৬. খুজ্জসোভিতত্থেরগাথাৰণ্ণনা

যে চিত্তকথী বহুস্সুতাতি আযস্মতো খুজ্জসোভিতত্থেরস্স গাথা. কা উপ্পত্তি? অযং কির পদুমুত্তরস্স ভগৰতো কালে কুলগেহে নিব্বত্তিত্ৰা ৰিঞ্ঞুতং পত্তো একদিৰসং ভগৰন্তং মহতা ভিক্খুসঙ্ঘেন সদ্ধিং গচ্ছন্তং দিস্ৰা পসন্নমানসো দসহি গাথাহি অভিত্থৰি. সো তেন পুঞ্ঞকম্মেন দেৰমনুস্সেসু সংসরন্তো ইমস্মিং বুদ্ধুপ্পাদে পাটলিপুত্তনগরে ব্রাহ্মণকুলে নিব্বত্তি, ‘‘সোভিতো’’তিস্স নামং অহোসি. থোকং খুজ্জধাতুকতায পন খুজ্জসোভিতোত্ৰেৰ পঞ্ঞাযিত্থ. সো ৰযপ্পত্তো সত্থরি পরিনিব্বুতে আনন্দত্থেরস্স সন্তিকে পব্বজিত্ৰা ছল়ভিঞ্ঞো অহোসি. তেন ৰুত্তং অপদানে (অপ. থের ২.৪৭.৪৯-৫৮) –

‘‘ককুধং ৰিলসন্তংৰ, দেৰদেৰং নরাসভং;

রথিযং পটিপজ্জন্তং, কো দিস্ৰা ন পসীদতি.

‘‘তমন্ধকারং নাসেত্ৰা, সন্তারেত্ৰা বহুং জনং;

ঞাণালোকেন জোতন্তং, কো দিস্ৰা ন পসীদতি.

‘‘ৰসীসতসহস্সেহি, নীযন্তং লোকনাযকং;

উদ্ধরন্তং বহূ সত্তে, কো দিস্ৰা ন পসীদতি.

‘‘আহনন্তং ধম্মভেরিং, মদ্দন্তং তিত্থিযে গণে;

সীহনাদং ৰিনদন্তং, কো দিস্ৰা ন পসীদতি.

‘‘যাৰতা ব্রহ্মলোকতো, আগন্ত্ৰান সব্রহ্মকা;

পুচ্ছন্তি নিপুণে পঞ্হে, কো দিস্ৰা ন পসীদতি.

‘‘যস্সঞ্জলিং করিত্ৰান, আযাচন্তি সদেৰকা;

তেন পুঞ্ঞং অনুভোন্তি, কো দিস্ৰা ন পসীদতি.

‘‘সব্বে জনা সমাগন্ত্ৰা, সম্পৰারেন্তি চক্খুমং;

ন ৰিকম্পতি অজ্ঝিট্ঠো, কো দিস্ৰা ন পসীদতি.

‘‘নগরং পৰিসতো যস্স, রৰন্তি ভেরিযো বহূ;

ৰিনদন্তি গজা মত্তা, কো দিস্ৰা ন পসীদতি.

‘‘ৰীথিযা গচ্ছতো যস্স, সব্বাভা জোততে সদা;

অব্ভুন্নতা সমা হোন্তি, কো দিস্ৰা ন পসীদতি.

‘‘ব্যাহরন্তস্স বুদ্ধস্স, চক্কৰাল়ম্পি সুয্যতি;

সব্বে সত্তে ৰিঞ্ঞাপেতি, কো দিস্ৰা ন পসীদতি.

‘‘সতসহস্সিতো কপ্পে, যং বুদ্ধমভিকিত্তযিং;

দুগ্গতিং নাভিজানামি, কিত্তনায ইদং ফলং.

‘‘কিলেসা ঝাপিতা ময্হং…পে… কতং বুদ্ধস্স সাসন’’ন্তি.

