৮. সমণমুণ্ডিকসুত্তৰণ্ণনা

২৬০. এৰং মে সুতন্তি সমণমুণ্ডিকসুত্তং. তত্থ উগ্গাহমানোতি তস্স পরিব্বাজকস্স নামং. সুমনোতি পকতিনামং. কিঞ্চি কিঞ্চি পন উগ্গহিতুং উগ্গাহেতুং সমত্থতায উগ্গাহমানোতি নং সঞ্জানন্তি. সমযং পৰদন্তি এত্থাতি সমযপ্পৰাদকং. তস্মিং কির ঠানে চঙ্কীতারুক্খপোক্খরসাতিপ্পভুতযো ব্রাহ্মণা নিগণ্ঠাচেলকপরিব্বাজকাদযো চ পব্বজিতা সন্নিপতিত্ৰা অত্তনো অত্তনো সমযং পৰদন্তি কথেন্তি দীপেন্তি, তস্মা সো আরামো সমযপ্পৰাদকোতি ৰুচ্চতি. স্ৰেৰ তিন্দুকাচীরসঙ্খাতায তিম্বরূসকরুক্খপন্তিযা পরিক্খিত্তত্তা তিন্দুকাচীরং. যস্মা পনেত্থ পঠমং একা সালা অহোসি, পচ্ছা মহাপুঞ্ঞং পোট্ঠপাদপরিব্বাজকং নিস্সায বহূ সালা কতা, তস্মা তমেৰ একং সালং উপাদায লদ্ধনামৰসেন একসালকোতি ৰুচ্চতি. মল্লিকায পন পসেনদিরঞ্ঞো দেৰিযা উয্যানভূতো সো পুপ্ফফলসঞ্ছন্নো আরামোতি কত্ৰা মল্লিকায আরামোতি সঙ্খং গতো. তস্মিং সমযপ্পৰাদকে তিন্দুকাচীরে একসালকে মল্লিকায আরামে. পটিৰসতীতি ৰাসফাসুতায ৰসতি. দিৰা দিৰস্সাতি দিৰসস্স দিৰা নাম মজ্ঝন্হাতিক্কমো, তস্মিং দিৰসস্সপি দিৰাভূতে অতিক্কন্তমত্তে মজ্ঝন্হিকে নিক্খমীতি অত্থো. পটিসল্লীনোতি ততো ততো রূপাদিগোচরতো চিত্তং পটিসংহরিত্ৰা লীনো, ঝানরতিসেৰনৰসেন একীভাৰং গতো. মনোভাৰনীযানন্তি মনৰড্ঢনকানং, যে আৰজ্জতো মনসিকরোতো চিত্তং ৰিনীৰরণং হোতি উন্নমতি ৰড্ঢতি. যাৰতাতি যত্তকা. অযং তেসং অঞ্ঞতরোতি অযং তেসং অব্ভন্তরো একো সাৰকো. অপ্পেৰ নামাতি তস্স উপসঙ্কমনং পত্থযমানো আহ. পত্থনাকারণং পন সন্দকসুত্তে ৰুত্তমেৰ.

২৬১. এতদৰোচাতি দন্দপঞ্ঞো অযং গহপতি, ধম্মকথায নং সঙ্গণ্হিত্ৰা অত্তনো সাৰকং করিস্সামীতি মঞ্ঞমানো এতং ‘‘চতূহি খো’’তিআদিৰচনং অৰোচ. তত্থ পঞ্ঞপেমীতি দস্সেমি ঠপেমি. সম্পন্নকুসলন্তি পরিপুণ্ণকুসলং. পরমকুসলন্তি উত্তমকুসলং. অযোজ্ঝন্তি ৰাদযুদ্ধেন যুজ্ঝিত্ৰা চালেতুং অসক্কুণেয্যং অচলং নিক্কম্পং থিরং. ন করোতীতি অকরণমত্তমেৰ ৰদতি, এত্থ পন সংৰরপ্পহানং ৰা পটিসেৰনপ্পহানং ৰা ন ৰদতি. সেসপদেসুপি এসেৰ নযো.

