৬. ইসিগিলিসুত্তৰণ্ণনা

১৩৩. এৰং মে সুতন্তি ইসিগিলিসুত্তং. তত্থ অঞ্ঞাৰ সমঞ্ঞা অহোসীতি ইসিগিলিস্স ইসিগিলীতি সমঞ্ঞায উপ্পন্নকালে ৰেভারো ন ৰেভারোতি পঞ্ঞাযিত্থ, অঞ্ঞাযেৰস্স সমঞ্ঞা অহোসি. অঞ্ঞা পঞ্ঞত্তীতি ইদং পুরিমপদস্সেৰ ৰেৰচনং. সেসেসুপি এসেৰ নযো.

তদা কির ভগৰা সাযন্হসমযে সমাপত্তিতো ৰুট্ঠায গন্ধকুটিতো নিক্খমিত্ৰা যস্মিং ঠানে নিসিন্নানং পঞ্চ পব্বতা পঞ্ঞাযন্তি, তত্থ ভিক্খুসঙ্ঘপরিৰুতো নিসীদিত্ৰা ইমে পঞ্চ পব্বতে পটিপাটিযা আচিক্খি. তত্থ ন ভগৰতো পব্বতেহি অত্থো অত্থি, ইতি ইমেসু পন পব্বতেসু পটিপাটিযা কথিযমানেসু ইসিগিলিস্স ইসিগিলিভাৰো কথেতব্বো হোতি. তস্মিং কথিযমানে পদুমৰতিযা পুত্তানং পঞ্চসতানং পচ্চেকবুদ্ধানং নামানি চেৰ পদুমৰতিযা চ পত্থনা কথেতব্বা ভৰিস্সতীতি ভগৰা ইমং পঞ্চ পব্বতপটিপাটিং আচিক্খি.

পৰিসন্তা দিস্সন্তি পৰিট্ঠা ন দিস্সন্তীতি যথাফাসুকট্ঠানে পিণ্ডায চরিত্ৰা কতভত্তকিচ্চা আগন্ত্ৰা চেতিযগব্ভে যমকমহাদ্ৰারং ৰিৰরন্তা ৰিয তং পব্বতং দ্ৰেধা কত্ৰা অন্তো পৰিসিত্ৰা রত্তিট্ঠানদিৰাট্ঠানানি মাপেত্ৰা তত্থ ৰসিংসু, তস্মা এৰমাহ. ইমে ইসীতি ইমে পচ্চেকবুদ্ধইসী.

কদা পন তে তত্থ ৰসিংসু? অতীতে কির অনুপ্পন্নে তথাগতে বারাণসিং উপনিস্সায একস্মিং গামকে একা কুলধীতা খেত্তং রক্খমানা একস্স পচ্চেকবুদ্ধস্স পঞ্চহি লাজাসতেহি সদ্ধিং একং পদুমপুপ্ফং দত্ৰা পঞ্চ পুত্তসতানি পত্থেসি. তস্মিংযেৰ চ খণে পঞ্চসতা মিগলুদ্দকা মধুরমংসং দত্ৰা ‘‘এতিস্সা পুত্তা ভৰেয্যামা’’তি পত্থযিংসু. সা যাৰতাযুকং ঠত্ৰা দেৰলোকে নিব্বত্তা, ততো চুতা জাতস্সরে পদুমগব্ভে নিব্বত্তি. তমেকো তাপসো দিস্ৰা পটিজগ্গি, তস্সা ৰিচরন্তিযাৰ পাদুদ্ধারে পাদুদ্ধারে ভূমিতো পদুমানি উট্ঠহন্তি. একো ৰনচরকো দিস্ৰা বারাণসিরঞ্ঞো আরোচেসি. রাজা নং আহরাপেত্ৰা অগ্গমহেসিং অকাসি, তস্সা গব্ভো সণ্ঠাসি. মহাপদুমকুমারো মাতুকুচ্ছিযং ৰসি, সেসা গব্ভমলং নিস্সা নিব্বত্তা. ৰযপ্পত্তা উয্যানে পদুমস্সরে কীল়ন্তা একেকস্মিং পদুমে নিসীদিত্ৰা খযৰযং পট্ঠপেত্ৰা পচ্চেকবোধিঞাণং নিব্বত্তযিংসু. অযং তেসং ব্যাকরণগাথা অহোসি –

‘‘সরোরুহং পদুমপলাসপত্তজং, সুপুপ্ফিতং ভমরগণানুচিণ্ণং;

অনিচ্চতাযুপগতং ৰিদিত্ৰা, একো চরে খগ্গৰিসাণকপ্পো’’তি.

