৭. মহাসকুলুদাযিসুত্তৰণ্ণনা

২৩৭. এৰং মে সুতন্তি মহাসকুলুদাযিসুত্তং. তত্থ মোরনিৰাপেতি তস্মিং ঠানে মোরানং অভযং ঘোসেত্ৰা ভোজনং অদংসু. তস্মা তং ঠানং মোরনিৰাপোতি সঙ্খং গতং. অন্নভারোতি একস্স পরিব্বাজকস্স নামং. তথা ৰরধরোতি. অঞ্ঞে চাতি ন কেৰলং ইমে তযো, অঞ্ঞেপি অভিঞ্ঞাতা বহূ পরিব্বাজকা. অপ্পসদ্দস্স ৰণ্ণৰাদীতি ইধ অপ্পসদ্দৰিনীতোতি অৰত্ৰাৰ ইদং ৰুত্তং. কস্মা? ন হি ভগৰা অঞ্ঞেন ৰিনীতোতি.

২৩৮. পুরিমানীতি হিয্যোদিৰসং উপাদায পুরিমানি নাম হোন্তি, ততো পরং পুরিমতরানি. কুতূহলসালাযন্তি কুতূহলসালা নাম পচ্চেকসালা নত্থি, যত্থ পন নানাতিত্থিযা সমণব্রাহ্মণা নানাৰিধং কথং পৰত্তেন্তি, সা বহূনং – ‘‘অযং কিং ৰদতি, অযং কিং ৰদতী’’তি কুতূহলুপ্পত্তিট্ঠানতো ‘‘কুতূহলসালা’’তি ৰুচ্চতি. ‘‘কোতূহলসালা’’তিপি পাঠো. লাভাতি যে এৰরূপে সমণব্রাহ্মণে দট্ঠুং পঞ্হং পুচ্ছিতুং ধম্মকথং ৰা নেসং সোতুং লভন্তি, তেসং অঙ্গমগধানং ইমে লাভাতি অত্থো.

সঙ্ঘিনোতিআদীসু পব্বজিতসমূহসঙ্খাতো সঙ্ঘো এতেসং অত্থীতি সঙ্ঘিনো. স্ৰেৰ গণো এতেসং অত্থীতি গণিনো. আচারসিক্খাপনৰসেন তস্স গণস্স আচরিযাতি গণাচরিযা. ঞাতাতি পঞ্ঞাতা পাকটা. যথাভুচ্চগুণেহি চেৰ অযথাভূতগুণেহি চ সমুগ্গতো যসো এতেসং অত্থীতি যসস্সিনো. পূরণাদীনঞ্হি ‘‘অপ্পিচ্ছো সন্তুট্ঠো, অপ্পিচ্ছতায ৰত্থম্পি ন নিৰাসেতী’’তিআদিনা নযেন যসো সমুগ্গতো, তথাগতস্স ‘‘ইতিপি সো ভগৰা’’তিআদীহি যথাভূতগুণেহি. তিত্থকরাতি লদ্ধিকরা. সাধুসম্মতাতি ইমে সাধূ সুন্দরা সপ্পুরিসাতি এৰং সম্মতা. বহুজনস্সাতি অস্সুতৰতো চেৰ অন্ধবালপুথুজ্জনস্স ৰিভাৰিনো চ পণ্ডিতজনস্স. তত্থ তিত্থিযা বালজনস্স এৰং সম্মতা, তথাগতো পণ্ডিতজনস্স. ইমিনা নযেন পূরণো কস্সপো সঙ্ঘীতিআদীসু অত্থো ৰেদিতব্বো. ভগৰা পন যস্মা অট্ঠতিংস আরম্মণানি ৰিভজন্তো বহূনি নিব্বানওতরণতিত্থানি অকাসি, তস্মা ‘‘তিত্থকরো’’তি ৰত্তুং ৰট্টতি.

কস্মা পনেতে সব্বেপি তত্থ ওসটাতি? উপট্ঠাকরক্খণত্থঞ্চেৰ লাভসক্কারত্থঞ্চ. তেসঞ্হি এৰং হোতি – ‘‘অম্হাকং উপট্ঠাকা সমণং গোতমং সরণং গচ্ছেয্যুং, তে চ রক্খিস্সাম. সমণস্স চ গোতমস্স উপট্ঠাকে সক্কারং করোন্তে দিস্ৰা অম্হাকম্পি উপট্ঠাকা অম্হাকং সক্কারং করিস্সন্তী’’তি. তস্মা যত্থ যত্থ ভগৰা ওসরতি, তত্থ তত্থ সব্বে ওসরন্তি.

২৩৯. ৰাদং আরোপেত্ৰাতি ৰাদে দোসং আরোপেত্ৰা. অপক্কন্তাতি, অপগতা, কেচি দিসং পক্কন্তা, কেচি গিহিভাৰং পত্তা, কেচি ইমং সাসনং আগতা. সহিতং মেতি ময্হং ৰচনং সহিতং সিলিট্ঠং, অত্থযুত্তং কারণযুত্তন্তি অত্থো. অসহিতং তেতি তুয্হং ৰচনং অসহিতং. অধিচিণ্ণং তে ৰিপরাৰত্তন্তি যং তুয্হং দীঘরত্তাচিণ্ণৰসেন সুপ্পগুণং, তং ময্হং একৰচনেনেৰ ৰিপরাৰত্তং ৰিপরিৰত্তিত্ৰা ঠিতং, ন কিঞ্চি জাতন্তি অত্থো. আরোপিতো তে ৰাদোতি মযা তৰ ৰাদে দোসো আরোপিতো. চর ৰাদপ্পমোক্খাযাতি দোসমোচনত্থং চর ৰিচর, তত্থ তত্থ গন্ত্ৰা সিক্খাতি অত্থো. নিব্বেঠেহি ৰা সচে পহোসীতি অথ সযং পহোসি, ইদানেৰ নিব্বেঠেহি. ধম্মক্কোসেনাতি সভাৰক্কোসেন.

২৪০. তং নো সোস্সামাতি তং অম্হাকং দেসিতং ধম্মং সুণিস্সাম. খুদ্দমধুন্তি খুদ্দকমক্খিকাহি কতং দণ্ডকমধুং. অনেলকন্তি নিদ্দোসং অপগতমচ্ছিকণ্ডকং. পীল়েয্যাতি দদেয্য. পচ্চাসীসমানরূপোতি পূরেত্ৰা নু খো নো ভোজনং দস্সতীতি ভাজনহত্থো পচ্চাসীসমানো পচ্চুপট্ঠিতো অস্স. সম্পযোজেত্ৰাতি অপ্পমত্তকং ৰিৰাদং কত্ৰা.

২৪১. ইতরীতরেনাতি লামকলামকেন. পৰিৰিত্তোতি ইদং পরিব্বাজকো কাযৰিৰেকমত্তং সন্ধায ৰদতি, ভগৰা পন তীহি ৰিৰেকেহি ৰিৰিত্তোৰ.

২৪২. কোসকাহারাপীতি দানপতীনং ঘরে অগ্গভিক্খাঠপনত্থং খুদ্দকসরাৰা হোন্তি, দানপতিনো অগ্গভত্তং ৰা তত্থ ঠপেত্ৰা ভুঞ্জন্তি, পব্বজিতে সম্পত্তে তং ভত্তং তস্স দেন্তি. তং সরাৰকং কোসকোতি ৰুচ্চতি. তস্মা যে চ একেনেৰ ভত্তকোসকেন যাপেন্তি, তে কোসকাহারাতি. বেলুৰাহারাতি বেলুৰমত্তভত্তাহারা. সমতিত্তিকন্তি ওট্ঠৰট্টিযা হেট্ঠিমলেখাসমং. ইমিনা ধম্মেনাতি ইমিনা অপ্পাহারতাধম্মেন. এত্থ পন সব্বাকারেনেৰ ভগৰা অনপ্পাহারোতি ন ৰত্তব্বো. পধানভূমিযং ছব্বস্সানি অপ্পাহারোৰ অহোসি, ৰেরঞ্জাযং তযো মাসে পত্থোদনেনেৰ যাপেসি পালিলেয্যকৰনসণ্ডে তযো মাসে ভিসমুল়ালেহেৰ যাপেসি. ইধ পন এতমত্থং দস্সেতি – ‘‘অহং একস্মিং কালে অপ্পাহারো অহোসিং, ময্হং পন সাৰকা ধুতঙ্গসমাদানতো পট্ঠায যাৰজীৰং ধুতঙ্গং ন ভিন্দন্তী’’তি. তস্মা যদি তে ইমিনা ধম্মেন সক্করেয্যুং, মযা হি তে ৰিসেসতরা. অঞ্ঞো চেৰ পন ধম্মো অত্থি, যেন মং তে সক্করোন্তীতি দস্সেতি. ইমিনা নযেন সব্বৰারেসু যোজনা ৰেদিতব্বা.

পংসুকূলিকাতি সমাদিন্নপংসুকূলিকঙ্গা. লূখচীৰরধরাতি সত্থসুত্তলূখানি চীৰরানি ধারযমানা. নন্তকানীতি অন্তৰিরহিতানি ৰত্থখণ্ডানি, যদি হি নেসং অন্তো ভৰেয্য, পিলোতিকাতি সঙ্খং গচ্ছেয্যুং. উচ্চিনিত্ৰাতি ফালেত্ৰা দুব্বলট্ঠানং পহায থিরট্ঠানমেৰ গহেত্ৰা. অলাবুলোমসানীতি অলাবুলোমসদিসসুত্তানি সুখুমানীতি দীপেতি. এত্তাৰতা চ সত্থা চীৰরসন্তোসেন অসন্তুট্ঠোতি ন ৰত্তব্বো. অতিমুত্তকসুসানতো হিস্স পুণ্ণদাসিযা পারুপিত্ৰা পাতিতসাণপংসুকূলং গহণদিৰসে উদকপরিযন্তং কত্ৰা মহাপথৰী অকম্পি. ইধ পন এতমত্থং দস্সেতি – ‘‘অহং একস্মিংযেৰ কালে পংসুকূলং গণ্হিং, ময্হং পন সাৰকা ধুতঙ্গসমাদানতো পট্ঠায যাৰজীৰং ধুতঙ্গং ন ভিন্দন্তী’’তি.

