৩. তিকনিপাতো

১. অঙ্গণিকভারদ্ৰাজত্থেরগাথাৰণ্ণনা

তিকনিপাতে অযোনি সুদ্ধিমন্ৰেসন্তি আযস্মতো অঙ্গণিকভারদ্ৰাজত্থেরস্স গাথা. কা উপ্পত্তি? অযম্পি পুরিমবুদ্ধেসু কতাধিকারো তত্থ তত্থ ভৰে ৰিৰট্টূপনিস্সযং পুঞ্ঞং উপচিনন্তো ইতো একতিংসে কপ্পে সিখিস্স ভগৰতো কালে কুলগেহে নিব্বত্তিত্ৰা ৰিঞ্ঞুতং পত্তো একদিৰসং সত্থারং পিণ্ডায চরন্তং দিস্ৰা পসন্নমানসো পঞ্চপতিট্ঠিতেন ৰন্দিত্ৰা অঞ্জলিং পগ্গণ্হি. সো তেন পুঞ্ঞকম্মেন দেৰমনুস্সেসু সংসরন্তো ইমস্মিং বুদ্ধুপ্পাদে হিমৰন্তসমীপে উক্কট্ঠে নাম নগরে ৰিভৰসম্পন্নস্স ব্রাহ্মণস্স গেহে নিব্বত্তিত্ৰা অঙ্গণিকভারদ্ৰাজোতি লদ্ধনামো ৰযপ্পত্তো ৰিজ্জাসিপ্পেসু নিপ্ফত্তিং গতো নেক্খম্মজ্ঝাসযতায পরিব্বাজকপব্বজ্জং পব্বজিত্ৰা অমরং তপং চরন্তো তত্থ তত্থ ৰিচরন্তো সম্মাসম্বুদ্ধং জনপদচারিকং চরন্তং দিস্ৰা পসন্নমানসো সত্থু সন্তিকে ধম্মং সুত্ৰা তং মিচ্ছাতপং পহায সাসনে পব্বজিত্ৰা ৰিপস্সনায কম্মং করোন্তো নচিরস্সেৰ ছল়ভিঞ্ঞো অহোসি. তেন ৰুত্তং অপদানে (অপ. থের ১.২৩.৪৮-৫১) –

‘‘উসভং পৰরং ৰীরং, ৰেস্সভুং ৰিজিতাৰিনং;

পসন্নচিত্তো সুমনো, বুদ্ধসেট্ঠমৰন্দহং.

‘‘একতিংসে ইতো কপ্পে, যং কম্মমকরিং তদা;

দুগ্গতিং নাভিজানামি, ৰন্দনায ইদং ফলং.

‘‘চতুৰীসতিকপ্পম্হি, ৰিকতানন্দনামকো;

সত্তরতনসম্পন্নো, চক্কৰত্তী মহব্বলো.

‘‘কিলেসা ঝাপিতা ময্হং…পে… কতং বুদ্ধস্স সাসন’’ন্তি.

ছল়ভিঞ্ঞো পন হুত্ৰা ৰিমুত্তিসুখেন ৰিহরন্তো ঞাতীনং অনুকম্পায অত্তনো জাতিভূমিং গন্ত্ৰা বহূ ঞাতকে সরণেসু চ সীলেসু চ পতিট্ঠাপেত্ৰা ততো নিৰত্তিত্ৰা কুরুরট্ঠে কুণ্ডিযস্স নাম নিগমস্স অৰিদূরে অরঞ্ঞে ৰসন্তো কেনচিদেৰ করণীযেন উগ্গারামং গতো উত্তরাপথতো আগতেহি সন্দিট্ঠেহি ব্রাহ্মণেহি সমাগতো তেহি, ‘‘ভো ভারদ্ৰাজ, কিং দিস্ৰা ব্রাহ্মণানং সমযং পহায ইমং সমযং গণ্হী’’তি পুচ্ছিতো তেসং ইতো বুদ্ধসাসনতো বহিদ্ধা সুদ্ধি নত্থীতি দস্সেন্তো –

২১৯. ‘‘অযোনি সুদ্ধিমন্ৰেসং, অগ্গিং পরিচরিং ৰনে;

সুদ্ধিমগ্গং অজানন্তো, অকাসিং অমরং তপ’’ন্তি. – পঠমং গাথমাহ;

তত্থ অযোনীতি অযোনিসো অনুপাযেন. সুদ্ধিন্তি সংসারসুদ্ধিং ভৰনিস্সরণং. অন্ৰেসন্তি গৰেসন্তো. অগ্গিং পরিচরিং ৰনেতি ‘‘অযং সুদ্ধিমগ্গো’’তি অধিপ্পাযেন অরঞ্ঞাযতনে অগ্গিহুতসালাযং অগ্যাগারং কত্ৰা আহুতিং পগ্গণ্হন্তো অগ্গিদেৰং পরিচরিং ৰেদে ৰুত্তৰিধিনা পূজেসিং. সুদ্ধিমগ্গং অজানন্তো, অকাসিং অমরং তপন্তি সুদ্ধিযা নিব্বানস্স মগ্গং অজানন্তো অগ্গিপরিচরণং ৰিয পঞ্চতপতপ্পনাদিঅত্তকিলমথানুযোগং ‘‘সুদ্ধিমগ্গো’’তি মঞ্ঞায অকাসিং অচরিং পটিপজ্জিং.

