত্ৰা ঞাতিং ৰা পুচ্ছতি, দানে ৰা পূজায ৰা মন্তেতি. সেসং উত্তানমেৰ. থেয্যসত্থসমুট্ঠানং – কাযচিত্ততো কাযৰাচাচিত্ততো চ সমুট্ঠাতি, কিরিযং, সঞ্ঞাৰিমোক্খং, সচিত্তকং, লোকৰজ্জং, কাযকম্মং, ৰচীকম্মং, অকুসলচিত্তং, দ্ৰিৰেদনন্তি.

পঠমসিক্খাপদং.

২. দুতিযসিক্খাপদৰণ্ণনা

৮৪২. দুতিযে – পটিচ্ছন্নে ওকাসেতি ইদমেৰ নানং. সেসং সব্বং পুরিমসদিসমেৰাতি.

দুতিযসিক্খাপদং.

৩. ততিযসিক্খাপদৰণ্ণনা

৮৪৬. ততিযে – অজ্ঝোকাসেতি নানং, সেসং সব্বং তাদিসমেৰাতি.

ততিযসিক্খাপদং.

৪. চতুত্থসিক্খাপদৰণ্ণনা

৮৫০-৩. চতুত্থে – নিকণ্ণিকন্তি কণ্ণমূলং ৰুচ্চতি; কণ্ণমূলে জপ্পেয্যাতি ৰুত্তং হোতি. সতি করণীযেতি সলাকভত্তাদীনং আহরণত্থায ৰিহারে ৰা দুন্নিক্খিত্তং পটিসামনত্থায. সেসং উত্তানমেৰ. সমুট্ঠানাদীনি পুরিমসদিসানেৰাতি.

চতুত্থসিক্খাপদং.

৫. পঞ্চমসিক্খাপদৰণ্ণনা

৮৫৪. পঞ্চমে – ঘরং সোধেন্তাতি তেসং কির এতদহোসি – ‘‘থেরিযা কোচি কাযিকৰাচসিকো ৰীতিক্কমো ন দিস্সতি, ঘরম্পি তাৰ সোধেমা’’তি, ততো ঘরং সোধেন্তা নং অদ্দসংসু.

৮৫৬. অনোৰস্সকং অতিক্কামেন্তিযাতি পঠমং পাদং অতিক্কামেন্তিযা দুক্কটং, দুতিযং অতিক্কামেন্তিযা পাচিত্তিযং, উপচারাতিক্কমে এসেৰ নযো.

৮৫৮. গিলানাযাতি যা তাদিসেন গেলঞ্ঞেন আপুচ্ছিতুং ন সক্কোতি. আপদাসূতি ঘরে অগ্গি ৰা উট্ঠিতো হোতি, চোরা ৰা; এৰরূপে উপদ্দৰে অনাপুচ্ছা পক্কমতি, অনাপত্তি. সেসমেত্থ উত্তানমেৰ.

কথিনসমুট্ঠানং – কাযৰাচতো কাযৰাচাচিত্ততো চ সমুট্ঠাতি, কিরিযাকিরিযং, নোসঞ্ঞাৰিমোক্খং, অচিত্তকং, পণ্ণত্তিৰজ্জং, কাযকম্মং, ৰচীকম্মং, তিচিত্তং, তিৰেদনন্তি.

পঞ্চমসিক্খাপদং.

৬. ছট্ঠসিক্খাপদৰণ্ণনা

৮৬০. ছট্ঠে – অভিনিসীদেয্যাতি নিসীদেয্য. নিসীদিত্ৰা গচ্ছন্তিযা একা আপত্তি, অনিসীদিত্ৰা নিপজ্জিত্ৰা গচ্ছন্তিযা একা, নিসীদিত্ৰা নিপজ্জিত্ৰা গচ্ছন্তিযা দ্ৰে.

৮৬৩. ধুৰপঞ্ঞত্তেতি ভিক্খুনীনং অত্থায নিচ্চপঞ্ঞত্তে. সেসং উত্তানমেৰ. কথিনসমুট্ঠানং…পে… তিৰেদনন্তি.

ছট্ঠসিক্খাপদং.

৭. সত্তমসিক্খাপদৰণ্ণনা

৮৬৪. সত্তমেপি – সব্বং ছট্ঠে ৰুত্তনযেনেৰ ৰেদিতব্বং.

সত্তমসিক্খাপদং.

৮. অট্ঠমসিক্খাপদৰণ্ণনা

৮৬৯. অট্ঠমে – সব্বং উত্তানমেৰ. তিসমুট্ঠানং – কিরিযং, সঞ্ঞাৰিমোক্খং, সচিত্তকং, লোকৰজ্জং, কাযকম্মং, ৰচীকম্মং অকুসলচিত্তং, দুক্খৰেদনন্তি.

অট্ঠমসিক্খাপদং.

৯. নৰমসিক্খাপদৰণ্ণনা

৮৭৫. নৰমে – অভিসপেয্যাতি সপথং করেয্য. নিরযেন অভিসপতি নাম ‘‘নিরযে নিব্বত্তামি, অৰীচিম্হি নিব্বত্তামি, নিরযে নিব্বত্ততু, অৰীচিম্হি নিব্বত্ততূ’’তি এৰমাদিনা নযেন অক্কোসতি. ব্রহ্মচরিযেন অভিসপতি নাম ‘‘গিহিনী হোমি, ওদাতৰত্থা হোমি, পরিব্বাজিকা হোমি, ইতরা ৰা এদিসা হোতূ’’তি এৰমাদিনা নযেন অক্কোসতি; ৰাচায ৰাচায পাচিত্তিযং. ঠপেত্ৰা পন নিরযঞ্চ ব্রহ্মচরিযঞ্চ ‘‘সুনখী সূকরী কাণা কুণী’’তিআদিনা নযেন অক্কোসন্তিযা ৰাচায ৰাচায দুক্কটং.

৮৭৮. অত্থপুরেক্খারাযাতি অট্ঠকথং কথেন্তিযা. ধম্মপুরেক্খারাযাতি পাল়িং ৰাচেন্তিযা. অনুসাসনিপুরেক্খারাযাতি ‘‘ইদানিপি ত্ৰং এদিসা, সাধু ৰিরমস্সু, নো চে ৰিরমসি, অদ্ধা পুন এৰরূপানি কম্মানি কত্ৰা নিরযে উপ্পজ্জিস্সসি, তিরচ্ছানযোনিযা উপ্পজ্জিস্সসী’’তি এৰং অনুসাসনিযং ঠত্ৰা ৰদন্তিযা অনাপত্তি. সেসং উত্তানমেৰ.

তিসমুট্ঠানং – কিরিযং, সঞ্ঞাৰিমোক্খং, সচিত্তকং, লোকৰজ্জং, কাযকম্মং, ৰচীকম্মং, অকুসলচিত্তং, দুক্খৰেদনন্তি.

নৰমসিক্খাপদং.

১০. দসমসিক্খাপদৰণ্ণনা

৮৭৯. দসমে – সব্বং উত্তানমেৰ. ধুরনিক্খেপসমুট্ঠানং – কাযৰাচাচিত্ততো সমুট্ঠাতি, কিরিযং, সঞ্ঞাৰিমোক্খং, সচিত্তকং, লোকৰজ্জং, কাযকম্মং, ৰচীকম্মং, অকুসলকম্মং, দুক্খৰেদনন্তি.

দসমসিক্খাপদং.

অন্ধকারৰগ্গো দুতিযো.