৯. গোলিযানিসুত্তৰণ্ণনা

১৭৩. এৰং মে সুতন্তি গোলিযানিসুত্তং. তত্থ পদসমাচারোতি দুব্বলসমাচারো ওল়ারিকাচারো, পচ্চযেসু সাপেক্খো মহারক্খিতত্থেরো ৰিয. তং কির উপট্ঠাককুলে নিসিন্নং উপট্ঠাকো আহ ‘‘অসুকত্থেরস্স মে, ভন্তে, চীৰরং দিন্ন’’ন্তি. সাধু তে কতং তংযেৰ তক্কেত্ৰা ৰিহরন্তস্স চীৰরং দেন্তেনাতি. তুম্হাকম্পি, ভন্তে, দস্সামীতি. সাধু করিস্সসি তংযেৰ তক্কেন্তস্সাতি আহ. অযম্পি এৰরূপো ওল়ারিকাচারো অহোসি. সপ্পতিস্সেনাতি সজেট্ঠকেন, ন অত্তানং জেট্ঠকং কত্ৰা ৰিহরিতব্বং. সেরিৰিহারেনাতি সচ্ছন্দৰিহারেন নিরঙ্কুসৰিহারেন.

নানূপখজ্জাতি ন অনুপখজ্জ ন অনুপৰিসিত্ৰা. তত্থ যো দ্ৰীসু মহাথেরেসু উভতো নিসিন্নেসু তে অনাপুচ্ছিত্ৰাৰ চীৰরেন ৰা জাণুনা ৰা ঘট্টেন্তো নিসীদতি, অযং অনুপখজ্জ নিসীদতি নাম. এৰং অকত্ৰা পন অত্তনো পত্তআসনসন্তিকে ঠত্ৰা নিসীদাৰুসোতি ৰুত্তে নিসীদিতব্বং. সচে ন ৰদন্তি, নিসীদামি, ভন্তেতি আপুচ্ছিত্ৰা নিসীদিতব্বং আপুচ্ছিতকালতো পট্ঠায নিসীদাতি ৰুত্তেপি অৰুত্তেপি নিসীদিতুং ৰট্টতিযেৰ. ন পটিবাহিস্সামীতি এত্থ যো অত্তনো পত্তাসনং অতিক্কমিত্ৰা নৰকানং পাপুণনট্ঠানে নিসীদতি, অযং নৰে ভিক্খূ আসনেন পটিবাহতি নাম. তস্মিঞ্হি তথা নিসিন্নে নৰা ভিক্খূ ‘‘অম্হাকং নিসীদিতুং ন দেতী’’তি উজ্ঝাযন্তা তিট্ঠন্তি ৰা আসনং ৰা পরিযেসন্তা আহিণ্ডন্তি. তস্মা অত্তনো পত্তাসনেযেৰ নিসীদিতব্বং. এৰং ন পটিবাহতি নাম.