পিণ্ডপাতিকাতি অতিরেকলাভং পটিক্খিপিত্ৰা সমাদিন্নপিণ্ডপাতিকঙ্গা. সপদানচারিনোতি লোলুপ্পচারং পটিক্খিপিত্ৰা সমাদিন্নসপদানচারা. উঞ্ছাসকে ৰতে রতাতি উঞ্ছাচরিযসঙ্খাতে ভিক্খূনং পকতিৰতে রতা, উচ্চনীচঘরদ্ৰারট্ঠাযিনো হুত্ৰা কবরমিস্সকং ভত্তং সংহরিত্ৰা পরিভুঞ্জন্তীতি অত্থো. অন্তরঘরন্তি ব্রহ্মাযুসুত্তে উম্মারতো পট্ঠায অন্তরঘরং, ইধ ইন্দখীলতো পট্ঠায অধিপ্পেতং. এত্তাৰতা চ সত্থা পিণ্ডপাতসন্তোসেন অসন্তুট্ঠোতি ন ৰত্তব্বো, অপ্পাহারতায ৰুত্তনিযামেনেৰ পন সব্বং ৰিত্থারেতব্বং. ইধ পন এতমত্থং দস্সেতি – ‘‘অহং একস্মিংযেৰ কালে নিমন্তনং ন সাদযিং, ময্হং পন সাৰকা ধুতঙ্গসমাদানতো পট্ঠায যাৰজীৰং ধুতঙ্গং ন ভিন্দন্তী’’তি.

রুক্খমূলিকাতি ছন্নং পটিক্খিপিত্ৰা সমাদিন্নরুক্খমূলিকঙ্গা. অব্ভোকাসিকাতি ছন্নঞ্চ রুক্খমূলঞ্চ পটিক্খিপিত্ৰা সমাদিন্নঅব্ভোকাসিকঙ্গা. অট্ঠমাসেতি হেমন্তগিম্হিকে মাসে. অন্তোৰস্সে পন চীৰরানুগ্গহত্থং ছন্নং পৰিসন্তি. এত্তাৰতা চ সত্থা সেনাসনসন্তোসেন অসন্তুট্ঠোতি ন ৰত্তব্বো, সেনাসনসন্তোসো পনস্স ছব্বস্সিকমহাপধানেন চ পালিলেয্যকৰনসণ্ডেন চ দীপেতব্বো. ইধ পন এতমত্থং দস্সেতি – ‘‘অহং একস্মিংযেৰ কালে ছন্নং ন পাৰিসিং, ময্হং পন সাৰকা ধুতঙ্গসমাদানতো পট্ঠায যাৰজীৰং ধুতঙ্গং ন ভিন্দন্তী’’তি.

আরঞ্ঞিকাতি গামন্তসেনাসনং পটিক্খিপিত্ৰা সমাদিন্নআরঞ্ঞিকঙ্গা. সঙ্ঘমজ্ঝে ওসরন্তীতি অবদ্ধসীমায কথিতং, বদ্ধসীমাযং পন ৰসন্তা অত্তনো ৰসনট্ঠানেযেৰ উপোসথং করোন্তি. এত্তাৰতা চ সত্থা নো পৰিৰিত্তোতি ন ৰত্তব্বো, ‘‘ইচ্ছামহং, ভিক্খৰে, অড্ঢমাসং পটিসল্লিযিতু’’ন্তি (পারা. ১৬২; ৫৬৫) এৰঞ্হিস্স পৰিৰেকো পঞ্ঞাযতি. ইধ পন এতমত্থং দস্সেতি ‘‘অহং একস্মিংযেৰ তথারূপে কালে পটিসল্লিযিং, ময্হং পন সাৰকা ধুতঙ্গসমাদানতো পট্ঠায যাৰজীৰং ধুতঙ্গং ন ভিন্দন্তী’’তি. মমং সাৰকাতি মং সাৰকা.

২৪৪. সনিদানন্তি সপ্পচ্চযং. কিং পন অপ্পচ্চযং নিব্বানং ন দেসেতীতি. নো ন দেসেতি, সহেতুকং পন তং দেসনং কত্ৰা দেসেতি, নো অহেতুকন্তি. সপ্পাটিহারিযন্তি পুরিমস্সেৰেতং ৰেৰচনং, সকারণন্তি অত্থো. তং ৰতাতি এত্থ ৰতাতি নিপাতমত্তং.

২৪৫. অনাগতং ৰাদপথন্তি অজ্জ ঠপেত্ৰা স্ৰে ৰা পুনদিৰসে ৰা অড্ঢমাসে ৰা মাসে ৰা সংৰচ্ছরে ৰা তস্স তস্স পঞ্হস্স উপরি আগমনৰাদপথং. ন দক্খতীতি যথা সচ্চকো নিগণ্ঠো অত্তনো নিগ্গহণত্থং আগতকারণং ৰিসেসেত্ৰা ৰদন্তো ন অদ্দস, এৰং ন দক্খতীতি নেতং ঠানং ৰিজ্জতি. সহধম্মেনাতি সকারণেন. অন্তরন্তরা কথং ওপাতেয্যুন্তি মম কথাৰারং পচ্ছিন্দিত্ৰা অন্তরন্তরে অত্তনো কথং পৰেসেয্যুন্তি অত্থো. ন খো পনাহং, উদাযীতি, উদাযি, অহং অম্বট্ঠসোণদণ্ডকূটদন্তসচ্চকনিগণ্ঠাদীহি সদ্ধিং মহাৰাদে ৰত্তমানেপি – ‘‘অহো ৰত মে একসাৰকোপি উপমং ৰা কারণং ৰা আহরিত্ৰা দদেয্যা’’তি এৰং সাৰকেসু অনুসাসনিং ন পচ্চাসীসামি. মমযেৰাতি এৰরূপেসু ঠানেসু সাৰকা মমযেৰ অনুসাসনিং ওৰাদং পচ্চাসীসন্তি.

২৪৬. তেসাহং চিত্তং আরাধেমীতি তেসং অহং তস্স পঞ্হস্স ৰেয্যাকরণেন চিত্তং গণ্হামি সম্পাদেমি পরিপূরেমি, অঞ্ঞং পুট্ঠো অঞ্ঞং ন ব্যাকরোমি, অম্বং পুট্ঠো লবুজং ৰিয লবুজং ৰা পুট্ঠো অম্বং ৰিয. এত্থ চ ‘‘অধিসীলে সম্ভাৰেন্তী’’তি ৰুত্তট্ঠানে বুদ্ধসীলং নাম কথিতং, ‘‘অভিক্কন্তে ঞাণদস্সনে সম্ভাৰেন্তী’’তি ৰুত্তট্ঠানে সব্বঞ্ঞুতঞ্ঞাণং, ‘‘অধিপঞ্ঞায সম্ভাৰেন্তী’’তি ৰুত্তট্ঠানে ঠানুপ্পত্তিকপঞ্ঞা, ‘‘যেন দুক্খেনা’’তি ৰুত্তট্ঠানে সচ্চব্যাকরণপঞ্ঞা. তত্থ সব্বঞ্ঞুতঞ্ঞাণঞ্চ সচ্চব্যাকরণপঞ্ঞঞ্চ ঠপেত্ৰা অৰসেসা পঞ্ঞা অধিপঞ্ঞং ভজতি.

২৪৭. ইদানি তেসং তেসং ৰিসেসাধিগমানং পটিপদং আচিক্খন্তো পুন চপরং উদাযীতিআদিমাহ. তত্থ অভিঞ্ঞাৰোসানপারমিপ্পত্তাতি অভিঞ্ঞাৰোসানসঙ্খাতঞ্চেৰ অভিঞ্ঞাপারমীসঙ্খাতঞ্চ অরহত্তং পত্তা.

সম্মপ্পধানেতি উপাযপধানে. ছন্দং জনেতীতি কত্তুকম্যতাকুসলচ্ছন্দং জনেতি. ৰাযমতীতি ৰাযামং করোতি. ৰীরিযং আরভতীতি ৰীরিযং পৰত্তেতি. চিত্তং পগ্গণ্হাতীতি চিত্তং উক্খিপতি. পদহতীতি উপাযপধানং করোতি. ভাৰনায পারিপূরিযাতি ৰড্ঢিযা পরিপূরণত্থং. অপিচেত্থ – ‘‘যা ঠিতি, সো অসম্মোসো…পে… যং ৰেপুল্লং, সা ভাৰনাপারিপূরী’’তি (ৰিভ. ৪০৬) এৰং পুরিমং পুরিমস্স পচ্ছিমং পচ্ছিমস্স অত্থোতিপি ৰেদিতব্বং.

ইমেহি পন সম্মপ্পধানেহি কিং কথিতং? কস্সপসংযুত্তপরিযাযেন সাৰকস্স পুব্বভাগপটিপদা কথিতা. ৰুত্তঞ্হেতং তত্থ –

‘‘চত্তারোমে, আৰুসো, সম্মপ্পধানা. কতমে চত্তারো? ইধাৰুসো, ভিক্খু, অনুপ্পন্না মে পাপকা অকুসলা ধম্মা উপ্পজ্জমানা অনত্থায সংৰত্তেয্যুন্তি আতপ্পং করোতি. উপ্পন্না মে পাপকা অকুসলা ধম্মা অপ্পহীযমানা অনত্থায সংৰত্তেয্যুন্তি আতপ্পং করোতি. অনুপ্পন্না মে কুসলা ধম্মা অনুপ্পজ্জমানা অনত্থায সংৰত্তেয্যুন্তি আতপ্পং করোতি. উপ্পন্না মে কুসলা ধম্মা নিরুজ্ঝমানা অনত্থায সংৰত্তেয্যুন্তি আতপ্পং করোতী’’তি (সং. নি. ২.১৪৫).

