৯. সন্ধিতত্থেরগাথাৰণ্ণনা

অস্সত্থে হরিতোভাসেতি আযস্মতো সন্ধিতত্থেরস্স গাথা. কা উপ্পত্তি? অযম্পি পুরিমবুদ্ধেসু কতাধিকারো তত্থ তত্থ ভৰে পুঞ্ঞানি উপচিনন্তো ইতো একতিংসে কপ্পে সিখিস্স ভগৰতো কালে একো গোপালকো অহোসি. সো সত্থরি পরিনিব্বুতে অঞ্ঞতরং থেরং উপসঙ্কমিত্ৰা তস্স সন্তিকে বুদ্ধগুণপটিসংযুত্তং ধম্মং সুত্ৰা পসন্নমানসো ‘‘কুহিং ভগৰা’’তি পুচ্ছিত্ৰা পরিনিব্বুতভাৰং সুত্ৰা ‘‘এৰং মহানুভাৰা বুদ্ধাপি নাম অনিচ্চতাৰসং গচ্ছন্তি, অহো সঙ্খারা অদ্ধুৰা’’তি অনিচ্চসঞ্ঞং পটিলভি. তং থেরো বোধিপূজায উস্সাহেসি. সো কালেন কালং বোধিরুক্খসমীপং গন্ত্ৰা ৰিপস্সনং পট্ঠপেত্ৰা বুদ্ধগুণে অনুস্সরন্তো বোধিং ৰন্দতি. সো তেন পুঞ্ঞকম্মেন দেৰমনুস্সেসু সংসরন্তো ইমস্মিং বুদ্ধুপ্পাদে কোসলরট্ঠে ইব্ভকুলে নিব্বত্তিত্ৰা সন্ধিতোতি লদ্ধনামো ৰযপ্পত্তো অনিচ্চতাপটিসংযুত্তং ধম্মকথং সুত্ৰা সংৰেগজাতো পব্বজিত্ৰা ৰিপস্সনং পট্ঠপেত্ৰা ঞাণস্স পরিপাকং গতত্তা নচিরস্সেৰ ছল়ভিঞ্ঞো অহোসি. সো অত্তনো পুব্বেনিৰাসং অনুস্সরন্তো সিখিস্স ভগৰতো কালে বোধিৰন্দনং বুদ্ধানুস্সতিং অনিচ্চসঞ্ঞাপটিলাভঞ্চ অনুস্সরিত্ৰা তদুপনিস্সযেন অত্তনো ৰিসেসাধিগমং পকাসেন্তো –

২১৭. ‘‘অস্সত্থে হরিতোভাসে, সংৰিরূল়্হম্হি পাদপে;

একং বুদ্ধগতং সঞ্ঞং, অলভিত্থং পতিস্সতো.

২১৮. ‘‘একতিংসে ইতো কপ্পে, যং সঞ্ঞমলভিং তদা;

তস্সা সঞ্ঞায ৰাহসা, পত্তো মে আসৰক্খযো’’তি. –

দ্ৰে গাথা অভাসি.

তত্থ অস্সত্থেতি অস্সত্থট্ঠানীযে, য্ৰাযং এতরহি অম্হাকং ভগৰতো বোধিরুক্খো অস্সত্থো, এতস্স ঠানে তদা সিখিস্স ভগৰতো বোধিরুক্খো পুণ্ডরীকো ঠিতোতি সো অস্সত্থট্ঠানীযতায ‘‘অস্সত্থে’’তি ৰুত্তং. সত্তানং অস্সাসজননতো ৰা. অপরে পন ‘‘অস্সত্থরুক্খমূলে নিসীদিত্ৰা তদা বুদ্ধানুস্সতিযা ভাৰিতত্তা থেরো ‘অস্সত্থে’তি অৰোচা’’তি ৰদন্তি. হরিতোভাসেতি হরিতেহি সারমণিৰণ্ণেহি ওভাসমানে. সংৰিরূল়্হম্হীতি সুট্ঠু ৰিরূল়্হে সুপ্পতিট্ঠিতে, সুঘননিচিতপত্তপলাসপল্লৰেহি ৰিরূল়্হসঞ্ছন্নেতি চ ৰদন্তি. পাদপেতি রুক্খে. একং বুদ্ধগতং সঞ্ঞং, অলভিত্থং পতিস্সতোতি বুদ্ধারম্মণং আরম্মণস্স একজাতিযত্তা একং ‘‘ইতিপি সো ভগৰা’’তিআদিনযপ্পৰত্তং বুদ্ধানুস্সতিসহগতং সঞ্ঞং বুদ্ধগুণানং পতিপতিসরণতো পতিস্সতো হুত্ৰা অলভিং.

কদা পন সা সঞ্ঞা লদ্ধা, কীৰতায সিদ্ধাতি আহ ‘‘একতিংসে ইতো কপ্পে’’তিআদি. ইতো ভদ্দকপ্পতো উদ্ধং আরোহনৰসেন একতিংসে কপ্পে. যং সঞ্ঞন্তি যং বুদ্ধানুস্সতিসহগতং সঞ্ঞং, যং ৰা বুদ্ধানং অনিচ্চতং দিস্ৰা তদনুসারেন সব্বাসঙ্খারেসু তদা অনিচ্চসঞ্ঞং অলভিং. তস্সা সঞ্ঞায ৰাহসাতি তস্সা যথাৰুত্তায সঞ্ঞায কারণভাৰেন তং উপনিস্সযং কত্ৰা. পত্তো মে আসৰক্খযোতি ইদানি মযা আসৰানং খযো নিরোধো অধিগতোতি ইমাযেৰ চ ইমস্স থেরস্স অপদানগাথাপি. যথাহ (অপ. থের ১.২২.২৭-৩০) –

‘‘অস্সত্থে হরিতোভাসে…পে… পত্তো মে আসৰক্খযো.

‘‘ইতো তেরসকপ্পম্হি, ধনিট্ঠো নাম খত্তিযো;

সত্তরতনসম্পন্নো, চক্কৰত্তী মহব্বলো.

‘‘কিলেসা ঝাপিতা ময্হং…পে… কতং বুদ্ধস্স সাসন’’ন্তি.

সন্ধিতত্থেরগাথাৰণ্ণনা নিট্ঠিতা.

পঞ্চমৰগ্গৰণ্ণনা নিট্ঠিতা.

নিট্ঠিতা চ দুকনিপাতৰণ্ণনা.