৩. নগ্গৰগ্গো

১. পঠমসিক্খাপদৰণ্ণনা

৮৮৩-৬. নগ্গৰগ্গস্স পঠমসিক্খাপদে – ব্রহ্মচরিযং চিণ্ণেনাতি ব্রহ্মচরিযেন চিণ্ণেন; অথ ৰা ব্রহ্মচরিযস্স চরণেনাতি; এৰং করণত্থে ৰা সামিঅত্থে ৰা উপযোগৰচনং ৰেদিতব্বং. অচ্ছিন্নচীৰরিকাযাতি ইদং উদকসাটিকং সন্ধায ৰুত্তং, ন অঞ্ঞং চীৰরং. তস্মা উদকসাটিকায অচ্ছিন্নায ৰা নট্ঠায ৰা নগ্গায ন্হাযন্তিযা অনাপত্তি. সচেপি উদকসাটিকচীৰরং মহগ্ঘং হোতি, ন সক্কা নিৰাসেত্ৰা বহি গন্তুং, এৰম্পি নগ্গায ন্হাযিতুং ৰট্টতি. সেসমেত্থ উত্তানমেৰ.

এল়কলোমসমুট্ঠানং – কিরিযং, নোসঞ্ঞাৰিমোক্খং, অচিত্তকং, পণ্ণত্তিৰজ্জং, কাযকম্মং, তিচিত্তং, তিৰেদনন্তি.

পঠমসিক্খাপদং.

২. দুতিযসিক্খাপদৰণ্ণনা

৮৮৭. দুতিযে – সব্বং উত্তানমেৰ. ছসমুট্ঠানং – কিরিযং, নোসঞ্ঞাৰিমোক্খং, অচিত্তকং, পণ্ণত্তিৰজ্জং, কাযকম্মং, ৰচীকম্মং, তিচিত্তং, তিৰেদনন্তি.

দুতিযসিক্খাপদং.

৩. ততিযসিক্খাপদৰণ্ণনা

৮৯৩-৪. ততিযে – অনন্তরাযিকিনীতি দসসু অন্তরাযেসু একেনপি অন্তরাযেন অনন্তরাযা. ধুরং নিক্খিত্তমত্তেতি ধুরং নিক্খিপিত্ৰা সচেপি পচ্ছা সিব্বতি, আপত্তিযেৰাতি অত্থো. সেসং উত্তানমেৰ.

ধুরনিক্খেপসমুট্ঠানং – অকিরিযং, সঞ্ঞাৰিমোক্খং, সচিত্তকং, লোকৰজ্জং, কাযকম্মং, ৰচীকম্মং, অকুসলচিত্তং, দুক্খৰেদনন্তি.

ততিযসিক্খাপদং.

৪. চতুত্থসিক্খাপদৰণ্ণনা

৮৯৮-৯. চতুত্থে – পঞ্চ অহানি পঞ্চাহং, পঞ্চাহমেৰ পঞ্চাহিকং. সঙ্ঘাটীনং চারো সঙ্ঘাটিচারো; পরিভোগৰসেন ৰা ওতাপনৰসেন ৰা সঙ্ঘটিতট্ঠেন সঙ্ঘাটীতি লদ্ধনামানং পঞ্চন্নং চীৰরানং পরিৰত্তনন্তি অত্থো. তস্মাযেৰ পদভাজনে ‘‘পঞ্চমং দিৰসং পঞ্চ চীৰরানী’’তিআদিমাহ. আপত্তি পাচিত্তিযস্সাতি এত্থ চ একস্মিং চীৰরে একা আপত্তি; পঞ্চসু পঞ্চ.

৯০০. আপদাসূতি মহগ্ঘং চীৰরং, ন সক্কা হোতি চোরভযাদীসু পরিভুঞ্জিতুং; এৰরূপে উপদ্দৰে অনাপত্তি. সেসং উত্তানমেৰ. কথিনসমুট্ঠানং – অকিরিযং, নোসঞ্ঞাৰিমোক্খং, অচিত্তকং, পণ্ণত্তিৰজ্জং, কাযকম্মং, ৰচীকম্মং, তিচিত্তং, তিৰেদনন্তি.

চতুত্থসিক্খাপদং.

৫. পঞ্চমসিক্খাপদৰণ্ণনা

৯০৩. পঞ্চমে – চীৰরসঙ্কমনীযন্তি সঙ্কমেতব্বং চীৰরং; অঞ্ঞিস্সা সন্তকং অনাপুচ্ছা গহিতং পুন পটিদাতব্বচীৰরন্তি অত্থো.

৯০৬. আপদাসূতি সচে অপারুতং ৰা অনিৰত্থং ৰা চোরা হরন্তি, এৰরূপাসু আপদাসু ধারেন্তিযা অনাপত্তি. সেসং উত্তানমেৰ. কথিনসমুট্ঠানং – কিরিযাকিরিযং, নোসঞ্ঞাৰিমোক্খং, অচিত্তকং, পণ্ণত্তিৰজ্জং, কাযকম্মং, ৰচীকম্মং, তিচিত্তং, তিৰেদনন্তি.

