৮. ৰজ্জিতত্থেরগাথাৰণ্ণনা

সংসরং দীঘমদ্ধানন্তি আযস্মতো ৰজ্জিতত্থেরস্স গাথা. কা উপ্পত্তি? অযম্পি পুরিমবুদ্ধেসু কতাধিকারো তত্থ তত্থ ভৰে পুঞ্ঞানি উপচিনন্তো ইতো পঞ্চসট্ঠিমে কপ্পে একস্মিং পচ্চন্তগামে নিব্বত্তিত্ৰা ৰিঞ্ঞুতং পত্তো ৰনচরকো হুত্ৰা ৰিচরন্তো একদিৰসং উপসন্তং নাম পচ্চেকবুদ্ধং পব্বতগুহাযং ৰিহরন্তং অদ্দস. সো তস্স উপসমং দিস্ৰা পসন্নমানসো চম্পকপুপ্ফেন পূজং অকাসি. সো তেন পুঞ্ঞকম্মেন দেৰমনুস্সেসু সংসরন্তো ইমস্মিং বুদ্ধুপ্পাদে কোসলরট্ঠে ইব্ভকুলে নিব্বত্তো জাতদিৰসতো পট্ঠায মাতুগামহত্থং গতো রোদতি. ব্রহ্মলোকতো কির চৰিত্ৰা ইধাগতো যস্মা মাতুগামসম্ফস্সং ন সহতি, তস্মা মাতুগামসম্ফস্সৰজ্জনতো ৰজ্জিতোত্ৰেৰ নামং জাতং. সো ৰযপ্পত্তো সত্থু যমকপাটিহারিযং দিস্ৰা পটিলদ্ধসদ্ধো পব্বজিত্ৰা ৰিপস্সনং পট্ঠপেত্ৰা তদহেৰ ছল়ভিঞ্ঞো অহোসি. তেন ৰুত্তং অপদানে (অপ. থের ১.৩৭.২৭-৩০) –

‘‘উপসন্তো চ সম্বুদ্ধো, ৰসতী পব্বতন্তরে;

একচম্পকমাদায, উপগচ্ছিং নরুত্তমং.

‘‘পসন্নচিত্তো সুমনো, পচ্চেকমুনিমুত্তমং;

উভো হত্থেহি পগ্গয্হ, পূজযিং অপরাজিতং.

‘‘পঞ্চসট্ঠিম্হিতো কপ্পে, যং পুপ্ফমভিপূজযিং;

দুগ্গতিং নাভিজানামি, বুদ্ধপূজাযিদং ফলং.

‘‘কিলেসা ঝাপিতা ময্হং…পে… কতং বুদ্ধস্স সাসন’’ন্তি.

ছল়ভিঞ্ঞো পন হুত্ৰা অত্তনো পুব্বেনিৰাসং অনুস্সরিত্ৰা ধম্মসংৰেগেন –

২১৫. ‘‘সংসরং দীঘমদ্ধানং, গতীসু পরিৰত্তিসং;

অপস্সং অরিযসচ্চানি, অন্ধভূতো পুথুজ্জনো.

২১৬. ‘‘তস্স মে অপ্পমত্তস্স, সংসারা ৰিনল়ীকতা;

সব্বা গতী সমুচ্ছিন্না, নত্থি দানি পুনব্ভৰো’’তি. – দ্ৰে গাথা অভাসি;

তত্থ সংসরন্তি সংসরন্তো, তস্মিং তস্মিং ভৰে আদাননিক্খেপৰসেন অপরাপরং সন্ধাৰন্তো. দীঘমদ্ধানন্তি চিরকালং অনাদিমতি সংসারে অপরিমাণকালং. গতীসূতি সুকতদুক্কটানং কম্মানং ৰসেন সুগতিদুগ্গতীসু. পরিৰত্তিসন্তি ঘটীযন্তং ৰিয পরিব্ভমন্তো চৰনুপপজ্জনৰসেন অপরাপরং পরিৰত্তিং. তস্স পন পরিৰত্তনস্স কারণমাহ ‘‘অপস্সং অরিযসচ্চানি, অন্ধভূতো পুথুজ্জনো’’তি. দুক্খাদীনি চত্তারি অরিযসচ্চানি ঞাণচক্খুনা অপস্সন্তো অপ্পটিৰিজ্ঝন্তো, ততো এৰ অৰিজ্জন্ধতায অন্ধভূতো পুথূনং জননাদীহি কারণেহি পুথুজ্জনো হোন্তো গতীসু পরিৰত্তিসন্তি যোজনা, তেনেৰাহ ভগৰা –

‘‘চতুন্নং, ভিক্খৰে, অরিযসচ্চানং অননুবোধা অপ্পটিৰেধা এৰমিদং দীঘমদ্ধানং সন্ধাৰিতং সংসরিতং মমঞ্চেৰ তুম্হাকঞ্চা’’তি (মহাৰ. ২৮৭; দী. নি. ২.১৫৫; সং. নি. ৫.১০৯১; নেত্তি. ১১৪).

তস্স ময্হং ৰুত্তনযেন পুব্বে পুথুজ্জনস্সেৰ সতো ইদানি সত্থারা দিন্ননযেন অপ্পমত্তস্স অপ্পমাদপটিপত্তিযা সমথৰিপস্সনাভাৰনং মত্থকং পাপেত্ৰা ঠিতস্স. সংসারা ৰিনল়ীকতাতি সংসরন্তি সত্তা এতেহীতি ‘‘সংসারা’’তি লদ্ধনামা কম্মকিলেসা অগ্গমগ্গেন সমুচ্ছিন্নত্তা ৰিগতনল়া নিম্মূলা কতা. সব্বা গতী সমুচ্ছিন্নাতি এৰং কম্মকিলেসৰট্টানং ৰিনল়ীকতত্তা নিরযাদিকা সব্বাপি গতিযো সম্মদেৰ উচ্ছিন্না ৰিদ্ধংসিতা, ততো এৰ নত্থি দানি আযতিং পুনব্ভৰোতি ইদমেৰ চ থেরস্স অঞ্ঞাব্যাকরণং অহোসীতি.

ৰজ্জিতত্থেরগাথাৰণ্ণনা নিট্ঠিতা.