এত্থ চ পাপকা অকুসলাতি লোভাদযো ৰেদিতব্বা. অনুপ্পন্না কুসলা ধম্মাতি সমথৰিপস্সনা চেৰ মগ্গো চ, উপ্পন্না কুসলা নাম সমথৰিপস্সনাৰ. মগ্গো পন সকিং উপ্পজ্জিত্ৰা নিরুজ্ঝমানো অনত্থায সংৰত্তনকো নাম নত্থি. সো হি ফলস্স পচ্চযং দত্ৰাৰ নিরুজ্ঝতি. পুরিমস্মিম্পি ৰা সমথৰিপস্সনাৰ গহেতব্বাতি ৰুত্তং, তং পন ন যুত্তং.

তত্থ ‘‘উপ্পন্না সমথৰিপস্সনা নিরুজ্ঝমানা অনত্থায সংৰত্তন্তী’’তি অত্থস্স আৰিভাৰত্থমিদং ৰত্থু – একো কির খীণাসৰত্থেরো ‘‘মহাচেতিযঞ্চ মহাবোধিঞ্চ ৰন্দিস্সামী’’তি সমাপত্তিলাভিনা ভণ্ডগাহকসামণেরেন সদ্ধিং জনপদতো মহাৰিহারং আগন্ত্ৰা ৰিহারপরিৰেণং পাৰিসি. সাযন্হসমযে মহাভিক্খুসঙ্ঘে চেতিযং ৰন্দমানে চেতিযং ৰন্দনত্থায ন নিক্খমি. কস্মা? খীণাসৰানঞ্হি তীসু রতনেসু মহন্তং গারৰং হোতি. তস্মা ভিক্খুসঙ্ঘে ৰন্দিত্ৰা পটিক্কমন্তে মনুস্সানং সাযমাসভুত্তৰেলাযং সামণেরম্পি অজানাপেত্ৰা ‘‘চেতিযং ৰন্দিস্সামী’’তি এককোৰ নিক্খমি. সামণেরো – ‘‘কিং নু খো থেরো অৰেলায এককোৰ গচ্ছতি, জানিস্সামী’’তি উপজ্ঝাযস্স পদানুপদিকো নিক্খমি. থেরো অনাৰজ্জনেন তস্স আগমনং অজানন্তো দক্খিণদ্ৰারেন চেতিযঙ্গণং আরুহি. সামণেরোপি অনুপদংযেৰ আরুল়্হো.

মহাথেরো মহাচেতিযং উল্লোকেত্ৰা বুদ্ধারম্মণং পীতিং গহেত্ৰা সব্বং চেতসো সমন্নাহরিত্ৰা হট্ঠপহট্ঠো চেতিযং ৰন্দতি. সামণেরো থেরস্স ৰন্দনাকারং দিস্ৰা ‘‘উপজ্ঝাযো মে অতিৰিয পসন্নচিত্তো ৰন্দতি, কিং নু খো পুপ্ফানি লভিত্ৰা পূজং করেয্যা’’তি চিন্তেসি. থেরো ৰন্দিত্ৰা উট্ঠায সিরসি অঞ্জলিং ঠপেত্ৰা মহাচেতিযং উল্লোকেত্ৰা ঠিতো. সামণেরো উক্কাসিত্ৰা অত্তনো আগতভাৰং জানাপেসি. থেরো পরিৰত্তেত্ৰা ওলোকেন্তো ‘‘কদা আগতোসী’’তি পুচ্ছি. তুম্হাকং চেতিযং ৰন্দনকালে, ভন্তে. অতিৰিয পসন্না চেতিযং ৰন্দিত্থ কিং নু খো পুপ্ফানি লভিত্ৰা পূজেয্যাথাতি? আম সামণের ইমস্মিং চেতিযে ৰিয অঞ্ঞত্র এত্তকং ধাতূনং নিধানং নাম নত্থি, এৰরূপং অসদিসং মহাথূপং পুপ্ফানি লভিত্ৰা কো ন পূজেয্যাতি. তেন হি, ভন্তে, অধিৰাসেথ, আহরিস্সামীতি তাৰদেৰ ঝানং সমাপজ্জিত্ৰা ইদ্ধিযা হিমৰন্তং গন্ত্ৰা ৰণ্ণগন্ধসম্পন্নপুপ্ফানি পরিস্সাৰনং পূরেত্ৰা মহাথেরে দক্খিণমুখতো পচ্ছিমং মুখং অসম্পত্তেযেৰ আগন্ত্ৰা পুপ্ফপরিস্সাৰনং হত্থে ঠপেত্ৰা ‘‘পূজেথ, ভন্তে,’’তি আহ. থেরো ‘‘অতিমন্দানি নো সামণের পুপ্ফানী’’তি আহ. গচ্ছথ, ভন্তে, ভগৰতো গুণে আৰজ্জিত্ৰা পূজেথাতি.

থেরো পচ্ছিমমুখনিস্সিতেন সোপাণেন আরুয্হ কুচ্ছিৰেদিকাভূমিযং পুপ্ফপূজং কাতুং আরদ্ধো. ৰেদিকাভূমিযং পরিপুণ্ণানি পুপ্ফানি পতিত্ৰা দুতিযভূমিযং জণ্ণুপমাণেন ওধিনা পূরযিংসু. ততো ওতরিত্ৰা পাদপিট্ঠিকপন্তিং পূজেসি. সাপি পরিপূরি. পরিপুণ্ণভাৰং ঞত্ৰা হেট্ঠিমতলে ৰিকিরন্তো অগমাসি. সব্বং চেতিযঙ্গণং পরিপূরি. তস্মিং পরিপুণ্ণে ‘‘সামণের পুপ্ফানি ন খীযন্তী’’তি আহ. পরিস্সাৰনং, ভন্তে, অধোমুখং করোথাতি. অধোমুখং কত্ৰা চালেসি, তদা পুপ্ফানি খীণানি. পরিস্সাৰনং সামণেরস্স দত্ৰা সদ্ধিং হত্থিপাকারেন চেতিযং তিক্খত্তুং পদক্খিণং কত্ৰা চতূসু ঠানেসু ৰন্দিত্ৰা পরিৰেণং গচ্ছন্তো চিন্তেসি – ‘‘যাৰ মহিদ্ধিকো ৰতাযং সামণেরো, সক্খিস্সতি নু খো ইমং ইদ্ধানুভাৰং রক্খিতু’’ন্তি. ততো ‘‘ন সক্খিস্সতী’’তি দিস্ৰা সামণেরমাহ – ‘‘সামণের ত্ৰং ইদানি মহিদ্ধিকো, এৰরূপং পন ইদ্ধিং নাসেত্ৰা পচ্ছিমকালে কাণপেসকারিযা হত্থেন মদ্দিতকঞ্জিযং পিৰিস্সসী’’তি. দহরকভাৰস্স নামেস দোসোযং, সো উপজ্ঝাযস্স কথাযং সংৰিজ্জিত্ৰা – ‘‘কম্মট্ঠানং মে, ভন্তে, আচিক্খথা’’তি ন যাচি, অম্হাকং উপজ্ঝাযো কিং ৰদতীতি তং পন অসুণন্তো ৰিয অগমাসি.

থেরো মহাচেতিযঞ্চ মহাবোধিঞ্চ ৰন্দিত্ৰা সামণেরং পত্তচীৰরং গাহাপেত্ৰা অনুপুব্বেন কুটেল়িতিস্সমহাৰিহারং অগমাসি. সামণেরো উপজ্ঝাযস্স পদানুপদিকো হুত্ৰা ভিক্খাচারং ন গচ্ছতি, ‘‘কতরং গামং পৰিসথ, ভন্তে,’’তি পুচ্ছিত্ৰা পন ‘‘ইদানি মে উপজ্ঝাযো গামদ্ৰারং পত্তো ভৰিস্সতী’’তি ঞত্ৰা অত্তনো চ উপজ্ঝাযস্স চ পত্তচীৰরং গহেত্ৰা আকাসেন গন্ত্ৰা থেরস্স পত্তচীৰরং দত্ৰা পিণ্ডায পৰিসতি. থেরো সব্বকালং ওৰদতি – ‘‘সামণের মা এৰমকাসি, পুথুজ্জনিদ্ধি নাম চলা অনিবদ্ধা, অসপ্পাযং রূপাদিআরম্মণং লভিত্ৰা অপ্পমত্তকেনেৰ ভিজ্জতি, সন্তায সমাপত্তিযা পরিহীনায ব্রহ্মচরিযৰাসো সন্থম্ভিতুং ন সক্কোতী’’তি. সামণেরো ‘‘কিং কথেতি ময্হং উপজ্ঝাযো’’তি সোতুং ন ইচ্ছতি, তথেৰ করোতি. থেরো অনুপুব্বেন চেতিযৰন্দনং করোন্তো কম্মুবিন্দুৰিহারং নাম গতো. তত্থ ৰসন্তেপি থেরে সামণেরো তথেৰ করোতি.