ছল়ভিঞ্ঞো পন হুত্ৰা পঠমমহাসঙ্গীতিকালে রাজগহে সত্তপণ্ণিগুহাযং সন্নিপতিতেন সঙ্ঘেন ‘‘আযস্মন্তং আনন্দং আমন্তেহী’’তি আণত্তো পথৰিযং নিমুজ্জিত্ৰা থেরস্স পুরতো উট্ঠহিত্ৰা সঙ্ঘস্স সাসনং আরোচেত্ৰা সযং পুরেতরং আকাসেন গন্ত্ৰা সত্তপণ্ণিগুহাদ্ৰারং সম্পাপুণি. তেন চ সমযেন মারস্স মারকাযিকানঞ্চ পটিসেধনত্থং দেৰসঙ্ঘেন পেসিতা অঞ্ঞতরা দেৰতা সত্তপণ্ণিগুহাদ্ৰারে ঠিতা হোতি, তস্সা খুজ্জসোভিতো থেরো অত্তনো আগমনং কথেন্তো –

২৩৪. ‘‘যে চিত্তকথী বহুস্সুতা, সমণা পাটলিপুত্তৰাসিনো;

তেসঞ্ঞতরোযমাযুৰা, দ্ৰারে তিট্ঠতি খুজ্জসোভিতো’’তি. – পঠমং গাথমাহ;

তত্থ চিত্তকথীতি ৰিচিত্তধম্মকথিকা, সঙ্খিপনং, ৰিত্থারণং গম্ভীরকরণং উত্তানীকরণং কঙ্খাৰিনোদনং ধম্মপতিট্ঠাপনন্তি এৰমাদীহি নানানযেহি পরেসং অজ্ঝাসযানুরূপং ধম্মস্স কথনসীলাতি অত্থো. বহুস্সুতাতি পরিযত্তিপটিৰেধবাহুসচ্চপারিপূরিযা বহুস্সুতা. সব্বসো সমিতপাপতায সমণা. পাটলিপুত্তৰাসিনো, তেসঞ্ঞতরোতি পাটলিপুত্তনগরৰাসিতায পাটলিপুত্তৰাসিনো, তেসং অঞ্ঞতরো, অযং আযুৰা দীঘাযু আযস্মা. দ্ৰারে তিট্ঠতীতি সত্তপণ্ণিগুহায দ্ৰারে তিট্ঠতি, সঙ্ঘস্স অনুমতিযা পৰিসিতুন্তি অত্থো. তং সুত্ৰা সা দেৰতা থেরস্স আগমনং সঙ্ঘস্স নিৰেদেন্তী –

২৩৫. ‘‘যে চিত্তকথী…পে… দ্ৰারে তিট্ঠতি মালুতেরিতো’’তি. – দুতিযং গাথমাহ;

তত্থ মালুতেরিতোতি ইদ্ধিচিত্তজনিতেন ৰাযুনা এরিতো, ইদ্ধিবলেন আগতোতি অত্থো.

এৰং তায দেৰতায নিৰেদিতেন সঙ্ঘেন কতোকাসো থেরো সঙ্ঘস্স সন্তিকং গচ্ছন্তো –

২৩৬. ‘‘সুযুদ্ধেন সুযিট্ঠেন, সঙ্গামৰিজযেন চ;

ব্রহ্মচরিযানুচিণ্ণেন, এৰাযং সুখমেধতী’’তি. –

ইমায ততিযগাথায অঞ্ঞং ব্যাকাসি.

তত্থ সুযুদ্ধেনাতি পুব্বভাগে তদঙ্গৰিক্খম্ভনপ্পহানৰসেন কিলেসেহি সুট্ঠু যুজ্ঝনেন. সুযিট্ঠেনাতি অন্তরন্তরা কল্যাণমিত্তেহি দিন্নসপ্পাযধম্মদানেন. সঙ্গামৰিজযেন চাতি সমুচ্ছেদপ্পহানৰসেন সব্বসো কিলেসাভিসঙ্খারনিম্মথনেন লদ্ধসঙ্গামৰিজযেন চ. ব্রহ্মচরিযানুচিণ্ণেনাতি অনুচিণ্ণেন অগ্গমগ্গব্রহ্মচরিযেন. এৰাযং সুখমেধতীতি এৰং ৰুত্তপ্পকারেন অযং খুজ্জসোভিতো নিব্বানসুখং ফলসমাপত্তিসুখঞ্চ এধতি, অনুভৰতীতি অত্থো.

খুজ্জসোভিতত্থেরগাথাৰণ্ণনা নিট্ঠিতা.