এৰং থেরো অস্সমতো অস্সমং গচ্ছন্তো ৰিয ৰেদে ৰুত্তৰিধিনা অগ্গিপরিচরণাদিনা অনুট্ঠায সুদ্ধিযা অপ্পত্তভাৰেন বহিদ্ধা সুদ্ধিযা অভাৰং দস্সেত্ৰা ইদানি ইমস্মিংযেৰ সাসনে সুদ্ধি চ মযা অধিগতাতি দস্সেন্তো –

২২০. ‘‘তং সুখেন সুখং লদ্ধং, পস্স ধম্মসুধম্মতং;

তিস্সো ৰিজ্জা অনুপ্পত্তা, কতং বুদ্ধস্স সাসন’’ন্তি. – দুতিযগাথমাহ;

তত্থ তন্তি যস্সত্থায সুদ্ধিং অন্ৰেসন্তো তস্স মগ্গং অজানন্তো অগ্গিং পরিচরিং অমরং তপং অচরিং, তং নিব্বানসুখং সুখেন সমথৰিপস্সনায সুখায পটিপদায অত্তকিলমথানুযোগং অনুপগম্ম মযা লদ্ধং পত্তং অধিগতং. পস্স ধম্মসুধম্মতন্তি সত্থু সাসনধম্মস্স সুধম্মতং অৰিপরীতনিয্যানিকধম্মসভাৰং পস্স জানাহীতি ধম্মালপনৰসেন ৰদতি, অত্তানং ৰা আলপতি. তস্স লদ্ধভাৰং পন দস্সেন্তো –

‘‘তিস্সো ৰিজ্জা অনুপ্পত্তা, কতং বুদ্ধস্স সাসন’’ন্তি. –

আহ, তং ৰুত্তত্থমেৰ. এৰং সুদ্ধিযা অধিগতত্তা ‘‘ইতো পট্ঠাযাহং পরমত্থতো ব্রাহ্মণো’’তি দস্সেন্তো –

২২১. ‘‘ব্রহ্মবন্ধু পুরে আসিং, ইদানি খোম্হি ব্রাহ্মণো;

তেৰিজ্জো ন্হাতকোচম্হি, সোত্তিযো চম্হি ৰেদগূ’’তি. – ততিযং গাথমাহ;

তস্সত্থো – ইতো পুব্বে জাতিমত্তেন ব্রাহ্মণভাৰতো ব্রাহ্মণানং সমঞ্ঞায ব্রহ্মবন্ধু নাম আসিং. বাহিতপাপত্তা পন ইদানি খো অরহত্তাধিগমেন পরমত্থতো ব্রাহ্মণো চ অম্হি. ইতো পুব্বে ভৰসঞ্চযকরানং তিস্সন্নং ৰেদসঙ্খাতানং ৰিজ্জানং অজ্ঝযনেন সমঞ্ঞামত্তেন তেৰিজ্জো নাম হুত্ৰা ইদানি ভৰক্খযকরায ৰিজ্জায ৰসেন তিস্সন্নং ৰিজ্জানং অধিগতত্তা পরমত্থতো তেৰিজ্জো চ অম্হি. তথা ইতো পুব্বে ভৰস্সাদগধিতায ন্হাতকৰতনিপ্ফত্তিযা সমঞ্ঞামত্তেন ন্হাতকো নাম হুত্ৰা ইদানি অট্ঠঙ্গিকমগ্গজলেন সুৰিক্খালিতকিলেসমলতায পরমত্থতো ন্হাতকো চম্হি. ইতো পুব্বে অৰিমুত্তভৰস্সাদমন্তজ্ঝানেন ৰোহারমত্ততো সোত্তিযো নাম হুত্ৰা ইদানি সুৰিমুত্তভৰস্সাদধম্মজ্ঝানেন পরমত্থতো সোত্তিযো চম্হি. ইতো পুব্বে অপ্পটিনিস্সট্ঠপাপধম্মানং ৰেদানং গতমত্তেন ৰেদগূ নাম হুত্ৰা ইদানি ৰেদসঙ্খাতেন মগ্গঞাণেন সংসারমহোঘস্স ৰেদস্স চতুসচ্চস্স চ পারং গতত্তা অধিগতত্তা ঞাতত্তা পরমত্থতো ৰেদগূ জাতোতি. তং সুত্ৰা ব্রাহ্মণা সাসনে উল়ারং পসাদং পৰেদেসুং.

অঙ্গণিকভারদ্ৰাজত্থেরগাথাৰণ্ণনা নিট্ঠিতা.

২. পচ্চযত্থেরগাথাৰণ্ণনা

পঞ্চাহাহং পব্বজিতোতি আযস্মতো পচ্চযত্থেরস্স গাথা. কা উপ্পত্তি? অযম্পি পুরিমবুদ্ধেসু কতাধিকারো তত্থ তত্থ ভৰে পুঞ্ঞানি উপচিনন্তো ইতো একনৰুতে কপ্পে ৰিপস্সিস্স ভগৰতো কালে কুলগেহে নিব্বত্তিত্ৰা ৰিঞ্ঞুতং পত্তো একদিৰসং সত্থারং ৰিনতায নাম নদিযা তীরে গচ্ছন্তং দিস্ৰা পসন্নমানসো মনুঞ্ঞদস্সনানি মহন্তানি উদুম্বরফলানি ওচিনিত্ৰা উপনামেসি. সো তেন পুঞ্ঞকম্মেন সুগতীসুযেৰ সংসরন্তো ইমস্মিং ভদ্দকপ্পে কস্সপে ভগৰতি লোকে উপ্পজ্জিত্ৰা পৰত্তৰরধম্মচক্কে ৰেনেয্যজনানুগ্গহং করোন্তে তস্স সাসনে পব্বজিত্ৰা ৰিপস্সনং পট্ঠপেত্ৰা ভাৰনমনুযুঞ্জন্তো একদিৰসং সংসারদুক্খং চিন্তেত্ৰা