নেৰ অভিনন্দীতি তিত্থিযা নাম জানিত্ৰাপি অজানিত্ৰাপি যং ৰা তং ৰা ৰদন্তীতি মঞ্ঞমানো নাভিনন্দি. ন পটিক্কোসীতি সাসনস্স অনুলোমং ৰিয পসন্নাকারং ৰিয ৰদতীতি মঞ্ঞমানো ন পটিসেধেতি.

২৬২. যথা উগ্গাহমানস্সাতি যথা তস্স ৰচনং, এৰং সন্তে উত্তানসেয্যকো কুমারো অযোজ্ঝসমণো থিরসমণো ভৰিস্সতি, মযং পন এৰং ন ৰদামাতি দীপেতি. কাযোতিপি ন হোতীতি সককাযো পরকাযোতিপি ৰিসেসঞাণং ন হোতি. অঞ্ঞত্র ফন্দিতমত্তাতি পচ্চত্থরণে ৰলিসম্ফস্সেন ৰা মঙ্গুলদট্ঠেন ৰা কাযফন্দনমত্তং নাম হোতি. তং ঠপেত্ৰা অঞ্ঞং কাযেন করণকম্মং নাম নত্থি. তম্পি চ কিলেসসহগতচিত্তেনেৰ হোতি. ৰাচাতিপি ন হোতীতি মিচ্ছাৰাচা সম্মাৰাচাতিপি নানত্তং ন হোতি. রোদিতমত্তাতি জিঘচ্ছাপিপাসাপরেতস্স পন রোদিতমত্তং হোতি. তম্পি কিলেসসহগতচিত্তেনেৰ. সঙ্কপ্পোতি মিচ্ছাসঙ্কপ্পো সম্মাসঙ্কপ্পোতিপি নানত্তং ন হোতি. ৰিকূজিতমত্তাতি ৰিকূজিতমত্তং রোদনহসিতমত্তং হোতি. দহরকুমারকানঞ্হি চিত্তং অতীতারম্মণং পৰত্ততি, নিরযতো আগতা নিরযদুক্খং সরিত্ৰা রোদন্তি, দেৰলোকতো আগতা হসন্তি, তম্পি কিলেসসহগতচিত্তেনেৰ হোতি. আজীৰোতি মিচ্ছাজীৰো সম্মাজীৰোতিপি নানত্তং ন হোতি. অঞ্ঞত্র মাতুথঞ্ঞাতি থঞ্ঞচোরদারকা নাম হোন্তি, মাতরি খীরং পাযন্তিযা অপিৰিত্ৰা অঞ্ঞৰিহিতকালে পিট্ঠিপস্সেন আগন্ত্ৰা থঞ্ঞং পিৰন্তি. এত্তকং মুঞ্চিত্ৰা অঞ্ঞো মিচ্ছাজীৰো নত্থি. অযম্পি কিলেসসহগতচিত্তেনেৰ হোতীতি দস্সেতি.

২৬৩. এৰং পরিব্বাজকৰাদং পটিক্খিপিত্ৰা ইদানি সযং সেক্খভূমিযং মাতিকং ঠপেন্তো চতূহি খো অহন্তিআদিমাহ. তত্থ সমধিগয্হ তিট্ঠতীতি ৰিসেসেত্ৰা তিট্ঠতি. ন কাযেন পাপ কম্মন্তিআদীসু ন কেৰলং অকরণমত্তমেৰ, ভগৰা পন এত্থ সংৰরপ্পহানপটিসঙ্খা পঞ্ঞপেতি. তং সন্ধাযেৰমাহ. ন চেৰ সম্পন্নকুসলন্তিআদি পন খীণাসৰং সন্ধায ৰুত্তং.

ইদানি অসেক্খভূমিযং মাতিকং ঠপেন্তো দসহি খো অহন্তিআদিমাহ. তত্থ তীণি পদানি নিস্সায দ্ৰে পঠমচতুক্কা ঠপিতা, একং পদং নিস্সায দ্ৰে পচ্ছিমচতুক্কা. অযং সেক্খভূমিযং মাতিকা.