অথেকদিৰসং একা পেসকারধীতা অভিরূপা পঠমৰযে ঠিতা কম্মবিন্দুগামতো নিক্খমিত্ৰা পদুমস্সরং ওরুয্হ গাযমানা পুপ্ফানি ভঞ্জতি. তস্মিং সমযে সামণেরো পদুমস্সরমত্থকেন গচ্ছতি, গচ্ছন্তো পন সিলেসিকায কাণমচ্ছিকা ৰিয তস্সা গীতসদ্দে বজ্ঝি. তাৰদেৰস্স ইদ্ধি অন্তরহিতা, ছিন্নপক্খকাকো ৰিয অহোসি. সন্তসমাপত্তিবলেন পন তত্থেৰ উদকপিট্ঠে অপতিত্ৰা সিম্বলিতূলং ৰিয পতমানং অনুপুব্বেন পদুমসরতীরে অট্ঠাসি. সো ৰেগেন গন্ত্ৰা উপজ্ঝাযস্স পত্তচীৰরং দত্ৰা নিৰত্তি. মহাথেরো ‘‘পগেৰেতং মযা দিট্ঠং, নিৰারিযমানোপি ন নিৰত্তিস্সতী’’তি কিঞ্চি অৰত্ৰা পিণ্ডায পাৰিসি.

সামণেরো গন্ত্ৰা পদুমসরতীরে অট্ঠাসি তস্সা পচ্চুত্তরণং আগমযমানো. সাপি সামণেরং আকাসেন গচ্ছন্তঞ্চ পুন আগন্ত্ৰা ঠিতঞ্চ দিস্ৰা ‘‘অদ্ধা এস মং নিস্সায উক্কণ্ঠিতো’’তি ঞত্ৰা ‘‘পটিক্কম সামণেরা’’তি আহ. সো পটিক্কমি. ইতরা পচ্চুত্তরিত্ৰা সাটকং নিৰাসেত্ৰা তং উপসঙ্কমিত্ৰা ‘‘কিং, ভন্তে,’’তি পুচ্ছি. সো তমত্থং আরোচেসি. সা বহূহি কারণেহি ঘরাৰাসে আদীনৰং ব্রহ্মচরিযৰাসে আনিসংসঞ্চ দস্সেত্ৰা ওৰদমানাপি তস্স উক্কণ্ঠং ৰিনোদেতুং অসক্কোন্তী – ‘‘অযং মম কারণা এৰরূপায ইদ্ধিযা পরিহীনো, ন দানি যুত্তং পরিচ্চজিতু’’ন্তি ইধেৰ তিট্ঠাতি ৰত্ৰা ঘরং গন্ত্ৰা মাতাপিতূনং তং পৰত্তিং আরোচেসি. তেপি আগন্ত্ৰা নানপ্পকারং ওৰদমানা ৰচনং অগ্গণ্হন্তং আহংসু – ‘‘ত্ৰং অম্হে উচ্চকুলাতি সল্লক্খেসি, মযং পেসকারা. সক্খিস্সসি পেসকারকম্মং কাতু’’ন্তি সামণেরো আহ – ‘‘উপাসক গিহিভূতো নাম পেসকারকম্মং ৰা করেয্য নল়কারকম্মং ৰা, কিং ইমিনা সাটকমত্তেন লোভং করোথা’’তি. পেসকারো উদরে বদ্ধসাটকং দত্ৰা ঘরং নেত্ৰা ধীতরং অদাসি.

সো পেসকারকম্মং উগ্গণ্হিত্ৰা পেসকারেহি সদ্ধিং সালায কম্মং করোতি. অঞ্ঞেসং ইত্থিযো পাতোৰ ভত্তং সম্পাদেত্ৰা আহরিংসু, তস্স ভরিযা ন তাৰ আগচ্ছতি. সো ইতরেসু কম্মং ৰিস্সজ্জেত্ৰা ভুঞ্জমানেসু তসরং ৰট্টেন্তো নিসীদি. সা পচ্ছা অগমাসি. অথ নং সো ‘‘অতিচিরেন আগতাসী’’তি তজ্জেসি. মাতুগামো চ নাম অপি চক্কৰত্তিরাজানং অত্তনি পটিবদ্ধচিত্তং ঞত্ৰা দাসং ৰিয সল্লক্খেতি. তস্মা সা এৰমাহ – ‘‘অঞ্ঞেসং ঘরে দারুপণ্ণলোণাদীনি সন্নিহিতানি, বাহিরতো আহরিত্ৰা দাযকা পেসনতকারকাপি অত্থি, অহং পন একিকাৰ, ত্ৰম্পি ময্হং ঘরে ইদং অত্থি ইদং নত্থীতি ন জানাসি. সচে ইচ্ছসি, ভুঞ্জ, নো চে ইচ্ছসি, মা ভুঞ্জা’’তি. সো ‘‘ন কেৰলঞ্চ উস্সূরে ভত্তং আহরসি, ৰাচাযপি মং ঘট্টেসী’’তি কুজ্ঝিত্ৰা অঞ্ঞং পহরণং অপস্সন্তো তমেৰ তসরদণ্ডকং তসরতো লুঞ্চিত্ৰা খিপি. সা তং আগচ্ছন্তং দিস্ৰা ঈসকং পরিৰত্তি. তসরদণ্ডকস্স চ কোটি নাম তিখিণা হোতি, সা তস্সা পরিৰত্তমানায অক্খিকোটিযং পৰিসিত্ৰা অট্ঠাসি. সা উভোহি হত্থেহি ৰেগেন অক্খিং অগ্গহেসি, ভিন্নট্ঠানতো লোহিতং পগ্ঘরতি. সো তস্মিং কালে উপজ্ঝাযস্স ৰচনং অনুস্সরি – ‘‘ইদং সন্ধায মং উপজ্ঝাযো ‘অনাগতে কালে কাণপেসকারিযা হত্থেহি মদ্দিতকঞ্জিযং পিৰিস্সসী’তি আহ, ইদং থেরেন দিট্ঠং ভৰিস্সতি, অহো দীঘদস্সী অয্যো’’তি মহাসদ্দেন রোদিতুং আরভি. তমেনং অঞ্ঞে – ‘‘অলং, আৰুসো, মা রোদি, অক্খি নাম ভিন্নং ন সক্কা রোদনেন পটিপাকতিকং কাতু’’ন্তি আহংসু. সো ‘‘নাহমেতমত্থং রোদামি, অপিচ খো ইমং সন্ধায রোদামী’’তি সব্বং পটিপাটিযা কথেসি. এৰং উপ্পন্না সমথৰিপস্সনা নিরুজ্ঝমানা অনত্থায সংৰত্তন্তি.

অপরম্পি ৰত্থু – তিংসমত্তা ভিক্খূ কল্যাণিমহাচেতিযং ৰন্দিত্ৰা অটৰিমগ্গেন মহামগ্গং ওতরমানা অন্তরামগ্গে ঝামখেত্তে কম্মং কত্ৰা আগচ্ছন্তং একং মনুস্সং অদ্দসংসু. তস্স সরীরং মসিমক্খিতং ৰিয অহোসি. মসিমক্খিতংযেৰ একং কাসাৰং কচ্ছং পীল়েত্ৰা নিৰত্থং, ওলোকিযমানো ঝামখাণুকো ৰিয খাযতি. সো দিৰসভাগে কম্মং কত্ৰা উপড্ঢজ্ঝাযমানানং দারূনং কলাপং উক্খিপিত্ৰা পিট্ঠিযং ৰিপ্পকিণ্ণেহি কেসেহি কুম্মগ্গেন আগন্ত্ৰা ভিক্খূনং সম্মুখে অট্ঠাসি. সামণেরা দিস্ৰা অঞ্ঞমঞ্ঞং ওলোকযমানা, – ‘‘আৰুসো, তুয্হং পিতা তুয্হং মহাপিতা তুয্হং মাতুলো’’তি হসমানা গন্ত্ৰা ‘‘কোনামো ত্ৰং উপাসকা’’তি নামং পুচ্ছিংসু. সো নামং পুচ্ছিতো ৰিপ্পটিসারী হুত্ৰা দারুকলাপং ছড্ডেত্ৰা ৰত্থং সংৰিধায নিৰাসেত্ৰা মহাথেরে ৰন্দিত্ৰা ‘‘তিট্ঠথ তাৰ, ভন্তে,’’তি আহ. মহাথেরা অট্ঠংসু.

দহরসামণেরা আগন্ত্ৰা মহাথেরানং সম্মুখাপি পরিহাসং করোন্তি. উপাসকো আহ – ‘‘ভন্তে, তুম্হে মং পস্সিত্ৰা পরিহসথ, এত্তকেনেৰ মত্থকং পত্তম্হাতি মা সল্লক্খেথ. অহম্পি পুব্বে তুম্হাদিসোৰ সমণো অহোসিং. তুম্হাকং পন চিত্তেকগ্গতামত্তকম্পি নত্থি, অহং ইমস্মিং সাসনে মহিদ্ধিকো মহানুভাৰো অহোসিং, আকাসং গহেত্ৰা পথৰিং করোমি, পথৰিং আকাসং. দূরং গণ্হিত্ৰা সন্তিকং করোমি, সন্তিকং দূরং. চক্কৰাল়সতসহস্সং খণেন ৰিনিৰিজ্ঝামি. হত্থে মে পস্সথ, ইদানি মক্কটহত্থসদিসা, অহং ইমেহেৰ হত্থেহি ইধ নিসিন্নোৰ চন্দিমসূরিযে পরামসিং. ইমেসংযেৰ পাদানং চন্দিমসূরিযে পাদকথলিকং কত্ৰা নিসীদিং. এৰরূপা মে ইদ্ধি পমাদেন অন্তরহিতা, তুম্হে মা পমজ্জিত্থ. পমাদেন হি এৰরূপং ব্যসনং পাপুণন্তি. অপ্পমত্তা ৰিহরন্তা জাতিজরামরণস্স অন্তং করোন্তি. তস্মা তুম্হে মঞ্ঞেৰ আরম্মণং করিত্ৰা অপ্পমত্তা হোথ, ভন্তে,’’তি তজ্জেত্ৰা ওৰাদমদাসি. তে তস্স কথেন্তস্সেৰ সংৰেগং আপজ্জিত্ৰা ৰিপস্সমানা তিংসজনা তত্থেৰ অরহত্তং পাপুণিংসূতি. এৰম্পি উপ্পন্না সমথৰিপস্সনা নিরুজ্ঝমানা অনত্থায সংৰত্তন্তীতি ৰেদিতব্বা.