অতিৰিয সঞ্জাতসংৰেগো ৰিহারে নিসিন্নো ‘‘অরহত্তং অপ্পত্ৰা ইতো ন নিক্খমিস্সামী’’তি চিত্তং অধিট্ঠায ৰাযমন্তো ঞাণস্স অপরিপক্কত্তা ৰিপস্সনং উস্সুক্কাপেতুং নাসক্খি. সো কালঙ্কত্ৰা দেৰমনুস্সেসু সংসরন্তো ইমস্মিং বুদ্ধুপ্পাদে রোহিতনগরে খত্তিযকুলে নিব্বত্তিত্ৰা পচ্চযোতি লদ্ধনামো ৰযপ্পত্তো পিতু অচ্চযেন রজ্জে পতিট্ঠিতো একদিৰসং মহারাজবলিং কাতুং আরভি. তত্থ মহাজনো সন্নিপতি. তস্মিং সমাগমে তস্স পসাদঞ্জননত্থং সত্থা মহাজনস্স পেক্খন্তস্সেৰ আকাসে ৰেস্সৰণেন নিম্মিতে রতনমযকূটাগারে রতনমযসীহাসনে নিসীদিত্ৰা ধম্মং দেসেসি. মহতো জনকাযস্স ধম্মাভিসমযো অহোসি. তং ধম্মং সুত্ৰা পচ্চযরাজাপি রজ্জং পহায পুরিমহেতুসঞ্চোদিতো পব্বজি. সো যথা কস্সপস্স ভগৰতো কালে পটিঞ্ঞং অকাসি, এৰং পটিঞ্ঞং কত্ৰা ৰিহারং পৰিসিত্ৰা ৰিপস্সনং ৰড্ঢেন্তো ঞাণস্স পরিপাকং গতত্তা তাৰদেৰ অরহত্তং পাপুণি. তেন ৰুত্তং অপদানে (অপ. থের ১.৩৯.১৫-২০) –

‘‘ৰিনতানদিযা তীরে, ৰিহাসি পুরিসুত্তমো;

অদ্দসং ৰিরজং বুদ্ধং, একগ্গং সুসমাহিতং.

‘‘তস্মিং পসন্নমানসো, কিলেসমলধোৰনে;

উদুম্বরফলং গয্হ, বুদ্ধসেট্ঠস্সদাসহং.

‘‘একনৰুতিতো কপ্পে, যং ফলমদদিং তদা;

দুগ্গতিং নাভিজানামি, ফলদানস্সিদং ফলং.

‘‘ইমম্হি ভদ্দকে কপ্পে, সংৰিগ্গমানমানসো;

কস্সপস্স ভগৰতো, সাসনে পব্বজিং অহং.

‘‘তথা পব্বজিতো সন্তো, ভাৰনং অনুযুঞ্জিসং;

ন ৰিহারা নিক্খমিস্সং, ইতি কত্ৰান মানসং.

‘‘উত্তমত্থং অসম্পত্তো, ন চ পত্তোম্হি তাৰদে;

ইদানি পন ঞাণস্স, পরিপাকেন নিব্বুতো;

পত্তোম্হি অচলং ঠানং, ফুসিত্ৰা অচ্চুতং পদং.

‘‘কিলেসা ঝাপিতা ময্হং…পে… কতং বুদ্ধস্স সাসন’’ন্তি.

অরহত্তং পন পত্ৰা অত্তনো পটিপত্তিকিত্তনমুখেন অঞ্ঞং ব্যাকরোন্তো –

২২২. ‘‘পঞ্চাহাহং পব্বজিতো, সেখো অপ্পত্তমানসো;

ৰিহারং মে পৰিট্ঠস্স, চেতসো পণিধী অহু.

২২৩. ‘‘নাসিস্সং ন পিৰিস্সামি, ৰিহারতো ন নিক্খমে;

নপি পস্সং নিপাতেস্সং, তণ্হাসল্লে অনূহতে.

২২৪. ‘‘তস্স মেৰং ৰিহরতো, পস্স ৰীরিযপরক্কমং;

তিস্সো ৰিজ্জা অনুপ্পত্তা, কতং বুদ্ধস্স সাসন’’ন্তি. –

ইমা তিস্সো গাথা অভাসি.

তত্থ পঞ্চাহাহং পব্বজিতোতি পঞ্চাহো অহং, পব্বজিতো হুত্ৰা পঞ্চাহো, পব্বজিতদিৰসতো পঞ্চমো অহো নিট্ঠিতোতি অত্থো. সেখো অপ্পত্তমানসোতি অধিসীলসিক্খাদীনং সিক্খনতো সেখো. অনৰসেসতো মানং সিযতি সমুচ্ছিন্দতীতি মানসো, অগ্গমগ্গো, তংনিব্বত্তিতো মানসতো আগতং মানসং, অরহত্তং, তং, সো ৰা অপ্পত্তো এতেনাতি অপ্পত্তমানসো. ৰিহারং মে পৰিট্ঠস্স, চেতসো পণিধী অহূতি এৰং সেখস্স মে ৰসনকৰিহারং ওৰরকং পৰিট্ঠস্স সতো এৰরূপো ইদানি ৰুচ্চমানাকারো চেতোপণিধি অহোসি, এৰং মযা চিত্তং পণিহিতন্তি অত্থো.

