১০. ৰেখনসসুত্তৰণ্ণনা

২৭৮. এৰং মে সুতন্তি ৰেখনসসুত্তং. তত্থ ৰেখনসোতি অযং কির সকুলুদাযিস্স আচরিযো, সো ‘‘সকুলুদাযী পরিব্বাজকো পরমৰণ্ণপঞ্হে পরাজিতো’’তি সুত্ৰা ‘‘মযা সো সাধুকং উগ্গহাপিতো, তেনাপি সাধুকং উগ্গহিতং, কথং নু খো পরাজিতো, হন্দাহং সযং গন্ত্ৰা সমণং গোতমং পরমৰণ্ণপঞ্হং পুচ্ছিত্ৰা জানিস্সামী’’তি রাজগহতো পঞ্চচত্তালীসযোজনং সাৰত্থিং গন্ত্ৰা যেন ভগৰা, তেনুপসঙ্কমি, উপসঙ্কমিত্ৰা পন ঠিতকোৰ ভগৰতো সন্তিকে উদানং উদানেসি. তত্থ পুরিমসদিসং ৰুত্তনযেনেৰ ৰেদিতব্বং.

২৮০. পঞ্চ খো ইমেতি কস্মা আরভি? অগারিযোপি একচ্চো কামগরুকো কামাধিমুত্তো হোতি, একচ্চো নেক্খম্মগরুকো নেক্খম্মাধিমুত্তো হোতি. পব্বজিতোপি চ একচ্চো কামগরুকো কামাধিমুত্তো হোতি, একচ্চো নেক্খম্মগরুকো নেক্খম্মাধিমুত্তো হোতি. অযং পন কামগরুকো কামাধিমুত্তো হোতি. সো ইমায কথায কথিযমানায অত্তনো কামাধিমুত্তত্তং সল্লক্খেস্সতি, এৰমস্সাযং দেসনা সপ্পাযা ভৰিস্সতীতি ইমং দেসনং আরভি. কামগ্গসুখন্তি নিব্বানং অধিপ্পেতং.

২৮১. পাপিতো ভৰিস্সতীতি অজাননভাৰং পাপিতো ভৰিস্সতি. নামকংযেৰ সম্পজ্জতীতি নিরত্থকৰচনমত্তমেৰ সম্পজ্জতি. তিট্ঠতু পুব্বন্তো তিট্ঠতু অপরন্তোতি যস্মা তুয্হং অতীতকথায অনুচ্ছৰিকং পুব্বেনিৰাসঞাণং নত্থি, অনাগতকথায অনুচ্ছৰিকং দিব্বচক্খুঞাণং নত্থি, তস্মা উভযম্পেতং তিট্ঠতূতি আহ. সুত্তবন্ধনেহীতি সুত্তমযবন্ধনেহি. তস্স হি আরক্খত্থায হত্থপাদেসু চেৰ গীৰায চ সুত্তকানি বন্ধন্তি. তানি সন্ধাযেতং ৰুত্তং. মহল্লককালে পনস্স তানি সযং ৰা পূতীনি হুত্ৰা মুঞ্চন্তি, ছিন্দিত্ৰা ৰা হরন্তি.

এৰমেৰ খোতি ইমিনা ইদং দস্সেতি – দহরস্স কুমারস্স সুত্তবন্ধনানং অজাননকালো ৰিয অৰিজ্জায পুরিমায কোটিযা অজাননং, ন হি সক্কা অৰিজ্জায পুরিমকোটি ঞাতুং, মোচনকালে জাননসদিসং পন অরহত্তমগ্গেন অৰিজ্জাবন্ধনস্স পমোক্খো জাতোতি জাননং. সেসং সব্বত্থ উত্তানমেৰাতি.

পপঞ্চসূদনিযা মজ্ঝিমনিকাযট্ঠকথায

ৰেখনসসুত্তৰণ্ণনা নিট্ঠিতা.

ততিযৰগ্গৰণ্ণনা নিট্ঠিতা.