উপাদানৰারৰণ্ণনা

৯৫. উপাদানৰারে কামুপাদানন্তিআদীসু ৰত্থুকামং উপাদিযতি এতেন, সযং ৰা তং উপাদিযতীতি কামুপাদানং. কামো চ সো উপাদানঞ্চাতি ৰা কামুপাদানং. উপাদানন্তি দল়্হগ্গহণং ৰুচ্চতি. দল়্হত্থো হি এত্থ উপসদ্দো, ‘‘উপাযাস উপকট্ঠা’’তিআদীসু ৰিয পঞ্চকামগুণিকরাগস্সেতং অধিৰচনং. অযমেত্থ সঙ্খেপো. ৰিত্থারতো পনেতং ‘‘তত্থ কতমং কামুপাদানং, যো কামেসু কামচ্ছন্দো’’তি (ধ. স. ১২২০; ৰিভ. ৯৩৮) ৰুত্তনযেন ৰেদিতব্বং.

তথা দিট্ঠি চ সা উপাদানঞ্চাতি দিট্ঠুপাদানং. অথ ৰা দিট্ঠিং উপাদিযতি, উপাদিযন্তি ৰা এতেন দিট্ঠিন্তি দিট্ঠুপাদানং. উপাদিযতি হি পুরিমদিট্ঠিং উত্তরদিট্ঠি. উপাদিযন্তি চ তায দিট্ঠিং. যথাহ ‘‘সস্সতো অত্তা চ লোকো চ, ইদমেৰ সচ্চং মোঘমঞ্ঞ’’ন্তিআদি (ম. নি. ৩.২৭), সীলব্বতুপাদানঅত্তৰাদুপাদানৰজ্জস্স সব্বদিট্ঠিগতস্সেতং অধিৰচনং. অযমেত্থ সঙ্খেপো. ৰিত্থারতো পনেতং ‘‘তত্থ কতমং দিট্ঠুপাদানং নত্থি দিন্ন’’ন্তি (ধ. স. ১২২০; ৰিভ. ৯৩৮) ৰুত্তনযেন ৰেদিতব্বং.

তথা সীলব্বতং উপাদিযন্তি এতেন, সযং ৰা তং উপাদিযতি, সীলব্বতঞ্চ তং উপাদানঞ্চাতি ৰা সীলব্বতুপাদানং. গোসীলগোৰতাদীনি হি এৰং সুদ্ধীতি অভিনিৰেসতো সযমেৰ উপাদানানি অযমেত্থ সঙ্খেপো. ৰিত্থারতো পনেতং ‘‘তত্থ কতমং সীলব্বতুপাদানং, ইতো বহিদ্ধা সমণব্রাহ্মণানং সীলেন সুদ্ধী’’তি ৰুত্তনযেন ৰেদিতব্বং.

ইদানি ৰদন্তি এতেনাতি ৰাদো. উপাদিযন্তি এতেনাতি উপাদানং. কিং ৰদন্তি, উপাদিযন্তি ৰা? অত্তানং. অত্তনো ৰাদুপাদানং অত্তৰাদুপাদানং. অত্তৰাদমত্তমেৰ ৰা অত্তাতি উপাদিযতি এতেনাতি অত্তৰাদুপাদানং, ৰীসতিৰত্থুকায সক্কাযদিট্ঠিযা এতং অধিৰচনং. অযমেত্থ সঙ্খেপো. ৰিত্থারতো পনেতং ‘‘তত্থ কতমং অত্তৰাদুপাদানং, ইধ অস্সুতৰা পুথুজ্জনো অরিযানং অদস্সাৰী’’তি (ধ. স. ১২২৩) ৰুত্তনযেন ৰেদিতব্বং.

তণ্হাসমুদযাতি এত্থ তণ্হা কামুপাদানস্স উপনিস্সযৰসেন অনন্তরসমনন্তরনত্থিৰিগতাসেৰনৰসেন ৰা পচ্চযো. অৰসেসানং পন সহজাতাদিৰসেনাপি. সেসং ৰুত্তনযমেৰাতি.

উপাদানৰারৰণ্ণনা নিট্ঠিতা.