নাসিস্সন্তিআদিনা চিত্তপণিধিং দস্সেতি. তত্থ নাসিস্সন্তি যংকিঞ্চি ভোজনং ন ভুঞ্জিস্সং ন ভুঞ্জিস্সামি তণ্হাসল্লে মম হদযগতে অনূহতে অনুদ্ধতেতি এৰং সব্বপদেসু যোজেতব্বং. ন পিৰিস্সামীতি যংকিঞ্চি পাতব্বং ন পিৰিস্সামি. ৰিহারতো ন নিক্খমেতি ইমস্মা ইদানি মযা নিসিন্নগব্ভতো ন নিক্খমেয্যং. নপি পস্সং নিপাতেস্সন্তি মম সরীরস্স দ্ৰীসু পস্সেসু একম্পি পস্সং কাযকিলমথৰিনোদনত্থং ন নিপাতেস্সং, একপস্সেনপি ন নিপজ্জিস্সামীতি অত্থো.

তস্স মেৰং ৰিহরতোতি তস্স মে এৰং চিত্তং পণিধায দল়্হৰীরিযাধিট্ঠানং কত্ৰা ৰিপস্সনানুযোগৰসেন ৰিহরতো. পস্স ৰীরিযপরক্কমন্তি ৰিধিনা ঈরযিতব্বতো ‘‘ৰীরিযং’’ পরং ঠানং অক্কমনতো ‘‘পরক্কমো’’তি চ লদ্ধনামং উস্সোল়্হীভূতং ৰাযামং পস্স জানাহি. যস্স পনানুভাৰেন মযা তিস্সো ৰিজ্জা অনুপ্পত্তা, কতং বুদ্ধস্স সাসনন্তি ৰুত্তত্থমেৰ.

পচ্চযত্থেরগাথাৰণ্ণনা নিট্ঠিতা.

৩. বাকুলত্থেরগাথাৰণ্ণনা

যো পুব্বে করণীযানীতি আযস্মতো বাকুলত্থেরস্স গাথা. কা উপ্পত্তি? অযম্পি কির অতীতে ইতো কপ্পসতসহস্সাধিকস্স অসঙ্খ্যেয্যস্স মত্থকে অনোমদস্সিস্স ভগৰতো উপ্পত্তিতো পুরেতরমেৰ ব্রাহ্মণকুলে নিব্বত্তিত্ৰা ৰযপ্পত্তো তযো ৰেদে উগ্গহেত্ৰা তত্থ সারং অপস্সন্তো ‘‘সম্পরাযিকত্থং গৰেসিস্সামী’’তি ইসিপব্বজ্জং পব্বজিত্ৰা পব্বতপাদে ৰিহরন্তো পঞ্চাভিঞ্ঞাঅট্ঠসমাপত্তিলাভী হুত্ৰা ৰিহরন্তো বুদ্ধুপ্পাদং সুত্ৰা সত্থু সন্তিকং গন্ত্ৰা ধম্মং সুত্ৰা সরণেসু পতিট্ঠিতো সত্থু উদরাবাধে উপ্পন্নে অরঞ্ঞতো ভেসজ্জানি আহরিত্ৰা তং ৰূপসমেত্ৰা তত্থ পুঞ্ঞং আরোগ্যত্থায পরিণামেত্ৰা ততো চুতো ব্রহ্মলোকে নিব্বত্তিত্ৰা একং অসঙ্খ্যেয্যং দেৰমনুস্সেসু সংসরন্তো পদুমুত্তরবুদ্ধকালে হংসৰতীনগরে কুলগেহে নিব্বত্তো সত্থারং একং ভিক্খুং অপ্পাবাধানং অগ্গট্ঠানে ঠপেন্তং দিস্ৰা সযং তং ঠানন্তরং আকঙ্খন্তো পণিধানং কত্ৰা যাৰজীৰং কুসলং উপচিনিত্ৰা সুগতীসুযেৰ সংসরন্তো ৰিপস্সিস্স ভগৰতো নিব্বত্তিতো পুরেতরমেৰ বন্ধুমতীনগরে ব্রাহ্মণকুলে নিব্বত্তো পুরিমনযেনেৰ ইসিপব্বজ্জং পব্বজিত্ৰা ঝানাভিঞ্ঞালাভী হুত্ৰা পব্বতপাদে ৰসন্তো বুদ্ধুপ্পাদং সুত্ৰা সত্থু সন্তিকং গন্ত্ৰা ধম্মং সুত্ৰা সরণেসু পতিট্ঠিতো ভিক্খূনং তিণপুপ্ফকরোগে উপ্পন্নে তং ৰূপসমেত্ৰা তত্থ যাৰতাযুকং ঠত্ৰা ততো চুতো ব্রহ্মলোকে নিব্বত্তিত্ৰা একনৰুতিকপ্পে দেৰমনুস্সেসু সংসরন্তো কস্সপস্স ভগৰতো কালে বারাণসিযং কুলগেহে নিব্বত্তিত্ৰা ঘরাৰাসং ৰসন্তো একং জিণ্ণং ৰিনস্সমানং মহাৰিহারং দিস্ৰা তত্থ উপোসথাগারাদিকং সব্বং আৰসথং কারেত্ৰা তত্থ ভিক্খুসঙ্ঘস্স সব্বং ভেসজ্জং পটিযাদেত্ৰা যাৰজীৰং কুসলং কত্ৰা একং বুদ্ধন্তরং দেৰমনুস্সেসু সংসরন্তো অম্হাকং ভগৰতো উপ্পত্তিতো পুরেতরমেৰ কোসম্বিযং সেট্ঠিগেহে নিব্বত্তি. সো অরোগভাৰায মহাযমুনায ন্হাপিযমানো ধাতিযা হত্থতো মচ্ছেন গিলিতো মচ্ছে কেৰট্টহত্থগতে বারাণসিসেট্ঠিভরিযায ৰিক্কিণিত্ৰা গহিতে ফালিযমানেপি পুঞ্ঞবলেন অরোগোযেৰ হুত্ৰা তায পুত্তোতি গহেত্ৰা পোসিযমানো তং পৰত্তিং সুত্ৰা জনকেহি মাতাপিতূহি ‘‘অযং অম্হাকং পুত্তো, দেথ নো পুত্ত’’ন্তি অনুযোগে কতে রঞ্ঞা ‘‘উভযেসম্পি সাধারণো হোতূ’’তি দ্ৰিন্নং কুলানং দাযাদভাৰেন ৰিনিচ্ছযং কত্ৰা ঠপিতত্তা বাকুলোতি লদ্ধনামো ৰযপ্পত্তো হুত্ৰা মহতিং সম্পত্তিং অনুভৰন্তো আসীতিকো হুত্ৰা সত্থু সন্তিকে ধম্মং সুত্ৰা পটিলদ্ধসদ্ধো পব্বজিত্ৰা সত্তাহমেৰ পুথুজ্জনো অহোসি, অট্ঠমে অরুণে সহ পটিসম্ভিদাহি অরহত্তং পাপুণি. তেন ৰুত্তং অপদানে (অপ. থের ১.৪০.৩৮৬-৪১১) –