তস্মিং কালে তে তত্থ ৰসিংসু, তদা চস্স পব্বতস্স ইসিগিলীতি সমঞ্ঞা উদপাদি.

১৩৫. যে সত্তসারাতি অরিট্ঠো উপরিট্ঠো তগরসিখী যসস্সী সুদস্সনো পিযদস্সী গন্ধারো পিণ্ডোলো উপাসভো নীতো তথো সুতৰা ভাৰিতত্তোতি তেরসন্নং পচ্চেকবুদ্ধানং নামানি ৰত্ৰা ইদানি তেসঞ্চ অঞ্ঞেসঞ্চ গাথাবন্ধেন নামানি আচিক্খন্তো যে সত্তসারাতিআদিমাহ. তত্থ সত্তসারাতি সত্তানং সারভূতা. অনীঘাতি নিদ্দুক্খা. নিরাসাতি নিত্তণ্হা.

দ্ৰে জালিনোতি চূল়জালি মহাজালীতি দ্ৰে জালিনামকা. সন্তচিত্তোতি ইদম্পি একস্স নামমেৰ. পস্সি জহি উপধিদুক্খমূলন্তি এত্থ পস্সি নাম সো পচ্চেকবুদ্ধো, দুক্খস্স পন মূলং উপধিং জহীতি অযমস্স থুতি. অপরাজিতোতিপি একস্স নামমেৰ.

সত্থা পৰত্তা সরভঙ্গো লোমহংসো উচ্চঙ্গমাযোতি ইমে পঞ্চ জনা. অসিতো অনাসৰো মনোমযোতি ইমেপি তযো জনা. মানচ্ছিদো চ বন্ধুমাতি বন্ধুমা নাম একো, মানস্স পন ছিন্নত্তা মানচ্ছিদোতি ৰুত্তো. তদাধিমুত্তোতিপি নামমেৰ.

কেতুম্ভরাগো চ মাতঙ্গো অরিযোতি ইমে তযো জনা. অথচ্চুতোতি অথ অচ্চুতো. অচ্চুতগামব্যামঙ্কোতি ইমে দ্ৰে জনা. খেমাভিরতো চ সোরতোতি ইমে দ্ৰেযেৰ.

সয্হো অনোমনিক্কমোতি সয্হো নাম সো বুদ্ধো, অনোমৰীরিযত্তা পন অনোমনিক্কমোতি ৰুত্তো. আনন্দো নন্দো উপনন্দো দ্ৰাদসাতি চত্তারো আনন্দা, চত্তারো নন্দা চত্তারো উপনন্দাতি এৰং দ্ৰাদস. ভারদ্ৰাজো অন্তিমদেহধারীতি ভারদ্ৰাজো নাম সো বুদ্ধো. অন্তিমদেহধারীতি থুতি.

তণ্হচ্ছিদোতি সিখরিস্সাযং থুতি. ৰীতরাগোতি মঙ্গলস্স থুতি. উসভচ্ছিদা জালিনিং দুক্খমূলন্তি উসভো নাম সো বুদ্ধো দুক্খমূলভূতং জালিনিং অচ্ছিদাতি অত্থো. সন্তং পদং অজ্ঝগমোপনীতোতি উপনীতো নাম সো বুদ্ধো সন্তং পদং অজ্ঝগমা. ৰীতরাগোতিপি একস্স নামমেৰ. সুৰিমুত্তচিত্তোতি অযং কণ্হস্স থুতি.

এতে চ অঞ্ঞে চাতি এতে পাল়িযং আগতা চ পাল়িযং অনাগতা অঞ্ঞে চ এতেসং একনামকাযেৰ. ইমেসু হি পঞ্চসু পচ্চেকবুদ্ধসতেসু দ্ৰেপি তযোপি দসপি দ্ৰাদসপি আনন্দাদযো ৰিয একনামকা অহেসুং. ইতি পাল়িযং আগতনামেহেৰ সব্বেসং নামানি ৰুত্তানি হোন্তীতি ইতো পরং ৰিসুং ৰিসুং অৰত্ৰা ‘‘এতে চ অঞ্ঞে চা’’তি আহ. সেসং সব্বত্থ উত্তানমেৰাতি.

পপঞ্চসূদনিযা মজ্ঝিমনিকাযট্ঠকথায

ইসিগিলিসুত্তৰণ্ণনা নিট্ঠিতা.