অনুপ্পন্নানং পাপকানন্তি চেত্থ ‘‘অনুপ্পন্নো ৰা কামাসৰো ন উপ্পজ্জতী’’তিআদীসু ৰুত্তনযেন অত্থো ৰেদিতব্বো. উপ্পন্নানং পাপকানন্তি এত্থ পন চতুব্বিধং উপ্পন্নং ৰত্তমানুপ্পন্নং ভুত্ৰাৰিগতুপ্পন্নং, ওকাসকতুপ্পন্নং, ভূমিলদ্ধুপ্পন্নন্তি. তত্থ যে কিলেসা ৰিজ্জমানা উপ্পাদাদিসমঙ্গিনো, ইদং ৰত্তমানুপ্পন্নং নাম. কম্মে পন জৰিতে আরম্মণরসং অনুভৰিত্ৰা নিরুদ্ধৰিপাকো ভুত্ৰা ৰিগতং নাম. কম্মং উপ্পজ্জিত্ৰা নিরুদ্ধং ভৰিত্ৰা ৰিগতং নাম. তদুভযম্পি ভুত্ৰাৰিগতুপ্পন্নন্তি সঙ্খং গচ্ছতি. কুসলাকুসলং কম্মং অঞ্ঞস্স কম্মস্স ৰিপাকং পটিবাহিত্ৰা অত্তনো ৰিপাকস্স ওকাসং করোতি, এৰং কতে ওকাসে ৰিপাকো উপ্পজ্জমানো ওকাসকরণতো পট্ঠায উপ্পন্নোতি সঙ্খং গচ্ছতি. ইদং ওকাসকতুপ্পন্নং নাম. পঞ্চক্খন্ধা পন ৰিপস্সনায ভূমি নাম. তে অতীতাদিভেদা হোন্তি. তেসু অনুসযিতকিলেসা পন অতীতা ৰা অনাগতা ৰা পচ্চুপ্পন্না ৰাতি ন ৰত্তব্বা. অতীতখন্ধেসু অনুসযিতাপি হি অপ্পহীনাৰ হোন্তি, অনাগতখন্ধেসু, পচ্চুপ্পন্নখন্ধেসু অনুসযিতাপি অপ্পহীনাৰ হোন্তি. ইদং ভূমিলদ্ধুপ্পন্নং নাম. তেনাহু পোরাণা – ‘‘তাসু তাসু ভূমীসু অসমুগ্ঘাতিতকিলেসা ভূমিলদ্ধুপ্পন্নাতি সঙ্খং গচ্ছন্তী’’তি.

অপরম্পি চতুব্বিধং উপ্পন্নং সমুদাচারুপ্পন্নং, আরম্মণাধিগহিতুপ্পন্নং, অৰিক্খম্ভিতুপ্পন্নং অসমুগ্ঘাতিতুপ্পন্নন্তি. তত্থ সম্পতি ৰত্তমানংযেৰ সমুদাচারুপ্পন্নং নাম. সকিং চক্খূনি উম্মীলেত্ৰা আরম্মণে নিমিত্তে গহিতে অনুস্সরিতানুস্সরিতক্খণে কিলেসা নুপ্পজ্জিস্সন্তীতি ন ৰত্তব্বা. কস্মা? আরম্মণস্স অধিগহিতত্তা. যথা কিং? যথা খীররুক্খস্স কুঠারিযা আহতাহতট্ঠানে খীরং ন নিক্খমিস্সতীতি ন ৰত্তব্বং, এৰং. ইদং আরম্মণাধিগহিতুপ্পন্নং নাম. সমাপত্তিযা অৰিক্খম্ভিতা কিলেসা পন ইমস্মিং নাম ঠানে নুপ্পজ্জিস্সন্তীতি ন ৰত্তব্বা. কস্মা? অৰিক্খম্ভিতত্তা. যথা কিং? যথা সচে খীররুক্খে কুঠারিযা আহনেয্যুং, ইমস্মিং নাম ঠানে খীরং ন নিক্খমেয্যাতি ন ৰত্তব্বং, এৰং. ইদং অৰিক্খম্ভিতুপ্পন্নং নাম. মগ্গেন অসমুগ্ঘাতিতকিলেসা পন ভৰগ্গে নিব্বত্তস্সাপি উপ্পজ্জন্তীতি পুরিমনযেনেৰ ৰিত্থারেতব্বং. ইদং অসমুগ্ঘাতিতুপ্পন্নং নাম.

ইমেসু উপ্পন্নেসু ৰত্তমানুপ্পন্নং ভুত্ৰাৰিগতুপ্পন্নং ওকাসকতুপ্পন্নং সমুদাচারুপ্পন্নন্তি চতুব্বিধং উপ্পন্নং ন মগ্গৰজ্ঝং, ভূমিলদ্ধুপ্পন্নং আরম্মণাধিগহিতুপ্পন্নং অৰিক্খম্ভিতুপ্পন্নং অসমুগ্ঘাতিতুপ্পন্নন্তি চতুব্বিধং মগ্গৰজ্ঝং. মগ্গো হি উপ্পজ্জমানো এতে কিলেসে পজহতি. সো যে কিলেসে পজহতি, তে অতীতা ৰা অনাগতা ৰা পচ্চুপ্পন্না ৰাতি ন ৰত্তব্বা. ৰুত্তম্পি চেতং –

‘‘হঞ্চি অতীতে কিলেসে পজহতি, তেন হি খীণং খেপেতি, নিরুদ্ধং নিরোধেতি, ৰিগতং ৰিগমেতি অত্থঙ্গতং অত্থঙ্গমেতি. অতীতং যং নত্থি, তং পজহতি. হঞ্চি অনাগতে কিলেসে পজহতি, তেন হি অজাতং পজহতি, অনিব্বত্তং, অনুপ্পন্নং, অপাতুভূতং পজহতি. অনাগতং যং নত্থি, তং পজহতি, হঞ্চি পচ্চুপ্পন্নে কিলেসে পজহতি, তেন হি রত্তো রাগং পজহতি, দুট্ঠো দোসং, মূল়্হো মোহং, ৰিনিবদ্ধো মানং, পরামট্ঠো দিট্ঠিং, ৰিক্খেপগতো উদ্ধচ্চং, অনিট্ঠঙ্গতো ৰিচিকিচ্ছং, থামগতো অনুসযং পজহতি. কণ্হসুক্কধম্মা যুগনদ্ধা সমমেৰ ৰত্তন্তি. সংকিলেসিকা মগ্গভাৰনা হোতি…পে… তেন হি নত্থি মগ্গভাৰনা, নত্থি ফলসচ্ছিকিরিযা, নত্থি কিলেসপ্পহানং, নত্থি ধম্মাভিসমযোতি. অত্থি মগ্গভাৰনা…পে… অত্থি ধম্মাভিসমযোতি. যথা কথং ৰিয, সেয্যথাপি তরুণো রুক্খো অজাতফলো…পে… অপাতুভূতাযেৰ ন পাতুভৰন্তী’’তি.

ইতি পাল়িযং অজাতফলরুক্খো আগতো, জাতফলরুক্খেন পন দীপেতব্বং. যথা হি সফলো তরুণম্বরুক্খো, তস্স ফলানি মনুস্সা পরিভুঞ্জেয্যুং, সেসানি পাতেত্ৰা পচ্ছিযো পূরেয্যুং. অথঞ্ঞো পুরিসো তং ফরসুনা ছিন্দেয্য, তেনস্স নেৰ অতীতানি ফলানি নাসিতানি হোন্তি, ন অনাগতপচ্চুপ্পন্নানি নাসিতানি. অতীতানি হি মনুস্সেহি পরিভুত্তানি, অনাগতানি অনিব্বত্তানি, ন সক্কা নাসেতুং. যস্মিং পন সমযে সো ছিন্নো, তদা ফলানিযেৰ নত্থীতি পচ্চুপ্পন্নানিপি অনাসিতানি. সচে পন রুক্খো অচ্ছিন্নো, অথস্স পথৰীরসঞ্চ আপোরসঞ্চ আগম্ম যানি ফলানি নিব্বত্তেয্যুং, তানি নাসিতানি হোন্তি. তানি হি অজাতানেৰ ন জাযন্তি, অনিব্বত্তানেৰ ন নিব্বত্তন্তি, অপাতুভূতানেৰ ন পাতুভৰন্তি, এৰমেৰ মগ্গো নাপি অতীতাদিভেদে কিলেসে পজহতি, নাপি ন পজহতি. যেসঞ্হি কিলেসানং মগ্গেন খন্ধেসু অপরিঞ্ঞাতেসু উপ্পত্তি সিযা, মগ্গেন উপ্পজ্জিত্ৰা খন্ধানং পরিঞ্ঞাতত্তা তে কিলেসা অজাতাৰ ন জাযন্তি, অনিব্বত্তাৰ ন নিব্বত্তন্তি, অপাতুভূতাৰ ন পাতুভৰন্তি, তরুণপুত্তায ইত্থিযা পুন অৰিজাযনত্থং, ব্যাধিতানং রোগৰূপসমনত্থং পীতভেসজ্জেহি চাপি অযমত্থো ৰিভাৰেতব্বো. এৰং মগ্গো যে কিলেসে পজহতি, তে অতীতা ৰা অনাগতা ৰা পচ্চুপ্পন্না ৰাতি ন ৰত্তব্বা, ন চ মগ্গো কিলেসে ন পজহতি. যে পন মগ্গো কিলেসে পজহতি, তে সন্ধায ‘‘উপ্পন্নানং পাপকান’’ন্তিআদি ৰুত্তং.