পঞ্চমসিক্খাপদং.

৬. ছট্ঠসিক্খাপদৰণ্ণনা

৯০৯-১০. ছট্ঠে – অঞ্ঞং পরিক্খারন্তি যংকিঞ্চি থালকাদীনং ৰা সপ্পিতেলাদীনং ৰা অঞ্ঞতরং. আনিসংসন্তি ‘‘কিত্তকং অগ্ঘনকং দাতুকামত্থা’’তি পুচ্ছতি, ‘‘এত্তকং নামা’’তি ৰদন্তি, ‘‘আগমেথ তাৰ, ইদানি ৰত্থং মহগ্ঘং, কতিপাহেন কপ্পাসে আগতে সমগ্ঘং ভৰিস্সতী’’তি এৰং ৰত্ৰা নিৰারেন্তিযা অনাপত্তি. সেসং উত্তানমেৰ.

তিসমুট্ঠানং – কিরিযং, সঞ্ঞাৰিমোক্খং, সচিত্তকং, লোকৰজ্জং, কাযকম্মং, ৰচীকম্মং, অকুসলচিত্তং, তিৰেদনন্তি.

ছট্ঠসিক্খাপদং.

৭. সত্তমসিক্খাপদৰণ্ণনা

৯১১. সত্তমে – পক্কমিংসূতি অঞ্ঞাসম্পি আগমনং আগমেন্তী ‘‘অদ্ধা অম্হাকম্পি আগমেস্সতী’’তি তত্থ তত্থ অগমংসু. পটিবাহেয্যাতি পটিসেধেয্য.

৯১৫. আনিসংসন্তি ‘‘একিস্সা একং সাটকং নপ্পহোতি, আগমেথ তাৰ, কতিপাহেন উপ্পজ্জিস্সতি, ততো ভাজেস্সামী’’তি এৰং আনিসংসং দস্সেত্ৰা পটিবাহন্তিযা অনাপত্তি. সেসং উত্তানমেৰ.

তিসমুট্ঠানং – কিরিযং, সঞ্ঞাৰিমোক্খং, সচিত্তকং, পণ্ণত্তিৰজ্জং, কাযকম্মং, ৰচীকম্মং, তিচিত্তং, তিৰেদনন্তি.

সত্তমসিক্খাপদং.

৮. অট্ঠমসিক্খাপদৰণ্ণনা

৯১৬-৮. অট্ঠমে – নটা নাম যে নাটকং নাটেন্তি. নটকা নাম যে নচ্চন্তি. লঙ্ঘকা নাম যে ৰংসৰরত্তাদীসু লঙ্ঘনকম্মং করোন্তি. সোকজ্ঝাযিকা নাম মাযাকারা. কুম্ভথূণিকা নাম ঘটকেন কীল়নকা; বিম্বিসকৰাদকাতিপি ৰদন্তি. দেতি আপত্তি পাচিত্তিযস্সাতি এত্থ চীৰরগণনায আপত্তিযো ৰেদিতব্বা. সেসং উত্তানমেৰ.

ছসমুট্ঠানং – কিরিযং, নোসঞ্ঞাৰিমোক্খং, অচিত্তকং, পণ্ণত্তিৰজ্জং, কাযকম্মং, ৰচীকম্মং, তিচিত্তং, তিৰেদনন্তি.

অট্ঠমসিক্খাপদং.

৯. নৰমসিক্খাপদৰণ্ণনা

৯২১-৪. নৰমে – দুব্বলচীৰরপচ্চাসাযাতি দুব্বলায চীৰরপচ্চাসায. আনিসংসন্তি কিঞ্চাপি ‘‘ন মযং অয্যে সক্কোমা’’তি ৰদন্তি, ‘‘ইদানি পন তেসং কপ্পাসো আগমিস্সতি, সদ্ধো পসন্নো পুরিসো আগমিস্সতি, অদ্ধা দস্সতী’’তি এৰং আনিসংসং দস্সেত্ৰা নিৰারেন্তিযা অনাপত্তি. সেসং উত্তানমেৰ.

নৰমসিক্খাপদং.

১০. দসমসিক্খাপদৰণ্ণনা

৯২৭. দসমে – কথিনুদ্ধারং ন দস্সন্তীতি কীদিসো কথিনুদ্ধারো দাতব্বো, কীদিসো ন দাতব্বোতি? যস্স অত্থারমূলকো আনিসংসো মহা, উব্ভারমূলকো অপ্পো, এৰরূপো ন দাতব্বো. যস্স পন অত্থারমূলকো আনিসংসো অপ্পো, উব্ভারমূলকো মহা, এৰরূপো দাতব্বো. সমানিসংসোপি সদ্ধাপরিপালনত্থং দাতব্বোৰ.

৯৩১. আনিসংসন্তি ভিক্খুনিসঙ্ঘো জিণ্ণচীৰরো, কথিনানিসংসমূলকো মহালাভোতি এৰরূপং আনিসংসং দস্সেত্ৰা পটিবাহন্তিযা অনাপত্তি. সেসং উত্তানমেৰ.

দসমসিক্খাপদং.

নগ্গৰগ্গো ততিযো.