৩. ব্রহ্মালিত্থেরগাথাৰণ্ণনা

কস্সিন্দ্রিযানি সমথঙ্গতানীতি আযস্মতো ব্রহ্মালিত্থেরস্স গাথা. কা উপ্পত্তি? অযম্পি পুরিমবুদ্ধেসু কতাধিকারো তত্থ তত্থ ভৰে ৰিৰট্টূপনিস্সযং কুসলং উপচিনন্তো ৰিপস্সিস্স ভগৰতো কালে কুলগেহে নিব্বত্তিত্ৰা ৰিঞ্ঞুতং পত্তো একদিৰসং সত্থারং পিণ্ডায চরন্তং দিস্ৰা পসন্নমানসো ৰন্দিত্ৰা পাদফলং অদাসি. সত্থা অনুমোদনং ৰত্ৰা পক্কামি. সো তেন পুঞ্ঞকম্মেন দেৰমনুস্সেসু সংসরন্তো ইমস্মিং বুদ্ধুপ্পাদে কোসলরট্ঠে ব্রাহ্মণকুলে নিব্বত্তিত্ৰা ব্রহ্মালীতি লদ্ধনামো ৰিঞ্ঞুতং পত্তো হেতুসম্পত্তিযা চোদিযমানো সংসারে সঞ্জাতসংৰেগো তাদিসেন কল্যাণমিত্তসন্নিস্সযেন বুদ্ধসাসনে পব্বজিত্ৰা পতিরূপকম্মট্ঠানং গহেত্ৰা অরঞ্ঞে ৰিহরন্তো ঞাণস্স পরিপাকগতত্তা নচিরস্সেৰ ৰিপস্সনং ৰড্ঢেত্ৰা ছল়ভিঞ্ঞো অহোসি. তেন ৰুত্তং অপদানে (অপ. থের ২.৫১.৬৩-৬৭) –

‘‘সুৰণ্ণৰণ্ণং সম্বুদ্ধং, আহুতীনং পটিগ্গহং;

রথিযং পটিপজ্জন্তং, পাদফলং অদাসহং.

‘‘একনৰুতিতো কপ্পে, যং ফলং অদদিং তদা;

দুগ্গতিং নাভিজানামি, ফলদানস্সিদং ফলং.

‘‘কিলেসা ঝাপিতা ময্হং…পে… কতং বুদ্ধস্স সাসন’’ন্তি.

ছল়ভিঞ্ঞো পন হুত্ৰা মগ্গসুখেন ফলসুখেন ৰীতিনামেন্তো একদিৰসং পধানপরিগ্গাহকেন থেরেন তস্মিং অরঞ্ঞাযতনে ভিক্খূ উদ্দিস্স ৰুত্তং পধানানুযোগং পরিগ্গণ্হন্তো –

২০৫. ‘‘কস্সিন্দ্রিযানি সমথঙ্গতানি, অস্সা যথা সারথিনা সুদন্তা;

পহীনমানস্স অনাসৰস্স, দেৰাপি কস্স পিহযন্তি তাদিনো.

২০৬. ‘‘ময্হিন্দ্রিযানি সমথঙ্গতানি, অস্সা যথা সারথিনা সুদন্তা;

পহীনমানস্স অনাসৰস্স, দেৰাপি ময্হং পিহযন্তি তাদিনো’’তি. –

গাথাদ্ৰযং অভাসি.

তস্সত্থো – ইমস্মিং অরঞ্ঞাযতনে ৰসন্তেসু ভিক্খূসু কস্স ভিক্খুনো থেরস্স ৰা নৰস্স ৰা মজ্ঝিমস্স ৰা ছেকেন সারথিনা সুদন্তা অস্সা ৰিয মনচ্ছট্ঠানি ইন্দ্রিযানি সমথং দন্তভাৰং নিব্বিসেৰনভাৰং গতানি. কস্স নৰৰিধম্পি মানং পহায ঠিতত্তা পহীনমানস্স চতুন্নম্পি আসৰানং অভাৰেন অনাসৰস্স ইট্ঠাদীসু তাদিলক্খণপ্পত্তিযা তাদিনো দেৰাপি পিহযন্তি মনুস্সাপি সম্মাপটিপত্তিদস্সনাদিনা চ আদরেন পত্থেন্তীতি.

তত্থ চ গাথাযং পুরিমড্ঢেন অনাগামিমগ্গাধিগমো পুট্ঠো, অনাগামিনোপি হি ইন্দ্রিযানি পহীনকামরাগব্যাপাদতায সমথং নিব্বিসেৰনতং গতানি হোন্তি. ইতরেন অরহত্তমগ্গপটিলাভো, অরহা হি ‘‘পহীনমানো অনাসৰো তাদী’’তি চ ৰুচ্চতি.

অথাযস্মা ব্রহ্মালি পধানপরিগ্গাহকেন ৰুত্তং ‘‘কস্সিন্দ্রিযানী’’তি গাথং পচ্চনুভাসি. তদত্থং অত্তূপনাযিকৰসেন ৰিস্সজ্জেন্তো ‘‘ময্হিন্দ্রিযানী’’তিআদিকায দুতিযগাথায অঞ্ঞং ব্যাকাসি, তত্থ ময্হিন্দ্রিযানীতি মম চক্খাদীনি ইন্দ্রিযানি. সেসং ৰুত্তনযমেৰ.

ব্রহ্মালিত্থেরগাথাৰণ্ণনা নিট্ঠিতা.