‘‘হিমৰন্তস্সাৰিদূরে, সোভিতো নাম পব্বতো;

অস্সমো সুকতো ময্হং, সকসিস্সেহি মাপিতো.

‘‘মণ্ডপা চ বহূ তত্থ, পুপ্ফিতা সিন্ধুৰারকা;

কপিত্থা চ বহূ তত্থ, পুপ্ফিতা জীৰজীৰকা.

‘‘নিগ্গুণ্ডিযো বহূ তত্থ, বদরামলকানি চ;

ফারুসকা অলাবূ চ, পুণ্ডরীকা চ পুপ্ফিতা.

‘‘আল়কা বেলুৰা তত্থ, কদলী মাতুলুঙ্গকা;

মহানামা বহূ তত্থ, অজ্জুনা চ পিযঙ্গুকা.

‘‘কোসম্বা সল়লা নিম্বা, নিগ্রোধা চ কপিত্থনা;

এদিসো অস্সমো ময্হং, সসিস্সোহং তহিং ৰসিং.

‘‘অনোমদস্সী ভগৰা, সযম্ভূ লোকনাযকো;

গৰেসং পটিসল্লানং, মমস্সমমুপাগমি.

‘‘উপেতম্হি মহাৰীরে, অনোমদস্সিমহাযসে;

খণেন লোকনাথস্স, ৰাতাবাধো সমুট্ঠহি.

‘‘ৰিচরন্তো অরঞ্ঞম্হি, অদ্দসং লোকনাযকং;

উপগন্ত্ৰান সম্বুদ্ধং, চক্খুমন্তং মহাযসং.

‘‘ইরিযঞ্চাপি দিস্ৰান, উপলক্খেসহং তদা;

অসংসযঞ্হি বুদ্ধস্স, ব্যাধি নো উদপজ্জথ.

‘‘খিপ্পং অস্সমমাগঞ্ছিং, মম সিস্সান সন্তিকে;

ভেসজ্জং কত্তুকামোহং, সিস্সে আমন্তযিং তদা.

‘‘পটিস্সুণিত্ৰান মে ৰাক্যং, সিস্সা সব্বে সগারৰা;

একজ্ঝং সন্নিপতিংসু, সত্থুগারৰতা মম.

‘‘খিপ্পং পব্বতমারুয্হ, সব্বোসধমহাসহং;

পানীযযোগং কত্ৰান, বুদ্ধসেট্ঠস্সদাসহং.

‘‘পরিভুত্তে মহাৰীরে, সব্বঞ্ঞুলোকনাযকে;

খিপ্পং ৰাতো ৰূপসমি, সুগতস্স মহেসিনো.

‘‘পস্সদ্ধং দরথং দিস্ৰা, অনোমদস্সী মহাযসো;

সকাসনে নিসীদিত্ৰা, ইমা গাথা অভাসথ.

‘‘যো মে পাদাসি ভেসজ্জং, ব্যাধিঞ্চ সমযী মম;

তমহং কিত্তযিস্সামি, সুণাথ মম ভাসতো.

‘‘কপ্পসতসহস্সানি, দেৰলোকে রমিস্সতি;

ৰাদিতে তূরিযে তত্থ, মোদিস্সতি সদা অযং.

