আসৰৰারৰণ্ণনা

১০৪. আসৰৰারে অৰিজ্জাসমুদযাতি এত্থ অৰিজ্জা কামাসৰভৰাসৰানং সহজাতাদিৰসেন পচ্চযো হোতি. অৰিজ্জাসৰস্স উপনিস্সযৰসেনেৰ. অপরাপরুপ্পন্না চেত্থ অৰিজ্জা অৰিজ্জাসৰোতি ৰেদিতব্বা. পুব্বুপ্পন্না অৰিজ্জাযেৰস্স অপরাপরুপ্পন্নস্স অৰিজ্জাসৰস্স উপনিস্সযপচ্চযো হোতি. সেসং ৰুত্তনযমেৰাতি. অযং ৰারো যা এসা পটিচ্চসমুপ্পাদপদেসু জেট্ঠিকা অৰিজ্জা, তস্সাপি পচ্চযদস্সনৰসেন ৰুত্তো. এৰং ৰুত্তেন ৰারেন সংসারস্স অনমতগ্গতা সাধিতা হোতি. কথং? আসৰসমুদযেন হি অৰিজ্জাসমুদযো. অৰিজ্জাসমুদযেনাপি আসৰসমুদযো. এৰং আসৰা অৰিজ্জায অৰিজ্জাপি আসৰানং পচ্চযোতি কত্ৰা পুব্বকোটি ন পঞ্ঞাযতি অৰিজ্জায, তস্সা অপঞ্ঞাযনতো সংসারস্স অনমতগ্গতা সিদ্ধা হোতীতি.

এৰং সব্বেপিমে ইমস্মিং সুত্তে কম্মপথৰারো আহারৰারো দুক্খৰারো জরা-মরণ-জাতি-ভৰ-উপাদান-তণ্হা-ৰেদনা-ফস্স-সল়াযতন-নামরূপ- ৰিঞ্ঞাণ-সঙ্খার-অৰিজ্জা-আসৰৰারোতি সোল়সৰারা ৰুত্তা.

তেসু একেকস্স ৰারস্স সঙ্খেপৰিত্থারৰসেন দ্ৰিধা ৰিভত্তা দ্ৰত্তিংসট্ঠানানি হোন্তি. ইতি ইমস্মিং সুত্তে ইমেসু দ্ৰত্তিংসট্ঠানেসু চত্তারি সচ্চানি কথিতানি. এতেসংযেৰ ৰিত্থারৰসেন ৰুত্তেসু সোল়সসু ঠানেসু অরহত্তং কথিতং. থেরস্স পন মতেন দ্ৰত্তিংসাযপি ঠানেসু চত্তারি সচ্চানি চত্তারো চ মগ্গা কথিতাতি. ইতি সকলেপি পঞ্চমহানিকাযসঙ্গহিতে বুদ্ধৰচনে নত্থি তং সুত্তং, যত্থ দ্ৰত্তিংসক্খত্তুং চত্তারি সচ্চানি দ্ৰত্তিংসক্খত্তুঞ্চ অরহত্তং পকাসিতং অঞ্ঞত্র ইমম্হা সম্মাদিট্ঠিসুত্তাতি.

ইদমৰোচাযস্মা সারিপুত্তোতি ইদং দ্ৰত্তিংসায চতুসচ্চপরিযাযেহি দ্ৰত্তিংসায অরহত্তপরিযাযেহীতি চতুসট্ঠিযা কারণেহি অলঙ্করিত্ৰা সম্মাদিট্ঠিসুত্তং আযস্মা সারিপুত্তো অৰোচ, অত্তমনা তে ভিক্খূ আযস্মতো সারিপুত্তস্স ভাসিতং অভিনন্দুন্তি.

আসৰৰারৰণ্ণনা নিট্ঠিতা.

পপঞ্চসূদনিযা মজ্ঝিমনিকাযট্ঠকথায

সম্মাদিট্ঠিসুত্তৰণ্ণনা নিট্ঠিতা.