১০. সপ্পাণকসিক্খাপদৰণ্ণনা

১৪০. দসমসিক্খাপদে – জানং সপ্পাণকন্তি সপ্পাণকং এতন্তি যথা তথা ৰা জানন্তো. সিঞ্চেয্য ৰা সিঞ্চাপেয্য ৰাতি তেন উদকেন সযং ৰা সিঞ্চেয্য, অঞ্ঞং ৰা আণাপেত্ৰা সিঞ্চাপেয্য. পাল়িযং পন ‘‘সিঞ্চেয্যাতি সযং সিঞ্চতী’’তি ঈদিসানং ৰচনানং অত্থো পুব্বে ৰুত্তনযেনেৰ ৰেদিতব্বো.

তত্থ ধারং অৰিচ্ছিন্দিত্ৰা সিঞ্চন্তস্স একস্মিং উদকঘটে একাৰ আপত্তি. এস নযো সব্বভাজনেসু. ধারং ৰিচ্ছিন্দন্তস্স পন পযোগে পযোগে আপত্তি. মাতিকং সম্মুখং করোতি, দিৰসম্পি সন্দতু, একাৰ আপত্তি. সচে তত্থ তত্থ বন্ধিত্ৰা অঞ্ঞতো অঞ্ঞতো নেতি, পযোগে পযোগে আপত্তি. সকটভারমত্তঞ্চেপি তিণং একপযোগেন উদকে পক্খিপতি, একাৰ আপত্তি. একেকং তিণং ৰা পণ্ণং ৰা পক্খিপন্তস্স পযোগে পযোগে আপত্তি. মত্তিকাযপি অঞ্ঞেসুপি কট্ঠগোমযাদীসু এসেৰ নযো. ইদং পন মহাউদকং সন্ধায ন ৰুত্তং, যং তিণে ৰা মত্তিকায ৰা পক্খিত্তায পরিযাদানং গচ্ছতি, আৰিলং ৰা হোতি, যত্থ পাণকা মরন্তি, তাদিসং উদকং সন্ধায ৰুত্তন্তি ৰেদিতব্বং. সেসমেত্থ উত্তানমেৰাতি.

তিসমুট্ঠানং – কাযচিত্ততো ৰাচাচিত্ততো কাযৰাচাচিত্ততো চ সমুট্ঠাতি, কিরিযং, সঞ্ঞাৰিমোক্খং, সচিত্তকং, পণ্ণত্তিৰজ্জং, কাযকম্মং, ৰচীকম্মং, তিচিত্তং তিৰেদনন্তি.

সপ্পাণকসিক্খাপদং দসমং.

সমত্তো ৰণ্ণনাক্কমেন সেনাসনৰগ্গো দুতিযো.