আভিসমাচারিকম্পি ধম্মন্তি অভিসমাচারিকং ৰত্তপটিপত্তিমত্তম্পি. নাতিকালেনাতি ন অতিপাতো পৰিসিতব্বং, ন অতিদিৰা পটিক্কমিতব্বং, ভিক্খুসঙ্ঘেন সদ্ধিংযেৰ পৰিসিতব্বঞ্চ নিক্খমিতব্বঞ্চ. অতিপাতো পৰিসিত্ৰা অতিদিৰা নিক্খমন্তস্স হি চেতিযঙ্গণবোধিযঙ্গণৰত্তাদীনি পরিহাযন্তি. কালস্সেৰ মুখং ধোৰিত্ৰা মক্কটকসুত্তানি ছিন্দন্তেন উস্সাৰবিন্দূ নিপাতেন্তেন গামং পৰিসিত্ৰা যাগুং পরিযেসিত্ৰা যাৰ ভিক্খাকালা অন্তোগামেযেৰ নানপ্পকারং তিরচ্ছানকথং কথেন্তেন নিসীদিত্ৰা ভত্তকিচ্চং কত্ৰা দিৰা নিক্খম্ম ভিক্খূনং পাদধোৰনৰেলায ৰিহারং পচ্চাগন্তব্বং হোতি. ন পুরেভত্তং পচ্ছাভত্তং কুলেসু চারিত্তং আপজ্জিতব্বন্তি ‘‘যো পন ভিক্খু নিমন্তিতো সভত্তো সমানো সন্তং ভিক্খুং অনাপুচ্ছা পুরেভত্তং ৰা পচ্ছাভত্তং ৰা কুলেসু চারিত্তং আপজ্জেয্য, অঞ্ঞত্র সমযা পাচিত্তিয’’ন্তি (পাচি. ২৯৯) ইমং সিক্খাপদং রক্খন্তেন তস্স ৰিভঙ্গে ৰুত্তং পুরেভত্তঞ্চ পচ্ছাভত্তঞ্চ চারিত্তং ন আপজ্জিতব্বং. উদ্ধতো হোতি চপলোতি উদ্ধচ্চপকতিকো চেৰ হোতি চীৰরমণ্ডন-পত্তমণ্ডন-সেনাসনমণ্ডনা ইমস্স ৰা পূতিকাযস্স কেলাযনা মণ্ডনাতি এৰং ৰুত্তেন চ তরুণদারকাৰচাপল্যেন সমন্নাগতো.

পঞ্ঞৰতা ভৰিতব্বন্তি চীৰরকম্মাদীসু ইতিকত্তব্বেসু উপাযপঞ্ঞায সমন্নাগতেন ভৰিতব্বং. অভিধম্মে অভিৰিনযেতি অভিধম্মপিটকে চেৰ ৰিনযপিটকে চ পাল়িৰসেন চেৰ অট্ঠকথাৰসেন চ যোগো করণীযো. সব্বন্তিমেন হি পরিচ্ছেদেন অভিধম্মে দুকতিকমাতিকাহি সদ্ধিং ধম্মহদযৰিভঙ্গং ৰিনা ন ৰট্টতি. ৰিনযে পন কম্মাকম্মৰিনিচ্ছযেন সদ্ধিং সুৰিনিচ্ছিতানি দ্ৰে পাতিমোক্খানি ৰিনা ন ৰট্টতি.

আরুপ্পাতি এত্তাৰতা অট্ঠপি সমাপত্তিযো ৰুত্তা হোন্তি. তা পন সব্বেন সব্বং অসক্কোন্তেন সত্তসুপি যোগো করণীযো, ছসুপি…পে… পঞ্চসুপি. সব্বন্তিমেন পরিচ্ছেদেন একং কসিণে পরিকম্মকম্মট্ঠানং পগুণং কত্ৰা আদায ৰিচরিতব্বং, এত্তকং ৰিনা ন ৰট্টতি. উত্তরিমনুস্সধম্মেতি ইমিনা সব্বেপি লোকুত্তরধম্মে দস্সেতি. তস্মা অরহন্তেন হুত্ৰা ৰিহাতব্বং, অরহত্তং অনভিসম্ভুণন্তেন অনাগামিফলে সকদাগামিফলে সোতাপত্তিফলে ৰা পতিট্ঠাতব্বং. সব্বন্তিমেন পরিযাযেন একং ৰিপস্সনামুখং যাৰ অরহত্তা পগুণং কত্ৰা আদায ৰিচরিতব্বং. সেসং সব্বত্থ উত্তানমেৰ. ইমং পন দেসনং আযস্মা সারিপুত্তো নেয্যপুগ্গলস্স ৰসেন আভিসমাচারিকৰত্ততো পট্ঠায অনুপুব্বেন অরহত্তং পাপেত্ৰা নিট্ঠাপেসীতি.

পপঞ্চসূদনিযা মজ্ঝিমনিকাযট্ঠকথায

গোলিযানিসুত্তৰণ্ণনা নিট্ঠিতা.