ন কেৰলঞ্চ মগ্গো কিলেসেযেৰ পজহতি, কিলেসানং পন অপ্পহীনত্তা যে চ উপ্পজ্জেয্যুং উপাদিন্নকক্খন্ধা, তেপি পজহতিযেৰ. ৰুত্তম্পি চেতং – ‘‘সোতাপত্তিমগ্গঞাণেন অভিসঙ্খারৰিঞ্ঞাণস্স নিরোধেন সত্ত ভৰে ঠপেত্ৰা অনমতগ্গে সংসারে যে উপ্পজ্জেয্যুং নামঞ্চ রূপঞ্চ, এত্থেতে নিরুজ্ঝন্তী’’তি (চূল়নি. ৬) ৰিত্থারো. ইতি মগ্গো উপাদিন্নঅনুপাদিন্নতো ৰুট্ঠাতি. ভৰৰসেন পন সোতাপত্তিমগ্গো অপাযভৰতো ৰুট্ঠাতি, সকদাগামিমগ্গো সুগতিভৰেকদেসতো, অনাগামিমগ্গো সুগতিকামভৰতো, অরহত্তমগ্গো রূপারূপভৰতো ৰুট্ঠাতি. সব্বভৰেহি ৰুট্ঠাতিযেৰাতিপি ৰদন্তি.

অথ মগ্গক্খণে কথং অনুপ্পন্নানং উপ্পাদায ভাৰনা হোতি, কথং ৰা উপ্পন্নানং ঠিতিযাতি. মগ্গপ্পৰত্তিযাযেৰ. মগ্গো হি পৰত্তমানো পুব্বে অনুপ্পন্নপুব্বত্তা অনুপ্পন্নো নাম ৰুচ্চতি. অনাগতপুব্বঞ্হি ঠানং আগন্ত্ৰা অননুভূতপুব্বং ৰা আরম্মণং অনুভৰিত্ৰা ৰত্তারো ভৰন্তি ‘‘অনাগতট্ঠানং আগতম্হা, অননুভূতং আরম্মণং অনুভৰামা’’তি. যা চস্স পৰত্তি, অযমেৰ ঠিতি নামাতি ঠিতিযা ভাৰেতীতিপি ৰত্তুং ৰট্টতি.

ইদ্ধিপাদেসু সঙ্খেপকথা চেতোখিলসুত্তে (ম. নি. ১.১৮৫ আদযো) ৰুত্তা. উপসমমানং গচ্ছতি, কিলেসূপসমত্থং ৰা গচ্ছতীতি উপসমগামী. সম্বুজ্ঝমানা গচ্ছতি, মগ্গসম্বোধত্থায ৰা গচ্ছতীতি সম্বোধগামী.

ৰিৰেকনিস্সিতাদীনি সব্বাসৰসংৰরে ৰুত্তানি. অযমেত্থ সঙ্খেপো, ৰিত্থারতো পনাযং বোধিপক্খিযকথা ৰিসুদ্ধিমগ্গে ৰুত্তা.

২৪৮. ৰিমোক্খকথাযং ৰিমোক্খেতি কেনট্ঠেন ৰিমোক্খা, অধিমুচ্চনট্ঠেন. কো পনাযং অধিমুচ্চনট্ঠো নাম? পচ্চনীকধম্মেহি চ সুট্ঠু মুচ্চনট্ঠো, আরম্মণে চ অভিরতিৰসেন সুট্ঠু মুচ্চনট্ঠো, পিতুঅঙ্কে ৰিস্সট্ঠঙ্গপচ্চঙ্গস্স দারকস্স সযনং ৰিয অনিগ্গহিতভাৰেন নিরাসঙ্কতায আরম্মণে পৰত্তীতি ৰুত্তং হোতি. অযং পনত্থো পচ্ছিমৰিমোক্খে নত্থি, পুরিমেসু সব্বেসু অত্থি. রূপী রূপানি পস্সতীতি এত্থ অজ্ঝত্তকেসাদীসু নীলকসিণাদিৰসেন উপ্পাদিতং রূপজ্ঝানং রূপং, তদস্স অত্থীতি রূপী. বহিদ্ধা রূপানি পস্সতীতি বহিদ্ধাপি নীলকসিণাদীনি রূপানি ঝানচক্খুনা পস্সতি. ইমিনা অজ্ঝত্ত বহিদ্ধাৰত্থুকেসু কসিণেসু উপ্পাদিতজ্ঝানস্স পুগ্গলস্স চত্তারিপি রূপাৰচরজ্ঝানানি দস্সিতানি.

অজ্ঝত্তং অরূপসঞ্ঞীতি অজ্ঝত্তং ন রূপসঞ্ঞী, অত্তনো কেসাদীসু অনুপ্পাদিতরূপাৰচরজ্ঝানোতি অত্থো. ইমিনা বহিদ্ধা পরিকম্মং কত্ৰা বহিদ্ধাৰ উপ্পাদিতজ্ঝানস্স রূপাৰচরজ্ঝানানি দস্সিতানি. সুভন্তেৰ অধিমুত্তো হোতীতি ইমিনা সুৰিসুদ্ধেসু নীলাদীসু ৰণ্ণকসিণেসু ঝানানি দস্সিতানি. তত্থ কিঞ্চাপি অন্তোঅপ্পনাযং সুভন্তি আভোগো নত্থি, যো পন সুৰিসুদ্ধং সুভকসিণং আরম্মণং কত্ৰা ৰিহরতি, সো যস্মা সুভন্তি অধিমুত্তো হোতীতি ৰত্তব্বতং আপজ্জতি, তস্মা এৰং দেসনা কতা. পটিসম্ভিদামগ্গে পন ‘‘কথং সুভন্তেৰ অধিমুত্তো হোতীতি ৰিমোক্খো. ইধ ভিক্খু মেত্তাসহগতেন চেতসা একং দিসং ফরিত্ৰা ৰিহরতি…পে… মেত্তায ভাৰিতত্তা সত্তা অপ্পটিকূলা হোন্তি. করুণাসহগতেন, মুদিতাসহগতেন, উপেক্খাসহগতেন চেতসা একং দিসং ফরিত্ৰা ৰিহরতি…পে… উপেক্খায ভাৰিতত্তা সত্তা অপ্পটিকূলা হোন্তি. এৰং সুভন্তেৰ অধিমুত্তো হোতীতি ৰিমোক্খো’’তি (পটি. ম. ১.২১২) ৰুত্তং.

সব্বসো রূপসঞ্ঞানন্তিআদীসু যং ৰত্তব্বং, তং সব্বং ৰিসুদ্ধিমগ্গে ৰুত্তমেৰ. অযং অট্ঠমো ৰিমোক্খোতি অযং চতুন্নং খন্ধানং সব্বসো ৰিস্সট্ঠত্তা ৰিমুত্তত্তা অট্ঠমো উত্তমো ৰিমোক্খো নাম.

২৪৯. অভিভাযতনকথাযং অভিভাযতনানীতি অভিভৰনকারণানি. কিং অভিভৰন্তি? পচ্চনীকধম্মেপি আরম্মণানিপি. তানি হি পটিপক্খভাৰেন পচ্চনীকধম্মে অভিভৰন্তি, পুগ্গলস্স ঞাণুত্তরিতায আরম্মণানি. অজ্ঝত্তং রূপসঞ্ঞীতিআদীসু পন অজ্ঝত্তরূপে পরিকম্মৰসেন অজ্ঝত্তং রূপসঞ্ঞী নাম হোতি. অজ্ঝত্তঞ্চ নীলপরিকম্মং করোন্তো কেসে ৰা পিত্তে ৰা অক্খিতারকায ৰা করোতি, পীতপরিকম্মং করোন্তো মেদে ৰা ছৰিযা ৰা হত্থতলপাদতলেসু ৰা অক্খীনং পীতট্ঠানে ৰা করোতি, লোহিতপরিকম্মং করোন্তো মংসে ৰা লোহিতে ৰা জিৰ্হায ৰা অক্খীনং রত্তট্ঠানে ৰা করোতি, ওদাতপরিকম্মং করোন্তো অট্ঠিম্হি ৰা দন্তে ৰা নখে ৰা অক্খীনং সেতট্ঠানে ৰা করোতি. তং পন সুনীলং সুপীতকং সুলোহিতকং সুওদাতং ন হোতি, অসুৰিসুদ্ধমেৰ হোতি.

