তণ্হাৰারৰণ্ণনা
৯৬. তণ্হাৰারে রূপতণ্হা…পে… ধম্মতণ্হাতি এৰং চক্খুদ্ৰারাদীসু জৰনৰীথিযং পৰত্তায তণ্হায ‘‘সেট্ঠিপুত্তো ব্রাহ্মণপুত্তো’’তি এৰমাদীসু পিতিতো নামং ৰিয পিতিসদিসারম্মণতো নামং. এত্থ চ রূপারম্মণা তণ্হা, রূপে তণ্হাতি রূপতণ্হা. সা কামরাগভাৰেন রূপং অস্সাদেন্তী পৰত্তমানা কামতণ্হা. সস্সতদিট্ঠিসহগতরাগভাৰেন রূপং নিচ্চং ধুৰং সস্সতন্তি এৰং অস্সাদেন্তী পৰত্তমানা ভৰতণ্হা. উচ্ছেদদিট্ঠিসহগতরাগভাৰেন রূপং উচ্ছিজ্জতি ৰিনস্সতি পেচ্চ ন ভৰিস্সতীতি এৰং অস্সাদেন্তী পৰত্তমানা ৰিভৰতণ্হাতি এৰং তিৰিধা হোতি. যথা চ রূপতণ্হা, তথা সদ্দতণ্হাদযোপীতি এতানি অট্ঠারস তণ্হাৰিচরিতানি হোন্তি. তানি অজ্ঝত্তরূপাদীসু অট্ঠারস, বহিদ্ধারূপাদীসু অট্ঠারসাতি ছত্তিংস. ইতি অতীতানি ছত্তিংস, অনাগতানি ছত্তিংস, পচ্চুপ্পন্নানি ছত্তিংসাতি অট্ঠসতং. ‘‘অজ্ঝত্তিকস্সুপাদায ‘অস্মী’তি হোতি, ‘ইত্থস্মী’তি হোতী’’তি (ৰিভ. ৯৭৩-৯৭৪) ৰা এৰমাদীনা অজ্ঝত্তিকরূপাদিনিস্সিতানি অট্ঠারস, ‘‘বাহিরস্সুপাদায ‘ইমিনা অস্মী’তি হোতি, ‘ইমিনা ইত্থস্মী’তি হোতী’’তি ৰা (ৰিভ. ৯৭৫) এৰমাদিনা বাহিররূপাদিনিস্সিতানি অট্ঠারসাতি ছত্তিংস. ইতি অতীতানি ছত্তিংস, অনাগতানি ছত্তিংস, পচ্চুপ্পন্নানি ছত্তিংসাতি এৰম্পি অট্ঠসততণ্হাৰিচরিতানি হোন্তি. পুন সঙ্গহে করীযমানে রূপাদীসু আরম্মণেসু ছল়েৰ তণ্হাকাযা তিস্সোযেৰ কামতণ্হাদযো হোন্তীতি এৰং –
নিদ্দেসত্থেন নিদ্দেস-ৰিত্থারা ৰিত্থারস্স চ;
পুন সঙ্গহতো তণ্হা, ৰিঞ্ঞাতব্বা ৰিভাৰিনাতি.
ৰেদনাসমুদযাতি এত্থ পন ৰেদনাতি ৰিপাকৰেদনা অধিপ্পেতা. সা কথং ছসু দ্ৰারেসু তণ্হায পচ্চযো হোতীতি চে? অস্সাদনীযতো. সুখায হি ৰেদনায অস্সাদনেন সত্তা ৰেদনং মমাযন্তা ৰেদনায তণ্হং উপ্পাদেত্ৰা ৰেদনারাগরত্তা হুত্ৰা চক্খুদ্ৰারে ইট্ঠমেৰ রূপং পত্থেন্তি, লদ্ধা চ নং অস্সাদেন্তি, আরম্মণদাযকানঞ্চ চিত্তকারাদীনং সক্কারং করোন্তি. তথা সোতদ্ৰারাদীসু ইট্ঠে চ সদ্দাদযো পত্থেন্তি, লদ্ধা চ নে অস্সাদেন্তি, আরম্মণদাযকানঞ্চ ৰীণাৰাদক-গন্ধিকসূদ-তন্তৰায-নানাৰিধসিপ্পসন্দস্সকাদীনং সক্কারং করোন্তি. যথা কিং? যথা পুত্তসিনেহেন পুত্তং মমাযন্তা ধাতিযা সক্কারং করোন্তি, সপ্পাযসপ্পিখীরাদীনিযেৰ নং পাযেন্তি চেৰ ভোজেন্তি চ. সেসং ৰুত্তনযমেৰ.
তণ্হাৰারৰণ্ণনা নিট্ঠিতা.