‘‘মনুস্সলোকমাগন্ত্ৰা, সুক্কমূলেন চোদিতো;

সহস্সক্খত্তুং রাজা চ, চক্কৰত্তী ভৰিস্সতি.

‘‘পঞ্চপঞ্ঞাসকপ্পম্হি, অনোমো নাম খত্তিযো;

চাতুরন্তো ৰিজিতাৰী, জম্বুমণ্ডস্স ইস্সরো.

‘‘সত্তরতনসম্পন্নো, চক্কৰত্তী মহব্বলো;

তাৰতিংসেপি খোভেত্ৰা, ইস্সরং কারযিস্সতি.

‘‘দেৰভূতো মনুস্সো ৰা, অপ্পাবাধো ভৰিস্সতি;

পরিগ্গহং ৰিৰজ্জেত্ৰা, ব্যাধিং লোকে তরিস্সতি.

‘‘অপরিমেয্যে ইতো কপ্পে, ওক্কাককুলসম্ভৰো;

গোতমো নাম গোত্তেন, সত্থা লোকে ভৰিস্সতি.

‘‘তস্স ধম্মেসু দাযাদো, ওরসো ধম্মনিম্মিতো;

সব্বাসৰে পরিঞ্ঞায, নিব্বাযিস্সতিনাসৰো.

‘‘কিলেসে ঝাপযিত্ৰান, তণ্হাসোতং তরিস্সতি;

বাকুলো নাম নামেন, হেস্সতি সত্থু সাৰকো.

‘‘ইদং সব্বং অভিঞ্ঞায, গোতমো সক্যপুঙ্গৰো;

ভিক্খুসঙ্ঘে নিসীদিত্ৰা, এতদগ্গে ঠপেস্সতি.

‘‘অনোমদস্সী ভগৰা, সযম্ভূ লোকনাযকো;

ৰিৰেকানুৰিলোকেন্তো, মমস্সমমুপাগমি.

‘‘উপাগতং মহাৰীরং, সব্বঞ্ঞুং লোকনাযকং;

সব্বোসধেন তপ্পেসিং, পসন্নো সেহি পাণিভি.

‘‘তস্স মে সুকতং কম্মং, সুখেত্তে বীজসম্পদা;

খেপেতুং নেৰ সক্কোমি, তদা হি সুকতং মম.

‘‘লাভা মম সুলদ্ধং মে, যোহং অদ্দক্খি নাযকং;

তেন কম্মাৰসেসেন, পত্তোম্হি অচলং পদং.

‘‘সব্বমেতং অভিঞ্ঞায, গোতমো সক্যপুঙ্গৰো;

ভিক্খুসঙ্ঘে নিসীদিত্ৰা, এতদগ্গে ঠপেসি মং.

‘‘অপরিমেয্যে ইতো কপ্পে, যং কম্মমকরিং তদা;

দুগ্গতিং নাভিজানামি, ভেসজ্জস্স ইদং ফলং.

‘‘কিলেসা ঝাপিতা ময্হং…পে… কতং বুদ্ধস্স সাসন’’ন্তি.

অরহত্তং পন পত্ৰা একদিৰসং সত্থারা অত্তনো সাৰকে পটিপাটিযা ঠানন্তরে ঠপেন্তেন অপ্পাবাধানং অগ্গট্ঠানে ঠপিতো সো পরিনিব্বানসমযে সঙ্ঘমজ্ঝে ভিক্খূনং ওৰাদমুখেন অঞ্ঞং ব্যাকরোন্তো –

২২৫. ‘‘যো পুব্বে করণীযানি, পচ্ছা সো কাতুমিচ্ছতি;

সুখা সো ধংসতে ঠানা, পচ্ছা চ মনুতপ্পতি.

২২৬. ‘‘যঞ্হি কযিরা তঞ্হি ৰদে, যং ন কযিরা ন তং ৰদে;

অকরোন্তং ভাসমানং, পরিজানন্তি পণ্ডিতা.

২২৭. ‘‘সুসুখং ৰত নিব্বানং, সম্মাসম্বুদ্ধদেসিতং;

অসোকং ৰিরজং খেমং, যত্থ দুক্খং নিরুজ্ঝতী’’তি. – গাথাত্তযমভাসি;

তত্থ যো পুব্বে করণীযানি, পচ্ছা সো কাতুমিচ্ছতীতি যো পুগ্গলো পুব্বে পুরেতরং জরারোগাদীহি অনভিভূতকালেযেৰ কাতব্বানি অত্তনো হিতসুখাৰহানি কম্মানি পমাদৰসেন অকত্ৰা পচ্ছা সো কাতব্বকালং অতিক্কমিত্ৰা কাতুং ইচ্ছতি. সোতি চ নিপাতমত্তং. তদা পন জরারোগাদীহি অভিভূতত্তা কাতুং ন সক্কোতি, অসক্কোন্তো চ সুখা সো ধংসতে ঠানা, পচ্ছা চ মনুতপ্পতীতি সো পুগ্গলো সুখা ঠানা সগ্গতো নিব্বানতো চ তদুপাযস্স অনুপ্পাদিতত্তা পরিহাযন্তো ‘‘অকতং মে কল্যাণ’’ন্তিআদিনা (ম. নি. ৩.২৪৮; নেত্তি. ১২০) পচ্ছা চ অনুতপ্পতি ৰিপ্পটিসারং আপজ্জতি. ম-কারো পদসন্ধিকরো. অহং পন করণীযং কত্ৰা এৰ তুম্হে এৰং ৰদামীতি দস্সেন্তো ‘‘যঞ্হি কযিরা’’তি দুতিযং গাথমাহ.