একো বহিদ্ধা রূপানি পস্সতীতি যস্সেতং পরিকম্মং অজ্ঝত্তং উপ্পন্নং হোতি, নিমিত্তং পন বহিদ্ধা, সো এৰং অজ্ঝত্তং পরিকম্মস্স বহিদ্ধা চ অপ্পনায ৰসেন – ‘‘অজ্ঝত্তং রূপসঞ্ঞী একো বহিদ্ধা রূপানি পস্সতী’’তি ৰুচ্চতি. পরিত্তানীতি অৰড্ঢিতানি. সুৰণ্ণদুব্বণ্ণানীতি সুৰণ্ণানি ৰা হোন্তু দুব্বণ্ণানি ৰা, পরিত্তৰসেনেৰ ইদমভিভাযতনং ৰুত্তন্তি ৰেদিতব্বং. তানি অভিভুয্যাতি যথা নাম সম্পন্নগহণিকো কটচ্ছুমত্তং ভত্তং লভিত্ৰা ‘‘কিমেত্থ ভুঞ্জিতব্বং অত্থী’’তি সঙ্কড্ঢিত্ৰা এককবল়মেৰ করোতি, এৰমেৰং ঞাণুত্তরিকো পুগ্গলো ৰিসদঞাণো – ‘‘কিমেত্থ পরিত্তকে আরম্মণে সমাপজ্জিতব্বং অত্থি, নাযং মম ভারো’’তি তানি রূপানি অভিভৰিত্ৰা সমাপজ্জতি, সহ নিমিত্তুপ্পাদেনেৰেত্থ অপ্পনং পাপেতীতি অত্থো. জানামি পস্সামীতি ইমিনা পনস্স আভোগো কথিতো, সো চ খো সমাপত্তিতো ৰুট্ঠিতস্স, ন অন্তোসমাপত্তিযং. এৰংসঞ্ঞী হোতীতি আভোগসঞ্ঞাযপি ঝানসঞ্ঞাযপি এৰংসঞ্ঞী হোতি. অভিভৰসঞ্ঞা হিস্স অন্তোসমাপত্তিযং অত্থি, আভোগসঞ্ঞা পন সমাপত্তিতো ৰুট্ঠিতস্সেৰ.

অপ্পমাণানীতি ৰড্ঢিতপ্পমাণানি, মহন্তানীতি অত্থো. অভিভুয্যাতি এত্থ পন যথা মহগ্ঘসো পুরিসো একং ভত্তৰড্ঢিতকং লভিত্ৰা ‘‘অঞ্ঞাপি হোতু, অঞ্ঞাপি হোতু, কিমেসা ময্হং করিস্সতী’’তি তং ন মহন্ততো পস্সতি, এৰমেৰ ঞাণুত্তরো পুগ্গলো ৰিসদঞাণো ‘‘কিমেত্থ সমাপজ্জিতব্বং, নযিদং অপ্পমাণং, ন ময্হং চিত্তেকগ্গতাকরণে ভারো অত্থী’’তি তানি অভিভৰিত্ৰা সমাপজ্জতি, সহ নিমিত্তুপ্পাদেনেৰেত্থ অপ্পনং পাপেতীতি অত্থো.

অজ্ঝত্তং অরূপসঞ্ঞীতি অলাভিতায ৰা অনত্থিকতায ৰা অজ্ঝত্তরূপে পরিকম্মসঞ্ঞাৰিরহিতো. একো বহিদ্ধা রূপানি পস্সতীতি যস্স পরিকম্মম্পি নিমিত্তম্পি বহিদ্ধাৰ উপ্পন্নং, সো এৰং বহিদ্ধা পরিকম্মস্স চেৰ অপ্পনায চ ৰসেন – ‘‘অজ্ঝত্তং অরূপসঞ্ঞী একো বহিদ্ধা রূপানি পস্সতী’’তি ৰুচ্চতি. সেসমেত্থ চতুত্থাভিভাযতনে ৰুত্তনযমেৰ. ইমেসু পন চতূসু পরিত্তং ৰিতক্কচরিতৰসেন আগতং, অপ্পমাণং মোহচরিতৰসেন, সুৰণ্ণং দোসচরিতৰসেন, দুব্বণ্ণং রাগচরিতৰসেন. এতেসঞ্হি এতানি সপ্পাযানি. সা চ নেসং সপ্পাযতা ৰিত্থারতো ৰিসুদ্ধিমগ্গেচরিযনিদ্দেসে ৰুত্তা.

পঞ্চমঅভিভাযতনাদীসু নীলানীতি সব্বসঙ্গাহিকৰসেন ৰুত্তং. নীলৰণ্ণানীতি ৰণ্ণৰসেন. নীলনিদস্সনানীতি নিদস্সনৰসেন. অপঞ্ঞাযমানৰিৰরানি অসম্ভিন্নৰণ্ণানি একনীলানেৰ হুত্ৰা দিস্সন্তীতি ৰুত্তং হোতি. নীলনিভাসানীতি ইদং পন ওভাসৰসেন ৰুত্তং, নীলোভাসানি নীলপভাযুত্তানীতি অত্থো. এতেন নেসং সুৰিসুদ্ধতং দস্সেতি. ৰিসুদ্ধৰণ্ণৰসেনেৰ হি ইমানি চত্তারি অভিভাযতনানি ৰুত্তানি. উমাপুপ্ফন্তি এতঞ্হি পুপ্ফং সিনিদ্ধং মুদুং দিস্সমানম্পি নীলমেৰ হোতি. গিরিকণ্ণিকপুপ্ফাদীনি পন দিস্সমানানি সেতধাতুকানি হোন্তি. তস্মা ইদমেৰ গহিতং, ন তানি. বারাণসেয্যকন্তি বারাণসিযং ভৰং. তত্থ কির কপ্পাসোপি মুদু, সুত্তকন্তিকাযোপি তন্তৰাযাপি ছেকা, উদকম্পি সুচি সিনিদ্ধং, তস্মা ৰত্থং উভতোভাগৰিমট্ঠং হোতি, দ্ৰীসু পস্সেসু মট্ঠং মুদু সিনিদ্ধং খাযতি. পীতানীতিআদীসু ইমিনাৰ নযেন অত্থো ৰেদিতব্বো. ‘‘নীলকসিণং উগ্গণ্হন্তো নীলস্মিং নিমিত্তং গণ্হাতি পুপ্ফস্মিং ৰা ৰত্থস্মিং ৰা ৰণ্ণধাতুযা ৰা’’তিআদিকং পনেত্থ কসিণকরণঞ্চেৰ পরিকম্মঞ্চ অপ্পনাৰিধানঞ্চ সব্বং ৰিসুদ্ধিমগ্গে ৰিত্থারতো ৰুত্তমেৰ.

অভিঞ্ঞাৰোসানপারমিপ্পত্তাতি ইতো পুব্বেসু সতিপট্ঠানাদীসু তে ধম্মে ভাৰেত্ৰা অরহত্তপ্পত্তাৰ অভিঞ্ঞাৰোসানপারমিপ্পত্তা নাম হোন্তি, ইমেসু পন অট্ঠসু অভিভাযতনেসু চিণ্ণৰসীভাৰাযেৰ অভিঞ্ঞাৰোসানপারমিপ্পত্তা নাম.

২৫০. কসিণকথাযং সকলট্ঠেন কসিণানি, তদারম্মণানং ধম্মানং খেত্তট্ঠেন অধিট্ঠানট্ঠেন ৰা আযতনানি. উদ্ধন্তি উপরি গগনতলাভিমুখং. অধোতি হেট্ঠা ভূমিতলাভিমুখং. তিরিযন্তি খেত্তমণ্ডলমিৰ সমন্তা পরিচ্ছিন্দিত্ৰা. একচ্চো হি উদ্ধমেৰ কসিণং ৰড্ঢেতি, একচ্চো অধো, একচ্চো সমন্ততো. তেন তেন কারণেন এৰং পসারেতি আলোকমিৰ রূপদস্সনকামো. তেন ৰুত্তং – ‘‘পথৰীকসিণমেকো সঞ্জানাতি উদ্ধংঅধোতিরিয’’ন্তি. অদ্ৰযন্তি দিসাঅনুদিসাসু অদ্ৰযং. ইদং পন একস্স অঞ্ঞভাৰানুপগমনত্থং ৰুত্তং. যথা হি উদকং পৰিট্ঠস্স সব্বদিসাসু উদকমেৰ হোতি অনঞ্ঞং, এৰমেৰং পথৰীকসিণং পথৰীকসিণমেৰ হোতি, নত্থি তস্স অঞ্ঞো কসিণসম্ভেদোতি. এস নযো সব্বত্থ. অপ্পমাণন্তি ইদং তস্স তস্স ফরণঅপ্পমাণৰসেন ৰুত্তং. তঞ্হি চেতসা ফরন্তো সকলমেৰ ফরতি, অযমস্স আদি, ইদং মজ্ঝন্তি পমাণং গণ্হাতীতি. ৰিঞ্ঞাণকসিণন্তি চেত্থ কসিণুগ্ঘাটিমাকাসে পৰত্তং ৰিঞ্ঞাণং. তত্থ কসিণৰসেন কসিণুগ্ঘাটিমাকাসে, কসিণুগ্ঘাটিমাকাসৰসেন তত্থ পৰত্তৰিঞ্ঞাণে উদ্ধংঅধোতিরিযতা ৰেদিতব্বা. অযমেত্থ সঙ্খেপো. কম্মট্ঠানভাৰনানযেন পনেতানি পথৰীকসিণাদীনি ৰিত্থারতো ৰিসুদ্ধিমগ্গে ৰুত্তানেৰ. ইধাপি চিণ্ণৰসিভাৰেনেৰ অভিঞ্ঞাৰোসানপারমিপ্পত্তা হোন্তীতি ৰেদিতব্বা. তথা ইতো অনন্তরেসু চতূসু ঝানেসু. যং পনেত্থ ৰত্তব্বং, তং মহাঅস্সপুরসুত্তে ৰুত্তমেৰ.

২৫২. ৰিপস্সনাঞাণে পন রূপীতিআদীনমত্থো ৰুত্তোযেৰ. এত্থ সিতমেত্থ পটিবদ্ধন্তি এত্থ চাতুমহাভূতিকে কাযে নিস্সিতঞ্চ পটিবদ্ধঞ্চ. সুভোতি সুন্দরো. জাতিমাতি সুপরিসুদ্ধআকরসমুট্ঠিতো. সুপরিকম্মকতোতি সুট্ঠু কতপরিকম্মো অপনীতপাসাণসক্খরো. অচ্ছোতি তনুচ্ছৰি. ৰিপ্পসন্নোতি সুট্ঠু ৰিপ্পসন্নো. সব্বাকারসম্পন্নোতি ধোৰন ৰেধনাদীহি সব্বেহি আকারেহি সম্পন্নো. নীলন্তিআদীহি ৰণ্ণসম্পত্তিং দস্সেতি. তাদিসঞ্হি আৰুতং পাকটং হোতি.

