১২. উত্তরপালত্থেরগাথাৰণ্ণনা

পণ্ডিতং ৰত মং সন্তন্তি আযস্মতো উত্তরপালত্থেরস্স গাথা. কা উপ্পত্তি? অযম্পি পুরিমবুদ্ধেসু কতাধিকারো তত্থ তত্থ ভৰে পুঞ্ঞানি উপচিনন্তো ৰিপস্সিস্স ভগৰতো গমনমগ্গে সেতুং কারাপেসি. সো তেন পুঞ্ঞকম্মেন দেৰমনুস্সেসু সংসরন্তো ইমস্মিং বুদ্ধুপ্পাদে সাৰত্থিযং ব্রাহ্মণকুলে নিব্বত্তিত্ৰা উত্তরপালোতি লদ্ধনামো ৰযপ্পত্তো যমকপাটিহারিযং দিস্ৰা পটিলদ্ধসদ্ধো পব্বজিত্ৰা সমণধম্মং করোতি. তস্স একদিৰসং অযোনিসোমনসিকারৰসেন অনুভূতারম্মণং অনুস্সরন্তস্স কামরাগো উপ্পজ্জি. সো তাৰদেৰ সহোড্ঢং চোরং গণ্হন্তো ৰিয অত্তনো চিত্তং নিগ্গহেত্ৰা সংৰেগজাতো পটিপক্খমনসিকারেন কিলেসে ৰিক্খম্ভেত্ৰা ৰিপস্সনায কম্মং করোন্তো ভাৰনং উস্সুক্কাপেত্ৰা অরহত্তং পাপুণি. তেন ৰুত্তং অপদানে (অপ. থের ২.৪৭.১৬-২০) –

‘‘ৰিপস্সিনো ভগৰতো, চঙ্কমন্তস্স সম্মুখা;

পসন্নচিত্তো সুমনো, সেতুং কারাপযিং অহং.

‘‘একনৰুতিতো কপ্পে, যং সেতুং কারযিং অহং;

দুগ্গতিং নাভিজানামি, সেতুদানস্সিদং ফলং.

‘‘কিলেসা ঝাপিতা ময্হং…পে… কতং বুদ্ধস্স সাসন’’ন্তি.

অরহত্তং পন পত্ৰা অত্তনো পটিপত্তিং পচ্চৰেক্খিত্ৰা সীহনাদং নদন্তো –

২৫২. ‘‘পণ্ডিতং ৰত মং সন্তং, অলমত্থৰিচিন্তকং;

পঞ্চ কামগুণা লোকে, সম্মোহা পাতযিংসু মং.

২৫৩. ‘‘পক্খন্দো মারৰিসযে, দল়্হসল্লসমপ্পিতো;

অসক্খিং মচ্চুরাজস্স, অহং পাসা পমুচ্চিতুং.

২৫৪. ‘‘সব্বে কামা পহীনা মে, ভৰা সব্বে পদালিতা;

ৰিক্খীণো জাতিসংসারো, নত্থি দানি পুনব্ভৰো’’তি. –

তিস্সো গাথা অভাসি.

তত্থ পণ্ডিতং ৰত মং সন্তন্তি সুতচিন্তামযায পঞ্ঞায ৰসেন পঞ্ঞাসম্পন্নম্পি নাম মং সমানং. অলমত্থৰিচিন্তকন্তি অত্তনো চ পরেসঞ্চ অত্থং হিতং ৰিচিন্তেতুং সমত্থং, অলং ৰা পরিযত্তং অত্থস্স ৰিচিন্তকং, কিলেসৰিদ্ধংসনসমত্থং অত্থদস্সিনং ৰা, সব্বমেতং অত্তনো অন্তিমভৰিকতায থেরো ৰদতি. পঞ্চ কামগুণাতি রূপাদযো পঞ্চ কামকোট্ঠাসা. লোকেতি তেসং পৰত্তিট্ঠানদস্সনং. সম্মোহাতি সম্মোহনিমিত্তং অযোনিসোমনসিকারহেতু. সম্মোহাতি ৰা সম্মোহনা সম্মোহকরা. পাতযিংসূতি ধীরভাৰতো পাতেসুং, লোকতো ৰা উত্তরিতুকামং মং লোকে পাতযিংসূতি অত্থো.

পক্খন্দোতি অনুপৰিট্ঠো. মারৰিসযেতি কিলেসৰিসযে কিলেসমারস্স পৰত্তিট্ঠানে, তস্স ৰসং গতোতি অধিপ্পাযো. দেৰপুত্তমারস্স ৰা ইস্সরিযট্ঠানে তং অনুপৰিসিত্ৰা ঠিতো. দল়্হসল্লসমপ্পিতোতি দল়্হং থিরং, দল়্হেন ৰা সল্লেন সমপ্পিতো, রাগসল্লেন হদযং আহচ্চ ৰিদ্ধো. অসক্খিং মচ্চুরাজস্স, অহং পাসা পমুচ্চিতুন্তি অগ্গমগ্গসণ্ডাসেন রাগাদিসল্লং অনৰসেসতো উদ্ধরন্তোযেৰ রাগবন্ধনসঙ্খাতা মচ্চুরাজস্স পাসা অহং পরিমুচ্চিতুং অসক্খিং, ততো অত্তানং পমোচেসিং.

ততো এৰ চ সব্বে কামা পহীনা মে, ভৰা সব্বে পদালিতাতি ৰত্থারম্মণাদিভেদেন অনেকভেদভিন্না সব্বে কিলেসকামা অরিযমগ্গেন সমুচ্ছেদৰসেন মযা পহীনা. কিলেসকামেসু হি পহীনেসু ৰত্থুকামাপি পহীনা এৰ হোন্তি. তথা কামভৰকম্মভৰাদযো ভৰা সব্বে মগ্গঞাণাসিনা পদালিতা ৰিদ্ধংসিতা. কম্মভৰেসু হি পদালিতেসু উপপত্তিভৰা পদালিতা এৰ হোন্তি. এৰং কম্মভৰানং পদালিতত্তা এৰ ৰিক্খীণো জাতিসংসারো, নত্থি দানি পুনব্ভৰোতি. তস্সত্থো হেট্ঠা ৰুত্তোযেৰ. ইদমেৰ চ থেরস্স অঞ্ঞাব্যাকরণং অহোসি.

উত্তরপালত্থেরগাথাৰণ্ণনা নিট্ঠিতা.