তত্থ পরিজানন্তীতি ‘‘এত্তকো অয’’ন্তি পরিচ্ছিজ্জ জানন্তি ন বহুং মঞ্ঞন্তীতি অত্থো. সম্মাপটিপত্তিৰসেন হি যথাৰাদী তথাকারী এৰ সোভতি, ন ততো অঞ্ঞথা. করণীযপরিযাযেন সাধারণতো ৰুত্তমত্থং ইদানি সরূপতো দস্সেতুং ‘‘সুসুখং ৰতা’’তিআদিনা ততিযং গাথমাহ. তস্সত্থো – সম্মা সামং সব্বধম্মানং বুদ্ধত্তা সম্মাসম্বুদ্ধেন ভগৰতা দেসিতং সব্বসো সোকহেতূনং অভাৰতো অসোকং ৰিগতরাগাদিরজত্তা ৰিরজং চতূহি যোগেহি অনুপদ্দুতত্তা খেমং নিব্বানং সুট্ঠু সুখং ৰত, কস্মা? যত্থ যস্মিং নিব্বানে সকলং ৰট্টদুক্খং নিরুজ্ঝতি অচ্চন্তমেৰ ৰূপসমতীতি.

বাকুলত্থেরগাথাৰণ্ণনা নিট্ঠিতা.

৪. ধনিযত্থেরগাথাৰণ্ণনা

সুখঞ্চে জীৰিতুং ইচ্ছেতি আযস্মতো ধনিযত্থেরস্স গাথা. কা উপ্পত্তি? অযম্পি পুরিমবুদ্ধেসু কতাধিকারো তত্থ তত্থ ভৰে পুঞ্ঞানি উপচিনন্তো সিখিস্স ভগৰতো কালে কুলগেহে নিব্বত্তিত্ৰা ৰিঞ্ঞুতং পত্তো একদিৰসং সত্থারং দিস্ৰা পসন্নমানসো নল়মালায পূজং অকাসি. সো তেন পুঞ্ঞকম্মেন দেৰমনুস্সেসু সংসরন্তো ইমস্মিং বুদ্ধুপ্পাদে রাজগহে কুম্ভকারকুলে নিব্বত্তিত্ৰা ধনিযোতি লদ্ধনামো ৰযপ্পত্তো কুম্ভকারকম্মেন জীৰতি. তেন চ সমযেন সত্থা ধনিযস্স কুম্ভকারস্স সালাযং নিসীদিত্ৰা পুক্কুসাতিস্স কুলপুত্তস্স ছধাতুৰিভঙ্গসুত্তং (ম. নি. ৩.৩৪২ আদযো) দেসেসি. সো তং সুত্ৰা কতকিচ্চো অহোসি. ধনিযো তস্স পরিনিব্বুতভাৰং সুত্ৰা ‘‘নিয্যানিকং ৰত বুদ্ধসাসনং, যত্থ একরত্তিপরিচযেনাপি ৰট্টদুক্খতো মুঞ্চিতুং সক্কা’’তি পটিলদ্ধসদ্ধো পব্বজিত্ৰা কুটিমণ্ডনানুযুত্তো ৰিহরন্তো কুটিকরণং পটিচ্চ ভগৰতা গরহিতো সঙ্ঘিকে সেনাসনে ৰসন্তো ৰিপস্সনং ৰড্ঢেত্ৰা অরহত্তং পাপুণি. তেন ৰুত্তং অপদানে (অপ. থের ২.৪৮.১-৭) –

‘‘সুৰণ্ণৰণ্ণং সম্বুদ্ধং, আহুতীনং পটিগ্গহং;

ৰিপিনগ্গেন গচ্ছন্তং, অদ্দসং লোকনাযকং.

‘‘নল়মালং গহেত্ৰান, নিক্খমন্তো চ তাৰদে;

তত্থদ্দসাসিং সম্বুদ্ধং, ওঘতিণ্ণমনাসৰং.

‘‘পসন্নচিত্তো সুমনো, নল়মালমপূজযিং;

দক্খিণেয্যং মহাৰীরং, সব্বলোকানুকম্পকং.

‘‘একতিংসে ইতো কপ্পে, যং মালমভিরোপযিং;

দুগ্গতিং নাভিজানামি, বুদ্ধপূজাযিদং ফলং.

‘‘কিলেসা ঝাপিতা ময্হং…পে… কতং বুদ্ধস্স সাসন’’ন্তি.

অরহত্তং পন পত্ৰা যে ভিক্খূ ধুতঙ্গসমাধানেন অত্তানং উক্কংসেত্ৰা সঙ্ঘভত্তাদিং সাদিযন্তে অঞ্ঞে ভিক্খূ অৰজানন্তি, তেসং ওৰাদদানমুখেন অঞ্ঞং ব্যাকরোন্তো –

২২৮. ‘‘সুখঞ্চে জীৰিতুং ইচ্ছে, সামঞ্ঞস্মিং অপেক্খৰা;

সঙ্ঘিকং নাতিমঞ্ঞেয্য, চীৰরং পানভোজনং.

