২. ধম্মপালত্থেরগাথাৰণ্ণনা

যো হৰে দহরো ভিক্খূতি আযস্মতো ধম্মপালত্থেরস্স গাথা. কা উপ্পত্তি? অযম্পি পুরিমবুদ্ধেসু কতাধিকারো তত্থ তত্থ ভৰে পুঞ্ঞানি উপচিনন্তো অত্থদস্সিস্স ভগৰতো কালে কুলগেহে নিব্বত্তিত্ৰা ৰিঞ্ঞুতং পত্তো কেনচিদেৰ করণীযেন ৰনন্তং উপগতো সত্থারং দিস্ৰা পসন্নমানসো পিলক্খফলমদাসি. সো তেন পুঞ্ঞকম্মেন দেৰমনুস্সেসু সংসরন্তো ইমস্মিং বুদ্ধুপ্পাদে সত্থরি পরিনিব্বুতে অৰন্তিরট্ঠে ব্রাহ্মণকুলে নিব্বত্তিত্ৰা ধম্মপালোতি লদ্ধনামো ৰযপ্পত্তো তক্কসিলং গন্ত্ৰা সিপ্পং উগ্গহেত্ৰা পটিনিৰত্তেন্তো অন্তরামগ্গে একস্মিং ৰিহারে অঞ্ঞতরং থেরং দিস্ৰা তস্স সন্তিকে ধম্মং সুত্ৰা পটিলদ্ধসদ্ধো পব্বজিত্ৰা ৰিপস্সনং ৰড্ঢেত্ৰা ছল়ভিঞ্ঞো অহোসি. তেন ৰুত্তং অপদানে (অপ. থের ১.৩৯.২১-২৫) –

‘‘ৰনন্তরে বুদ্ধং দিস্ৰা, অত্থদস্সিং মহাযসং;

পসন্নচিত্তো সুমনো, পিলক্খস্সাদদিং ফলং.

‘‘অট্ঠারসে কপ্পসতে, যং ফলমদদিং তদা;

দুগ্গতিং নাভিজানামি, ফলদানস্সিদং ফলং.

‘‘কিলেসা ঝাপিতা ময্হং…পে… কতং বুদ্ধস্স সাসন’’ন্তি.

ছল়ভিঞ্ঞো পন হুত্ৰা সমাপত্তিসুখেন ৰীতিনামেন্তো একদিৰসং তস্মিং ৰিহারে দ্ৰে সামণেরে রুক্খগ্গে পুপ্ফানি ওচিনন্তে আরূল়্হসাখায ভগ্গায পতন্তে দিস্ৰা থেরো ইদ্ধানুভাৰেন হত্থেন গহেত্ৰা অরোগেযেৰ ভূমিযং ঠপেত্ৰা তেসং সামণেরানং ধম্মং দেসেন্তো –

২০৩. ‘‘যো হৰে দহরো ভিক্খু, যুঞ্জতি বুদ্ধসাসনে;

জাগরো স হি সুত্তেসু, অমোঘং তস্স জীৰিতং.

২০৪. ‘‘তস্মা সদ্ধঞ্চ সীলঞ্চ, পসাদং ধম্মদস্সনং;

অনুযুঞ্জেথ মেধাৰী, সরং বুদ্ধান সাসন’’ন্তি. – ইমা দ্ৰে গাথা অভাসি;

তত্থ যোতি অনিযমৰচনং. হৰেতি দল়্হত্থে নিপাতো. দহরোতি তরুণো. ভিক্খতীতি ভিক্খু. যুঞ্জতীতি ঘটতি ৰাযমতি. জাগরোতি জাগরণধম্মসমন্নাগতো. সুত্তেসূতি সুপন্তেসু. ইদং ৰুত্তং হোতি যো ভিক্খু দহরোৰ সমানো তরুণো ‘‘তথাহং পচ্ছা ৰুড্ঢকালে জানিস্সামী’’তি অচিন্তেত্ৰা বুদ্ধানং সাসনে অপ্পমাদপটিপত্তিযং যুঞ্জতি সমথৰিপস্সনাভাৰনায যোগং করোতি, সো সুত্তেসু অৰিজ্জানিদ্দায সুত্তেসু পমত্তেসু সদ্ধাদিজাগরধম্মসমন্নাগমেন জাগরো, ততো এৰ অত্তহিতপরহিতপারিপূরিযা অমোঘং অৰঞ্ঝং তস্স জীৰিতং, যস্মা চ এতদেৰং, তস্মা সদ্ধঞ্চ ‘‘অত্থি কম্মং অত্থি কম্মৰিপাকো’’তিআদিনযপ্পৰত্তং কম্মফলসদ্ধঞ্চ, সদ্ধূপনিবন্ধত্তা সীলস্স তদুপনিস্সযং চতুপারিসুদ্ধিসীলঞ্চ, ‘‘সম্মাসম্বুদ্ধো ভগৰা, স্ৰাখাতো ধম্মো, সুপ্পটিপন্নো সঙ্ঘো’’তি এৰং পৰত্তরতনত্তযপ্পসাদঞ্চ, ৰিপস্সনাপঞ্ঞাসহিতায মগ্গপঞ্ঞায পরিঞ্ঞাদিৰসেন চতুসচ্চধম্মদস্সনঞ্চ মেধাৰী ধম্মোজপঞ্ঞায সমন্নাগতো ভিক্খু বুদ্ধানং সাসনং ওৰাদং অনুসিট্ঠিং অনুস্সরন্তো আদিত্তম্পি অত্তনো সীসং অজ্ঝুপেক্খিত্ৰা অনুযুঞ্জেথ, তত্থ অনুযোগং আতপ্পং করেয্যাতি অত্থো.

ধম্মপালত্থেরগাথাৰণ্ণনা নিট্ঠিতা.