৪. সেৰিতব্বাসেৰিতব্বসুত্তৰণ্ণনা

১০৯. এৰং মে সুতন্তি সেৰিতব্বাসেৰিতব্বসুত্তং. তত্থ তঞ্চ অঞ্ঞমঞ্ঞং কাযসমাচারন্তি অঞ্ঞং সেৰিতব্বং কাযসমাচারং, অঞ্ঞং অসেৰিতব্বং ৰদামি, সেৰিতব্বমেৰ কেনচি পরিযাযেন অসেৰিতব্বন্তি, অসেৰিতব্বং ৰা সেৰিতব্বন্তি চ ন ৰদামীতি অত্থো. ৰচীসমাচারাদীসু এসেৰ নযো. ইতি ভগৰা সত্তহি পদেহি মাতিকং ঠপেত্ৰা ৰিত্থারতো অৰিভজিত্ৰাৰ দেসনং নিট্ঠাপেসি. কস্মা? সারিপুত্তত্থেরস্স ওকাসকরণত্থং.

১১৩. মনোসমাচারে মিচ্ছাদিট্ঠিসম্মাদিট্ঠিযো দিট্ঠিপটিলাভৰসেন ৰিসুং অঙ্গং হুত্ৰা ঠিতাতি ন গহিতা.

১১৪. চিত্তুপ্পাদে অকম্মপথপ্পত্তা অভিজ্ঝাদযো ৰেদিতব্বা.

১১৫. সঞ্ঞাপটিলাভৰারে অভিজ্ঝাসহগতায সঞ্ঞাযাতিআদীনি কামসঞ্ঞাদীনং দস্সনত্থং ৰুত্তানি.

১১৭. সব্যাবজ্ঝন্তি সদুক্খং. অপরিনিট্ঠিতভাৰাযাতি ভৰানং অপরিনিট্ঠিতভাৰায. এত্থ চ সব্যাবজ্ঝত্তভাৰা নাম চত্তারো হোন্তি. পুথুজ্জনোপি হি যো তেনত্তভাৰেন ভৰং পরিনিট্ঠাপেতুং ন সক্কোতি, তস্স পটিসন্ধিতো পট্ঠায অকুসলা ধম্মা ৰড্ঢন্তি, কুসলা ধম্মা চ পরিহাযন্তি, সদুক্খমেৰ অত্তভাৰং অভিনিব্বত্তেতি নাম. তথা সোতাপন্নসকদাগামিঅনাগামিনো. পুথুজ্জনাদযো তাৰ হোন্তু, অনাগামী কথং সব্যাবজ্ঝং অত্তভাৰং অভিনিব্বত্তেতি, কথঞ্চস্স অকুসলা ধম্মা অভিৰড্ঢন্তি, কুসলা ধম্মা পরিহাযন্তীতি. অনাগামীপি হি সুদ্ধাৰাসে নিব্বত্তো উয্যানৰিমানকপ্পরুক্খে ওলোকেত্ৰা ‘‘অহো সুখং অহো সুখ’’ন্তি উদানং উদানেতি, অনাগামিনো ভৰলোভো ভৰতণ্হা অপ্পহীনাৰ হোন্তি, তস্স অপ্পহীনতণ্হতায অকুসলা ৰড্ঢন্তি নাম, কুসলা পরিহাযন্তি নাম, সদুক্খমেৰ অত্তভাৰং অভিনিব্বত্তেতি, অপরিনিট্ঠিতভৰোযেৰ হোতীতি ৰেদিতব্বো.

অব্যাবজ্ঝন্তি অদুক্খং. অযম্পি চতুন্নং জনানং ৰসেন ৰেদিতব্বো. যো হি পুথুজ্জনোপি তেনত্তভাৰেন ভৰং পরিনিট্ঠাপেতুং সক্কোতি, পুন পটিসন্ধিং ন গণ্হাতি, তস্স পটিসন্ধিগ্গহণতো পট্ঠায অকুসলা পরিহাযন্তি, কুসলাযেৰ ৰড্ঢন্তি, অদুক্খমেৰ অত্তভাৰং নিব্বত্তেতি, পরিনিট্ঠিতভৰোযেৰ নাম হোতি. তথা সোতাপন্নসকদাগামিঅনাগামিনো. সোতাপন্নাদযো তাৰ হোন্তু, পুথুজ্জনো কথং অব্যাবজ্ঝঅত্তভাৰং নিব্বত্তেতি, কথঞ্চস্স অকুসলপরিহানিআদীনি হোন্তীতি. পুথুজ্জনোপি পচ্ছিমভৰিকো তেনত্তভাৰেন ভৰং পরিনিট্ঠাপেতুং সমত্থো হোতি. তস্স অঙ্গুলিমালস্স ৰিয একেনূনপাণসহস্সং ঘাতেন্তস্সাপি অত্তভাৰো অব্যাবজ্ঝোযেৰ নাম, ভৰং পরিনিট্ঠাপেতিযেৰ নাম. অকুসলমেৰ হাযতি, ৰিপস্সনমেৰ গব্ভং গণ্হাপেতি নাম.

১১৯. চক্খুৰিঞ্ঞেয্যন্তিআদীসু যস্মা একচ্চস্স তস্মিংযেৰ রূপে রাগাদযো উপ্পজ্জন্তি, অভিনন্দতি অস্সাদেতি, অভিনন্দন্তো অস্সাদেন্তো অনযব্যসনং পাপুণাতি, একচ্চস্স নুপ্পজ্জন্তি, নিব্বিন্দতি ৰিরজ্জতি, নিব্বিন্দন্তো ৰিরজ্জন্তো নিব্বুতিং পাপুণাতি, তস্মা ‘‘তঞ্চ অঞ্ঞমঞ্ঞ’’ন্তি ন ৰুত্তং. এস নযো সব্বত্থ.

এৰং ৰিত্থারেন অত্থং আজানেয্যুন্তি এত্থ কে ভগৰতো ইমস্স ভাসিতস্স অত্থং আজানন্তি, কে ন আজানন্তীতি? যে তাৰ ইমস্স সুত্তস্স পাল়িঞ্চ অট্ঠকথঞ্চ উগ্গণ্হিত্ৰা তক্করা ন হোন্তি, যথাৰুত্তং অনুলোমপটিপদং ন পটিপজ্জন্তি, তে ন আজানন্তি নাম. যে পন তক্করা হোন্তি, যথাৰুত্তং অনুলোমপটিপদং পটিপজ্জন্তি, তে আজানন্তি নাম. এৰং সন্তেপি সপটিসন্ধিকানং তাৰ দীঘরত্তং হিতায সুখায হোতু, অপ্পটিসন্ধিকানং কথং হোতীতি. অপ্পটিসন্ধিকা অনুপাদানা ৰিয জাতৰেদা পরিনিব্বাযন্তি, কপ্পসতসহস্সানম্পি অচ্চযেন তেসং পুন দুক্খং নাম নত্থি. ইতি একংসেন তেসংযেৰ দীঘরত্তং হিতায সুখায হোতি. সেসং সব্বত্থ উত্তানমেৰাতি.

পপঞ্চসূদনিযা মজ্ঝিমনিকাযট্ঠকথায

সেৰিতব্বাসেৰিতব্বসুত্তৰণ্ণনা নিট্ঠিতা.