২২৯. সুখঞ্চে জীৰিতুং ইচ্ছে, সামঞ্ঞস্মিং অপেক্খৰা;

অহি মূসিকসোব্ভংৰ, সেৰেথ সযনাসনং.

২৩০. সুখঞ্চে জীৰিতুং ইচ্ছে, সামঞ্ঞস্মিং অপেক্খৰা;

ইতরীতরেন তুস্সেয্য, একধম্মঞ্চ ভাৰযে’’তি. – তিস্সো গাথা অভাসি;

তত্থ সুখঞ্চে জীৰিতুং ইচ্ছে, সামঞ্ঞস্মিং অপেক্খৰাতি সামঞ্ঞস্মিং সমণভাৰে অপেক্খৰা সিক্খায তিব্বগারৰো হুত্ৰা সুখং জীৰিতুং ইচ্ছেয্য চে, অনেসনং পহায সামঞ্ঞসুখেন সচে জীৰিতুকামোতি অত্থো. সঙ্ঘিকং নাতিমঞ্ঞেয্য, চীৰরং পানভোজনন্তি সঙ্ঘতো আভতং চীৰরং আহারং ন অৰমঞ্ঞেয্য, সঙ্ঘস্স উপ্পজ্জনকলাভো নাম পরিসুদ্ধুপ্পাদো হোতীতি তং পরিভুঞ্জন্তস্স আজীৰপারিসুদ্ধিসম্ভৰেন সামঞ্ঞসুখং হত্থগতমেৰাতি অধিপ্পাযো. অহি মূসিকসোব্ভংৰাতি অহি ৰিয মূসিকায খতবিলং সেৰেথ সেৰেয্য সেনাসনং. যথা নাম সপ্পো সযমত্তনো আসযং অকত্ৰা মূসিকায অঞ্ঞেন ৰা কতে আসযে ৰসিত্ৰা যেন কামং পক্কমতি, এৰমেৰং ভিক্খু সযং সেনাসনকরণা সংকিলেসং অনাপজ্জিত্ৰা যত্থ কত্থচি ৰসিত্ৰা পক্কমেয্যাতি অত্থো.

ইদানি ৰুত্তে অৰুত্তে চ পচ্চযে যথালাভসন্তোসেনেৰ সামঞ্ঞসুখং হোতি, ন অঞ্ঞথাতি দস্সেন্তো আহ ‘‘ইতরীতরেন তুস্সেয্যা’’তি, যেন কেনচি হীনেন ৰা পণীতেন ৰা যথালদ্ধেন পচ্চযেন সন্তোসং আপজ্জেয্যাতি অত্থো. একধম্মন্তি অপ্পমাদভাৰং, তঞ্হি অনুযুঞ্জন্তস্স অনৰজ্জং সব্বং লোকিযসুখং লোকুত্তরসুখঞ্চ হত্থগতমেৰ হোতি. তেনাহ ভগৰা – ‘‘অপ্পমত্তো হি ঝাযন্তো, পপ্পোতি ৰিপুলং সুখ’’ন্তি (ম. নি. ২.৩৫২; ধ. প. ২৭).

ধনিযত্থেরগাথাৰণ্ণনা নিট্ঠিতা.

৫. মাতঙ্গপুত্তত্থেরগাথাৰণ্ণনা

অতিসীতন্তি আযস্মতো মাতঙ্গপুত্তত্থেরস্স গাথা. কা উপ্পত্তি? অযং কির পদুমুত্তরস্স ভগৰতো কালে হিমৰন্তসমীপে মহতো জাতস্সরস্স হেট্ঠা মহতি নাগভৰনে মহানুভাৰো নাগরাজা হুত্ৰা নিব্বত্তো একদিৰসং নাগভৰনতো নিক্খমিত্ৰা ৰিচরন্তো সত্থারং আকাসেন গচ্ছন্তং দিস্ৰা পসন্নমানসো অত্তনো সীসমণিনা পূজং অকাসি. সো তেন পুঞ্ঞকম্মেন দেৰমনুস্সেসু সংসরন্তো ইমস্মিং বুদ্ধুপ্পাদে কোসলরট্ঠে মাতঙ্গস্স নাম কুটুম্বিকস্স পুত্তো হুত্ৰা নিব্বত্তো মাতঙ্গপুত্তোত্ৰেৰ পঞ্ঞাযিত্থ. সো ৰিঞ্ঞুতং পত্তো অলসজাতিকো হুত্ৰা কিঞ্চি কম্মং অকরোন্তো ঞাতকেহি অঞ্ঞেহি চ গরহিতো ‘‘সুখজীৰিনো ইমে সমণা সক্যপুত্তিযা’’তি সুখজীৰিতং আকঙ্খন্তো ভিক্খূহি কতপরিচযো হুত্ৰা সত্থারং উপসঙ্কমিত্ৰা ধম্মং সুত্ৰা পটিলদ্ধসদ্ধো পব্বজিত্ৰা অঞ্ঞে ভিক্খূ ইদ্ধিমন্তে দিস্ৰা ইদ্ধিবলং পত্থেত্ৰা সত্থু সন্তিকে কম্মট্ঠানং গহেত্ৰা ভাৰনং অনুযুঞ্জন্তো ছল়ভিঞ্ঞো অহোসি. তেন ৰুত্তং অপদানে (অপ. থের ২.৪৮.৮-২৯) –

‘‘পদুমুত্তরো নাম জিনো, সব্বধম্মান পারগূ;