অৰিজ্জাৰারৰণ্ণনা

১০৩. অৰিজ্জাৰারে দুক্খে অঞ্ঞাণন্তি দুক্খসচ্চে অঞ্ঞাণং, মোহস্সেতং অধিৰচনং. এস নযো সমুদযে অঞ্ঞাণন্তিআদীসু. তত্থ চতূহি কারণেহি দুক্খে অঞ্ঞাণং ৰেদিতব্বং অন্তোগধতো ৰত্থুতো আরম্মণতো পটিচ্ছাদনতো চ. তথা হি তং দুক্খসচ্চপরিযাপন্নত্তা দুক্খে অন্তোগধং, দুক্খসচ্চঞ্চস্স নিস্সযপচ্চযভাৰেন ৰত্থু, আরম্মণপচ্চযভাৰেন আরম্মণং, দুক্খসচ্চঞ্চ এতং পটিচ্ছাদেতি, তস্স যাথাৰলক্খণপ্পটিৰেধনিৰারণেন, ঞাণপ্পৰত্তিযা চেত্থ অপ্পদানেন.

সমুদযে অঞ্ঞাণং তীহি কারণেহি ৰেদিতব্বং ৰত্থুতো আরম্মণতো পটিচ্ছাদনতো চ. নিরোধে পটিপদাযঞ্চ অঞ্ঞাণং একেনেৰ কারণেন ৰেদিতব্বং পটিচ্ছাদনতো. নিরোধপটিপদায হি পটিচ্ছাদকমেৰ অঞ্ঞাণং তেসং যাথাৰলক্খণপ্পটিৰেধনিৰারণেন, তেসু চ ঞাণপ্পৰত্তিযা অপ্পদানেন. ন পন তত্থ অন্তোগধং, তস্মিং সচ্চদ্ৰযে অপরিযাপন্নত্তা. ন তস্স তং সচ্চদ্ৰযং ৰত্থু, অসহজাতত্তা. নারম্মণং, তদারব্ভ অপ্পৰত্তনতো. পচ্ছিমঞ্হি সচ্চদ্ৰযং গম্ভীরত্তা দুদ্দসং, ন চেত্থ অন্ধভূতং অঞ্ঞাণং পৰত্ততি. পুরিমং পন ৰঞ্চনিযট্ঠেন সভাৰলক্খণস্স দুদ্দসত্তা গম্ভীরং, তত্থ ৰিপল্লাসগ্গাহৰসেন পৰত্ততি.

অপিচ দুক্খেতি এত্তাৰতা সঙ্গহতো ৰত্থুতো আরম্মণতো কিচ্চতো চ অৰিজ্জা দীপিতা. দুক্খসমুদযেতি এত্তাৰতা ৰত্থুতো আরম্মণতো কিচ্চতো চ. দুক্খনিরোধে দুক্খনিরোধগামিনিযা পটিপদাযাতি এত্তাৰতা কিচ্চতো. অৰিসেসতো পন অঞ্ঞাণন্তি এতেন সভাৰতো নিদ্দিট্ঠাতি ঞাতব্বা. আসৰসমুদযাতি এত্থ পন কামাসৰভৰাসৰা সহজাতাদিৰসেন অৰিজ্জায পচ্চযা হোন্তি. অৰিজ্জাসৰো উপনিস্সযৰসেনেৰ. পুব্বুপ্পন্না চেত্থ অৰিজ্জা অৰিজ্জাসৰোতি ৰেদিতব্বা. সা অপরাপরুপ্পন্নায অৰিজ্জায উপনিস্সযপচ্চযো হোতি. সেসং ৰুত্তনযমেৰাতি.

অৰিজ্জাৰারৰণ্ণনা নিট্ঠিতা.