এৰমেৰ খোতি এত্থ এৰং উপমাসংসন্দনং ৰেদিতব্বং – মণি ৰিয হি করজকাযো. আৰুতসুত্তং ৰিয ৰিপস্সনাঞাণং. চক্খুমা পুরিসো ৰিয ৰিপস্সনালাভী ভিক্খু. হত্থে করিত্ৰা পচ্চৰেক্খতো ‘‘অযং খো মণী’’তি মণিনো আৰিভূতকালো ৰিয ৰিপস্সনাঞাণং অভিনীহরিত্ৰা নিসিন্নস্স ভিক্খুনো চাতুমহাভূতিককাযস্স আৰিভূতকালো. ‘‘তত্রিদং সুত্তং আৰুত’’ন্তি সুত্তস্স আৰিভূতকালো ৰিয ৰিপস্সনাঞাণং অভিনীহরিত্ৰা নিসিন্নস্স ভিক্খুনো তদারম্মণানং ফস্সপঞ্চমকানং ৰা সব্বচিত্তচেতসিকানং ৰা ৰিপস্সনাঞাণস্সেৰ ৰা আৰিভূতকালোতি.

কিং পনেতং ঞাণস্স আৰিভূতং, পুগ্গলস্সাতি. ঞাণস্স, তস্স পন আৰিভাৰত্তা পুগ্গলস্স আৰিভূতাৰ হোন্তি. ইদঞ্চ ৰিপস্সনাঞাণং মগ্গস্স অনন্তরং, এৰং সন্তেপি যস্মা অভিঞ্ঞাৰারে আরদ্ধে এতস্স অন্তরাৰারো নত্থি, তস্মা ইধেৰ দস্সিতং. যস্মা চ অনিচ্চাদিৰসেন অকতসম্মসনস্স দিব্বায সোতধাতুযা ভেরৰসদ্দং সুণন্তো পুব্বেনিৰাসানুস্সতিযা ভেরৰে খন্ধে অনুস্সরতো দিব্বেন চক্খুনা ভেরৰরূপং পস্সতো ভযসন্তাসো উপ্পজ্জতি, ন অনিচ্চাদিৰসেন কতসম্মসনস্স, তস্মা অভিঞ্ঞাপত্তস্স ভযৰিনোদকহেতুসম্পাদনত্থম্পি ইদং ইধেৰ দস্সিতং. ইধাপি অরহত্তৰসেনেৰ অভিঞ্ঞাৰোসানপারমিপ্পত্ততা ৰেদিতব্বা.

২৫৩. মনোমযিদ্ধিযং চিণ্ণৰসিতায. তত্থ মনোমযন্তি মনেন নিব্বত্তং. সব্বঙ্গপচ্চঙ্গিন্তি সব্বেহি অঙ্গেহি চ পচ্চঙ্গেহি চ সমন্নাগতং. অহীনিন্দ্রিযন্তি সণ্ঠানৰসেন অৰিকলিন্দ্রিযং. ইদ্ধিমতা নিম্মিতরূপঞ্হি সচে ইদ্ধিমা ওদাতো, তম্পি ওদাতং. সচে অৰিদ্ধকণ্ণো, তম্পি অৰিদ্ধকণ্ণন্তি এৰং সব্বাকারেহি তেন সদিসমেৰ হোতি. মুঞ্জম্হা ঈসিকন্তিআদি উপমত্তযম্পি তং সদিসভাৰদস্সনত্থমেৰ ৰুত্তং. মুঞ্জসদিসা এৰ হি তস্স অন্তো ঈসিকা হোতি. কোসসদিসোযেৰ অসি, ৰট্টায কোসিযা ৰট্টং অসিমেৰ পক্খিপন্তি, পত্থটায পত্থটং.

করণ্ডাতি ইদম্পি অহিকঞ্চুকস্স নামং, ন ৰিলীৰকরণ্ডকস্স. অহিকঞ্চুকো হি অহিনা সদিসোৰ হোতি. তত্থ কিঞ্চাপি ‘‘পুরিসো অহিং করণ্ডা উদ্ধরেয্যা’’তি হত্থেন উদ্ধরমানো ৰিয দস্সিতো, অথ খো চিত্তেনেৰস্স উদ্ধরণং ৰেদিতব্বং. অযঞ্হি অহি নাম সজাতিযং ঠিতো, কট্ঠন্তরং ৰা রুক্খন্তরং ৰা নিস্সায, তচতো সরীরনিক্কড্ঢনপযোগসঙ্খাতেন থামেন, সরীরং খাদমানং ৰিয পুরাণতচং জিগুচ্ছন্তোতি ইমেহি চতূহি কারণেহি সযমেৰ কঞ্চুকং জহাতি, ন সক্কা ততো অঞ্ঞেন উদ্ধরিতুং. তস্মা চিত্তেন উদ্ধরণং সন্ধায ইদং ৰুত্তন্তি ৰেদিতব্বং. ইতি মুঞ্জাদিসদিসং ইমস্স ভিক্খুনো সরীরং, ঈসিকাদিসদিসং নিম্মিতরূপন্তি ইদমেত্থ ওপম্মসংসন্দনং. নিম্মানৰিধানং পনেত্থ পরতো চ ইদ্ধিৰিধাদিপঞ্চঅভিঞ্ঞাকথা সব্বাকারেন ৰিসুদ্ধিমগ্গে ৰিত্থারিতাতি তত্থ ৰুত্তনযেনেৰ ৰেদিতব্বা. উপমামত্তমেৰ হি ইধ অধিকং.

তত্থ ছেককুম্ভকারাদযো ৰিয ইদ্ধিৰিধঞাণলাভী ভিক্খু দট্ঠব্বো. সুপরিকম্মকতমত্তিকাদযো ৰিয ইদ্ধিৰিধঞাণং দট্ঠব্বং. ইচ্ছিতিচ্ছিতভাজনৰিকতিআদিকরণং ৰিয তস্স ভিক্খুনো ৰিকুব্বনং দট্ঠব্বং. ইধাপি চিণ্ণৰসিতাৰসেনেৰ অভিঞ্ঞাৰোসানপারমিপ্পত্ততা ৰেদিতব্বা. তথা ইতো পরাসু চতূসু অভিঞ্ঞাসু.

২৫৫. তত্থ দিব্বসোতধাতুউপমাযং সঙ্খধমোতি সঙ্খধমকো. অপ্পকসিরেনেৰাতি নিদ্দুক্খেনেৰ. ৰিঞ্ঞাপেয্যাতি জানাপেয্য. তত্থ এৰং চাতুদ্দিসা ৰিঞ্ঞাপেন্তে সঙ্খধমকে ‘‘সঙ্খসদ্দো অয’’ন্তি ৰৰত্থাপেন্তানং সত্তানং তস্স সঙ্খসদ্দস্স আৰিভূতকালো ৰিয যোগিনো দূরসন্তিকভেদানং দিব্বানঞ্চেৰ মানুসকানঞ্চ সদ্দানং আৰিভূতকালো দট্ঠব্বো.

২৫৬. চেতোপরিযঞাণ-উপমাযং দহরোতি তরুণো. যুৰাতি যোব্বনেন সমন্নাগতো. মণ্ডনকজাতিকোতি যুৰাপি সমানো ন অলসিযো কিলিট্ঠৰত্থসরীরো, অথ খো মণ্ডনকপকতিকো, দিৰসস্স দ্ৰে তযো ৰারে ন্হাযিত্ৰা সুদ্ধৰত্থ-পরিদহন-অলঙ্কারকরণসীলোতি অত্থো. সকণিকন্তি কাল়তিলকৰঙ্ক-মুখদূসিপীল়কাদীনং অঞ্ঞতরেন সদোসং. তত্থ যথা তস্স মুখনিমিত্তং পচ্চৰেক্খতো মুখদোসো পাকটো হোতি, এৰং চেতোপরিযঞাণায চিত্তং অভিনীহরিত্ৰা নিসিন্নস্স ভিক্খুনো পরেসং সোল়সৰিধং চিত্তং পাকটং হোতীতি ৰেদিতব্বং. পুব্বেনিৰাসউপমাদীসু যং ৰত্তব্বং, তং সব্বং মহাঅস্সপুরে ৰুত্তমেৰ.

২৫৯. অযং খো উদাযি পঞ্চমো ধম্মোতি একূনৰীসতি পব্বানি পটিপদাৰসেন একং ধম্মং কত্ৰা পঞ্চমো ধম্মোতি ৰুত্তো. যথা হি অট্ঠকনাগরসুত্তে (ম. নি. ২.১৭ আদযো) একাদস পব্বানি পুচ্ছাৰসেন একধম্মো কতো, এৰমিধ একূনৰীসতি পব্বানি পটিপদাৰসেন একো ধম্মো কতোতি ৰেদিতব্বানি. ইমেসু চ পন একূনৰীসতিযা পব্বেসু পটিপাটিযা অট্ঠসু কোট্ঠাসেসু ৰিপস্সনাঞাণে চ আসৰক্খযঞাণে চ অরহত্তৰসেন অভিঞ্ঞাৰোসানপারমিপ্পত্ততা ৰেদিতব্বা, সেসেসু চিণ্ণৰসিভাৰৰসেন. সেসং সব্বত্থ উত্তানমেৰাতি.

পপঞ্চসূদনিযা মজ্ঝিমনিকাযট্ঠকথায

মহাসকুলুদাযিসুত্তৰণ্ণনা নিট্ঠিতা.