সঙ্খারৰারৰণ্ণনা
১০২. সঙ্খারৰারে অভিসঙ্খরণলক্খণো সঙ্খারো. ৰিত্থারৰারে পনস্স কাযসঙ্খারোতি কাযতো পৰত্তসঙ্খারো, কাযদ্ৰারে চোপনৰসেন পৰত্তানং কামাৰচরকুসলতো অট্ঠন্নং, অকুসলতো দ্ৰাদসন্নন্তি ৰীসতিযা কাযসঞ্চেতনানমেতং অধিৰচনং. ৰচীসঙ্খারোতি ৰচিতো পৰত্তসঙ্খারো, ৰচীদ্ৰারে ৰচনভেদৰসেন পৰত্তানং ৰীসতিযা এৰ ৰচীসঞ্চেতনানমেতং অধিৰচনং. চিত্তসঙ্খারোতি চিত্ততো পৰত্তসঙ্খারো, কাযৰচীদ্ৰারে চোপনং অকত্ৰা রহো নিসীদিত্ৰা চিন্তযন্তস্স পৰত্তানং লোকিযকুসলাকুসলৰসেন একূনতিংসমনোসঞ্চেতনানমেতং অধিৰচনং. অৰিজ্জাসমুদযাতি এত্থ পন কুসলানং উপনিস্সযৰসেন অকুসলানং সহজাতাদিৰসেনাপি অৰিজ্জাপচ্চযো হোতীতি ৰেদিতব্বা. সেসং ৰুত্তনযমেৰাতি.
সঙ্খারৰারৰণ্ণনা নিট্ঠিতা.