৭. দুক্খধম্মসুত্তৰণ্ণনা

২৪৪. সত্তমে দুক্খধম্মানন্তি দুক্খসম্ভৰধম্মানং. পঞ্চসু হি খন্ধেসু সতি ছেদনৰধবন্ধনাদিভেদং দুক্খং সম্ভৰতি, তস্মা তে দুক্খসম্ভৰধম্মত্তা দুক্খধম্মাতি ৰুচ্চন্তি. তথা খো পনস্সাতি তেনাকারেনস্স. যথাস্স কামে পস্সতোতি যেনাকারেনস্স কামে পস্সন্তস্স. যথা চরন্তন্তি যেনাকারেন চারঞ্চ ৰিহারঞ্চ অনুবন্ধিত্ৰা চরন্তং. অঙ্গারকাসূপমা কামা দিট্ঠা হোন্তীতি পরিযেট্ঠিমূলকস্স চেৰ পটিসন্ধিমূলকস্স চ দুক্খস্স ৰসেন অঙ্গারকাসু ৰিয মহাপরিল়াহাতি দিট্ঠা হোন্তি. কামে পরিযেসন্তানঞ্হি নাৰায মহাসমুদ্দোগাহনঅজপথসঙ্কুপথপটিপজ্জনউভতোব্যূল়্হসঙ্গামপক্খন্দনাদিৰসেন পরিযেট্ঠিমূলকম্পি, কামে পরিভুঞ্জন্তানং কামপরিভোগচেতনায চতূসু অপাযেসু দিন্নপটিসন্ধিমূলকম্পি মহাপরিল়াহদুক্খং উপ্পজ্জতি. এৰমেতস্স দুৰিধস্সাপি দুক্খস্স ৰসেন অঙ্গারকাসু ৰিয মহাপরিল়াহাতি দিট্ঠা হোন্তি.

দাযন্তি অটৰিং. পুরতোপি কণ্টকোতি পুরিমপস্সে ৰিজ্ঝিতুকামো ৰিয আসন্নট্ঠানেযেৰ ঠিতকণ্টকো. পচ্ছতোতিআদীসুপি এসেৰ নযো. হেট্ঠা পন পাদেহি অক্কন্তট্ঠানস্স সন্তিকে, ন অক্কন্তট্ঠানেযেৰ. এৰং সো কণ্টকগব্ভং পৰিট্ঠো ৰিয ভৰেয্য. মা মং কণ্টকোতি মা মং কণ্টকো ৰিজ্ঝীতি কণ্টকৰেধং রক্খমানো.

দন্ধো, ভিক্খৰে, সতুপ্পাদোতি সতিযা উপ্পাদোযেৰ দন্ধো, উপ্পন্নমত্তায পন তায কাচি কিলেসা নিগ্গহিতাৰ হোন্তি, ন সণ্ঠাতুং সক্কোন্তি. চক্খুদ্ৰারস্মিঞ্হি রাগাদীসু উপ্পন্নেসু দুতিযজৰনৰারেন ‘‘কিলেসা মে উপ্পন্না’’তি ঞত্ৰা ততিযে জৰনৰারে সংৰরজৰনংযেৰ জৰতি. অনচ্ছরিযঞ্চেতং, যং ৰিপস্সকো ততিযজৰনৰারে কিলেসে নিগ্গণ্হেয্য. চক্খুদ্ৰারে পন ইট্ঠারম্মণে আপাথগতে ভৰঙ্গং আৰট্টেত্ৰা আৰজ্জনাদীসু উপ্পন্নেসু ৰোট্ঠব্বনানন্তরং সম্পত্তকিলেসজৰনৰারং নিৰত্তেত্ৰা কুসলমেৰ উপ্পাদেতি. আরদ্ধৰিপস্সকানঞ্হি অযমানিসংসো ভাৰনাপটিসঙ্খানে পতিট্ঠিতভাৰস্স.

অভিহট্ঠুং পৰারেয্যুন্তি সুদিন্নত্থেরস্স ৰিয রট্ঠপালকুলপুত্তস্স ৰিয চ কাযেন ৰা সত্ত রতনানি অভিহরিত্ৰা ৰাচায ৰা ‘‘অম্হাকং ধনতো যত্তকং ইচ্ছসি, তত্তকং গণ্হা’’তি ৰদন্তা পৰারেয্যুং. অনুদহন্তীতি সরীরে পলিৰেঠিতত্তা উণ্হপরিল়াহং জনেত্ৰা অনুদহন্তি. সঞ্জাতসেদে ৰা সরীরে লগ্গন্তা অনুসেন্তীতিপি অত্থো. যঞ্হি তং, ভিক্খৰে, চিত্তন্তি ইদং যস্মা চিত্তে অনাৰট্টন্তে পুগ্গলস্স আৰট্টনং নাম নত্থি. এৰরূপঞ্হি চিত্তং অনাৰট্টন্তি, তস্মা ৰুত্তং. ইতি ইমস্মিং সুত্তে ৰিপস্সনাবলমেৰ দীপিতং.