৯. পিণ্ডপাতপারিসুদ্ধিসুত্তৰণ্ণনা

৪৩৮. এৰং মে সুতন্তি পিণ্ডপাতপারিসুদ্ধিসুত্তং. তত্থ পটিসল্লানাতি ফলসমাপত্তিতো.

ৰিপ্পসন্নানীতি ওকাসৰসেনেতং ৰুত্তং. ফলসমাপত্তিতো হি ৰুট্ঠিতস্স পঞ্চহি পসাদেহি পতিট্ঠিতোকাসো ৰিপ্পসন্নো হোতি, ছৰিৰণ্ণো পরিসুদ্ধো. তস্মা এৰমাহ. সুঞ্ঞতৰিহারেনাতি সুঞ্ঞতফলসমাপত্তিৰিহারেন. মহাপুরিসৰিহারোতি বুদ্ধপচ্চেকবুদ্ধতথাগতমহাসাৰকানং মহাপুরিসানং ৰিহারো. যেন চাহং মগ্গেনাতিআদীসু ৰিহারতো পট্ঠায যাৰ গামস্স ইন্দখীলা এস পৰিট্ঠমগ্গো নাম, অন্তোগামং পৰিসিত্ৰা গেহপটিপাটিযা চরিত্ৰা যাৰ নগরদ্ৰারেন নিক্খমনা এস চরিতব্বপদেসো নাম, বহি ইন্দখীলতো পট্ঠায যাৰ ৰিহারা এস পটিক্কন্তমগ্গো নাম. পটিঘং ৰাপি চেতসোতি চিত্তে পটিহঞ্ঞনকিলেসজাতং কিঞ্চি অত্থি নত্থীতি. অহোরত্তানুসিক্খিনাতি দিৰসঞ্চ রত্তিঞ্চ অনুসিক্খন্তেন.

৪৪০. পহীনা নু খো মে পঞ্চ কামগুণাতিআদীসু একভিক্খুস্স পচ্চৰেক্খণা নানা, নানাভিক্খূনং পচ্চৰেক্খণা নানাতি. কথং? একো হি ভিক্খু পচ্ছাভত্তং পিণ্ডপাতপটিক্কন্তো পত্তচীৰরং পটিসামেত্ৰা ৰিৰিত্তোকাসে নিসিন্নো পচ্চৰেক্খতি ‘‘পহীনা নু খো মে পঞ্চকামগুণা’’তি. সো ‘‘অপ্পহীনা’’তি ঞত্ৰা ৰীরিযং পগ্গয্হ অনাগামিমগ্গেন পঞ্চকামগুণিকরাগং সমুগ্ঘাটেত্ৰা মগ্গানন্তরং ফলং ফলানন্তরং মগ্গং ততো ৰুট্ঠায পচ্চৰেক্খন্তো ‘‘পহীনা’’তি পজানাতি. নীৰরণাদীসুপি এসেৰ নযো. এতেসং পন অরহত্তমগ্গেন পহানাদীনি হোন্তি, এৰং একভিক্খুস্স নানাপচ্চৰেক্খণা হোতি. এতাসু পন পচ্চৰেক্খণাসু অঞ্ঞো ভিক্খু একং পচ্চৰেক্খণং পচ্চৰেক্খতি, অঞ্ঞো একন্তি এৰং নানাভিক্খূনং নানাপচ্চৰেক্খণা হোতি. সেসং সব্বত্থ উত্তানমেৰাতি.

পপঞ্চসূদনিযা মজ্ঝিমনিকাযট্ঠকথায

পিণ্ডপাতপারিসুদ্ধিসুত্তৰণ্ণনা নিট্ঠিতা.