৭. অনুরুদ্ধসুত্তৰণ্ণনা

২৩০. এৰং মে সুতন্তি অনুরুদ্ধসুত্তং. তত্থ এৰমাহংসূতি তস্স উপাসকস্স অফাসুককালো অহোসি, তদা উপসঙ্কমিত্ৰা এৰমাহংসু. অপণ্ণকন্তি অৰিরাধিতং. একত্থাতি অপ্পমাণাতি ৰা মহগ্গতাতি ৰা ঝানমেৰ চিত্তেকগ্গতাযেৰ এৰং ৰুচ্চতীতি ইমং সন্ধায এৰমাহ.

২৩১. যাৰতা একং রুক্খমূলং মহগ্গতন্তি ফরিত্ৰা অধিমুচ্চিত্ৰা ৰিহরতীতি একরুক্খমূলপমাণট্ঠানং কসিণনিমিত্তেন ওত্থরিত্ৰা তস্মিং কসিণনিমিত্তে মহগ্গতজ্ঝানং ফরিত্ৰা অধিমুচ্চিত্ৰা ৰিহরতি. মহগ্গতন্তি পনস্স আভোগো নত্থি, কেৰলং মহগ্গতজ্ঝানপৰত্তিৰসেন পনেতং ৰুত্তং. এস নযো সব্বত্থ. ইমিনা খো এতং গহপতি পরিযাযেনাতি ইমিনা কারণেন. এত্থ হি অপ্পমাণাতি ৰুত্তানং ব্রহ্মৰিহারানং নিমিত্তং ন ৰড্ঢতি, উগ্ঘাটনং ন জাযতি, তানি ঝানানি অভিঞ্ঞানং ৰা নিরোধস্স ৰা পাদকানি ন হোন্তি, ৰিপস্সনাপাদকানি পন ৰট্টপাদকানি ভৰোক্কমনানি চ হোন্তি. ‘‘মহগ্গতা’’তি ৰুত্তানং পন কসিণজ্ঝানানং নিমিত্তং ৰড্ঢতি, উগ্ঘাটনং জাযতি, সমতিক্কমা হোন্তি, অভিঞ্ঞাপাদকানি নিরোধপাদকানি ৰট্টপাদকানি ভৰোক্কমনানি চ হোন্তি. এৰমিমে ধম্মা নানত্থা, অপ্পমাণা মহগ্গতাতি এৰং নানাব্যঞ্জনা চ.

২৩২. ইদানি মহগ্গতসমাপত্তিতো নীহরিত্ৰা ভৰূপপত্তিকারণং দস্সেন্তো চতস্সো খো ইমাতিআদিমাহ. পরিত্তাভাতি ফরিত্ৰা জানন্তস্স অযমাভোগো অত্থি, পরিত্তাভেসু পন দেৰেসু নিব্বত্তিকারণং ঝানং ভাৰেন্তো এৰং ৰুত্তো. এস নযো সব্বত্থ. পরিত্তাভা সিযা সংকিলিট্ঠাভা হোন্তি সিযা পরিসুদ্ধাভা, অপ্পমাণাভা সিযা সংকিলিট্ঠাভা হোন্তি সিযা পরিসুদ্ধাভা. কথং? সুপ্পমত্তে ৰা সরাৰমত্তে ৰা কসিণপরিকম্মং কত্ৰা সমাপত্তিং নিব্বত্তেত্ৰা পঞ্চহাকারেহি আচিণ্ণৰসিভাৰো পচ্চনীকধম্মানং সুট্ঠু অপরিসোধিতত্তা দুব্বলমেৰ সমাপত্তিং ৰল়ঞ্জিত্ৰা অপ্পগুণজ্ঝানে ঠিতো কালং কত্ৰা পরিত্তাভেসু নিব্বত্ততি, ৰণ্ণো পনস্স পরিত্তো চেৰ হোতি সংকিলিট্ঠো চ. পঞ্চহি পনাকারেহি আচিণ্ণৰসিভাৰো পচ্চনীকধম্মানং সুট্ঠু পরিসোধিতত্তা সুৰিসুদ্ধং সমাপত্তিং ৰল়ঞ্জিত্ৰা পগুণজ্ঝানে ঠিতো কালং কত্ৰা পরিত্তাভেসু নিব্বত্ততি, ৰণ্ণো পনস্স পরিত্তো চেৰ হোতি পরিসুদ্ধো চ. এৰং পরিত্তাভা সিযা সংকিলিট্ঠাভা হোন্তি সিযা পরিসুদ্ধাভা. কসিণে পন ৰিপুলপরিকম্মং কত্ৰা সমাপত্তিং নিব্বত্তেত্ৰা পঞ্চহাকারেহি আচিণ্ণৰসিভাৰোতি সব্বং পুরিমসদিসমেৰ ৰেদিতব্বং. এৰং অপ্পমাণাভা সিযা সংকিলিট্ঠাভা হোন্তি সিযা পরিসুদ্ধাভাতি.