২৬৪. ইদানি তং ৰিভজন্তো কতমে চ থপতি অকুসলসীলাতিআদিমাহ. তত্থ সরাগন্তি অট্ঠৰিধং লোভসহগতচিত্তং. সদোসন্তি পটিঘসম্পযুত্তচিত্তদ্ৰযং. সমোহন্তি ৰিচিকিচ্ছুদ্ধচ্চসহগতচিত্তদ্ৰযম্পি ৰট্টতি, সব্বাকুসলচিত্তানিপি. মোহো সব্বাকুসলে উপ্পজ্জতীতি হি ৰুত্তং. ইতোসমুট্ঠানাতি ইতো সরাগাদিচিত্ততো সমুট্ঠানং উপ্পত্তি এতেসন্তি ইতোসমুট্ঠানা.

কুহিন্তি কতরং ঠানং পাপুণিত্ৰা অপরিসেসা নিরুজ্ঝন্তি. এত্থেতেতি সোতাপত্তিফলে ভুম্মং. পাতিমোক্খসংৰরসীলঞ্হি সোতাপত্তিফলে পরিপুণ্ণং হোতি, তং ঠানং পত্ৰা অকুসলসীলং অসেসং নিরুজ্ঝতি. অকুসলসীলন্তি চ দুস্সীলস্সেতং অধিৰচনন্তি ৰেদিতব্বং.

অকুসলানং সীলানং নিরোধায পটিপন্নোতি এত্থ যাৰ সোতাপত্তিমগ্গা নিরোধায পটিপন্নো নাম হোতি, ফলপত্তে পন তে নিরোধিতা নাম হোন্তি.

২৬৫. ৰীতরাগন্তিআদীহি অট্ঠৰিধং কামাৰচরকুসলচিত্তমেৰ ৰুত্তং. এতেন হি কুসলসীলং সমুট্ঠাতি.

সীলৰা হোতীতি সীলসম্পন্নো হোতি গুণসম্পন্নো চ. নো চ সীলমযোতি অলমেত্তাৰতা, নত্থি ইতো কিঞ্চি উত্তরি করণীযন্তি এৰং সীলমযো ন হোতি. যত্থস্স তেতি অরহত্তফলে ভুম্মং. অরহত্তফলঞ্হি পত্ৰা অকুসলসীলং অসেসং নিরুজ্ঝতি.

নিরোধায পটিপন্নোতি এত্থ যাৰ অরহত্তমগ্গা নিরোধায পটিপন্নো নাম হোতি, ফলপত্তে পন তে নিরোধিতা নাম হোন্তি.

২৬৬. কামসঞ্ঞাদীসু কামসঞ্ঞা অট্ঠলোভসহগতচিত্তসহজাতা, ইতরা দ্ৰে দোমনস্সসহগতচিত্তদ্ৰযেন সহজাতা.

পঠমং ঝানন্তি অনাগামিফলপঠমজ্ঝানং. এত্থেতেতি অনাগামিফলে ভুম্মং. অনাগামিফলঞ্হি পত্ৰা অকুসলসঙ্কপ্পা অপরিসেসা নিরুজ্ঝন্তি.

নিরোধায পটিপন্নোতি এত্থ যাৰ অনাগামিমগ্গা নিরোধায পটিপন্নো নাম হোতি, ফলপত্তে পন তে নিরোধিতা নাম হোন্তি. নেক্খম্মসঞ্ঞাদযো হি তিস্সোপি অট্ঠকামাৰচরকুসলসহজাতসঞ্ঞাৰ.

২৬৭. এত্থেতেতি অরহত্তফলে ভুম্মং. দুতিযজ্ঝানিকং অরহত্তফলঞ্হি পাপুণিত্ৰা কুসলসঙ্কপ্পা অপরিসেসা নিরুজ্ঝন্তি. নিরোধায পটিপন্নোতি এত্থ যাৰ অরহত্তমগ্গা নিরোধায পটিপন্নো নাম হোতি, ফলপত্তে পন তে নিরোধিতা নাম হোন্তি. সেসং সব্বত্থ উত্তানমেৰাতি.

পপঞ্চসূদনিযা মজ্ঝিমনিকাযট্ঠকথায

সমণমুণ্ডিকসুত্তৰণ্ণনা নিট্ঠিতা.