১. সুরাপানসিক্খাপদৰণ্ণনা

৩২৬. সুরাপানৰগ্গস্স পঠমসিক্খাপদে – ভদ্দৰতিকাতি একো গামো, সো ভদ্দিকায ৰতিযা সমন্নাগতত্তা এতং নাম লভি. পথাৰিনোতি অদ্ধিকা. তেজসা তেজন্তি অত্তনো তেজসা আনুভাৰেন নাগস্স তেজং. কাপোতিকাতি কপোতপাদসমৰণ্ণরত্তোভাসা. পসন্নাতি সুরামণ্ডস্সেতং অধিৰচনং. অননুচ্ছৰিযং ভিক্খৰে সাগতস্সাতি পঞ্চাভিঞ্ঞস্স সতো মজ্জপানং নাম ন অনুচ্ছৰিযন্তি ৰুত্তং হোতি.

৩২৮. পুপ্ফাসৰো নাম মধুকপুপ্ফাদীনং রসেন কতো. ফলাসৰো নাম মুদ্দিকফলাদীনি মদ্দিত্ৰা তেসং রসেন কতো. মধ্ৰাসৰো নাম মুদ্দিকানং জাতিরসেন কতো; মক্খিকমধুনাপি করিযতীতি ৰদন্তি. গুল়াসৰো নাম উচ্ছুরসাদীহি করিযতি. সুরা নাম পিট্ঠকিণ্ণপক্খিত্তা; নাল়িকেরাদীনম্পি রসেন কতা সুরাত্ৰেৰ সঙ্খ্যং গচ্ছতি, তস্সাযেৰ কিণ্ণপক্খিত্তায মণ্ডে গহিতে মেরযোত্ৰেৰ সঙ্খ্যং গচ্ছতীতি ৰদন্তি. অন্তমসো কুসগ্গেনপি পিৰতীতি এতং সুরং ৰা মেরযং ৰা বীজতো পট্ঠায কুসগ্গেন পিৰতোপি পাচিত্তিযন্তি অত্থো. একেন পন পযোগেন বহুম্পি পিৰন্তস্স একা আপত্তি. ৰিচ্ছিন্দিত্ৰা ৰিচ্ছিন্দিত্ৰা পিৰতো পযোগগণনায আপত্তিযো.

৩২৯. অমজ্জঞ্চ হোতি মজ্জৰণ্ণং মজ্জগন্ধং মজ্জরসন্তি লোণসোৰীরকং ৰা সুত্তং ৰা হোতি. সূপসম্পাকেতি ৰাসগাহাপনত্থং ঈসকং মজ্জং পক্খিপিত্ৰা সূপং পচন্তি, তস্মিং অনাপত্তি. মংসসম্পাকেপি এসেৰ নযো. তেলং পন ৰাতভেসজ্জত্থং মজ্জেন সদ্ধিং পচন্তি, তস্মিম্পি অনতিক্খিত্তমজ্জেযেৰ অনাপত্তি, যং পন অতিক্খিত্তমজ্জং হোতি, এত্থ মজ্জস্স ৰণ্ণগন্ধরসা পঞ্ঞাযন্তি, তস্মিং আপত্তিযেৰ. অমজ্জং অরিট্ঠন্তি যো অরিট্ঠো মজ্জং ন হোতি, তস্মিং অনাপত্তি. আমলকাদীনংযেৰ কির রসেন অরিট্ঠং করোন্তি, সো মজ্জৰণ্ণগন্ধরসোযেৰ হোতি, ন চ মজ্জং; তং সন্ধাযেতং ৰুত্তং. যো পন সম্ভারপক্খিত্তো, সো মজ্জং হোতি, বীজতো পট্ঠায ন ৰট্টতি. সেসমেত্থ উত্তানমেৰ. এল়কলোমসমুট্ঠানং – কিরিযং, নোসঞ্ঞাৰিমোক্খং, অচিত্তকং, লোকৰজ্জং, কাযকম্মং অকুসলচিত্তং, তিৰেদনন্তি. ৰত্থুঅজাননতায চেত্থ অচিত্তকতা ৰেদিতব্বা, অকুসলেনেৰ পাতব্বতায লোকৰজ্জতাতি.

সুরাপানসিক্খাপদং পঠমং.