ৰণ্ণনানত্তন্তি সরীরৰণ্ণস্স নানত্তং. নো চ আভানানত্তন্তি আলোকে নানত্তং ন পঞ্ঞাযতি. অচ্চিনানত্তন্তি দীঘরস্সঅণুথূলৰসেন অচ্চিযা নানত্তং.

যত্থ যত্থাতি উয্যানৰিমানকপ্পরুক্খনদীতীরপোক্খরণীতীরেসু যত্থ যত্থ. অভিনিৰিসন্তীতি ৰসন্তি. অভিরমন্তীতি রমন্তি ন উক্কণ্ঠন্তি. কাজেনাতি যাগুভত্ততেলফাণিতমচ্ছমংসকাজেসু যেন কেনচি কাজেন. ‘‘কাচেনাতি’’পি পাঠো, অযমেৰ অত্থো. পিটকেনাতি পচ্ছিযা. তত্থ তত্থেৰাতি সপ্পিমধুফাণিতাদীনং সুলভট্ঠানতো লোণপূতিমচ্ছাদীনং উস্সন্নট্ঠানং নীতা ‘‘পুব্বে অম্হাকং ৰসনট্ঠানং ফাসুকং, তত্থ সুখং ৰসিম্হা, ইধ লোণং ৰা নো বাধতি পূতিমচ্ছগন্ধো ৰা সীসরোগং উপ্পাদেতী’’তি এৰং চিত্তং অনুপ্পাদেত্ৰা তত্থ তত্থেৰ রমন্তি.

২৩৪. আভাতি আভাসম্পন্না. তদঙ্গেনাতি তস্সা ভৰূপপত্তিযা অঙ্গেন, ভৰূপপত্তিকারণেনাতি অত্থো. ইদানি তং কারণং পুচ্ছন্তো কো নু খো, ভন্তেতিআদিমাহ.

কাযদুট্ঠুল্লন্তি কাযালসিযভাৰো. ঝাযতোতি জলতো.

২৩৫. দীঘরত্তং খো মেতি থেরো কির পারমিযো পূরেন্তো ইসিপব্বজ্জং পব্বজিত্ৰা সমাপত্তিং নিব্বত্তেত্ৰা নিরন্তরং তীণি অত্তভাৰসতানি ব্রহ্মলোকে পটিলভি, তং সন্ধাযেতং আহ. ৰুত্তম্পি চেতং –

‘‘অৰোকিণ্ণং তীণি সতং, যং পব্বজিং ইসিপব্বজ্জং;

অসঙ্খতং গৰেসন্তো, পুব্বে সঞ্চরিতং মম’’ন্তি.

সেসং সব্বত্থ উত্তানমেৰাতি.

পপঞ্চসূদনিযা মজ্ঝিমনিকাযট্ঠকথায

অনুরুদ্ধসুত্তৰণ্ণনা নিট্ঠিতা.